དྷ་ས་རྒྱལ་སྤྱིའི་གློག་བརྙན་དུས་སྟོན་མགོ་བཙུཊ།

དེ་རིང་ནས་བཟུང་ཕྱི་ཚེས་ ༨ ཉིན་བར་དྷ་ས་བོད་ཀྱི་ཟློས་གར་ཁང་དང་དྷ་ས་མཉམ་སྤྲོ་ཁང་དུ་རྒྱ་གར་ནང་ལོགས་དང་རྒྱལ་སྤྱིའི་གློག་བརྙན་གསར་པ་ ༣༠ ལྷག་གཟིགས་འབུལ་ཞུ་བཞིན་ཡོད་འདུག

ཁ་སང་ཕྱི་དྲོའི་ཆུ་ཚོད་ ༦ པ་ཙམ་ལ་དྷ་ས་བོད་ཀྱི་ཟློས་གར་ཚོགས་ཁང་དུ། འདི་ལོའི་དྷ་ས་རྒྱལ་སྤྱིའི་གློག་བརྙན་དུས་སྟོན་(DIFF)སྒོ་འབྱེད་ཀྱི་མཛད་སྒོ་ཚོགས་སོང་བ་དང་། མཛད་སྒོའི་ཐོག་བཙན་བྱོལ་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གི་དབུས་བཀའ་བློན། དེ་བཞིན་བོད་མི་མང་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་དང་སྤྱི་འཐུས་ཁག་ཅིག གཞན་ཡང་། དྷ་ས་ཁུལ་གྱི་སེར་སྐྱ་མི་མང་དང་ཕྱི་རྒྱལ་བ་བཅས་མི་གྲངས་ ༥༠༠ ཡས་མས་འཛོམས་འདུག་པ་དང་། མཛད་སྒོའི་ཐོག་རྒྱ་གར་གྱི་གློག་བརྙན་ཕྱེ་མ་ལེབ་(Titli)ཞེས་པ་ཞིག་གཟིགས་འབུལ་ཞུས་པ་དང་འབྲེལ། གློག་བརྙན་དེའི་ཕབ་སྐྲུན་པ་ཁཱ་ནུ་བྷིལ་(Kanu Dehl)ལགས་དང་གློག་བརྙན་དེའི་འཁྲབ་སྟོན་པ་ཞིག་གིས་གློག་བརྙན་སྐོར་འགྲེལ་བཤད་དང་། ལྟད་མོ་བའི་དྲི་བར་ལན་འདེབས་བཅས་གནང་སོང་།

མཛད་སྒོའི་ཐོག་དྷ་ས་རྒྱལ་སྤྱིའི་གློག་བརྙན་དུས་སྟོན་གྱི་འགན་འཛིན་བསྟན་འཛིན་བསོད་ནམས་ལགས་ཀྱི་བཟའ་ཟླ་ལྕམ་རི་ཐོ་སཱ་རིན་(Ritu Sarin)ལགས་ཀྱིས་གློག་བརྟན་དུས་སྟོན་གྱི་དགོས་དམིགས་སོགས་ངོ་སྤྲོད་གནང་སྐབས། འདས་པའི་ལོ་ ༤ ཡི་གོང་དུ་གློག་བརྙན་ཁང་མེད་པའི་བཞུགས་སྒར་དྷ་རམ་ས་ལར། རྒྱ་གར་དང་རྒྱལ་སྤྱིའི་གློག་བརྙན་ཡག་ཤོས་རྣམས་གཟིགས་འབུལ་ཞུ་ཐུབ་པར་དམིགས་ཏེ། དྷ་ས་རྒྱལ་སྤྱིའི་གློག་བརྙན་དུས་སྟོན་གསར་དུ་མགོ་བཙུགས་པ་དང་། འཛམ་གླིང་རང་བཞིན་གྱི་སྐད་ཡིག་ཐོག་ཡོད་པའི་དྷ་ས་རྒྱལ་སྤྱིའི་གློག་བརྙན་དུས་སྟོན་གྱིས་རིག་གནས་དང་ཆོས་ལུགས་མི་འདྲ་བ་མང་པོ་འདུས་པའི་དྷ་སའི་སྤྱི་ཚོགས་འདི་མཉམ་དུ་འཛོམས་ཏེ། ཤེས་ཡོན་ཡར་རྒྱས་དང་འཛམ་གླིང་སྤྱི་ཡོངས་ཀྱི་གནས་སྟངས་ཤེས་རྟོགས་ཡོང་བའི་རིག་གནས་ཀྱི་སྡིངས་ཆ་ཞིག་བསྐྲུན་ཐུབ་པའི་རེ་བ་བཅངས་ཡོད་པ་དང་། དེ་དང་ཆབས་ཅིག ཧི་མ་ཅལ་གྱི་གློག་བརྙན་བཟོ་བསྐྲུན་གྱི་ལས་རིགས་ལ་སྐུལ་འདེད་དང་རྒྱབ་སྐྱོར་བྱེད་པའི་ཆེད་དུ་ཡིན་སྐོར་དང་། འདི་ལོའི་གློག་བརྙན་དུས་སྟོན་ཐོག་རྒྱ་གར་ནང་ལོགས་ཀྱི་གློག་བརྙན་ ༡༣ དང་རྒྱལ་སྤྱིའི་ཐོག་ནས་གློག་བརྙན་ ༢༣ ཡོད་པ་དང་། དེའི་ནང་དངོས་བྱུང་གློག་བརྙན་ ༡༠ དང་། བྱིས་པའི་གློག་བརྙན་ ༥ ཡོད་སྐོར་སོགས་བརྗོད་སོང་།

ཐེངས་འདིའི་གློག་བརྙན་དུས་སྟོན་ཐོག་ཧྥ་རན་སིར་གནས་སྡོད་རྒྱ་རིགས་ཧུའུ་ཝེ་གྱིས་ཕབ་སྐྲུན་བྱས་པའི་བོད་སྐོར་གྱི་གློག་བརྙན་(མཆོད་མེ)་དང་། ཉི་ཧོང་བ་ཁོ་རོ་ཨེ་ཁེ་ཡཱ་ལགས་ཀྱིས་ཕབ་སྐྲུན་བྱས་པའི་(རླུང་རྟ)། ཕྱི་རྒྱལ་བ་ཨན་ཌི་ཝི་ཧིན་ཊོན་དང་ཇོ་ནི་བྷར་ཁེ་གཉིས་ཀྱིས་ཕབ་སྐྲུན་བྱས་པའི་(བཀྲ་ཤིས་དང་གྲྭ་པ)། སུད་སི་ནས་ཡིན་པའི་ཌོའུ་ཌོའུ་ཧུན་ཛི་ཁར་(Dodo Hunziker) གྱིས་ཕབ་སྐྲུན་བྱས་པའི་(བོད་ཀྱི་དམག་མི།)བཅས་འབར་མ་དང་འབྲུག རྒྱ་གར། རྒྱ་ནག་སོགས་ཀྱི་གློག་བརྙན་གསར་པ་ ༣༣ ཙམ་གཟིགས་འབུལ་ཞུ་འཆར་ཡོད་པ་དང་། དེ་རིང་སྔ་དྲོའི་ཆུ་ཚོད་ ༡༡ ནས་བཟུང་ཟླ་འདིའི་ཕྱི་ཚེས་ ༨ ཉིན་བར་བོད་ཀྱི་ཟློས་གར་ཁང་དང་། དྷ་ས་མཉམ་སྤྲོ་ཁང་(Club House)གཉིས་ཀྱི་ནང་གཟིགས་འབུལ་ཞུ་བཞིན་ཡོད་འདུག

གསར་འགོད་པ། པདྨ་མཚོ།