༄། སྲིད་སྐྱོང་གི་ཁང་རིན་ཨ་སྒོར་ཉིས་འབུམ་ཉིས་ཁྲི་བདུན་སྟོང་གི་རྙོག་དྲ།

 

 

ཤར་ཕྱོགས་ཁུག་རྟ།

 

དེ་སྔ་བློ་བཟང་སེང་གེས་ཨ་རིར་ཁང་པ་ཉོ་སྐབས་སྤྱི་མཚུངས་ལྟར་དངུལ་ཁང་ལ་པེད་ཤག་གཡར་ནས་ཉོས་ཡོད་ལ།

དེ་ལྟར་རྩིས་རྒྱབ་ན་ཕལ་ཆེར་ལོ་སུམ་བཅུ་མ་ཟིན་ཙམ་ཞིག་འགོར་གྱི་ཡོད།

སྐབས་དེར་ཁོང་གི་དངུལ་བྱང་ཁག་གི་སྟེང་ཁང་གླ་མཉམ་སྤྲོད་བྱ་རྒྱུའི་དངུལ་འབོར་མེད་པའང་ར་འཕྲོད་ཡོད།

འོན་ཀྱང་། ཁོང་ལ་བཀའ་བློན་ཁྲི་པ་ཐོབ་ནས་བདུན་ཕྲག་གཅིག་ཙམ་འགོར་མ་ཐག ༢༠༡༡ ཟླ ༧

ཚེས ༢༩ ཉིན་ཁོང་གིས་ཁང་གླའི་བུ་ལོན་ཨ་སྒོར ༢༢༧༠༠༠ ཆ་ཚང་དུས་གཅིག་ཏུ་སྤྲད་འདུག

ད་ལྟ་རྒྱལ་སྤྱིའི་གསར་ལམ་ཁག་ཏུ་དེའི་ཐད་དྲི་བ་ག་རེ་གཏོང་གི་ཡོད་པ་རེད་དམ་ཞེ་ན།

ཁོང་ལ་དེ་སྔར་དངུལ་བྱང་སྟེང་ཁང་གླའི་དངུལ་འབོར་མེད་པ་གསལ་བོ་ཡིན་པ་གཞིར་བྱས།

གལ་སྲིད་དངུལ་ཁང་ནང་མེད་པའི་དངུལ་གྲངས་འབོར་ཆེན་ཞིག་གློ་བུར་ཐོབ་ཀྱང་།

ཡང་ན་གཞན་གྱིས་སྤྲད་ཀྱང་།

ཨ་རིའི་དངུལ་ཁང་ཁག་གིས་དངུལ་རྐྱང་རྩིས་བཞེས་མི་གནང་བ་མི་ཆོག་པ།

དེ་ལྟར་གནང་ན་པེད་ཤག་ནག་པོ་ཆགས་ཏེ་ཁྲིམས་སྒྲིག་དང་འགལ་ཡོད་པས་རེད།

དེའི་རྐྱེན་བློ་བཟང་སེང་གེ་ལགས་ཀྱིས་སུ་ཞིག་གི་ཅེ་ཁི་ Chueqe

རྒྱུད་ཁང་གླ་སྤྲད་མིན་དེ་གསལ་བོ་བཟོ་དགོས་ཞེས་མི་མང་པོས་དྲི་བ་གཏོང་གི་ཡོད་པ་རེད།

 

 

སྤྱིར་ཝ་ཞིན་གྲོན་པོ་སི་ཏྲི་ལྟ་བུའི་རྒྱལ་སྤྱིའི་སྟེང་ཆེ་མཐོང་དང་སྐད་གྲགས་ཡོད་པའི་ཚགས་ཤོག་སྟེང་།

བོད་ཀྱི་སྲིད་སྐྱོང་ལ་པེད་ཤག་དང་འབྲེལ་བའི་དྲི་བ་ཞིག་ཡོང་བ་ཙམ་གྱིས་བོད་མི་རིགས་ཀྱི་ཆེ་མཐོང་ལ་ཅི་ཙམ་ཕན་གནོད་འབྲེལ་ཡོད་པ་ཚང་མས་མཁྱེན་གསལ་རེད།

