བོད་ནང་ལོ་བདུན་ཞེས་པའི་གླུ་གཞས་གཏོང་མཁན་དབྱིན་ཇིའི་རོལ་གཞས་སྒྱུ་རྩལ་བ་གྲགས་ཅན་ཌཱ་ཝི་ཌི་བྷོ་བི་ལགས་མཆིན་པའི་འབྲས་སྐྲན་གྱིས་འདས་གྲོངས་སུ་ཕྱིན་ཡོད་པ་རེད།
རྒྱལ་སྤྱིའི་བརྒྱུད་ལམ་ཁག་ཏུ་གནས་ཚུལ་ཐོན་པ་ལྟར་ན། ༼བོད་ནང་ལོ་བདུན༽ཞེས་པའི་གླུ་གཞས་གཏོང་མཁན་དབྱིན་ཇིའི་རོལ་གཞས་སྒྱུ་རྩལ་བ་གྲགས་ཅན་ཌཱ་ཝི་ཌི་བྷོ་བེ་(David Bowie)ལགས། ཟླ་འདིའི་ཕྱི་ཚེས་ ༡༠ ཉིན་ཨ་རིའི་གྲོང་ཁྱེར་ནིའུ་ཡོག་ནང་མཆིན་པའི་འབྲས་སྐྲན་གྱི་ནད་རྙིང་འཕར་ཏེ་འདས་གྲོངས་སུ་ཕྱིན་ཡོད་པ་དང་། དབྱིན་ཇིའི་སྲིད་བློན་ཌ་ཝེ་ཌི་ཁེམ་རོན་ (David Cameron)ལགས་ཀྱི་གཙོས་རྒྱལ་སྤྱིའི་ཐོག་ནས་ཁོང་གི་རོལ་གཞས་སྒྱུ་རྩལ་དང་གློག་བརྙན་ལ་དགའ་མོས་བྱེད་མཁན་ཧ་ཅང་མང་པོས། ཁོང་འདས་གྲོངས་སུ་ཕྱིན་པ་དེས་རོལ་གཞས་སྒྱུ་རྩལ་ཐད་གྱོང་གུད་ཆེན་པོ་ཐེབས་ཡོད་སྐོར་བརྗོད་དེ་རྗེས་དྲན་མྱ་ངན་ཞུ་བཞིན་ཡོད་འདུག
ཕྱི་ཚེས་ ༡༠ ཉིན་ཌཱ་ཝི་ཌི་བྷོ་བེ་ལགས་ཀྱི་གཞུང་གཉེར་ངོ་དེབ་ཐོག འདས་པའི་ཟླ་ ༡༨ རིང་སྤོབས་པ་ཆེན་པོའི་ཐོག་ནས་འབྲས་སྐྲན་གྱི་ན་ཚར་འཐབ་འཛིང་བྱས་རྗེས། དེ་རིང་ཁྱིམ་མི་ཚོའི་ལྟ་སྐྱོང་འོག་ཁོང་འཇིག་རྟེན་འདི་ནས་ཁ་བྲལ་སོང་། ཞེས་བྲིས་འདུག་ལ། ཟླ་འདིའི་ཕྱི་ཚེས་ ༨ ཉིན་ནི་ཁོང་དགུང་ལོ་ ༦༩ ལོན་པའི་སྐྱེས་སྐར་ཡིན་པ་དང་། ཉིན་དེར་ཁོང་གི་མི་ཚེའི་ནང་གི་ཆེད་སྒྲིག་མཐའ་མ་སྐར་མ་ནག་པོ་(Blackstar)ཞེས་པ་དེའང་འགྲེམས་སྤེལ་བྱས་ཡོད་འདུག
ཌཱ་ཝི་ཌི་བྷོ་བེ་ལགས་དགུང་ལོ་ ༡༣ ཙམ་ཡིན་སྐབས། དབྱིན་ཇིའི་རྩོམ་པ་པོ་བློ་བཟང་ཟེར་བ་ཞིག་གིས་བརྩམས་པའི་(The Rampa Story)ཞེས་པའི་དཔེ་དེབ་ཀྱི་ཤུགས་རྐྱེན་འོག ནང་ཆོས་ལ་དོ་དབྱིངས་བསླེབས་ཏེ་ཁོ་རང་གི་ཕུ་བོ་སོགས་ཀྱི་འགྲམ་ནས་ནང་ཆོས་སྦྱོང་མགོ་བརྩམས་ཡོད་པ་དང་། ཕྱིས་སུ་འཆི་མེད་གཡུང་དྲུང་རིན་པོ་ཆེ་དང་གྲོགས་པོར་གྱུར་ཏེ་ཁོང་གི་མདུན་ནས་ཀྱང་ནང་ཆོས་སྦྱངས་ཡོད་འདུག