ཉིན་འདི་འགར་རྒྱ་ནག་གི་སྲིད་འཛིན་དབྱིན་ཡུལ་ནང་སྐྱོར་སྐྱོད་སྐབས་དབྱིན་ཇིའི་སྲིད་བློན་གྱིས་དཔལ་འབྱོར་ཁེ་ཕན་དང་འགྲོ་བ་མིའི་ཐོབ་ཐང་ཚོང་བསྒྱུར་མི་བྱེད་རྒྱུར་ཚོགས་སྡེ་ཁག་གིས་འབོད་སྐུལ་ཞུ་བཞིན་འདུག
ཁ་སང་ཞོགས་པར་རྒྱ་ནག་གི་སྲིད་འཛིན་ཞི་ཅིན་ཕིན་དབྱིན་ཡུལ་ནང་རྒྱལ་དོན་སྐོར་སྐྱོད་སྐབས། གཞུང་ལམ་གྱི་གཡོན་ཕྱོགས་སུ་རྒྱ་ནག་མི་སེར་དང་རྒྱ་རིགས་སློབ་ཕྲུག་ཁག་ཅིག་གིས་རྒྱ་ནག་གི་རྒྱལ་དར་དང་། ཞི་ཅིན་ཕིན་ལ་འཚམས་འདྲིའི་བརྗོད་ཚིག་འཁོད་པའི་འཕྲེད་དར་སྣ་ཚོགས་བཟུང་ནས་དགའ་བསུ་བྱས་ཡོད་ཀྱང་། གཞུང་ལམ་གྱི་གཡས་ཕྱོགས་སུ་བོད་དང་བོད་དོན་རྒྱབ་སྐྱོར་བ། འགྲོ་བ་མིའི་ཐོབ་ཐང་ཚོགས་པ་ཁག་གིས་བོད་ཀྱི་རྒྱལ་དར་འཕྱར་ཏེ། བོད་ལ་རང་དབང་དགོས་པའི་སྐད་འབོད་ངོ་རྒོལ་ཤུགས་ཆེན་བྱས་ཡོད་པ་མ་ཟད། ཆོས་འཁོར་རྩ་རླུང་སྒོམ་སྒྲུབ་པ་ཚོས་འཕྲེད་དར་སྟེང་རྒྱ་ནག་གི་སྲིད་འཛིན་ཟུར་པ་ཅང་ཙེ་མིན་ཁྲིམས་ལ་སྦྱར་དགོས་ཞེས་པའི་བརྗོད་ཚིག་འཁོད་དེ་སྐད་འབོད་གནང་ཡོད་པ་དང་། ཧོང་ཀོང་ནས་ཡོང་བའི་རྒྱ་རིགས་སློབ་ཕྲུག་ཁག་ཅིག་དང་ནང་སོག་གི་སྐྱབས་བཅོལ་བ་ཁག་ཅིག་གིས་ཀྱང་ངོ་རྒོལ་བྱས་ཡོད་འདུག
དེ་རིང་དབྱིན་ཇིའི་སྲིད་བློན་ཌ་ཝེ་ཌི་ཁེམ་རོན་ (David Cameron) གྱིས་ལོན་ཏོན་གྱི་སྲིད་བློན་སྡོད་ཤག་ (Downing Street) ཏུ་རྒྱ་ནག་གི་སྲིད་འཛིན་ཞི་ཅིན་ཕིན་སྣེ་ལེན་བྱ་རྒྱུ་ཡིན་སྟབས། སྲིད་བློན་ཌ་ཝེ་ཌི་ཡི་ཐབས་བཅོས་སློབ་སྟོན་པ་ཟུར་བ་སི་ཊེ་ཧྥི་ཧོལ་ཊོན་(Steve Hilton) ལགས་ཀྱིས། དོན་དངོས་སུ་རྒྱ་ནག་ནི་ཨུ་རུ་སུ་དང་ཨི་རན་ལྟ་བུའི་གཡོ་སྒྱུ་ཅན་གྱི་རྒྱལ་ཁབ་ཅིག་རེད། སྤྱིར་ང་ཚོ་རྒྱ་ནག་གི་ཁ་གཏད་དུ་ལངས་དགོས་པ་ཞིག་ཡིན་ཡང་། དེ་ལྟར་མི་བྱེད་པར་འབྲེལ་ལམ་ཡར་རྒྱས་གཏོང་ཐབས་བྱེད་ཀྱི་ཡོད་པ་དེའི་རྒྱུ་མཚན་ངས་ཧ་གོ་མ་སོང་། ཞེས་དང་། ཁོང་གིས་མུ་མཐུད་དུ། ང་ཚོས་ས་གདན་དམར་པོ་བཏང་སྟེ་མགྲོན་བསུ་བྱེད་པ་ལས། དེ་ལས་ལྡོག་པའི་ལམ་ཁ་ཞིག་ལ་བསམ་བློ་གཏོང་དགོས་ཀྱི་འདུག ཅེས་བརྗོད་འདུག
དེ་རིང་དབྱིན་ཡུལ་གྱི་ལྟ་སྐྱོང་དྲ་བས་གནས་ཚུལ་སྤེལ་བ་ལྟར་ན། རྒྱ་ནག་གི་སྲིད་འཛིན་ཞི་ཅིན་ཕིན་གྱིས་དབྱིན་ཡུལ་གྱི་གྲོས་ཚོགས་སུ་སྐར་མ་ ༡༡ རིང་གཏམ་བཤད་བྱས་པའི་ནང་། དབྱིན་རྒྱ་གཉིས་ཀྱིས་མཐུན་སྒྲིལ་ངང་གཅིག་ལ་གཅིག་རྟེན་གྱི་ཁེ་དབང་ལོངས་སུ་སྤྱོད་དགོས་སྐོར་བཤད་པ་ལས། རྒྱ་ནག་སྲིད་གཞུང་དང་གླེང་དགོས་པའི་མིའི་རིགས་ཀྱི་དཀའ་རྙོག་དང་དམངས་གཙོའི་སྐོར་ལ་གཏམ་བཤད་གང་ཡང་བྱས་མི་འདུག ཅེས་བཀོད་འདུག
