རྒྱ་གར་གྱི་སྲིད་འཛིན་དམ་པ་ཚན་རིག་པ་གྲགས་ཅན་ཨབ་དྷུལ་ཀཱ་ལམ་མཆོག་གི་རྗེས་དྲན་གཟེངས་རྟགས་ཐོག་མ་༧གོང་ས་མཆོག་ལ་འབུལ་རྒྱུ་ཡིན་འདུག
རྒྱ་གར་གྱི་སྲིད་འཛིན་དམ་པ་ཨབ་དྷུལ་ཀཱ་ལམ་ (Dr. A P J Abdul Kalam )མཆོག་སྐུ་སྒེར་གྱི་དྲ་རྒྱའི་ཐོག་གནས་ཚུལ་སྤེལ་བ་ལྟར་ན། དམ་པ་ཁོང་གི་རྒྱ་གར་འཕེལ་རྒྱས་གཏོང་བའི་འཆར་སྣང་ལས་འགུལ་ཚོགས་ཆུང་(Abdul Kalam Vision India Movement) གི་གོ་སྒྲིག་འོག དམ་པ་ཁོང་གི་བཀའ་དྲིན་རྗེས་དྲན་ཞུ་ཆེད། ཁོང་གི་མཚན་ཐོག་ནས་(Abdul Kalam Seva Ratna awards)ཞེས་པའི་གཟེངས་རྟགས་ཤིག་༧གོང་ས་མཆོག་གི་དབུས་རྒྱ་གར་གྱི་སྤྱི་ཚོགས་ཞབས་ཞུའི་ཚོགས་པ་དང་མི་སྒེར་ཁག་ཅིག་ལ་འབུལ་རྒྱུ་ཡིན་པ་དང་། གཟེངས་རྟགས་འབུལ་བཞེས་ཀྱི་མཛད་སྒོ་དེ་ཟླ་འདིའི་ཕྱི་ཚེས་ ༩ ཉིན་རྒྱ་གར་ལྷོ་ཕྱོགས་ཏ་མིལ་ནཱ་དུའུ་(Tamil Nadu)ལྟེ་གནས་གྲོང་ཁྱེར་ཆིན་ནཱ་ཡེ་(Chennai)ནང་ཡོད་པའི་ཆིན་ནཱ་ཡེ་ཚོང་ལས་བསྟི་གནས་ཁང་དུ་འཚོགས་རྒྱུ་ཡིན་འདུག
སྲིད་འཛིན་དམ་པ་ཁོང་གི་སློབ་སྟོན་པ་སྐུ་ཞབས་ཝི་ཕོན་རཱ་ཇི་(V. Ponraj)ལགས་ཀྱིས། ༧གོང་ས་ཏཱ་ལའི་བླ་མ་མཆོག་དང་སྲིད་འཛིན་དམ་པ་མཆོག་རྣམ་གཉིས་འཛམ་གླིང་ཞི་བདེ་གཏོང་འཕེལ་དུ་གཏོང་བར་དགོངས་བཞེད་མཐུན་པ་མ་ཟད། སྲིད་འཛིན་དམ་པ་མཆོག་ནས་དུས་རྒྱུན་བོད་ཀྱི་དབུ་ཁྲིད་༧གོང་ས་ཏཱ་ལའི་བླ་མ་མཆོག་ཞི་བདེའི་མཚོན་རྟགས་ཤིག་ཏུ་ངོས་འཛིན་ཞུ་ཡི་ཡོད་པ་དང་། དབུ་ཁྲིད་རྣམ་གཉིས་ཀྱིས་དུས་ཡུན་རིང་པོ་ནས་གཞོན་སྐྱེས་མི་རབས་གསར་པ་ཚོས་ཤེས་ཡོན་ལྡན་པའི་སྤྱི་ཚོགས་ཤིག་འཛུགས་སྐྲུན་བྱེད་པར་སྐུལ་འདེད་ལམ་སྟོན་མཛད་ཡོད་སྟབས། གཟེངས་རྟགས་འབུལ་བཞེས་ཀྱི་མཛད་སྒོའི་ཚོགས་མགོན་དུ་༧གོང་ས་མཆོག་གདན་འདྲེན་ཞུ་གཏན་འཁེལ་བ་ཡིན། ཞེས་གསུངས་འདུག
