བོད་ཀྱི་གཞོན་ནུ་ལྷན་ཚོགས་ཀྱི་དམིགས་ཡུལ་དོན་ཚན་དང་པོའི་ནང་༧གོང་ས་མཆོག་གི་བཀའ་དགོངས་ཐོག་ཤར་སྐྱོད་བྱ་རྒྱུ་ཟེར་བ་དང་། དོན་ཚན་བཞི་པའི་ནང་རང་བཙན་རྩོད་རྒྱུ་ཟེར་བ་གཉིས་ནང་འགལ་ཆགས་ཡོད་པ་དེ་འགྲིག་གི་མི་འདུག་ཟེར་གྱི་ཡོད།
ཟླ་འདིའི་ཚེས་ ༡༦ ཉིན་དབུས་བོད་ཀྱི་གཞོན་ནུ་ལྷན་ཚོགས་སྤྱི་ཁྱབ་རྒྱུན་ལས་ཁང་གིས་ནེའུ་ཡོག་དང་ནེའུ་ཇར་སི་ས་གནས་བོད་ཀྱི་གཞོན་ནུ་ལྷན་ཚོགས་ཀྱིས་གཞོན་ལྷན་གྱི་ཚོགས་ཆེན་རིམ་པའི་ཐོག་གཏན་ལ་ཕབ་པའི་དམིགས་ཡུལ་དང་སྒྲིག་གཞིར་བརྩི་བཀུར་མི་བྱེད་པ་དང་། གཞོན་ནུའི་ལངས་ཕྱོགས་ལ་འགྱུར་བ་མ་གཏང་བར་ཁྱབ་ཁོངས་འོག་གནས་ཐབས་མེད་སྐོར་བརྗོད་པ་མ་ཟད། ལོ་རྗེས་མའི་ཚོགས་ཆེན་ཐོག་མང་མོས་ཐག་གཅོད་ཇི་བྱུང་ལ་ཡང་མོས་མཐུན་བྱེད་འཆར་མེད་པ་སོགས་ལ་བརྟེན་ཏེ། གནས་སྐབས་རིང་ས་གནས་གཞོན་ནུ་ལྷན་ཚོགས་སྒོ་རྒྱག་རྒྱུ་ཡིན་པའི་གསལ་བསྒྲགས་སྤེལ་ཡོད་སྟབས། འདི་གའི་གསར་འགོད་པས་ནེའུ་ཡོག་དང་ནེའུ་ཇར་སི་ས་གནས་བོད་ཀྱི་གནོན་ནུ་ལྷན་ཚོགས་ཀྱི་ཚོགས་གཙོ་ངག་དབང་དཔལ་ལྡན་ལགས་སུ་བཅར་འདྲི་ཞུས།
ངག་དབང་དཔལ་ལྡན་ལགས་སུ། ཉེ་དབུས་གཞོན་ནུ་ལྷན་ཚོགས་ཀྱིས་ཐག་གཅོད་དེ་འདྲ་ཞིག་གནང་དགོས་པའི་རྒྱུ་མཚན་ཇི་ལྟར་བྱུང་མིན་དྲིས་པར་ཁོང་གིས། ཕྱི་ཟླ་ ༡༡ ཚེས་ ༡༩ ཉིན་ང་ཚོར་དབུས་གཞོན་ནུ་ལྷན་ཚོགས་ནས་ཚོགས་གཙོ་གཙོས་པའི་རྒྱུན་ལས་ལྔ་ཟླ་དེའི་ཚེས་ ༢༥ ཉིན་ས་གནས་ལ་ཕེབས་ནས་ཚོགས་འདུ་འཚོགས་རྒྱུ་ཡིན་པའི་གློག་འཕྲིན་འབྱོར་བ་ལྟར་ང་ཚོས་གྲ་སྒྲིག་བྱས་པ་ཡིན། ཁོ་རང་ཚོ་འདིར་ཕེབས་ཏེ་ང་ཚོ་དང་མཉམ་དུ་ཚོགས་འདུ་ཁག་གཉིས་ཚོགས་ཀྱང་གྲུབ་འབྲས་ཐོན་མ་སོང་། ང་ཚོས་ག་རེ་ཞུ་