སེམས་ཞི་ཞིང་དུལ་བ་ཡོང་རྐྱེན་གཙོ་བོ་གཞན་ཕན་གྱི་བློས་ནང་སེམས་ཀྱི་སྙིང་སྟོབས་འཕེལ་བ་དང་། རྟེན་ཅིང་འབྲེལ་འབྱུང་གི་བསམ་བློ་དེས་དངོས་ཡོད་གནས་ཚུལ་དང་མཐུན་ཞིང་བསམ་བློ་གུ་ཡངས་པོའི་ཐོག་ནས་བལྟ་ཐུབ་རྒྱུར་ཕན་ཐོགས།
༧གོང་ས་མཆོག་ཟླ་འདིའི་ཚེས་ ༤ ཉིན་བཞུགས་སྒར་དྷ་རམ་ས་ལ་ནས་ལྡི་ལི་བརྒྱུད་རྒྱ་གར་ལྷོ་ཕྱོགས་སུ་ཆིབས་བསྒྱུར་བསྐྱངས་ཡོད་ཅིང་། ཚེས་ ༦ ཉིན་བྷིང་ལོར་ནང་ཡོད་པའི་རྒྱལ་ཁབ་འདྲ་མིན་གྱི་གཞུང་ལས་ཁང་དང་ཚན་རིག་བསྟི་གནས་ཁང་བཅས་ཀྱི་དབུ་འབྱེད་མཛད་སྒོར་ཆིབས་བསྒྱུར་བསྐྱངས་ཏེ་བཀའ་སློབ་གནང་ཡོད་འདུག
མཛད་སྒོ་དེའི་སྟེང་ཡོངས་འཛིན་གླིང་མཆོག་སྤྲུལ་རིན་པོ་ཆེ་མཆོག་དང་། ༸རྒྱལ་བའི་གསུང་འབུམ་ཕྱོགས་སྒྲིག་སྡེ་ཚན་གྱི་འགན་འཛིན་སེར་སྨད་ཡང་སྟེང་རིན་པོ་ཆེ་མཆོག ཨོ་སི་ཊོ་རི་ཡར་བཅའ་བཞུགས་གཉན་རྩེ་སྤྲུལ་སྐུ་བློ་བཟང་དམ་ཆོས་ལགས། དེ་བཞིན། རྒྱལ་ཁབ་ ༢༠ ཙམ་གྱི་གཞུང་ཚབ་ལས་བྱེད་བཅས་ཁྱོན་གྲངས་ ༢༠༠ ལྷག་ཙམ་མཉམ་ཞུགས་གནང་ཡོད་འདུག
ཕྱི་ཚེས་ ༧ ཉིན་རྒྱལ་ཡོངས་སེམས་ཁམས་དང་དབང་རྩའི་བསྟི་གནས་ཁང་དུ་ཕེབས་ཏེ། བསྟི་གནས་ཁང་དེའི་ཉེ་བའི་རིགས་བདག་སྐུ་ཞབས་སཱ་ཏི་ཤི་ཅན་ཌིར་(Prof Satish Chandra)ལགས་གཙོས་པའི་དགེ་ལས་སློབ་ཕྲུག་དང་། ཨ་རིའི་གློག་བརྙན་འཁྲབ་སྟོན་པ་རེ་ཆར་གྷེར་། ཚན་རིག་པ་དང་ཤེས་ལྡན་མི་སྣ་སོགས་མི་ ༡༠༠༠ བརྒལ་བར་བཀའ་སློབ་བསྩལ་དོན། ང་ཚོ་ཚང་མ་སེམས་ཚོར་དང་ལུས་ཚོར་གང་གི་ཆ་ནས་འགྲོ་བ་མི་རིགས་གཅིག་མཚུངས་ཡིན། ངོས་རང་ཡང་འགྲོ་བ་མི་ཞིག་ཡིན། ཁྱད་པར་གང་ཡང་མེད། ཞེས་ངོས་ཀྱི་རྟག་ཏུ་མང་ཚོགས་ལ་གསལ་པོར་བརྗོད་ཀྱི་ཡོད། ངོས་རང་སེམས་ཞི་ཞིང་དུལ་བ་ཞིག་ཡོང་ཐབས་བྱས་པའི་མྱོང་བ་དེའི་ཕན་ཡོན་གང་ཡོད་པའི་སྐོར་ཞུ་འདོད་བྱུང་། དང་པོ། གཞན་ཕན་གྱི་བློས་ནང་སེམས་ཀྱི་སྙིང་སྟོབས་ཇེ་འཕེལ་འགྲོ་གི་ཡོད་པ་དང་། གཉིས་པ། རྟེན་ཅིང་འབྲེལ་བར་འབྱུང་བའི་བསམ་བློ་དེས་དངོས་ཡོད་གནས་ཚུལ་དང་མཐུན་ཞིང་བསམ་བློ་གུ་ཡངས་པོའི་ཐོག་ནས་གནས་ཚུལ་རྣམས་ལ་བལྟ་ཐུབ་རྒྱུར་ཕན་ཐོགས་ཧ་ཅང་ཡོད་པ་མ་ཟད། དཀའ་ངལ་ཇི་འདྲ་ཞིག་འཕྲད་ཀྱང་དེར་གདོང་ལེན་བྱ་རྒྱུར་བསམ་བློའི་གྲ་སྒྲིག་དང་ཐབས་ལམ་བཟང་བ་བསྟེན་ཐུབ།
དཀའ་ངལ་འཕྲད་ས་གཙོ་བོ་ནང་གི་བསམ་བློར་ཐུག་ཡོད་སྟབས་དཀའ་ངལ་དེ་ཕྱི་དངོས་པོས་སེལ་མི་ཐུབ་པར་ནང་གི་སེམས་རྒྱུད་དང་འབྲེལ་བའི་བསམ་བློའི་འདུ་ཤེས་ཀྱི་ཐོག་ནས་དངོས་ཡོད་གནས་ཚུལ་དང་འཚམས་ཤིང་ལེགས་ཉེས་རྣམ་པར་འབྱེད་པའི་ཤེས་རབ་ལ་བརྟེན་ནས་གདོང་ལེན་བྱེད་དགོས། དེར་བརྟེན། སྒོམ་རྒྱག་རྒྱུ་དེ་ཧ་ཅང་གལ་ཆེན་པོ་ཡིན། སྒོམ་རྒྱག་སྟངས་དེ་ཡང་དཔྱད་སྒོམ་ཐོག་ནས་སྒོམ་བརྒྱབ་པ་ཡིན་ན་དངོས་ཡོད་གནས་ཚུལ་དང་རན་པའི་དཀའ་ངལ་ལ་གདོང་ལེན་བྱེད་ཕྱོགས་ཐད་དམིགས་བསལ་ཁྱད་པར་ཆེན་པོ་ཡོད། ངོས་རང་ཚན་རིག་པས་དངོས་པོ་གང་དང་གང་ལ་ཡིད་ཆེས་བྱས་པ་ཙམ་མིན་པར་བསམ་བློ་བཏང་། དཔྱད་པ་བྱས་ནས་གཏན་ལ་ཕབ་རྒྱུའི་ལམ་སྲོལ་དེར་ཧ་ཅང་མོས་པོ་ཡོད། ང་ཚོར་དཀོན་མཆོག་གིས་བསམ་བློ་གཏོང་བྱེད་ཀྱི་ཀླད་པ་རེ་གནང་ཡོད། ཅེས་གསུངས་འདུག
