ཐེ་ཝན། ཆབ་སྲིད་ཀྱི་བསམ་བློ་རྙིང་པའི་རྒྱ་ལས་གྲོལ་རྒྱུ་ཡིན།

( ཕྱི་ལོ་ ༢༠༡༦ ལོའི་ཐེ་ཝན་འོས་བསྡུ་ཆེན་མོའི་ཁྲོད་དམངས་གཙོ་ཡར་ཐོན་ཚོགས་པའི་ཚོགས་གཙོ་ཚའེ་ཡིན་ཝུན་ལ་སྲིད་འཛིན་རྒྱལ་ཁ་ཐོབ་རྗེས། ཐེངས་འདིའི་སྲིད་འཛིན་འོས་ཐོབ་པའི་ངོས་ནས་གསར་འགོད་གསལ་བསྒྲགས་སྐབས་ཀྱི་གཏམ་བཤད།)

རྒྱལ་ཁབ་ཕྱི་ནང་གི་གྲོགས་པོ་གསར་འགོད་པ་རྣམ་པར་ཐུགས་རྗེ་ཆེ་ཞུ། ཚང་མས་བཟོད་བསྲན་གྱིས་སྒུག་བསྡད་པར་ཐུགས་རྗེ་ཆེ། དེ་རིང་། ཐེ་ཝན་པ་རྣམས་ཀྱིས་འོས་ཤོག་སྤྱད་དེ་ལོ་རྒྱུས་གསར་པ་བྲིས་ཡོད། སྲིད་འཛིན་ལམ་ལུགས་ལག་བསྟར་བྱས་པ་ནས་བཟུང་སྔ་ཕྱིར་གཞུང་འཛིན་ཆབ་སྲིད་ཚོགས་པ་ཐེངས་གསུམ་བརྗེ་ལེན་ལེགས་འགྲུབ་བྱུང་པ་རེད། དེ་བཞིན། གྲོས་ཚོགས་ནང་ཆབ་སྲིད་ཚོགས་པའི་འཐུས་མི་སྔ་ཕྱིར་ཐེངས་བཞི་ལ་བརྗེ་ལེན་བྱས་ཡོད། དེ་རིང་འོས་འཕེན་དུ་ཡོང་ནས་ཆེས་རྩ་ཆེ་བའི་འོས་ཤོག་གཅིག་པུ་བླུགས་མཁན་ཐེ་ཝན་མི་དམངས་ལ་ངས་སེམས་གཏིང་ནས་གུས་འདུད་ཞུ། ཁྱོད་ཚོས་འོས་ཤོག་སུ་ཞིག་ལ་བླུགས་ཡོད་མེད་ལ་མ་ལྟོས་པར། གཙོ་བོ་དམངས་གཙོའི་འདུ་ཤེས་གསལ་འདོན་བྱས་པ་དེ་ནི་ཐེངས་འདིའི་འོས་བསྡུའི་དོན་སྙིང་ཆེ་ཤོས་དེ་ཆགས་ཡོད།

ཕྱི་ལོ་ ༢༠༡༦ ལོར་ང་ཚོས་ཡང་བསྐྱར་དམངས་གཙོའི་འོས་བསྡུ་ཐེངས་གཅིག་བརྒྱུད་ནས། དམངས་གཙོའི་རྒྱལ་ཁབ་ཞིག་ཡིན་པའི་ང་རྒྱལ་དང་ཐེ་ཝན་པ་ཞིག་ཡིན་པའི་གཟི་བརྗིད་འཛམ་གླིང་ཡོངས་ལ་གསལ་སྟོན་བྱས་ཡོད།  དེ་བཞིན། དམངས་གཙོའི་རིན་ཐང་ནི་ཐེ་ཝན་པ་རྣམས་ཀྱི་ཟུངས་ཁྲག་ཁྲོད་འཐིམ་ཡོད་པ་དང་། མི་དམངས་ས་ཡ་ཉེར་གསུམ་གྱིས་དམངས་གཙོ་ལྡན་པའི་འཚོ་བ་རོལ་སྟངས་དུས་གཏན་དུ་རྒྱུན་འཁྱོངས་བྱ་རྒྱུ་ཡིན་པ་དེ། ང་ཚོས་རྒྱལ་སྤྱིའི་སྤྱི་ཚོགས་ལ་སླར་ཡང་ཐེངས་གཅིག་གསལ་བརྗོད་བྱས་ཡོད།

