དེ་རིང་དྷ་རམ་ས་ལར་གཞུང་འབྲེལ་མིན་པའི་ཚོགས་པ་གསུམ་གྱིས་བོད་ནང་གི་ཁོར་ཡུག་ཐོག་འཛམ་གླིང་རྒྱལ་ཁབ་ཁག་གིས་དོ་སྣང་བྱེད་དགོས་པའི་འབོད་སྐུལ་ལས་འགུལ་ཞིག་སྤེལ་སོང་།
དེ་རིང་སྔ་དྲོའི་ཆུ་ཚོད་ ༡༡ ཡོལ་ཙམ་ལ་དྷ་རམ་ས་ལའི་མེག་གྷན་སུམ་མདོ་རུ། རྒྱ་གར་བོད་རང་བཙན་སློབ་ཕྲུག་ཚོགས་པ་དང་བོད་ཀྱི་བུད་མེད་ལྷན་ཚོགས། རྒྱལ་སྤྱིའི་བོད་དོན་འབྲེལ་མཐུད་ཁང་བཅས་མཉམ་འབྲེལ་ཐོག མི་འགྱངས་བར་ཧྥ་རན་སིའི་རྒྱལ་ས་ཕ་རི་སིར་རྒྱལ་ཚོགས་ཀྱི་ཀོབ་ ༢༡ (UN COP21)ལྷན་ཚོགས་ཚོགས་གཏན་འཁེལ་ཡོད་པ་ལྟར། བོད་འཛམ་གླིང་གི་སྣེ་མོ་གསུམ་པ་ཞེས་པའི་བརྗོད་གཞིའི་ཐོག་ནས་གནམ་གཤིས་ཀྱི་དོ་ཁུར་བོད་ནང་ལག་བསྟར་དགོས་པའི་འབོད་སྐུལ་གྱི་ཁྲོམ་གཞུང་ཟློས་གར་ཞིག་འཁྲབ་སྟོན་གནང་སོང་ལ། མི་རིང་བར་ཚོགས་འཆར་ཡོད་པའི་ལྷན་ཚོགས་ཐོག་བོད་ཀྱི་གནམ་གཤིས་དང་འབྲེལ་བའི་ཞུ་ཡིག་ཅིག་ཀྱང་འབུལ་རྒྱུ་ཡིན་འདུག
འབོད་སྐུལ་གྱི་ལས་འགུལ་ཐོག་རྒྱ་གར་བོད་རང་བཙན་སློབ་ཕྲུག་ཚོགས་པའི་འགན་འཛིན་བསྟན་འཛིན་ཚེ་ལྷ་ལགས་ཀྱིས། ང་ཚོས་ཁྲོམ་གཞུང་ཟློས་གར་འདི་འཁྲབ་སྟོན་བྱ་དགོས་དོན་ནི། བོད་ཀྱི་གནམ་གཤིས་འགྱུར་ལྡོག་གི་གནས་བབ་ཛ་དྲག་ཆགས་ཡོད་པ་དེ་གསལ་འདོན་བྱ་ཆེད་ཡིན་ཞེས་དང་། བོད་ཀྱི་འཁྱག་རོམ་ནི་འཛམ་གླིང་བྱང་རྩེའི་གནས་སྟངས་ཇི་བཞིན་ཆག་འཇིག་གི་གནས་སུ་གྱར་ཡོད། བོད་ཀྱི་གནམ་གཤིས་ཚ་དྲོད་ནི་འཛམ་གླིང་ཁྱོན་ཡོངས་ཀྱི་ཚ་དྲོད་འཕར་ཚད་ལས་ལྡབ་གཉིས་མྱུར་བ་ཡིན། བོད་མཐོ་སྒང་ནི་འཇིག་ཉེན་གྱི་གནས་སྟངས་ཤིག་ཏུ་གྱུར་ཡོད་པས་ངེས་པར་དུ་དེར་སྲུང་སྐྱོབ་བྱ་དགོས། འོན་ཀྱང་། རྒྱ་གཞུང་གིས་ཐུན་མོང་མ་ཡིན་པའི་ས་ཆ་འདིར་གཞི་རྒྱ་ཆེ་བའི་ཆུ་མཛོད་བརྒྱ་ཕྲག་མང་པོ་དང་གཏོར་སྐྱོན་ཆེ་བའི་གཏེར་ཁ་སྔོག་འདོན་གྱི་ལས་གཞི་ཤུགས་ཆེར་བརྩམས་དང་རྩོམ་བཞིན་པ་དེས། ཁོར་ཡུག་རང་བཞིན་གྱི་གཏོར་བརླག་གིས་རྩ་ཆེ་ཞིང་ཐུན་མོང་མ་ཡིན་པའི་བོད་ཀྱི་རང་བྱུང་ཁམས་ལ་གཏོར་སྐྱོན་ཆག་འཇིག་བཟོ་བཞིན་ཡོད་པ་རེད། ཅེས་བརྗོད་སོང་།
ཡང་བོད་ཀྱི་བུད་མེད་ལྷན་ཚོགས་ཀྱི་ཁོར་ཡུག་སྡེ་ཚན་གྱི་ལས་བྱེད་ནོར་འཛིན་སྒྲོལ་མ་ལགས་ཀྱིས། ནང་ཁུལ་གྱི་ཆུའི་དཀའ་ངལ་གླེང་ན། རྒྱ་གཞུང་གིས་ཚད་ལས་བརྒལ་བའི་ཆུ་མཛོད་རྒྱག་པ་དང་ཆུའི་ཁ་སྒྱུར་བྱེད་པའི་ལས་གཞི་སྣ་ཚོགས་རྩོམ་བཞིན་ཡོད། ལས་གཞི་འདི་རིགས་ཀྱིས་ལྷོ་ཤར་ཨེ་ཤ་ཡའི་ནང་གི་མི་མང་ས་ཡ་མང་པོའི་འཚོ་རྟེན་གྱི་ཆུ་ལ་དཀའ་ངལ་བཟོ་བ་ཙམ་མ་ཟད། བོད་མི་སྟོང་ཕྲག་མང་པོ་འཚོ་གནས་མ་ཐུབ་པ་དང་སྡོད་གནས་སྤོར་དུ་བཅུག་པ། ས་གནས་ཀྱི་གཙང་པོའི་རང་བྱུང་ཁམས་བཅས་ལ་གཏོར་སྐྱོན་བཟོ་བ་བཅས་ཀྱི་རྩ་བ་ཆགས་ཡོད། ཅེས་བརྗོད་སོང་།
རྒྱལ་སྤྱིའི་བོད་དོན་འབྲེལ་མཐུད་ཁང་གི་ལས་བྱེད་ཉི་མ་ལྷ་མོ་ལགས་ཀྱིས། བོད་ཀྱི་གནམ་གཤིས་འཕོ་འགྱུར་གྱི་ཤུགས་རྐྱེན་ནི་ས་ཁུལ་རང་བཞིན་ཙམ་མ་ཡིན་པར་རྒྱལ་སྤྱི་རང་བཞིན་གྱི་གནད་དོན་ཞིག་ཡིན་ཞེས་དང་། ང་ཚོས་རྒྱ་གར་གཞུང་དང་འཛམ་གླིང་རྒྱལ་ཁབ་ཁག་གི་སྲིད་གཞུང་དག་ལ། ཚན་རིག་པ་དང་བོད་ནང་གི་འབྲེལ་ཡོད་མི་སྣ། བོད་ཀྱི་གཙང་པོ་ཁག་ལ་རྟེན་ཡོད་པའི་རྒྱལ་ཁབ་དག་གི་འགན་འཁུར་མི་སྣ་བཅས་མཉམ་ཞུགས་ཐོག བོད་མཐོ་སྔ་གི་གནས་སྟངས་ལ་ཚད་དང་ལྡན་པའི་ཞིབ་འཇུག་ཞིག་ཡོང་ཐུབ་པ་གནང་རོགས་ཞེས་འབོད་སྐུལ་ནན་པོ་ཞུ་རྒྱུ་ཡིན། རྒྱ་ནག་གཞུང་གིས་འགོག་སྲིད་ཀྱང་ཛ་དྲག་རང་བཞིན་གྱི་གནད་དོན་འདིའི་ཐད་ནས་མཚོ་བོད་མཐོ་སྒང་དང་དེའི་རང་བྱུང་ཐོན་རྫས་ཀྱི་དོ་དམ་དང་ཐག་གཅོད་ཐད་བོད་མི་རང་མཉམ་ཞུགས་དགོས། ལྷག་པར་དུ་བོད་ཀྱི་འབྲོག་པ་མང་ཚོགས་ཚོ་ལ་དབང་ཚད་འདི་ཡོད་དགོས། ཞེས་བརྗོད་སོང་།