དྲི་བ་བཏང་བ་དེར་ཁོང་གི་གྲོགས་པོ་དབུ་དཀར་ཚང་ཀེ་རྡོར།

ད་ལྟའི་ཨ་རིའི་དོན་གཅོད་དུ་བྱས་རྗེས་དང་གཞུང་ཞབས་ཀྱི་རྒྱུད་རིམ་གང་ཡང་མེད་པར་བསྐོ་བཞག་བྱས་པ་དེས་ལན་འདེབས་ཤིག་བྱས་ཀྱང་།

ཨ་རིའི་བུད་མེད་མོ་ནེ་ཧན་ Maura Moynihan

གྱིས་དེ་བས་ཀྱང་ལན་འདེབས་དྲི་བ་ཚ་ནན་དུ་སྤེལ་བས།

ཁོང་གི་ཁང་པའི་དངུལ་དེ་ཡང་སྙིང་སུ་ཞིག་གིས་སྤྲད་མིན་ནི་ཧ་ཅང་དོགས་གཞི་ཅན་ཞིག་ཆགས་ཡོད་པ་རེད།

 

 

དེ་ཧ་ཅང་དོགས་གཞི་ཅན་ཞིག་ཆགས་དགོས་དོན་ནི།

བློ་བཟང་སེང་གེ་དེ་སྔར་བཀའ་བློན་ཁྲི་པར་ལངས་སྐབས་ཀྱི་འོས་བསྡུའི་ཁྱབ་བསྒྲགས་ཀྱི་འགྲོ་སོང་ཡོང་ཁུངས་ཐད།

དེ་རིང་སང་ཉིན་ཨ་རིའི་གཞུང་གིས་རྒྱ་ནག་གི་སོ་པའི་དོགས་གཞིའི་འོག་བཀག་ཉར་འདྲི་རྩད་བྱེད་བཞིན་པའི་རྒྱ་རིགས་ཚོང་པ་བྷན་དང་

Banja min wey འབྲེལ་བ་ཡོད་པའི་དོགས་སློང་བྱས་འདུག

རྒྱ་རིགས་བྷན་གྱི་འབོད་སྐུལ་འོག་བློ་བཟང་སེང་གེ་དེ་སྔར་རྒྱ་ནག་ཏུ་ཚོགས་འདུར་འགྲོ་སྐབས།

འགྲོ་རྒྱུར་མཐུན་འགྱུར་ཞུ་མཁན་གྱི་འབྲེལ་ཡོད་མི་སྣ་ཡོངས་རྫོགས་རྒྱ་རིགས་བུད་མེད་རྐྱང་རྐྱང་ཆགས་ཡོད་པ་དང་།

བློ་བཟང་སེང་གེ་གདན་འདྲེན་ཞུ་མཁན་ Ms.Huxiao jiang་

ནི་རྒྱ་ནག་གི་བདེ་སྲུང་དང་གསང་བའི་ལས་ཁུངས་ཀྱི་ལས་བྱེད་མི་སྣ་ཞིག་ཡིན་པའང་གསལ་བོ་བཟོས་པ་རེད།

དེའི་རྐྱེན་གྱིས་ཨ་རིའི་བུད་མེད་རྩོམ་པ་པོ་ Maura Moynihan

ལགས་ཀྱིས་སྲིད་སྐྱོང་གི་ཁང་རིན་ཡོང་ཁུངས་མི་སྣ་དེ་དག་དང་འབྲེལ་བ་ཡོད་པའི་དོགས་སློང་གནང་ཡོད་ལ།

དེ་རྣམས་གསལ་བོ་བཟོ་ཕྱིར་མུ་མཐུད་ལྕམ་སྐུ་མོ་ནེ་ཧན་གྱིས་དྲི་བ་བཏང་དང་གཏོང་བཞིན་པ་རེད།

 

 