བཀུར་འོས་ཀྱི་ཁ་གཏད་འོས་མི་སྟེ་རྒྱལ་དམངས་ཚོགས་པའི་ཚོགས་གཙོ་ཀྲུའུ་དང་དམངས་གཅེས་ཚོགས་པའི་ཚོགས་གཙོ་སཱུང་གཉིས་ལ་ངས་འདི་ནས་ཐུགས་རྗེ་ཆེ་ཞུ། དམངས་གཙོའི་གཟི་ཉམས་གསལ་འདོན་ཐོག་ཐེངས་འདིའི་འོས་བསྡུ་ཆེན་མོ་རྒྱལ་ཁའི་ངང་ལེགས་འགྲུབ་བྱུང་བཅུག་པར་ངས་ཁོང་ཚོར་ཐུགས་རྗེ་ཆེ་ཞུ། འདས་མ་ཐག་པའི་དུས་ཐུང་ནང་ཕན་ཚུན་འགྲན་རྩོད་དང་། དེ་བཞིན། ཁོ་ཚོས་ང་ལ་སློབ་སྟོན་མང་པོ་གནང་བ་ཆ་ཚང་།  མ་འོངས་པར་ང་རང་མུ་མཐུད་ཡར་རྒྱས་ཡོང་བའི་སྒུལ་ཤུགས་སུ་འགྱུར་ངེས།

ཆབ་སྲིད་ཚོགས་པ་ཕན་ཚུན་དབར་འགྲན་རྩོད་ཕུད། གཞན་ད་དུང་མཉམ་ལས་ཆོག་པར་ངས་ཡིད་ཆེས་བྱེད་ཀྱི་ཡོད། གྲོས་ཚོགས་འཐུས་མིས་དམ་འབུལ་དང་སྲིད་གཞུང་གསར་པའི་གཞུང་འཛིན་མ་བྱས་སྔོན་གྱི་བར་བརྒལ་དུས་ཡུན་ནང་། སྲིད་གཞུང་བརྗེ་ལེན་བརྒྱུད་རིམ་གྱི་ཆབ་སྲིད་གནས་བབ་བརྟན་ལྷིང་དང་རྒྱུན་ལྡན་གྱི་སྒོ་ནས་སྒྲུབ་ཐུབ་པ་ཡོང་ཆེད། དམངས་གཙོ་ཡར་ཐོན་ཚོགས་པའི་ངོས་ནས་ད་ཡོད་ལམ་ལུགས་ལ་བསྟུན་མཁས་དང་། ད་ལྟའི་སྲིད་གཞུང་ལ་འབྲེལ་གཏུགས་དང་གྲོས་བསྡུར། མཐུན་འགྱུར་བཅས་རྒྱུན་འཁྱོངས་གང་ལེགས་བྱ་རྒྱུ་ཡིན།

ངས་གང་མགྱོགས་སྒོས་རྒྱལ་ཁབ་ཀྱི་ལས་དོན་ཐད་རྒྱལ་ནང་གི་ཆབ་སྲིད་ཚོགས་པ་གཙོ་གྲས་ཁག་དང་ཐུན་མོང་གྲོས་བསྡུར་ཡོང་བའི་སྒྲོམ་གཞི་འཛུགས་རྒྱུ་ཡིན། དེ་བཞིན། ང་ཚོའི་ངོས་ནས་ཐུན་མོང་གྲོས་བསྡུར་གྱི་སྒྲོམ་གཞི་དེ་སྤྱད་ནས་གལ་ཆེའི་སྲིད་བྱུས་ཐད་དུས་རྒྱུན་བསམ་ཚུལ་བརྗེ་རེས་བྱས་ཏེ། ཆབ་སྲིད་ཀྱི་བསམ་བློ་རྙིང་པའི་རྒྱ་ལས་ཐེ་ཝན་གྲོལ་ཏེ་ཆབ་སྲིད་མདུན་ལྗོངས་གསར་པ་ཞིག་བསུ་ཐུབ་པའི་རེ་བ་བྱེད་ཀྱིན་ཡོད།