ཡི་ཡོད་ཟེར་ན། གཞོན་ནུའི་དཀའ་ངལ་དེ་ནེའུ་ཡོག་དང་ནེའུ་ཇར་སི་ཙམ་མ་རེད། སྤྱི་ཡོངས་ཀྱི་དཀའ་ངལ་ཞིག་ཆགས་ཀྱི་ཡོད་སྟབས། དཀའ་ངལ་དེ་སེལ་རྒྱུ་དབུས་ལ་འགན་ཡོད་པ་རེད་ཟེར་གྱི་ཡོད། སྔོན་མ་ང་ཚོ་རྒྱུན་ལས་སྐབས་བཅུ་གཉིས་པའི་སྐབས་ལ་དབུས་གཞོན་ནུ་ལྷན་ཚོགས་ལ་ཛ་དྲག་གི་ཚོགས་ཆེན་བསྐོང་དགོས་པའི་འབོད་སྐུལ་ཞུས་པ་ལྟར། ཁོ་ཚོས་ང་ཚོར་ཡི་གེ་ཞིག་བཏང་སྟེ་དེའི་ནང་དབུས་རྒྱུན་ཟུར་པ་མང་པོ་དང་གྲོས་བསྡུར་བྱས་རྗེས། གནས་སྐབས་རིང་ཛ་དྲག་གི་ཚོགས་འདུ་བསྐོང་དགོས་ཀྱི་མི་འདུག་གསུངས་ཡོད་པ་རེད། དེར་མ་ཟད་ ༢༠༡༦ ལོར་ཚོགས་ཆེན་ཚོགས་སྐབས་ལྷོ་གཞིས་ཁག་གི་ས་གནས་བརྒྱད་དེ་ངེས་པར་དུ་ཚོགས་འདུར་མཉམ་ཞུགས་གནང་འཇུག་རོགས། ཁོ་ཚོ་ཚོགས་འདུར་བཅར་བཅུག་པ་ཡིན་ན་ནེའུ་ཡོག་དང་ནེའུ་ཇར་སི་ས་གནས་ཀྱང་ཚོགས་ཞུགས་བྱ་རྒྱུ་ཡིན་ལ། ཚོགས་འདུའི་ནང་བཀའ་སྡུར་དང་ཐག་གཅོད་གང་གནང་བ་དེར་ངོས་ལེན་ཞུ་རྒྱུ་ཡིན་ཞུས་པ་ཡིན། ཞེས་བརྗོད་བྱུང་།
ཐེངས་འདིར་དབུས་རྒྱུན་རྣམས་འདིར་ཕེབས་ཏེ་ཚོགས་འདུ་ཚོགས་སྐབས་གྲུབ་འབྲས་མ་ཐོན་པའི་རྒྱུ་རྐྱེན་གཙོ་བོ་གང་ལ་ཐུག་ཡོད་མེད་དྲིས་པར་ཁོང་གིས། ད་ཐེངས་དབུས་ནས་རྒྱུན་ལས་མི་ ༥ ཕེབས་ཏེ་ང་ཚོ་ཚོགས་འདུ་རིམ་པ་གཉིས་ཚོགས་པ་ཡིན། ཚོགས་འདུར་གྲུབ་འབྲས་མ་ཐོན་པའི་རྒྱུ་མཚན་གཙོ་བོ་ང་ཚོས་ད་ལོའི་ཕྱི་ཟླ་ ༧ ཚེས་ ༢༡ ཉིན་དབུས་ལ་ཡི་གེ་ཞིག་བཏང་སྟེ་དབུས་གཞོན་ནུ་ལྷན་ཚོགས་ཀྱི་ལངས་ཕྱོགས་ལ་འགྱུར་བ་མ་ཕྱིན་བར་ས་གནས་ཀྱིས་དབུས་ལ་འབྲེལ་བ་ཞུ་རྒྱུ་མིན་ཟེར་བ་དེ་ཕྱིར་འཐེན་བྱེད་དགོས་གསུངས་ཡོད་པ་རེད། དེ་ནས་ཁོ་ཚོས་ས་གནས་རྒྱུན་ལས་ཟུར་བ་རེ་ཟུང་ཞིག་དང་ཚོགས་འདུ་ཚོགས་ཏེ། ནེའུ་ཡོག་དང་ནེའུ་ཇར་སི་ས་གནས་གཞོན་ནུ་སྒོ་རྒྱག་རྒྱུ་ཡིན་ལབ་པ་རེད། དེ་འགྲོ་སྟངས་ཀྱི་ཆ་ནས་ཏག་ཏག་བསྡད་ཡོད་པ་མ་རེད། གལ་སྲིད་ས་གནས་རྒྱུན་ལས་ཟུར་བ་སྐད་གཏོང་རྒྱུ་ཡིན་ན་ཚང་མ་གཏོང་དགོས་པ་རེད། ཁོ་ཚོས་རྒྱུན་ལས་ཟུར་བ་འཛོམས་དགོས་པའི་གསལ་བསྒྲགས་མ་བཏང་བར་ཁོ་རང་ཚོ་ལངས་ཕྱོགས་མཐུན་པ་ཁག་ཅིག་དང་། བོད་རྒྱལ་ཡོངས་རང་བཙན་ལྷན་ཚོགས་ཀྱི་མི་སྣ་ཁག་ཅིག་སྐད་བཏང་སྟེ་ཚོགས་འདུ་ཚོགས་འདུག ང་ཚོ་ས་གནས་ཀྱི་རྒྱུན་ལས་སུ་གང་ལའང་འབྲེལ་བ་བྱས་མེད་པ་མ་ཟད། དེ་སྔོན་ས་གནས་གཞོན་ནུའི་རྒྱུན་ལས་འོས་འདེམས་བྱེད་སྐབས། ང་ཚོ་རྒྱུན་ལས་བཅུ་གཅིག་པ་ཕུད་པའི་ཁ་གཏད་མི་བཅུ་གཅིག་ལངས་ཡོད་པ་དེ་དག་ཁྲོད་ནས་མི་བདུན་སྐད་བཏང་ཡོད་པ་དེ་ཧ་ཅང་བློ་ཕམ་གྱི་རང་བཞིན་ཞིག་རེད། ཅེས་བརྗོད་བྱུང་།
ཡང་ཁོང་གིས་དབུས་གཞོན་ནུའི་གསལ་བསྒྲགས་ནང་གི་གནད་དོན་ཁ་ཤས་ཐོག་གསལ་བཤད་གནང་དོན། ང་ཚོའི་ཚོགས་འདུའི་ནང་བསམ་ཚུལ་མ་མཐུན་པ་བྱུང་ཡོད་པ་རེད། སྐབས་དེར་ས་གནས་ས་ཐོག་ནས་གསལ་བསྒྲགས་མ་བྱས་པར། ཝ་ཤིན་ཌོན་ལ་ཕྱིན་ཏེ་གསར་འགོད་གསལ་བསྒྲགས་སྤེལ་ཏེ། ང་ཚོས་དབུས་ལ་འབྲེལ་བ་བྱེད་ཀྱི་མེད་པ་གཙོས་ས་གནས་ནས་མ་འགྲིག་པ་དང་མ་བྱས་པ་མང་དག་ཅིག་ལབ་ཀྱི་འདུག དེ་དག་བདེན་པ་མ་རེད། དེ་བཞིན། ཁོ་རང་ཚོས་ཉེ་ལམ་འདིར་འོང་རྒྱུ་ཡིན། ལམ་གྲོན་ཁྱོད་རང་ཚོས་གཏོང་དགོས་ཟེར་བ་ཙམ་ལས་ད་བར་ས་གནས་ལ་འབྲེལ་བ་ཁྱོན་ནས་བྱས་མ་སོང་།