ཐེངས་འདིའི་ལས་འགུལ་བརྒྱུད་འབོད་སྐུལ་དོན་ཚན་གསུམ་གནང་ཡོད་པ་ནི། གཅིག ཕ་རི་སི་ཡི་ལྷན་ཚོགས་སྟེང་། ས་ཁུལ་འཚོ་སྡོད་རིག་གནས་དང་གནམ་གཤིས་འགྱུར་ལྡོག་ཞི་འཇམ་སྙོམ་སྒྲིག་ལ་ངོས་འཛིན་མཉམ་ལས་བྱེད་སྐབས། འགྲོ་བ་མིའི་ཐོབ་ཐང་ལ་བརྩི་མཐོང་དང་གོ་ལའི་ཚ་དྲོད་ ༡་༥ བར་སྙོམ་སྒྲིག་ཡོང་ཐབས་བཅས་ཀྱི་ཐོག་གྲོས་ཆོད་ཅིག་འཇོག་ཐུབ་པ་གནང་རོགས།
གཉིས། བོད་ཀྱི་འབྲོག་པ་ཚོར་སོ་སོར་བདག་པའི་རྩྭ་སའི་བདག་དབང་སྤྲོད་རྒྱུ་དང་ཨེ་ཤ་ཡའི་ཆུའི་མགོ་ཁུངས་ལ་རྒྱག་བཞིན་པའི་ཆུ་མཛོད་ལས་གཞི་རིགས་མཚམས་འཇོག་ཡོང་ཆེད། རྒྱ་ནག་གཞུང་ལ་འཁན་མ་ཁུར་བའི་བོད་ནང་གི་ཁོར་ཡུག་སྲིད་བྱུས་རིགས་མཚམས་འཇོག་བྱ་དགོས་པའི་གནོན་ཤུགས་སྐུལ་འདེད་གནང་རོགས།
གསུམ། ང་ཚོས་བོད་ཀྱི་གཙང་པོ་དག་འབབ་ཡུལ་གྱི་རྒྱལ་ཁབ་བཅུ་ལ་འབོད་སྐུལ་ཞུ་རྒྱུར། ལྷོ་དང་ལྷོ་ཤར་ཨེ་ཤ་ཡའི་རྒྱལ་ཁབ་ཁག་གི་མཉམ་སྤྱོད་ཀྱི་ཡུལ་དུ་གྱུར་བའི་བོད་ཀྱི་གཙང་པོ་དག་སྔར་ལས་སྲུང་སྐྱོབ་ཡོང་ཐབས་དང་། ཆུ་དང་ཟས་རིགས་སྲུང་སྐྱོབ། དཔལ་འབྱོར་གྱི་བདེ་འཇགས། རང་བྱུང་ཁམས་ཀྱི་བདེ་འཇགས་བཅས་ཀྱི་ཆེད་དུ་བོད་ནང་ལ་རྩོམ་བཞིན་པའི་རྒྱ་ནག་གཞུང་གི་ཆུ་མཛོད་དང་། གཏེར་ཁ་སྔོག་འདོན་གྱི་ལས་གཞི་རིགས་འཕྲལ་དུ་རང་འགུལ་གྱིས་མཚམས་འཇོག་ཡོང་བར་གནོན་ཤུགས་སྤྲོད་དགོས་པའི་འབོད་སྐུལ་ཤུགས་ཆེར་ཞུ་རྒྱུ་ཡིན་ཞེས་བཀོད་འདུག
གསར་འགོད་པ། པདྨ་མཚོ།