གཞན་ཡང་། འོས་ཤོག་འཕངས་ཏེ་ཚའེ་ཡུན་ཝིན་དང་ཁྲིན་ཅན་རིན། དེ་བཞིན། དམངས་གཙོ་ཡར་ཐོན་ཚོགས་པ་དང་ཁྲིམས་བཟོ་ལྷན་ཚོགས་ཀྱི་འོས་མི་བཅས་ལ་རྒྱབ་སྐྱོར་བྱེད་མཁན་འོས་འཕེན་མི་དམངས་རྣམས་ཀྱིས་དམངས་གཙོ་ཡར་ཐོན་ཚོགས་པ་བསྐྱར་དུ་ཡར་བསླངས་པ་མ་ཟད། རྒྱལ་ཁབ་བཅོས་སྐྱོང་གི་འགན་དབང་ཡང་བསྐྱར་ང་ཚོར་ཐེངས་གཅིག་བསྩལ་བར་ངས་ཐུགས་རྗེ་ཆེ་ཞུ།

ང་རང་ཉིད་ལ་མཚོན་ནས་བཤད་ན། འདི་ནི་འོས་བསྡུ་ཐེངས་གཅིག་གི་རྒྱལ་ཁ་ཙམ་མ་ཡིན་པར། སྔར་ལས་ལྷར་པར་དམངས་ཀྱི་མངོན་འདོད་དང་ལེན་བྱེད་མཁན་གྱི་སྲིད་གཞུང་ཞིག་དང་། སྲིད་ཇུས་ཐག་གཅོད་ཀྱི་བརྒྱུད་རིམ་ཕྱི་གསལ་ནང་གསལ་གྱི་སྲིད་གཞུང་ཞིག ཉམས་ཐག་ལ་ལྟ་སྐྱོང་དང་དཀའ་ངལ་ཐག་གཅོད་ཀྱི་ནུས་པ་ལྡན་པའི་སྲིད་གཞུང་ཞིག རྒྱལ་ཁབ་འདི་ཉིད་དུས་རབས་གསར་བའི་སྡིངས་ཆའི་སྟེང་སྐྱེལ་ཐུབ་མཁན་གྱི་སྲིད་གཞུང་ཞིག ད་དུང་། བློ་བརྟན་འགྱུར་མེད་ཀྱིས་རྒྱལ་ཁབ་ཀྱི་བདག་དབང་སྲུང་སྐྱོང་ཐུབ་མཁན་གྱི་སྲིད་གཞུང་ཞིག་བཅས་ལ།  མི་དམངས་ཀྱིས་རེ་སྙེགས་བྱེད་བཞིན་པ་དེ་ཐེངས་འདིའི་འོས་བསྡུའི་གྲུབ་འབྲས་ཀྱིས་ང་ལ་གསལ་བརྗོད་བྱས་ཡོད།

དེ་རིང་ནས་བཟུང་བཅོས་བསྒྱུར་གྱི་ལམ་ཁ་དང་པོ་མགོ་ཚུགས་པ་རེད་ཅེས་ངས་ཐེངས་མང་བརྗོད་མྱོང་ཡོད་པ་ལྟར། མ་འོངས་པར་རེ་བཅོལ་དེ་དག་མངོན་འགྱུར་ཐད་སྐུལ་འདེད་གཏོང་བའི་རྒྱབ་རིར་འགྱུར་ངེས། ཕྱི་ཟླ་ ༢ པའི་ཚེས་ ༡ ཉིན་ལས་འཁུར་བྱེད་ཀྱིན་པའི་གྲོས་ཚོགས་གསར་པ་དང་། ཕྱི་ཟླ་ ༥ ཚེས་ ༢༠ ཉིན་དབང་འཛིན་བྱེད་བཞིན་པའི་སྲིད་གཞུང་གསར་པ་ཚང་མས། རེ་སྒུག་དེ་དག་མངོན་འགྱུར་བྱ་རྒྱུ་ནི་ཆེས་གལ་ཆེ་བའི་དམིགས་འབེན་དུ་འཛིན་གྱི་ཡིན།

