ཁ་སང་སུད་སིར་བོད་ཀྱི་རྒྱལ་གཅེས་དཔའ་བོ་དཔའ་མོའི་རྗེས་དྲན་བགྲོ་གླེང་ཚོགས་འདུག་ཞིག་ཚོགས་པའི་སྟེང་བོད་པ་མི་རེ་ངོ་རེར་བོད་དོན་འཐབ་རྩོད་ཀྱི་འགན་ཡོད་པ་དང་མ་འོངས་པར་རྒྱལ་གཅེས་དཔའ་བོའི་ཉིན་མོ་གཏན་འབེབས་སྲུང་གཙི་ཞུ་དགོས་སྐོར་སོགས་གླེང་ཡོད་འདུག
ཁ་སང་ཚེས་ ༢༠ ཉིན་སུད་སི་གྲོང་ཁྱེར་ཛུ་རིག་ནང་། ནམ་ཁོ་རྫ་རྡོ་ལགས་ཀྱི་གོ་སྒྲིག་འོག ‘རྒྱལ་གཅེས་དཔའ་བོ་དཔའ་མོའི་རྗེས་དྲན་ཐེངས་གསུམ་པ’ ཞེས་པ་ཚོགས་ཏེ། བོད་བསྟན་པ་ཆབ་སྲིད་ཆེད་ལུས་སྲོག་ལོངས་སྤྱོད་བློས་བཏང་གནང་མཁན་ཡོངས་དང་། དམིགས་བསལ་སྐུ་ལུས་མེར་བསྲེགས་གནང་མཁན་རྒྱལ་གཅེས་དཔའ་བོ་དཔའ་མོ་རྣམས་ལ་མྱ་ངན་རྗེས་དྲན་གནང་སོང་། འདུ་འཛོམས་འདིའི་ཐོག་ཡུ་རོབ་སྤྱི་འཐུས་བཀྲས་མཐོང་དབང་པོ་ལགས་དང་བོད་ཀྱི་ཆབ་སྲིད་བཙོན་ཟུར་མགོ་ལོག་འཇིགས་མེད་ལགས། བོད་ཀྱི་མི་རབས་གསར་བའི་མཐུན་ཚོགས་ཀྱི་ཚོགས་གཙོ་དཔའ་བོ་ལགས། བོད་དོན་འཐབ་རྩོད་པ་མིག་དམར་སྒྲོལ་མ་ལགས། བོད་ཀྱི་མི་རབས་གསར་བའི་མཐུན་ཚོགས་ཀྱི་ཚོགས་གཞོན་མཁར་འཕག་ལགས་བཅས་ཀྱིས་གཏམ་བཤད་གནང་སོང་།
བོད་མིའི་སྒྲིག་འཛུགས་ཀྱི་ངོས་ནས་དཔའ་བོ་དཔའ་མོར་རྗེས་དྲན་གྱི་ཉིན་མོ་ཞིག་གཏན་འབེབས་ཁྱབ་བསྒྲགས་བྱས་ཏེ། འཛམ་གླིང་གང་སར་ཡོད་པའི་བོད་མི་ཡོད་དོ་ཅག་གིས་ལོ་ལྟར་ཉིན་བརྒྱ་དུས་གཅིག་ལ་དུས་དྲན་འདི་སྲུང་གཙི་ཞུ་དགོས་པ་ཧ་ཅང་གལ་ཆེན་པོ་ཡིན་པ་དང་། གནད་དོན་དེ་ཡུ་རོབ་སྤྱི་འཐུས་བརྒྱུད་དེ་བོད་མིའི་སྒྲིག་འཛུགས་ལ་འབོད་སྐུལ་ཞུ་དགོས་པ་བཅས་བསམ་ཚུལ་བྱུང་སོང་།