ཨིན་ཡིག་གི་ལམ་ནས་ཕྱི་རྒྱལ་མི་སྣས་བོད་ཀྱི་དབུ་ཁྲིད་སྲིད་སྐྱོང་ལས་ཐོག་བློ་བཟང་སེང་གེས་ཁང་རིན་ཡོང་ཁུངས་རྩད་གཅོད་དོགས་འདྲི་བྱེད་བཞིན་པ་འདི་རིགས།

བོད་ཕྱི་ནང་གི་སྤྱི་ཚོགས་སུ་གནས་ཚུལ་གསལ་བོ་ཞིག་ཆགས་ཀྱི་མེད་ཁར།

སྲིད་སྐྱོང་ལས་ཐོག་པས་ཀྱང་གསལ་བཤད་གསལ་བོ་ཞིག་ད་དུང་མ་གནང་བས།

གནད་དོན་འདི་རྒྱལ་སྤྱིའི་སྒང་བོད་ཀྱི་ཆེ་མཐོང་དང་༧གོང་ས་མཆོག་གི་མཚན་ཤོས་འགྲོ་གཞིར་གྱུར་དང་འགྱུར་བཞིན་པ་མ་ཟད།

བོད་མི་ནང་ཁུལ་གྱི་ཆིག་སྒྲིལ་ལའང་གནོད་པ་ཚབས་ཆེན་ཐེབས་གཞིར་གྱུར་དང་འགྱུར་བཞིན་པ་རེད།

 

 

དེ་ཅི་ལྟར་ཞེ་ན།

རྒྱལ་སྤྱིའི་གསར་ལམ་གྲགས་ཅན་ཝ་ཞིན་གྲོན་དུས་བབ་རྒྱུད་སྲིད་སྐྱོང་མཆོག་གི་ཁང་རིན་ཡོང་ཁུངས་སྐོར་གྱི་དོགས་གཞི་རྣམས་མཐོང་སྐབས།

བོད་ལ་ཤ་ཚ་རྒྱབ་སྐྱོར་ཡོད་པའི་ཕྱི་རྒྱལ་བའི་ཚོགས་སྡེ་དང་མི་སྒེར་མང་པོ་ཞིག་གིས་ཐུགས་ཁྲལ་གནང་བཞིན་པ་གསལ་བོ་རེད།

ངེད་ལ་ཨ་རི་བ་གྲོགས་པོ་བོད་དོན་ལ་ཤ་ཚ་ཞིང་དབུ་མའི་ལམ་ལ་བསྟོད་བསྔགས་གནང་མཁན་ཞིག་ཡོད་པ་དེས་ང་ལ་གསུང་རྒྱུར།

”རྙོག་དྲ་འདི་པེད་ཤག་དང་འབྲེལ་སྟབས་མང་ཉུང་ལ་མ་ལྟོས་པར་གནད་དོན་བཙོག་པའི་རིགས་རེད།

དེ་ཡང་ཁྱོད་ཚོའི་ཆབ་སྲིད་དབུ་ཁྲིད་ལས་ཐོག་དང་འབྲེལ་བ་ཡིན་སྟབས།

ངེས་པར་དུ་གཙང་མ་བཟོ་དགོས་པ་རེད།

འདིས་རླབས་ཆེན་༧ཏཱ་ལའི་བླ་མ་མཆོག་གི་ཞབས་འདྲེན་ངེས་རེད་ལ།

རོགས་ཚོགས་ཁག་ལའང་བསམ་ཕྱོགས་ཡོང་མི་སྲིད་པ་མ་རེད།

ཁྱོད་ཚོ་མང་གཙོ་ཡིན་སྟབས་དྲི་བ་བཏང་ནས་གསལ་བོ་བཟོ་དགོས་པ་རེད་ཟེར།’’

གོང་གི་བཀའ་མོལ་འདི་ནི་དཔེ་མཚོན་གཅིག་རེད།

གཙོ་བོ་པེད་ཤག་གི་མང་ཉུང་མ་རེད།

པེད་ཤག་དང་འབྲེལ་བའི་རྙོག་གླེང་ཞིག་རྒྱལ་སྤྱིའི་གསར་ལམ་ཆེ་ཁག་ཏུ་ཐོན་ན་བོད་མི་རིགས་སྤྱིའི་ལར་རྒྱར་གནོད་ཀྱི་ཡོད་པ་ཚང་མས་གསུངས་བཞིན་པ་དེ་ག་རང་རེད།