བཅོས་བསྒྱུར་ནི་གོམ་པ་གཅིག་གིས་འགྲུབ་ཐུབ་ཞིག་པ་དང་ཐེ་ཝན་གྱི་མིག་སྔའི་དཀའ་ཁག་རྣམས་གློ་བུར་སེལ་པ་ཞིག་མིན་སྟབས། ང་ཚོས་ངེས་པར་གཟབ་ནན་གྱི་སྒོ་ནས་གདོང་ལེན་བྱ་དགོས།  ཡིན་ནའང་། འབྱུང་འགྱུར་གི་ལོ་བཞིའི་ལས་ཡུན་རིང་ངས་རང་ཉིད་ཀྱི་ཁས་ལེན་མངོན་འགྱུར་ཡོང་བར་རང་ནུས་གང་ཡོད་འདོན་རྒྱུ་ཡིན། ཐེ་ཝན་སྔོན་ཐོན་རྒྱལ་ཁབ་གྲས་སུ་སླེབས་ཆེད་ཞི་རྒྱས་དབང་དྲག་གི་སྟོབས་ཤུགས་སྣ་ཚོགས་འཛུགས་བསྐྲུན་རྒྱ་བསྐྱེད་དང་། འདས་པའི་སྲིད་བྱུས་ཀྱི་ནོར་འཁྲུལ་རྣམས་ལེགས་བཅོས་བྱས་ཐོགམི་དམངས་ཀྱིས་སྲིད་གཞུང་ལ་འཛིན་པའི་ཡིད་ཆེས་བསྐྱར་གསོ་བྱས་ཏེ། དུས་རིམ་རྗེས་མའི་ཐེ་ཝན་གྱི་འཕེལ་རྒྱས་ལ་སྲ་ཞིང་བརྟན་པའི་རྨང་གཞི་བསྐྲུན་རྒྱུ་ཡིན།

རྒྱལ་སྤྱིའི་གྲོགས་པོ་རྣམས་ཀྱིས་ཐེ་ཝན་གྱི་འོས་བསྡུར་དོ་སྣང་དང་རྒྱབ་སྐྱོར་གནང་བར།  ངས་ཐེ་ཝན་མི་དམངས་ཀྱི་ཚབ་ཞུས་ཏེ་གོ་སྐབས་འདི་བརྒྱུད་ནས་ཐུགས་རྗེ་ཆེ་ཞུ། ཐེ་ཝན་ནི་རྒྱལ་སྤྱིའི་སྤྱི་ཚོགས་ཀྱི་ཆ་ཤས་ཤིག་ཡིན་པའི་ངོས་ཐད་ནས། རྒྱལ་སྤྱིའི་མཉམ་ལས་ཁྲོད་ཧུར་བརྩོན་གྱིས་འཛུལ་ཞུགས་བྱ་རྒྱུར་ཐེ་ཝན་གྱིས་མོས་མཐུན་ཡོད། དེ་བཞིན། འཛམ་གླིང་གི་གྲོགས་པོ་ཡོངས་དང་ཁེ་ཕན་མཉམ་རོལ་དང་འོས་འགན་མཉམ་འཁུར་བྱ་རྒྱུའི་འདུན་པ་ཡོད། དེར་མ་ཟད། ས་ཁུལ་རང་བཞིན་གྱི་ཞི་བདེ་བརྟན་ལྷིང་ཐད་ལག་རྗེས་གང་ལེགས་འབུལ་རྒྱུ་ཡིན།

མ་འོངས་པར་ཆེས་གཅིག་མཐུན་རང་བཞིན་ལྡན་པ་དང་ཚོད་བགམ་རང་བཞིན་ཐུབ་པ། རྒྱུན་མཐུན་ཐུབ་པའི་རང་བཞིན་ཅན་གྱི་མཚོ་འགག་འབྲེལ་བ་འཛུགས་རྒྱུ་ཡིན་ཞེས། ཐེངས་འདིའི་འོས་བསྡུའི་འགྲན་རྩོད་ཁྲོད་ངས་ཐེངས་མང་པོར་ཁས་ལེན་བྱས་ཡོད། རྒྱ་ནག་མི་སེར་རྒྱལ་ཁབ་ཀྱི་སྐབས་བཅུ་བཞི་པའི་སྲིད་འཛིན་འོས་ཐོབ་པ་ཞིག་ཡིན་པའི་ངོས་ནས། འདི་ལོའི་ཕྱི་ཟླ་ ༥ ཚེས་ ༢༠ ཉིན་སྲིད་གཞུང་གསར་པའི་གཞུང་འཛིན་བྱས་རྗེས། རྒྱ་ནག་མི་སེར་རྒྱལ་ཁབ་ཀྱིས་ད་ལྟ་ལག་བསྟར་བཞིན་པའི་ཁྲིམས་སྐྱོང་ལམ་ལུགས་དང་། མཚོ་འགག་གཉིས་ཕན་ཚུན་བར་འབྲེལ་འདྲིས་གྲོས་བསྡུར་གྱི་འབྲས་བུ། དེ་བཞིན། དམངས་གཙོའི་ལམ་ལུགས་དང་ཡོངས་ཁྱབ་ཀྱི་དམངས་འདུན་བཅས་ནི། མ་འོངས་པར་མཚོ་འགག་གཉིས་ཀྱི་འབྲེལ་བར་སྐུལ་འདེད་ཀྱི་རྨང་གཞི་བྱ་རྒྱུ་ཡིན་པ་ངས་བསྐྱར་དུ་ནན་བརྗོད་ཞུ་རྒྱུ་ཡིན། དེར་མ་ཟད་ངས་ཆབ་སྲིད་ཚོགས་པའི་ལངས་ཕྱོགས་ཁོ་ན་མཁྲེགས་འཛིན་མ་ཡིན་པའི་ཐོག་ནས། ཐེ་ཝན་མི་དམངས་ཀྱི་མངོན་འདོད་ལ་བརྩི་བཀུར་དང་ཆེས་མཐོའི་སྤྱི་མོས་ངོས་འཛིན་བཅས་གཞི་ལ་བཞག་སྟེ། མཚོ་འགག་འབྲེལ་བ་མུ་མཐུད་ཞི་བདེ་བརྟན་ལྷིང་གི་ད་ལྟའི་གནས་བབ་འགན་སྲུང་དང་། ཐེ་ཝན་མི་དམངས་ལ་ཆེས་བཟང་བའི་ཁེ་ཕན་དང་བདེ་སྐྱིད་བསྐྲུན་རྒྱུ་ཡིན།