ཁོང་གིས་མུ་མཐུད་དུ་གསུངས་དོན། ངོས་ཀྱིས་ནང་པ་སངས་རྒྱས་པའི་ཆོས་དེ་ཆོས་ལུགས་གཞན་ལས་ཁྱད་དུ་འཕགས་པ་གཅིག་རེད། ཅེས་ནམ་ཡང་ཤོད་ཀྱི་མེད། འོན་ཀྱང་། ནང་པ་སངས་རྒྱས་པའི་ཆོས་དེར་དམིགས་བསལ་ཁྱད་ཆོས་ཤིག་ཡོད་པ་ནི་བཅོམ་ལྡན་འདས་རང་ཉིད་ཀྱིས། ངས་གང་བཤད་པ་དེར་དད་པ་དང་གུས་པ་བྱས་ནས་ཆ་མ་བཞག་པར། དེར་བསྲེགས་བཅད་བརྡར་གསུམ་གྱི་ལམ་ནས་དཔྱད་པ་བྱེད་དགོས་ཞེས་གསུངས་ཡོད། དེ་དམིགས་བསལ་བ་ཞིག་རེད་ལ། ཚན་རིག་དང་མཐུན་པ། དངོས་ཡོད་གནས་ཚུལ་དང་མཐུན་པ་ཞིག་ཀྱང་ཆགས་ཡོད། སྔ་མོ་དཔལ་ནཱ་ལཎྜའི་མཁས་པ་ཚོའི་སེམས་ཁམས་རིག་པའི་རྣམ་གཞག་དེ་ཧ་ཅང་ཚད་མཐོན་པོར་སོན་ཡོད། དེང་སྐབས་ནུབ་ཕྱོགས་པའི་སེམས་ཁམས་རིག་པའི་རྣམ་གཞག་དེ་རྒྱ་གར་གནའ་རབས་ཀྱི་སེམས་ཁམས་རིག་པ་དང་བསྡུར་བ་ཡིན་ན་སྔོན་འགྲོ་ལྟ་བུ་རེད། སྤྱིར་སྔ་མོ་རྒྱ་གར་དུ་མཁས་པ་ཆེན་པོ་མང་པོ་བྱུང་ཡོད་ཀྱང་དེང་སྐབས་རྒྱ་གར་བ་ཚོས་ཕྱི་དངོས་པོའི་རིན་ཐང་ཐོག་བསམ་བློ་ཤུགས་ཆེ་བ་གཏོང་གི་འདུག
སྤྱིར་ཕྱི་དངོས་པོའི་ཡར་རྒྱས་ཧ་ཅང་གལ་ཆེ་ཡིན། ཕྱོགས་མཚུངས་ནང་སེམས་ཀྱི་རིན་ཐང་ཐོག་དོ་སྣང་བྱ་རྒྱུ་དེ་ཡང་རང་ཉིད་མི་ཚེ་དོན་ལྡན་ཡོང་བར་ཕན་ཐོགས་ཆེན་པོ་ཡོད། དེང་སྐབས་ཕྱི་དངོས་པོའི་མཐུན་རྐྱེན་བཟང་པོ་ཡོད་པར་བརྟེན། གནད་དོན་གང་དང་གང་ཡིན་རུང་བརྟག་དཔྱད་བྱས་ཏེ་དངོས་ཡོད་གནས་ཚུལ་དང་མཐུན་པའི་སྒོ་གནས་དཀའ་ངལ་སོགས་ལ་གདོང་ལེན་བྱ་རྒྱུ་ཧ་ཅང་གལ་ཆེན་པོ་ཡིན། ལོ་ངོ་བཞི་བཅུ་ཉེ་བའི་རིང་ནང་པའི་ཚན་རིག་དང་ཚན་རིག་གཉིས་དབར་བགྲོ་གླེང་བྱས་པ་དེ་དག་ལྷ་ཡུལ་ཡོད་མེད་དང་སྐྱེས་བ་ཕྱི་མ་ཡོད་མེད་སྐོར་གང་ཡང་བགྲོ་གླེང་བྱེད་ཀྱི་མེད། དངོས་ཡོད་གནས་ཚུལ་དང་མཐུན་པའི་སྒོ་ནས་སེམས་དང་སྲོག་གི་རྣམ་གཞག་སོགས་ཀྱི་སྐོར་བགྲོ་གླེང་དང་གོ་བསྡུར་བྱས་ཡོད། ཅེས་སོགས་གསུངས་འདུག
