བོད་རང་སྐྱོང་ལྗོངས་མི་དམངས་འཐུས་ཚོགས་ཀྱི་ཚོགས་གཞོན་ལི་ཌ་ཁཱེ་ཡིས་ལྐོག་རྔན་བླངས་པ་དང་ལོག་གཡེམ་བྱས་པ་བཅས་ཀྱི་ནག་ཉེས་ཕོག་སྟེ་ཁྲིམས་བཤེར་བྱེད་བཞིན་ཡོད་འདུག
དེ་རིང་རོའུ་ཌར་གསར་ལམ་སྟེང་གནས་ཚུལ་སྤེལ་བ་ལྟར་ན། ཉེ་ལམ་རྒྱ་ནག་དབུས་སྒྲིག་ཁྲིམས་ཞིབ་བཤེར་ལྷན་ཁང་གིས་བོད་ལྗོངས་མི་དམངས་འཐུས་ཚོགས་ཀྱི་ཚོགས་གཞོན་དང་བོད་ཀྱི་བདེ་འཇགས་ལྷན་ཁང་གི་འགན་འཛིན་ཟུར་པ་ལི་ཌ་ཁཱེ་ (Le Dake) ལ་ཞིབ་བཤེར་བྱས་པ་བརྒྱུད། ཁོས་དེ་སྔོན་དབང་ཆ་འཛིན་སྐབས་ལྐོག་ཟ་བྱས་ཡོད་པ་ར་འཕྲོད་བྱུང་སྟེ། ལས་གནས་དང་དམར་ཤོག་ཚོགས་པའི་ཚོགས་ཁོངས་ནས་ཕུད་དེ། ད་ལྟ་རྒྱ་ནག་དབུས་ཆེས་མཐོའི་ཁྲིམས་ཁང་གིས་ཁྲིམས་ཐག་གཅོད་བཞིན་ཡོད་འདུག
རྒྱ་ནག་དབུས་ཁྲིམས་སྒྲིག་ཞིབ་བཤེར་ལྷན་ཁང་གི་དྲ་བའི་ཐོག ལི་ཌ་ཁཱེ་ཡིས་བོད་ལྗོངས་མི་དམངས་འཐུས་ཚོགས་ཀྱི་ཚོགས་གཞོན་བྱེད་སྐབས། ཞིབ་བཤེར་ལྷན་ཁང་ལ་དབང་ཆ་སྒེར་གཅོད་བྱས་ནས་ལྐོག་རྔན་ལེན་གྱི་ཡོད་པའི་གྱོད་དོན་སྙན་སེང་ཞུས་ཡོད་སྟབས། ང་ཚོས་ཁོ་ལ་འདི་ལོའི་ཕྱི་ཟླ་ ༦ པ་ནས་བརྟག་དཔྱད་བྱས་ཏེ། ཁོས་རྒྱལ་ཁབ་ཀྱི་རྐུབ་སྟེགས་བེད་སྤྱད་བྱས་ཏེ་གཞུང་དངུལ་ལྐོག་ཟ་དང་གཞན་གྱི་ལག་ནས་ལྐོག་རྔན་བླངས་ཡོད་པ་ར་འཕྲོད་སྟབས། ལས་གནས་ནས་ཕྱིར་ཕུད་བཏང་སྟེ་ཆེས་མཐོའི་ཁྲིམས་ཁང་ལ་གྱོད་དོན་རྩིས་འབུལ་ཞུས་པ་ཡིན། ཞེས་བཀོད་འདུག
ལི་ཌ་ཁཱེ་ནི་ཕྱི་ལོ་ ༡༩༦༠ ལོའི་ཟླ་ ༣ པའི་ནང་རྒྱ་ནག་ཅང་ཞི་ཞིང་ཆེན་ཏུང་ཞིང་ (Dongxiang) རྫོང་དུ་སྐྱེས་ཤིང་། ༡༩༨༣ ནས་ ༡༩༨༦ ལོ་བར་ཅང་ཞི་གཙུག་ལག་སློབ་ཆེན་ནང་སློབ་གཉེར་བྱས་ཡོད་པ་དང་། ཕྱི་ལོ་ ༡༩༨༠ ནས་ ༡༩༩༤ ལོ་བར་ཅང་ཞི་ཞིང་ཆེན་བདེ་འཇགས་ལྷན་ཁང་གི་ལས་བྱེད་དང་། ཕྱི་ལོ་ ༡༩༩༤ ནས་ ༢༠༠༤ ལོ་བར་རྒྱ་ནག་དབུས་རྒྱལ་ཡོངས་བདེ་འཇགས་ལྷན་ཁང་གི་ལས་བྱེད་བྱས་ཡོད་འདུག ཕྱི་ལོ་ ༢༠༠༤ ནས་ ༢༠༡༢ ལོ་བར་བོད་ཀྱི་བདེ་འཇགས་ལྷན་ཁང་གི་འགན་འཛིན་དང་། ཕྱི་ལོ་ ༢༠༡༣ ནས་འདི་ལོའི་ཟླ་ ༦ ཚེས་ ༢༦ ཉིན་བར་བོད་ལྗོངས་མི་དམངས་འཐུས་ཚོགས་ཀྱི་ཚོགས་གཞོན་བྱས་ཡོད་འདུག
རྒྱ་ནག་ཤིན་ཧྭ་གསར་ཁང་དང་དབྱིན་ཡུལ་གྱི་ཆ་འཕྲིན་གྱིས། ལོ་འདིའི་ནང་བོད་ལྗོངས་ཀྱི་མཐོ་རིམ་ལས་བྱེད་ ༡༥ ཡིས་གཞུང་དངུལ་ལྐོག་ཟ་བྱས་ཡོད་པ་ཤེས་རྟོགས་བྱུང་སྟེ། ལས་གནས་ནས་ཕུད་དེ་བཙོན་འཇུག་བྱས་ཡོད་པ་དང་། ཟླ་འདིའི་ཚེས་ ༡༦ ཉིན་ནག་ཆུ་ས་ཁུལ་དབུས་ཁྲིམས་སྒྲིག་ཁང་གི་མཐོ་རིམ་དཔོན་རིགས་ཟུར་པ་དང་། བོད་རང་སྐྱོང་ལྗོངས་བདེ་འཇགས་ཐོན་སྐྱེད་ལྟ་སྐུལ་དོ་དམ་ཁང་གི་འགན་འཛིན་གཞོན་པ་བོད་རིགས་ལས་བྱེད་དངོས་དཀར་གྱིས་ནག་ཆུ་ས་ཁུལ་དུ་ལས་འགན་ཁུར་བའི་རིང་ལྐོག་རྔན་བླངས་པ་དང་ལོག་གཡེམ་བྱས་པ། འཕྲིན་ཐོག་གི་འདྲི་རྩད་དང་ལེན་བྱེད་སྐབས་རྩ་འཛུགས་ལ་རང་ཉིད་ཀྱི་གནད་དོན་ཇི་མ་ཇི་བཞིན་ངོས་ལེན་ཞུས་མེད་པ་བཅས་ཀྱི་ཉེས་འཛུགས་བྱས་ཏེ་ཕྱིར་ཕུད་བཏང་ཡོད། ཅེས་བརྗོད་འདུག
ཞི་ཅིན་ཕིན་གྱིས་ལྐོག་ཟ་རུལ་སུངས་ལ་རྡུང་རྡེག་ལག་བསྟར་བྱས་པ་ནས་ཟླ་འདིའི་ཚེས་ ༢༦ ཉིན་བར་རྒྱ་ནག་གི་ཞིང་ཆེན་དང་རང་སྐྱོང་ལྗོངས་སོགས་ས་ཁུལ་ ༦༥ ཙམ་གྱི་ནང་རྟོག་ཞིབ་བྱས་ཏེ། ལས་བྱེད་ཁྱོན་ ༦༢༤ ལྷག་ལ་ནག་ཉེས་ཕོག་ཡོད་པ་དང་། དེའི་ནང་རྒྱལ་ཁབ་དང་ཞིང་ཆེན་རིམ་པའི་མཐོ་རིམ་དཔོན་རིགས་ ༨༠ ཙམ་ཚུད་ཡོད་འདུག
གསར་འགོད་པ། དོན་གྲུབ།