 

 

དེ་བཞིན་ནང་ཁུལ་ཆིག་སྒྲིལ་ལ་ཅི་ལྟར་གནོད་དམ་ཞེ་ན།

ཁ་ཤས་ཀྱིས་རྙོག་དྲ་འདི་མི་ཅིག་གིས་བཟོས་པ་རེད། ཉིག་གིས་བཟོས་པ་རེད།

ཡང་གནས་ཚུལ་ཆ་ཚང་མགོ་མི་འཚོས་མཁན་ཚོས་འོས་བསྡུའི་སྐབས་གཞི་མེད་རྙོག་དྲ་སློང་གི་ཡོད་པ་རེད་ཅེས་བསྒྲགས་ཏེ།

རྒྱུ་མཚན་མེད་པར་གནད་དོན་འདི་ཆོལ་ཁའི་ཕྱོགས་སུ་འཐེན་འགྲོ་མཁན།

བཙན་གྱིས་སྦྱོར་མཁན། མ་ཤེས་པར་སྦྱོར་མཁན།

བསམ་བཞིན་ཁྱད་གསོད་ཀྱིས་སྦྱོར་མཁན་མང་པོ་ཞིག་ཡོང་གི་ཡོད་པ་མཐའ་དག

ང་ཚོས་མཐོང་གསལ་ཡིན་སྟབས།

གནས་ཚུལ་འདི་གཙང་མ་མ་ཆགས་པར་བསམ་ཕྱོགས་དེ་དག་གཙང་མ་མི་ཆགས་པ།

གཟུར་གནས་མཁས་པ་སུ་ལ་དྲིས་ཀྱང་ཧ་ཅང་གསལ་བོ་རེད།

ངས་བསམས་པར།་གནད་དོན་འདི་རྒྱལ་སྤྱིའི་སྒང་གི་བོད་དོན་གླེང་སྟེགས་ཁག་གི་གླེང་གཞི་ཞིག་ཀྱ་ཆགས་ཡོད་སྟབས།

གལ་སྲིད་༧གོང་ས་མཆོག་ལ་བཀའ་འདྲི་ཞུས་ཏེ་ག་རེ་གནང་དགོས་པ་རེད་དམ་ཞེས་ཞུས་ན།

ཏན་ཏན་དེ་སྲིད་སྐྱོང་མཆོག་གིས་གཙང་མ་བཟོ་དགོས་པ་རེད་ཅེས་བཀའ་ཕེབས་པ་ཐེ་ཚོམ་མི་དགོས་པ་ཞིག་ཏུ་སེམས་ན།

ཨ་རིའི་བུད་མེད་རྩོམ་པ་པོ་ལྕམ་སྐུ་མོ་ནེ་ཧན་གྱིས་ཡོངས་བསྒྲགས་དོགས་སློང་བྱས་པ་དང་།

དེར་ཨ་རིའི་སྐུ་ཚབ་དོན་གཅོད་དབུ་དཀར་ཚང་ཀེ་རྡོར་གྱིས་ལན་བཏབས་པ།

ཡང་དེར་ལྕམ་སྐུ་མོ་ནེ་ཧན་གྱིས་གསལ་བཤད་དོགས་འདྲི་ཚ་ནན་བྱས་པ་བཅས་ཀྱི་སྲིད་སྐྱོང་གི་ཁང་རིན་ཐད་ཀྱི་དོགས་འདྲིའི་ཐད།

 

 

ངེད་ཀྱི་རེ་བར།

༡ ཨ་སྒོར་ཉིས་འབུམ་ཉིས་ཁྲི་བདུན་སྟོང་གི་དོགས་འདྲི་འདི་དང་།

༢ ད་ལྟ་ཨ་རིའི་གཞུང་གི་རྒྱ་གཞུང་གི་སོ་པའི་དོགས་གཞིའི་འོག་བཀག་ཉར་འདྲི་རྩད་བྱེད་བཞིན་པའི་རྒྱ་རིགས་ཚོང་པ་བྷན་དང་སྲིད་སྐྱོང་བློ་བཟང་སེང་གེ་མཆོག་གི་འབྲེལ་བ་ཅི་ཡིན།

༣ དེ་བཞིན་རྒྱ་ནག་ཏུ་ཚོགས་འདུར་གདན་འདྲེན་ཞུ་མཁན་རྒྱ་རིགས་བུ་མོ་ཧུའུ་དང་སྲིད་སྐྱོང་བློ་བཟང་སེང་གེ་མཆོག་གི་འབྲེལ་བ་ཅི་ཡིན་བཅས་གནད་དོན་གསུམ་གྱི་ཐད་ངེས་པར་དུ་གསལ་བཤད་ས་རིས་ཐང་གསལ།

འཇིག་རྟེན་མིག་ཁ་འབྱེད་པ།

རང་གཞན་སུ་ལའང་བློ་དོགས་འབྱུང་མི་དགོས་པ་ཞིག་ཅི་ནས་ཀྱང་བཟང་སྤྱོད་དང་ལྡན་པའི་ངང་གནང་རོགས་ཞུ་རྒྱུ་དང་།

དེ་ནི་སྐུ་ཉིད་ད་ལྟ་སྲིད་སྐྱོང་ལས་ཐོག་ཡིན་པའི་ཆ་ནས།

ལྐོག་ཟ་རུལ་སུངས་དང་འབྲེལ་བའི་གནས་ཚུལ་ཆེ་ཕྲ་བདེན་རྫུན་གང་ཞིག་ཡིན་ཡང་།

མི་རིགས་དང་རྒྱལ་ཁབ་ཀྱི་ལ་རྒྱ།

མི་མང་གི་རེ་བ་ཡིད་ཆེས་བཅས་ལ་དགོངས་ནས་གསལ་བོ་གསལ་རྐྱང་བཟོ་དགོས་པ་སྨྲས་མེད་ཐོག

གསལ་བོ་མ་བཟོས་ན་བཅའ་ཁྲིམས་རིན་པོ་ཆེའི་དོན་ཚན་ཉེར་གཅིག་པ།

སྲིད་སྐྱོང་དང་བཀའ་བློན་གྱི་འོས་ཆོས་ཞེས་པའི་ནང་གསེས་དོན་ཚན་དགུ་བ་༼བོད་མིའི་ཁེ་ཕན་ལ་གནོད་གཞིའི་རྒྱལ་ཁབ་གཞན་གྱི་ལས་དོན་དང་།

གོ་གནས། དངུལ་དངོས་ཀྱི་ཁེ་ཕན་ཡོད་རིགས་མ་ཡིན་པ་བཅས།༽

ཞེས་གསལ་བར་འགལ་འདུག་པའི་གླེང་གཞི་སླེབས་ན་དམངས་སེམས་འཁྲུགས་འགྲོ་བ་སྨྲ་ག་ལ་དགོས།

 

 

མཐའ་དོན་ངས་གོང་དུ་གང་གླེང་ཡོད་པ་མཐའ་དག་ཚིག་དོན་གཉིས་ཆར་གསལ་བ་དེ་ལྟར།

བོད་མི་རིགས་ཀྱི་ཆེད་དུ་ཁུངས་ལྡན་ཚུལ་མཐུན་གླེང་སློང་བྱས་ཡོད་པ་བཞིན།

གལ་སྲིད་རྒོལ་གཏམ་གཏོང་མཁན་དང་ཀླན་ཀ་འཚོལ་མཁན་རིགས་བྱ་འདོད་ཡོད་མཁན་ཚོས་ཀྱང་།

དེ་ལྟར་ཡིན་ལུགས་ཚུལ་མཐུན་གནང་རོགས་ཞེས་ཞོར་དུ་ཞུ་འདོད་བྱུང་།

བདེན་པ་ཉིད་རྣམ་པར་རྒྱལ་གྱུར་ཅིག

 

༢༠༡༥། ༡༠། ༧། ཉིན།།