སྐབས་དེར་མགོ་ལོག་འཇིགས་མེད་ལགས་ཀྱིས་རྒྱ་དམག་གིས་བོད་སར་འཛུལ་བྱས་པ་ནས་ད་ལྟའི་བར་སྡུག་སྦྱོང་མནར་གཅོད་བཏང་ཚུལ་སྒྲུང་ཞིག་དང་འབྲེལ་ཏེ་གསུངས་དོན། ང་ཚོ་བོད་པ་མི་རེ་ངོ་རེ་ལ་རྩ་དོན་འཐབ་རྩོད་ཐོག་འགན་རེ་ཡོད། ང་རང་ལ་མཚོན་ནའང་ལས་ཀ་ཏོག་ཙམ་བྱས་པ་ཚང་མ་བོད་མི་ཞིག་ཡིན་བསམ་པའི་ཐོག་ནས་བྱེད་ཀྱིན་ཡོད་མ་གཏོགས་ང་མགོ་ལོག་འཇིགས་མེད་ལ་མིང་དང་སྙན་གྲགས་ཤིག་ཨེ་ཐོབ་ན་སྙམ་པའི་བསམ་བློ་བཏང་མྱོང་མེད། ད་ལྟའང་དེ་བཞིན་ཡིན། དེར་བརྟེན། བོད་མི་ཚོས་ལས་འགུལ་འདི་ལྟ་བུ་ག་རེ་སྤེལ་ནའང་རྒྱབ་སྐྱོར་བརྒྱ་ཆའི་བརྒྱ་ཡོད། ཅེས་བརྗོད་སོང་།
ཡུ་རོབ་སྤྱི་འཐུས་བཀྲས་མཐོང་དབང་པོ་ལགས་ཀྱིས་བརྗོད་དོན། དཔའ་བོ་དཔའ་མོའི་རྗེས་དྲན་མུ་མཐུད་གནང་དགོས་པ་ནི་ལོ་རྒྱུས་ཀྱི་གནད་འགག་ཅིག་ཆགས་ཡོད། མ་འོངས་པར་ང་ཚོའི་བུ་རབས་ཚ་རྒྱུད་རྣམས་ཀྱིས་ལོ་རྒྱུས་ཁྲོད་ཀྱི་དཔའ་བོ་དཔའ་མོ་རྣམས་ངོ་ཤེས་པ་དང་། ཐ་ན་པར་ཅིག་མཐོང་ནའང་ཁོང་ཅག་སུ་ཡིན་པ་ཤེས་ཐུབ་པ་ཞིག་བྱ་དགོས། དེ་ལ་ང་ཚོར་ལྷག་བསམ་དང་སྙིང་སྟོབས་ཡོད་པ་གཅིག་པུས་མི་ཡོང་བར། འཇོན་ཐང་དང་མཉམ་རུབ་སོགས་ཕྱོགས་གང་ཐད་ནས་འདང་དགོས། དེ་རིང་ང་ཚོས་འདིར་རྗེས་དྲན་བྱེད་པ་ཁོ་ན་མ་ཡིན་པར་མ་འོངས་པར་རྗེས་དྲན་གནང་ཕྱོགས་སོགས་ལའང་ཐག་གཅོད་དང་གྲུབ་འབྲས་ཐོན་པ་ཞིག་གནང་རྒྱུ་གལ་ཆེན་པོ་རེད། ཞེས་བརྗོད་སོང་།
བོད་ཀྱི་མི་རབས་གསར་བའི་མཐུན་ཚོགས་ཀྱི་ཚོགས་གཙོ་དཔའ་བོ་ལགས་ཀྱིས། འཛམ་གླིང་འདིའི་ནང་མི་རིགས་མང་པོ་ཡོད་པའི་ཁྲོད་དུ་བོད་མི་རིགས་ནི་བློ་ཁོག་དང་སྙིང་སྟོབས་ཧ་ཅང་ཆེན་པོ་ཡོད་པའི་མི་རིགས་ཤིག་རེད། རྒྱ་ནག་ལྟ་བུའི་ནང་དཔའ་བོ་ཟེར་ནས་རྒྱལ་ཁབ་ཀྱི་ངོས་ནས་རྗེས་དྲན་རྒྱ་ཆེན་པོ་དང་གཟི་བརྗིད་ཆེན་པོར་བརྩི་བཞིན་པ་དག་གཡུལ་འཁྲུག་ཁྲོད་རང་སྲོག་ཤོར་བ་རྣམས་རེད་ལ། རྒྱལ་ཁབ་གཞན་པ་ཁག་ཏུའང་དེ་ལྟར་རེད། དེར་བརྟེན། བོད་ཀྱི་དཔའ་བོ་དཔའ་མོ་རྣམས་ནི་རང་ཉིད་སྒེར་གྱི་ཚེ་སྲོག་དང་འཚོ་བ་ཉེན་ཁར་ཐུག་སྟེ་ཤི་བ་མིན་པར་བོད་མི་རིགས་ཀྱི་ཆེད་དུ་རང་ཐག་རང་གཅོད་གནང་སྟེ་ཞི་བདེ་དང་རང་དབང་གི་ཆེད་དུ་སྐུ་སྲོག་བློས་གཏོང་གནང་བ་ཡིན་སྟབས་ང་ཚོས་ངེས་པར་དུ་རྗེས་དྲན་ཞུ་དགོས། ཞེས་སོགས་བརྗོད་སོང་།
གཞན་མིག་དམར་སྒྲོལ་མ་ལགས་ཀྱིས་བརྗོད་དོན། དཔའ་བོ་དཔའ་མོ་ཁོང་ཅག་གི་ཞལ་ཆེམས་ཁག་ནི་ང་ཚོར་བཅོལ་བའི་མཐའ་མཇུག་གི་རེ་བ་རེད། དེར་བརྟེན། འུ་ཚོས་རྒྱ་ནག་ནི་སྟོབས་ཆེན་རྒྱལ་ཁབ་ཡིན་སྟབས་ང་ཚོས་ཁ་གཏད་གཅོག་མི་ཐུབ་པའི་བསམ་ཚུལ་བཟུང་སྟེ་སྡོད་པ་ནི་ཧ་ཅང་ཐབས་སྐྱོ་བོ་རེད། ཞེས་བརྗོད་པ་དང་འབྲེལ་ཏེ་འཇར་ནང་བྲིས་པའི་རྒྱལ་གཅེས་དཔའ་བོ་དཔའ་མོའི་རྗེས་དྲན་གྱི་སྙན་ཚིག་ཅིག་ཀློག་འདོན་བྱས་སོང་།
བོད་ཀྱི་རབས་གསར་བའི་མཐུན་ཚོགས་ཀྱི་ཚོགས་གཞོན་མཁར་འཕག་ལགས་ཀྱིས་བརྗོད་དོན། མཚམས་རེར་ང་ནི་བོད་པ་ཞིག་ཏུ་སྐྱེས་པ་སྤོབས་པ་སྐྱེ་ཡི་འདུག རྒྱུ་མཚན་ང་ཚོར་༧གོང་ས་མཆོག་ལྟ་བུའི་དབུ་ཁྲིད་རླབས་ཆེན་ཞིག་ཡོད་པ་དང་། བོད་བསྟན་སྲིད་གྱི་ཆེད་དུ་བློས་གཏོང་ཅི་ཡང་བྱེད་ཕོད་མཁན་གྱི་རྒྱལ་གཅེས་དཔའ་བོ་དཔའ་མོ་མཚམས་མ་ཆད་པར་ཡོང་གི་འདུག་ཀྱང་། མཚམས་ལ་རེར་བོད་པ་ཁ་ཤས་ཀྱིས་ལས་འགུལ་འདི་ལྟ་བུར་དོ་སྣང་མི་བྱེད་པ་དང་། ལྷག་པར་དུ་བོད་མི་རེ་འགས་ང་ཆབ་སྲིད་ལ་དགའ་བོ་མེད་ཚུལ་བཤད་དེ་མཉམ་ཞུགས་མི་བྱེད་པ་ནི་ངོ་ཚ་དགོས་པ་ཞིག་རེད། བོད་མི་ཚོ་ཕྱི་རྒྱལ་ཁག་དུ་ཡོང་དུས་སོ་སོས་སྒྲུང་རྫུན་མ་བཟོས་ཏེ་ཆབ་སྲིད་ལས་ཀ་བྱས་མེད་ཀྱང་ཡོད་མདོག་མདོག་གིས་ཡིག་ཆ་རག་ཐབས་བྱེད་ཀྱི་ཡོད་པ་རེད། ཡིག་ཆ་དང་འཚོ་བ་ཅུང་ཡག་ཏུ་ཕྱིན་སྐབས་ང་ཆབ་སྲིད་ལ་དོ་སྣང་མེད་ལབ་ན་ངོ་ཚ་རེད། ཅེས་བརྗོད་སོང་།