རྒྱལ་སྤྱིའི་བརྒྱུད་ལམ་ཁག་ཏུ། ཐེངས་འདིར་རྒྱ་ནག་གི་སྲིད་འཛིན་སྐོར་སྐྱོད་དང་འབྲེལ་དབྱིན་རྒྱ་གཉིས་བར་ཨ་སྒོར་ཐེར་འབུམ་ ༤༥ ཡི་ཚོང་འབྲེལ་གན་རྒྱར་མིང་རྟགས་འགོད་རྒྱུ་ཡིན་སྟབས། དབྱིན་ཡུལ་གྱི་གཞུང་དང་མང་ཚོགས་བར་བསམ་ཚུལ་མི་མཐུན་པ་འབྱུང་བཞིན་ཡོད་པ་དང་། དབྱིན་ཡུལ་གྱི་རྙིང་ཞན་ཚོགས་པ་(conservative party) ཡིས་དབྱིན་རྒྱ་གཉིས་ཀྱིས་མཉམ་འབྲེལ་བྱས་ན་རྒྱལ་ཁབ་དང་མི་མང་ལ་ཁེ་ཕན་ཡོད་པར་ངོས་འཛིན་བྱེད་ཀྱི་ཡོད་ཀྱང་། སྤྱི་དམངས་ཁྲོད་རྒྱལ་ཁབ་གཉིས་ཀྱིས་འབྲེལ་ལམ་བཙུགས་ཆོག་ཀྱང་། འགྲོ་བ་མིའི་གཞི་རྩའི་ཐོབ་ཐང་དང་སྨྲ་བརྗོད་རང་དབང་སོགས་སྣང་མེད་བཏང་བ་དེ་འགྲིག་གི་མེད་པ་མ་ཟད། དཔལ་འབྱོར་དང་འགྲོ་བ་མིའི་ཐོབ་ཐང་གཉིས་ཚོང་བརྒྱབ་པ་དེ་ཧ་ཅང་ཚབས་ཆེན་གྱི་གནད་དོན་ཞིག་ཡིན་ཚུལ་བརྗོད་ཡོད་འདུག
རེས་གཟའ་ཉི་མའི་ཉིན། བྷེ་བྷེ་སིའི་ (One’s Andrew Marr Show) ཞེས་པའི་ལས་ཚན་ནང་། དབྱིན་ཡུལ་རྒྱ་ནག་གཞུང་ཚབ་ཁང་གི་ལེའུ་ཞའོ་མིན་ (Liu Xiaoming) གྱིས། ཁོའི་རྒྱལ་ཁབ་ཀྱིས་འགྲོ་བ་མིའི་ཐོབ་ཐང་གླེང་སློང་བྱ་རྒྱུར་མཚེར་སྣང་སྐྱེས་ནས་གཡོལ་ཐབས་བྱ་རྒྱུ་མེད་ཀྱང་། དབྱིན་ཇིའི་རྒྱལ་མོའི་གསོལ་ཚིགས་སྟེང་ངལ་རྩོལ་ཚོགས་པའི་མགོ་ཁྲིད་ཇེར་མེ་ཁོ་བྷན་ (Jeremy Corbyn) གྱིས་དཀལ་རྙོག་དེ་གླེང་སློང་བྱ་རྒྱུའི་དོགས་གཞི་དེར་ཁོས། སྲིད་འཛིན་ཞི་ཅིན་ཕིན་རྒྱལ་ཁབ་གཉིས་ཀྱི་མཐུན་འབྲེལ་དང་ཚོང་འབྲེལ་ལས་དོན་ཆེད་ཕེབས་པ་ལས། ཁོ་འདིར་རྒྱ་ནག་གི་འགྲོ་བ་མིའི་ཐོབ་ཐང་རྩོད་གླེང་བྱེད་དུ་ཡོང་བ་མ་རེད། ཚང་མས་ཤེས་གསལ་ལྟར་རྒྱ་ནག་དང་དབྱིན་ཇི་གཉིས་ལ་ལོ་རྒྱུས་དང་རིག་གཞུང་། དཔལ་ཡོན་དར་རྒྱས་མ་འདྲ་བའི་ཁྱད་པར་ཡོད་པ་དེ་རྒྱུན་ལྡན་རང་བཞིན་ཡིན་པ་མ་ཟད། འགྲོ་བ་མིའི་ཐོབ་ཐང་ཡང་དེ་དེ་བཞིན་རེད། རྒྱ་ནག་ནང་མིའི་འཚོ་བ་དང་ལས་ཀ ངོ་བའི་མཐུན་རྐྱེན་སོགས་ལ་དོ་སྣང་མང་ཙམ་སྤྲོད་ཀྱི་ཡོད་སྟབས། རྒྱ་ནག་མི་མང་ཁོ་རང་ཚོས་ཀྱང་བདེ་སྐྱིད་ཀྱི་འཚོ་བ་ལོངས་སུ་སྤྱོད་ཀྱི་ཡོད་པ་ རེད་བསམ་གྱི་ཡོད། ཅེས་སོགས་བརྗོད་འདུག
གསར་འགོད་པ། འཇིགས་མེད་རྒྱ་མཚོ།
