བཀའ་སྤྱི་གཉིས་ནས་ཟས་བཅད་ཞུ་འབུལ་བར་ཐུག་འཕྲད་གནང་།

བཀའ་ཤག་དང་བོད་མི་མང་སྤྱི་འཐུས་ལྷན་ཚོགས་ནས་གཞོན་ནུའི་ཆུ་ཚོད་ངེས་མེད་ཀྱི་ཟས་བཅད་ཞུ་འབུལ་བར་ཐུག་འཕྲད་གནང་སྟེ་གདུང་སེམས་མཉམ་སྐྱེད་དང་རྒྱབ་སྐྱོར་ཡོད་སྐོར་གསུངས་འདུག

བོད་མི་མང་སྤྱི་འཐུས་ལྷན་ཚོགས་ནས་འདི་གར་གནས་ཚུལ་མཁོ་གཏོང་གནང་བ་ལྟར་ན། བོད་ཀྱི་གཞོན་ནུ་ལྷན་ཚོགས་ཀྱི་དབུས་རྒྱུན་ཚོགས་གཞོན་རྟ་མགྲིན་སྲི་གཅོད་ལགས་དང་། དཔལ་འབྱོར་འགན་འཛིན་བསྟན་འཛིན་དབང་ཕྱུག་ལགས། ཕྱི་དྲིལ་འགན་འཛིན་ཚེ་དབང་སྒྲོལ་མ་ལགས་བཅས་ཀྱིས་ཆུ་ཚོད་ངེས་མེད་ཀྱི་ཟས་བཅད་ཞུ་འབུལ་གནང་སྟེ། ཉིན་གྲངས་ ༣༠ འགྲོ་བཞིན་ཡོད་པ་དང་། དེ་རིང་བོད་མི་མང་སྤྱི་འཐུས་རྒྱུན་ལས་ཀྱི་སྐུ་ཚབ་ཚོགས་གཞོན་མཁན་པོ་བསོད་ནམས་བསྟན་འཕེལ་མཆོག་དང་། སྤྱི་འཐུས་དགེ་བཤེས་སྨོན་ལམ་མཐར་ཕྱིན་ལགས་རྣམ་གཉིས་ལྡི་ལིར་ཆེད་ཕེབས་ཀྱིས། ཟས་བཅད་ཞུ་འབུལ་བ་རྣམ་ལ་ཐུག་འཕྲད་ཀྱིས་འཚམས་འདྲི་གནང་ཡོད་འདུག

སྐབས་དེར་ཚོགས་གཞོན་མཆོག་གིས་ཁོང་རྣམ་པས་བཏོན་པའི་དགོས་འདུན་དོན་ཚན་ལྔ་ལ་བོད་མི་མང་སྤྱི་འཐུས་ལྷན་ཚོགས་ནས་རྒྱབ་སྐྱོར་ཡོད་པ་དང་། ཟས་བཅད་ཞུ་འབུལ་མཚམས་འཇོག་བྱོས་ཞེས་ཞུ་ཐབས་མེད་ནའང་ཁོང་རྣམ་པའི་སྐུ་གཟུགས་ཀྱི་གནས་སྟངས་ལ་ཐུགས་འཚབ་ཡོད་སྐོར་དང་། རྒྱལ་ཚོགས་ནས་ཡ་ལན་གནང་སྟེ་ལས་འགུལ་རྒྱལ་ཁའི་ངང་མཚམས་འཇོག་ཐུབ་རེ་ཡོད་སྐོར་སོགས་གསུངས་ཡོད་འདུག

དེ་བཞིན། ཁ་སང་ཕྱི་ཚེས་ ༨ ཉིན་བོད་མི་མང་སྤྱི་འཐུས་ལྷན་ཚོགས་ཀྱིས་ནིའུ་ཡོག་མཉམ་འབྲེལ་རྒྱལ་ཚོགས་ཀྱི་སྤྱི་ཁྱབ་དྲུང་ཆེ་བྷན་ཁེ་མོན་(Mr. Ban Ki-Moon) མཆོག་དང་། སུད་སི་ཇི་ནི་ཝར་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཀྱི་འགན་འཛིན་(Zeid Ra’ad AI Hussein)མཆོག ལྡི་ལི་རྒྱལ་ཚོགས་ཡན་ལག་ལས་ཁུངས་ཀྱི་འགན་འཛིན་ (Mr. Rajiv Chandran)མཆོག་བཅས་སུ། ད་ལན་བོད་ཀྱི་གཞོན་ནུ་ལྷན་ཚོགས་ཀྱིས་བོད་དོན་སྐོར་དགོས་འདུན་དོན་ཚན་ལྔ་བཏོན་གནང་བ་རྣམས་ནི་རྒྱལ་ཚོགས་ནས་བསྒྲུབ་འོས་པ་དང་། བསྒྲུབ་ཐུབ་པ་ཞིག་ཡིན་པས་དེ་ལུགས་དགོངས་བཞེས་དགོས་སྐོར་སོགས་འཁོད་པའི་སྙན་ཞུ་འབུལ་གཏོང་གནང་ཡོད་པ་དང་། སྙན་ཞུའི་ངོ་བཤུས་ཤིག་དབུས་བོད་ཀྱི་གཞོན་ནུ་ལྷན་ཚོགས་ལ་གནང་ཡོད་འདུག

གཞན་ཡང་། ཁ་སང་ཕྱི་དྲོར་སྲིད་སྐྱོང་བློ་བཟང་སེང་གེ་མཆོག་དང་ནང་སྲིད་བཀའ་བློན་རྒྱ་རི་སྒྲོལ་མ་མཆོག་རྣམ་གཉིས་ཀྱིས་ཟས་བཅད་ཞུ་འབུལ་བར་ཐུག་འཕྲད་གནང་ཡོད་པ་དང་། ཕྱི་ཚེས་ ༦ ཉིན་ཕྱི་དྲིལ་བཀའ་བློན་བདེ་སྐྱིད་ཆོས་དབྱངས་མཆོག་གིས་ཞུ་འབུལ་བར་ཐུག་འཕྲད་གནང་བ་དང་སྦྲགས། ཁོང་རྣམ་པའི་ལས་འགུལ་ལ་གདུང་སེམས་མཉམ་སྐྱེད་དང་རྒྱབ་སྐྱོར་ཡོད་སྐོར་གསུངས་ཡོད་འདུག

འདི་གའི་གསར་འགོད་པས་ཁ་པར་བརྒྱུད་གཞོན་ནུའི་དབུས་རྒྱུན་ཚོགས་གཙོ་བསྟན་འཛིན་འཇིགས་མེད་ལགས་སུ་སྲིད་སྐྱོང་མཆོག་ནས་བཀའ་སློབ་ལམ་སྟོན་ག་རེ་གནང་ཡོད་མེད་དྲིས་པར། བཀའ་ཤག་གི་ངོས་ནས་གདུང་སེམས་མཉམ་སྐྱེད་ཡོད་པ་དང་། ཆེ་ཆུང་ལ་མ་ལྟོས་པར་བོད་དོན་ལས་འགུལ་མུ་མཐུད་དུ་སྤེལ་རྒྱུ་གལ་ཆེན་པོ་ཡིན་སྐོར་སོགས་གསུངས་སོང་ཟེར།

གསར་འགོད་པ། པདྨ་མཚོ།