ཌཱ་ཝི་ཌི་བྷོ་བེ་ལགས་དགུང་ལོ་ ༡༩ ཙམ་ལ་སོན་སྐབས། དབྱིན་ཇིའི་སི་ཀོ་ཊི་ལན་ཌི་ནང་ཡོད་པའི་ཆོས་རྒྱམ་དྲུང་པ་རིན་པོ་ཆེའི་དགོན་པ་བསམ་ཡས་གླིང་དུ་སོང་ནས་སྒོམ་ཉམས་ལེན་བྱས་པ་མ་ཟད། སྐབས་དེར་ཁོང་ལ་རབ་བྱུང་སྒྲུབ་འདོད་ཀྱི་འདུན་པའང་ཆེན་པོ་སྐྱེས་ཡོད་ཀྱང་། གཞན་གྱི་ལམ་སྟོན་ལྟར་གླུ་གཞས་སྒྱུ་རྩལ་གྱི་ཆེད་ལས་དེ་དོར་ནུས་མེད་པ་རེད།
ཕྱི་ལོ་ ༡༩༦༧ ལོར་ཁོང་གིས་བོད་དང་འབྲེལ་བའི་གླུ་གཞས་ཐོག་མ་(Silly Boy Blue)ཞེས་པ་བརྩམས་ཡོད་པ་དང་། ཨོ་སི་ཊོ་ལི་ཡའི་རྩོམ་པ་པོ་ཧིན་རི་ཆི་ཧཱ་རིར་(Heinrich Harrer)ལགས་ཀྱིས་བརྩམས་པའི་༼བོད་ནང་ལོ་བདུན༽་ཞེས་པའི་བོད་སྐོར་གྱི་དཔེ་དེབ་དེས། ཁོང་ལ་བོད་དོན་ཐོག་དོ་ཁུར་གནང་བའི་འདུན་པ་ཤུགས་ཆེན་པོ་བསྐྲུན་ཡོད་པ་ལྟར། ཕྱི་ལོ་ ༡༩༩༧ ལོར་ཁོང་གིས་༼བོད་ནང་ལོ་བདུན༽ཞེས་པའི་རྒྱའི་བཙན་འཛུལ་འོག་གི་བོད་མིའི་དཀའ་སྡུག་མཚོན་པའི་གླུ་གཞས་དེ་བརྩམས་ཡོད་པ་དང་། དེ་བཞིན་(Wild Eyed Boy from Free Cloud)ཟེར་བ་སོགས་ཁོང་གིས་བོད་དོན་དང་འབྲེལ་བའི་གླུ་གཞས་མང་པོ་བརྩམས་ཡོད་སྟབས། རྒྱ་གཞུང་གིས་ཁོང་བོད་དང་རྒྱ་ནག་ནང་ཡོང་བར་བཀག་འགོག་བྱས་ཡོད་འདུག
ཌཱ་ཝི་ཌི་བྷོ་བེ་ལགས་ཕྱི་ལོ་ ༡༩༤༧ ཟླ་ ༡ ཚེས་ ༨ ཉིན་དབྱིན་ཇིའི་རྒྱལ་ས་ལུན་ཏུན་དུ་སྐྱེས་ཤིང་། ཆུང་དུས་ནས་རོལ་དབྱངས་ལ་དགའ་བོ་ཡོད་སྟབས་སློབ་གྲྭ་ནས་ཐོན་ཏེ་རོལ་དབྱངས་སྒྱུ་རྩལ་ཐོག་ཆེད་སྦྱོང་བྱས་ཡོད་པ་དང་། ད་ལྟའི་བར་ཁོང་ལ་རོལ་གཞས་ཆེད་སྒྲིག་ཁྱོན་ ༢༦ ལྷག་ཡོད་འདུག ཁོང་གི་སྒྱུ་རྩལ་བརྩམས་ཆོས་རྣམས་ལ་ལྟད་མོ་བ་མང་པོས་དགའ་བསུ་ཆེན་པོ་ཐོབ་ཡོད་པ་མ་ཟད། ཆེས་ཚབ་མཚོན་རང་བཞིན་ལྡན་པའི་རོལ་གཞས་བ་གྲགས་ཅན་ཞིག་ཡིན་འདུག
གསར་འགོད་པ། པདྨ་མཚོ།