རྗེས་དྲན་གོ་སྒྲིག་གནང་མཁན་ནམ་ཁོ་རྫ་རྡོ་ལགས་ཀྱིས་དཔའ་བོ་དཔའ་མོར་རྗེས་དྲན་ཞུ་དགོས་པའི་རྒྱུ་མཚན་ཁག་ཅིག་བྲིས་ཡོད་པའི་ནང་། ང་ཚོའི་ལུང་པ་རྒྱ་ལག་ཏུ་ཤོར་ནས་བོད་མི་ཚོའི་རང་དབང་ཡོད་ཚད་རྒྱ་ལག་ཏུ་ཤོར་བ་མ་ཟད་བོད་མི་དཔའ་བོ་དཔའ་མོ་ས་ཡ་ལྷག་གི་ཚེ་སྲོག་ང་ཚོའི་རྒྱལ་ཁབ་དང་མི་རིགས་ཀྱི་དོན་དུ་ཤོར་ཡོད། ལྷག་པར་དུ་ ༢༠༠༩ ནས་ད་ལྟའི་བར་དུ་མི་རབ་གསར་བའི་དཔའ་བོ་དཔའ་མོ་ ༡༤༤ ལྷག་གིས་རང་ཉིད་ཀྱི་ལུས་པོ་མེར་བསྲེགས་ཏེ་ཁྱོད་དང་ང་ཡི་མ་འོངས་བདེ་སྐྱིད་ཀྱི་དོན་དུ་འཐབ་རྩོད་དང་བློས་གཏོང་གནང་ཡོད་པ་རེད། བོད་མི་ཧ་ཅང་མང་པོ་ཞིག་གིས་སྐབས་ཐོག་གི་སེམས་ཚོར་དང་སེམས་ཤུགས་ཙམ་ཕྱི་ལ་སྟོན་པ་ལས། དཔའ་བོ་དཔའ་མོ་རྣམས་ཀྱི་བློས་གཏོང་གི་དགོས་པ་རྒྱུ་མཚན་དང་། གནས་ལུགས་རྒྱབ་ལྗོངས་ལ་བསམ་བློ་ཞིབ་ཏུ་མི་གཏོང་བར། ཟླ་ཤས་དང་ལོ་ཤས་རྗེས་སུ་དཔའ་བོ་དཔའ་མོ་རྣམས་གཏིང་བརྗེད་དུ་འགྲོ་བཞིན་འདུག ཁོང་ཅག་གི་རླབས་ཆེན་བློས་གཏོང་ནི་ལོ་དང་ཟླ་བ་ཙམ་མ་ཡིན་པར་བསྐལ་བ་མ་སྟོང་བར་དུ་བརྗེད་ཐབས་མེད། རྒྱལ་ཁབ་དང་མི་རིགས་ཀྱི་རྣམ་པ་དང་ངོ་བོ་ཇི་ལྟར་འགྱུར་ཡང་དཔའ་བོ་དཔའ་མོ་རྗེས་དྲན་གྱི་འདུ་ཤེས་འདི་ཉིད་རྒྱུན་འཛིན་ཐུབ་དགོས། འོན་ཀྱང་རླབས་ཆེ་བའི་རྗེས་དྲན་འདུ་འཛོམས་འདི་ལྟ་བུ་ཞིག་གི་གུས་པ་ལྟ་བུ་ཞིག་གིས་གོ་སྒྲིག་ཞུ་དགོས་བྱུང་བ་ནི་ཡིད་སྐྱོ་དགོས་པ་ཞིག་རེད། རབ་ཡིན་ན་དཔའ་བོ་རྗེས་དྲན་གྱི་ལས་རིམ་འདི་རིགས་གཞུང་དང་ཚོགས་པ་ཆེ་ཁག་ནས་ལོ་ལྟར་གོ་སྒྲིག་ཞུ་དགོས་པ་ཞིག་ཆགས་ཡོད། ཅེས་སོགས་འཁོད་འདུག
གནས་ཚུལ་གཏོང་མཁན། ཙ་ཡུས་ཕུན་ཚོགས་ཡིན།