སྲིད་འཛིན་དམ་པ་མཆོག་གི་རྗེས་དྲན་གཟེངས་རྟགས་དེ་ནི་རྒྱ་གར་གྱི་གྲོང་ཁྱེར་དང་གྲོང་གསེབ་ཁག་ཏུ་ཤིང་སྣ་འདེབས་འཛུགས་དང་སྨྱོས་རྫས་ངན་གོམས་འགོག་ཐབས། དེ་བཞིན། འཐུང་ཆུ་གཙང་མ་མཁོ་སྤྲོད་དང་ལྗང་མདོག་འཛུགས་སྐྲུན་སོགས་ཀྱི་ཐོག་ཕྱག་ལས་གཟེངས་སུ་ཐོན་པ་གནང་མཁན་གྱི་མི་སྒེར་དང་ཚོགས་པ་ཁག་ལ་ཆེ་མཐོང་ཞུ་ཆེད་དུ་འབུལ་གཏན་འཁེལ་བ་ཞིག་ཡིན་སྟབས། ཐེངས་འདིའི་གཟེངས་རྟགས་འབུལ་བཞེས་ཀྱི་བྱ་འགུལ་ནང་རྒྱ་གར་རྒྱལ་ཡོངས་ཀྱི་ཤིང་སྣ་འདེབས་འཛུགས་ཚན་པ་འབུམ་ ༧༠༨ ཀྱིས་མཉམ་ཞུགས་ཐོ་འགོད་བྱས་ཡོད་པ་དང་། དེ་བཞིན་སྒྲིག་འཛུགས་ཁག་ ༩ ཡིས་མི་ ༧༢༠༤༠ ལ་སྨྱོས་རྫས་ངན་གོམས་འགོག་ཐབས་ཀྱི་ལས་གཞི་སྤེལ་བ་གཞིར་བཟུང་འཛུལ་ཞུགས་ཐོ་འགོད་བྱས་ཡོད་སྟབས། རྒྱ་གར་གྱི་ཤེས་ཡོན་པ་གྲགས་ཅན་དང་སྲིད་གཞུང་གི་དཔོན་རིགས་ཟུར་པ་སོགས་ནས་མཐའ་མའི་དཔྱད་འདེམས་གནང་རྒྱུ་ཡིན་འདུག
བོད་མིའི་སྒྲིག་འཛུགས་ཀྱི་དྲ་བའི་ཐོག་གནས་ཚུལ་སྤེལ་བ་ལྟར་ན། གཟེངས་རྟགས་འབུལ་བཞེས་ཀྱི་མཛད་སྒོ་དེ་གྲུབ་རྗེས། ཕྱི་ཚེས་ ༡༠ ཉིན་༧གོང་ས་མཆོག་ཆིན་ནཱ་ཡེའི་གྲོང་ཁྱེར་ནང་རྟེན་གཞི་བྱས་པའི་ (IIT)འཕྲུལ་རིག་ལྟེ་གནས་ཁང་དུ་ཆིབས་སྒྱུར་གྱིས་དེ་གའི་དགེ་ལས་སློབ་ཕྲུག་ཚོར་བཀའ་སློབ་ལམ་སྟོན་བསྩལ་རྒྱུ་དང་། ཕྱི་ཚེས་ ༡༢ དང་ ༡༣ ཉིན་རྒྱ་གར་གྱི་རྒྱལ་ས་ལྡི་ལིའི་ཇཱ་བ་ཧ་རལ་ལ་ནེ་རུ་གཙུག་ལག་སློབ་ཆེན་ནང་འཚོགས་འཆར་ཡོད་པའི་ཚད་རྡུལ་དངོས་ཁམས་རིག་པ་དང་དབུ་མའི་ལྟ་གྲུབ་དབར་གྱི་བགྲོ་གླེང་ཚོགས་འདུར་ལྷན་བཞུགས་གནང་རྒྱུ་ཡིན་འདུག དེའི་རྗེས་རྒྱ་གར་པན་ཇབ་ (Punjab )མངའ་སྡེའི་གྲོང་ཁྱེར་ཕག་ཝྭ་རྭ་ (Phagwara )ནང་ཡོད་པའི་ (lovely Professional University )གཙུག་ལག་སློབ་ཆེན་གྱིས་ཇི་ལྟར་གསོལ་འདེབས་ཞུས་པ་ལྟར། ཕྱི་ཚེས་ ༡༤ ཉིན་༧གོང་ས་མཆོག་སློབ་ཆེན་དེའི་བསླབ་པ་མཐར་སོན་གྱི་མཛད་སྒོའི་ཐོག་ཆིབས་བསྒྱུར་བཀའ་དྲིན་བསྐྱང་འཆར་ཡོད་པ་མ་ཟད། གཙུག་ལག་སློབ་ཆེན་དེས་༸གོང་ས་མཆོག་ལ་ཆེ་བསྟོད་ཀྱི་མཁས་པའི་ཕྱག་འཁྱེར་ཞིག་ཀྱང་འབུལ་རྒྱུ་ཡིན་འདུག
གསར་འགོད་པ། པདྨ་མཚོ།
དགའ་བསུའི་མིག་མཐར་མཆི་མ་ཁེངས།