དབུས་ཀྱི་བཀའ་མོལ་མང་པོ་ཞིག་ཏག་ཏག་བསྡད་ཡོད་མ་རེད། དཔེར་ན། འགན་འཛིན་ལྷན་ཚོགས་སྐབས་གྲོས་ཆོད་བཞག་སྟེ། ལྷོ་ཕྱོགས་ཀྱི་གཞོན་ནུའི་ས་གནས་བརྒྱད་དང་ནེའུ་ཡོག་དང་ནེའུ་ཇར་སིའི་དཀའ་ཉོག་དེ་དབུས་ཀྱིས་སེལ་ཐབས་གནང་དགོས་ཞེས་འཁོད་ཡོད་ཀྱང་། ཁོ་རང་ཚོས་དཀའ་ངལ་སེལ་ཐབས་གནང་རྒྱུའི་ཚབ་ཏུ་ནེའུ་ཡོག་དང་ནེའུ་ཇར་སི་ས་གནས་གཞོན་ནུ་ལྷན་ཚོགས་སྒོ་རྒྱག་རྒྱུ་ཡིན་ཟེར་གྱི་ཡོད་པ་རེད། ད་དུང་གྲོས་ཆོད་ནང་ས་གནས་བརྒྱད་དང་ནེའུ་ཡོག་གི་དཀའ་ངལ་སེལ་ཆེད་དབུས་ཀྱི་ས་གནས་ས་ཐོག་ལ་ཕེབས་ནས་མི་མང་ལ་གསལ་བཤད་མཐིལ་ཕྱིན་པ་རྒྱག་རྒྱུ་ཞེས་གསལ་བོར་འཁོད་ཡོད་ཀྱང་། ད་ཐེངས་དབུས་རྒྱུན་ལྔ་ཕེབས་ཡོད་ཀྱང་མི་མང་འདུ་སྐོང་གཅིག་རྐྱང་བྱས་ཡོད་པ་མ་རེད།
ད་དུང་ནེའུ་ཡོག་ས་གནས་ཀྱིས་ལོ་རྗེས་མའི་ཚོགས་ཆེན་སྟེང་གི་ཐག་གཅོད་ལ་མོས་མཐུན་བྱེད་ཀྱི་མི་འདུག་ཟེར་གྱི་ཡོད་པ་རེད། དེ་ཚོ་རྩ་བ་ནས་བདེན་པ་མ་རེད། གཅིག་ནས་ཚོགས་ཆེན་འཚོགས་རྒྱུར་ད་དུང་ཧ་ལམ་ལོ་གཅིག་ཡོད་སྟབས། ད་ལྟ་ཚོགས་ཆེན་ནང་གྲོས་ཆོད་གང་འཁྱེར་ཡོང་གི་ཡོད་མེད་དང་ཐག་གཅོད་གང་བྱེད་ཀྱི་ཡོད་མེད་ཤེས་རྒྱུ་ཁག་པོ་ཡིན་པར་བརྟེན། ང་ཚོས་ད་ལྟ་ནས་མོས་མཐུན་བྱེད་དང་མི་བྱེད་ལབ་ཐུབ་པ་ཞིག་མ་རེད། གཉིས་ནས་གཞོན་ནུའི་སྒྲིག་འཛུགས་དང་མ་འོངས་པའི་ཆིག་སྒྲིལ་ཆེད་ལྷོ་ཕྱོགས་ཀྱི་ས་གནས་བརྒྱད་དེ་མི་འབོར་དང་ས་གནས་གང་ཐད་ནས་ཧ་ཅང་གལ་ཆེན་པོ་རེད། ས་གནས་བརྒྱད་ཐེངས་རྗེས་མའི་ཚོགས་ཆེན་ལ་ཕེབས་པ་ཡིན་ན། ང་ཚོ་ཡང་བཅར་ཏེ་ཚོགས་ཆེན་ཐོག་གྲོས་ཆོད་གང་བྱུང་ཡང་ངོས་ལེན་བྱ་རྒྱུ་ཡིན་ཞུས་ཡོད། ཅེས་བརྗོད་བྱུང་།
ནེའུ་ཡོག་དང་ནེའུ་ཇར་སི་ས་གནས་གཞོན་ནུའི་དགོས་འདུན་གཙོ་བོ་གང་ཡིན་དྲིས་པར་ཁོང་གིས། ད་ལྟའི་ཆར་བོད་ཀྱི་གཞོན་ནུ་ལྷན་ཚོགས་ཀྱི་ལྟ་བ་ལངས་ཕྱོགས་དང་ལས་ཀ་བྱེད་ཕྱོགས་ཁག་ཅིག བོད་ཀྱི་གཞོན་ནུ་ལྷན་ཚོགས་ཐོག་མ་འཛུགས་སྐབས་ཀྱི་དམིགས་ཡུལ་བཞི་ཡོད་པའི་ནང་གི་དང་པོ་དང་རྒྱབ་འགལ་ཆགས་ཡོད་པ་རེད། དེ་གང་རེད་ཟེར་ན། གཞོན་ནུའི་དམིགས་ཡུལ་གྱི་དོན་ཚན་དང་པོའི་ནང་། ༧གོང་ས་མཆོག་གི་བཀའ་དགོངས་བཞིན་ཤར་སྐྱོད་བྱ་རྒྱུ་ཞེས་འཁོད་ཡོད་པ་དང་། དོན་ཚན་བཞི་པའི་ནང་རང་བཙན་འཐབ་རྩོད་བྱེད་རྒྱུ་ཡིན་ཟེར་བ་གཉིས་བར་འགལ་བ་ཆགས་ཡོད་པ་རེད། དམིགས་ཡུལ་འདི་ཐོག་མ་གཏན་འབེབས་བྱེད་སྐབས། ༧གོང་ས་མཆོག་དང་བོད་གཞུང་གི་ལངས་ཕྱོགས་དང་མཐུན་གྱི་ཡོད་པ་རེད། ཡིན་ནའང་རྗེས་སུ་༧གོང་ས་མཆོག་དང་བོད་མིའི་སྒྲིག་འཛུགས་ཀྱི་ལངས་ཕོགས་འགྱུར་བ་ཐེབས་ཡོད་པ་རེད། དངོས་ནས་༧གོང་ས་མཆོག་གི་བཀའ་དགོངས་ཐོག་ཤར་སྐྱོད་བྱ་རྒྱུ་ཡིན་ན། བོད་ཀྱི་གཞོན་ནུ་ལྷན་ཚོགས་ཀྱི་ལངས་ཕྱོགས་ལའང་འགྱུར་བ་གཏོང་དགོས་པ་ཆགས་ཡོད་པ་རེད། ང་ཚོས་སྔ་ཕྱི་བར་གསུམ་དུ་ག་རེ་ཞུས་ཡོད་ཟེར་ན། ང་ཚོ་བོད་ཀྱི་གཞོན་ནུ་ལྷན་ཚོགས་ཀྱི་སྒྲིག་གཞི་དང་འགལ་མེད་ལ། གཞོན་ནུ་ཐོག་མ་འཛུགས་སྐབས་ཀྱི་དམིགས་དང་ཡང་འགལ་མེད། ང་ཚོས་གཞོན་ནུའི་སྒྲིག་འཛུགས་ཀྱི་ཡུལ་དོན་ཚན་དང་པོ་དེ་གལ་ཆེ་ཤོས་སུ་བརྩིས་ཏེ། དེ་ལ་ང་ཚོས་ག་དུས་ཡིན་ཡང་བརྩི་བཀུར་ཞུ་བཞིན་ཡོད་ཟེར་གྱི་ཡོད། ཅེས་བརྗོད་བྱུང་།
བོད་ཀྱི་གཞོན་ནུ་ལྷན་ཚོགས་དེ་བཙན་བྱོལ་སྤྱི་ཚོགས་ནང་གི་ཚོགས་པ་ཆེ་ཤོས་ཤིག་ཡིན་པ་མ་ཟད། རྩ་དོན་འཐབ་རྩོད་ཐོག་ལའང་གལ་འགངས་ཆེན་པོ་ཆགས་ཡོད་སྟབས། མ་འོངས་པར་གཞོན་ནུ་ཆིག་སྒྲིལ་ཡོང་ཐབས་ཐད། དགོངས་པ་གང་འདྲ་བཞེས་ཀྱི་ཡོད་མེད་དྲིས་པར་ཁོང་གིས། ང་ཚོས་གཞོན་ནུ་ལྷན་ཚོགས་དུམ་བུ་གཉིས་སུ་མི་འགྲོ་ཐབས་ལ་དང་པོ་ནས་འབད་བརྩོན་ཞེ་དྲགས་བྱས་པ་ཡིན་ལ་ད་ལྟའང་བྱེད་བཞིན་ཡོད། ང་ཚོས་ཟླ་འདིའི་ཚེས་ ༢༦ ཉིན་རེས་གཟའ་སྤེན་པ་དང་བསྟུན་ཏེ། མི་མང་འདུ་སྐོང་བྱས་ཏེ་ཚོགས་འདུ་ཚོགས་རྒྱུ་ཡིན། ཚོགས་འདུའི་ཐོག་སུས་འགྲིག་ཡོད་མེད་བརྡར་ཤ་གཅོད་རྒྱུ་ཡིན། ད་ལྟ་དབུས་རྒྱུན་ཚོགས་གཙོ་དང་དྲུང་ཆེ་ཨ་རིར་བཞུགས་ཡོད་པ་རེད། ཚོགས་འདུའི་ཐོག་ཕེབས་ནས་མི་མང་ལ་བཀལ་མོལ་གནང་བ་ཡིན་ན། མི་མང་གིས་སུས་འགྲིག་ཡོད་མེད་ཐག་གཅོད་གནང་གི་རེད། གལ་སྲིད་མི་མང་གིས་ང་ཚོས་འགྲིག་མི་འདུག་གསུང་བ་ཡིན་ན། ཉིན་དེ་རང་ལ་ང་ཚོས་དགོངས་པ་ཞུ་རྒྱུ་ཡིན། སུས་འགྲིག་མིན་གྱི་མཐའ་མའི་ཐག་གཅོད་བྱེད་མཁན་དེ་མི་མང་ཡིན། ཞེས་བརྗོད་བྱུང་།
ཁོས་མུ་མཐུད་དུ་བརྗོད་དོན། བོད་ཀྱི་གཞོན་ནུ་ལྷན་ཚོགས་ཀྱིས་ད་བར་རླབས་ཆེན་གྱི་བྱ་གཞག་མང་པོ་ཞིག་ཆབ་སྲིད་གཅིག་པུ་མིན་པར། སྤྱི་ཚོགས་ཞབས་ཞུ་དང་ཆོས་དང་རིག་གཞུང་ཐོག་ཞུས་ཡོད་པ་རེད། སྔོན་མ་ཡིན་ན་བོད་གཞུང་གི་གཞུང་ཞབས་ཡིན་ན་བོད་ཀྱི་གཞོན་ནུ་ལྷན་ཚོགས་ནང་འཛུལ་ཆོག་པ་དང་། རྒྱུན་ལས་ནང་བདམས་ན་གཞུང་ནས་བཀའ་ཁྲོལ་ཡོད་པ་མ་ཟད། རྒྱུན་ལས་ནས་ཐོན་མཚམས་གཞུང་ཞབས་ཁོངས་བསྐྱར་དུ་འཛུལ་ཆོག་པའི་ཆོག་མཆན་ཐོབ་ཀྱི་ཡོད་པ་མ་ཟད། དེ་བཞིན། ལས་དོན་ཆེ་ཁག་རིགས་གཞོན་ནུ་ལྷན་ཚོགས་ལ་བཀོད་ཁྱབ་གནང་རྒྱུ་སོགས་ཀྱི་ལམ་ལུགས་ཀྱང་ཡོད་པ་རེད། ད་ཆ་དེ་ཚོ་མེད་པ་ཆགས་པ་མ་ཟད་གཞོན་ནུ་ལྷན་ཚོགས་དང་གཞུང་བར་ཐག་རིང་པོ་ཆགས་པ་དང་། དེ་ལ་བརྟེན་ཏེ་རང་བཞིན་གྱིས་གཞོན་ནུ་ལྷན་ཚོགས་དང་མི་མང་བར་ལ་ཐག་རིང་དུ་འགྲོ་བཞིན་ཡོད་པ་རེད། དེ་ངས་ཞུ་དགོས་པ་ཞིག་མ་རེད། སྤྱི་ཚོགས་ནང་བོད་ཀྱི་གཞོན་ནུ་ལྷན་ཚོགས་ལ་ལྟ་སྟངས་གང་འདྲ་ཡོད་མེད་ཀྱིས་ཁ་གྲག་ཡོང་གི་ཡོད་པ་རེད། དེ་རྩ་བ་ཉིད་ནས་འགྲིག་གི་ཡོད་པ་མ་རེད། ཚོགས་པ་བྱེ་བྲག་པ་ཞིག་གིས་ག་ཚོད་ཀྱིས་མི་མང་དང་བར་ཐག་རིང་དུ་བཏང་བ་དེའི་ཚོད་ཀྱིས། ཚོགས་པའི་ནུས་ཤུགས་ལ་དོ་ཕོག་འགྲོ་རྒྱུ་ཡིན་པ་བཤད་མ་དགོས་པ་ཞིག་རེད། མ་འོངས་པར་སྒྲིག་འཛུགས་འདི་ཆིག་སྒྲིལ་འོག་གནས་དགོས་ན། ད་ལྟ་ནས་བོད་མིའི་སྒྲིག་འཛུགས་དང་གཞོན་ནུ་ལྷན་ཚོགས་བར་འབྲེལ་ལམ་ཡག་པོ་ཞིག་དང་། མི་མང་དང་གཞོན་ནུ་ལྷན་ཚོགས་བར་དམ་ཚིག་གཙང་མ་ཞིག་དགོས་པ་ཧ་ཅང་གལ་ཆེན་པོ་རེད། ཅེས་བརྗོད་བྱུང་།
མཇུག་ཏུ་གསར་འགོད་པས་ལོ་རྗེས་མའི་གཞོན་ནུའི་ཚོགས་ཆེན་སྟེང་ཐག་གཅོད་གང་གནང་ལ་མོས་མཐུན་ཞུ་རྒྱུ་ཡིན་མིན་དྲིས་པར་ཁོང་གིས། ཡིན་དང་ཡིན། ང་ཚོས་སྔོན་མ་ནས་ཞུས་པ་ཡིན་ལ་ད་ལྟ་དེ་བཞིན་ཡིན། ལོ་རྗེས་མའི་ཚོགས་ཆེན་ཐོག་ལྷོ་གཞིས་ཁག་གི་ས་གནས་བརྒྱད་ཀྱི་རྒྱུན་ལས་རྣམས་ཕེབས་པ་ཡིན་ན། ང་ཚོ་ཡང་ཚོགས་ཞུགས་བྱས་ཏེ་གོ་བསྡུར་སྦྱང་བཤད་བྱས་ཏེ། མཐའ་མར་སྤྱི་མོས་གྲོས་ཆོད་ག་རེ་བཞག་པ་ཡིན་ན། ང་ཚོས་དེར་གུས་བརྩི་ཞུ་རྒྱུ་ཡིན། གལ་སྲིད་དེ་ལྟར་མ་བྱུང་བ་ཡིན་ན། ཚོགས་འདུའི་ཐོག་ཐག་གཅོད་གང་གནང་ཡང་ང་ཚོས་ངོས་ལེན་བྱེད་ཐབས་ཡོད་པ་མ་རེད། ཅེས་བརྗོད་བྱུང་།
གསར་འགོད་པ། དོན་གྲུབ།
དེ་ག་རང་རེད། གཞོན་ནུའི་ལངས་ཕྱོགས་ལ་འགྱུར་བ་མ་སོང་ན་ཁྱབ་ཁོངས་སུ་གནས་རྒྱུ་མིན་པའི་ཐག་གཅོད་བྱེད་མཁན་ཇེ་མང་དུ་འགྲོ་དང་འགྲོ་བཞིན་པར་བརྟེན། འདིའི་དཀའ་ངལ་དངོས་དེ་སེལ་བ་ལ་གཞོན་ནུའི་ཚོགས་མི་ཡོངས་ཪྫོགས་བསྡུས་ནས་མང་གཙོའི་ལམ་ནས་ཐག་གཅོད་གཙང་མ་བྱེད་པའི་ཐབས་ལམ་ཅིག་འཚོལ་དགོས་པ་གལ་ཆེན་པོ་རེད་སྙམ། དེ་མིན་ན་ས་གནས་རེ་རེ་ནས་མཉམ་ཞུགས་མ་བྱས་པ་རྒྱུ་མཚན་དུ་བྱས་ནས་ས་གནས་ག་གེ་མོ་རེ་སྒོ་རྒྱབ་པ་ཡིན་ན། ལྷོ་ཕྱོགས་ཀྱི་ས་གནས་དེ་ཚོ་ཡང་སྒོ་རྒྱག་དགོས་པ་རེད་སྙམ།
ནེའུ་ཡོག་གི་གཞོན་ནུ་དང་ལྷོ་ཕྱོགས་ཀྱི་ས་གནས་གཞོན་ནུ་ཁག་གི་འདོད་ཚུལ་གཅིག་ཡིན་པས། ནེའུ་ཡོག་གི་ས་གཞོན་སྒོ་བརྒྱབ་རྗེས་ལྷོ་ཕྱོགས་ཀྱི་ས་གཞོན་ཁག་ཀྱང་སྒོ་རྒྱག་འཆར་ཡོད་དམ། དེ་མིན་ནེའུ་ཡོག་གི་ས་གཞོན་གྱིས་དམིགས་བསལ་འགལ་འཛོལ་གང་བྱས་ཡོད།
ད་ཐེངས་ནེའུ་ཡོག་གི་ས་གཞོན་སྒོ་བརྒྱབ་པའི་ཟློས་གར་འདིའི་རྒྱབ་ན་འཇམ་ནོར་དང་། ཀླུ་མཁར་བྱམས། དོན་གྲུབ་ལྷ་དར་གྱི་ངན་བྱུས་བཤམས་པ་གོ་ཐོས་བྱུང་།
དབུས་གཞོན་ནུས་གསལ་བཤད་ལེགས་པོ་ཞིག་མ་བྱས་ཚེ་ཚོགས་པའི་མ་འོངས་པར་གནོད་ཚབས་ཤིན་ཏུ་ཆེ།
ནེའུ་ཡོག་ས་གནས་གཞོན་ནུར་རྒྱབ་སྐྱོར་ཡོད་
རྡ་ས་ནསདབུས་རྒྱུན་ལས་ལྔ་ཕེབས་དགོས་ཀྱི་ཡོད་དམ་
མིདམངས་ཀྱི་ལག་ནས་སྒོར་མོ་རེ་རེའི་བྱས་ནས་གསགས་པ་དེ་བོད་སྤྱོད་བྱས་ནས་ཕྱམས་ཕྱམས་ལ་ཕེབས་པ་རེད་དམ་ ཚོགས་གཙོ་ཚོགས་གཞོན་གཉིས་ཀྱི་མི་འགྲིགས་པ་ཨེ་ཡོད་
ས་གནས་མི་དམངས་ཀྱི་འོས་བླུགས་པའི་ས་གནས་གཞོན་ནུའི་ལས་ཁུངས་སྒོ་རྒྱབ་ཀྱི་ཡོད་ན་ མ་འོངས་ས་གནས་མི་དམངས་ཀྱི་རྒྱབ་སྐྱོར་མེད་པའི་ རངབཙན་རྩོད་ལེན་པ་གཞོན་ནུའི་ལས་འགུལ་ལ་ཁ་བདེ་པོའི་མི་ཉུང་ཤས་ཞིག་གི་ལས་འགུལ་གང་འདྲ་སྤེལ་གྱི་ཡོད་ན་
རྡ་རམ་ས་ལའི་གཞོན་ནུའི་ཕོ་གསར་མོ་གསར་ ༥ ་ཨ་རི་ནིའི་ཡོག་ས་གནས་གཞོན་ནུ་སྒོ་རྒྱག་གི་སོང་བ་དེ། གཞོན་ནུའི་ནང་རྙོག་ལ་ཁ་གཡར་ནས་ཨ་རིའི་ཝེ་ཟ་རེག་ཐབས་བྱས་པ་མ་རེད་དམ། དངོས་གནས་ཐབས་སྐྱོ་བོ་རེད། སྤྱི་དོན་གྱི་མིང་ཐོག་ནས་སྒེར་དོན་སྒྲུབ་ཟེར་བ་དངོས་གནས་དེ་འདི་རེད།