ངས་ད་དུང་ནན་བརྗོད་ཞུ་རྒྱུ་ཞིག་ལ། བློ་ཡིད་ལས་འགོང་པའི་བྱེད་སྤྱོད་དང་རྒོལ་རེས་མེད་པར་ཕན་ཚུན་གཉིས་ཀས་ངོས་ལེན་བྱ་ཐུབ་པའི་འབྲེལ་ལམ་ཞིག་དང་། འདྲ་མཉམ་གྱི་བརྩི་མཐོང་ཞིག་འཚོལ་སྙེགས་ཡོང་བར་ནུས་པ་གང་ཡོད་འདོན་རྒྱུ་དེ་མཚོ་འགག་གཉིས་ཆར་འོས་འགན་ཡོད། དེ་རིང་གི་འོས་བསྡུའི་མཐའ་མའི་གྲུབ་འབྲས་ཀྱིས་ཐེ་ཝན་མི་དམངས་ཀྱི་མངོན་འདོད་གསལ་སྟོན་བྱས་ཡོད། རྒྱ་ནག་མི་སེར་རྒྱལ་ཁབ་ནི་དམངས་གཙོའི་རྒྱལ་ཁབ་ཅིག་ཡིན་པའི་ཆ་ནས། མི་དམངས་ས་ཡ་ཉེར་གསུམ་ཐུན་མོང་གིས་རྒྱུན་སྐྱོང་བྱེད་ཀྱིན་ཡོད། ང་ཚོའི་དམངས་གཙོའི་ལམ་ལུགས་དང་རྒྱལ་ཁབ་ཀྱི་ངོས་འཛིན། རྒྱལ་སྤྱིའི་ཁོར་ཡུག་བཅས་ལ་ངེས་པར་དུ་ཕྱོགས་ཡོངས་ནས་བརྩི་འཇོག་བྱ་དགོས། དྲག་གནོན་གྱི་རྣམ་པ་ག་འདྲ་ཞིག་ཡིན་ཡང་མཚོ་འགག་གཉིས་ཀྱི་བརྟན་ལྷིང་འབྲེལ་བར་གཏོར་སྐྱོན་བཟོ་ངེས་ཡིན།

མཐའ་མཇུག་བརྗོད་འདོད་པ་ནི། ངས་རང་ཉིད་ལ་ལས་འགན་ལྕི་མོ་ཞིག་ཡོད་པ་ཤེས་ཀྱི་ཡོད། དེ་ནི་རྒྱལ་ཁབ་འདི་རྡོག་རྩ་ཆིག་སྒྲིལ་བཟོ་རྒྱུ་དེ་རེད། ཉེ་བའི་ཉིན་འདི་གཉིས་ཀར་གསར་འགྱུར་གཅིག་གིས་ཐེ་ཝན་སྤྱི་ཚོགས་ལ་སྒུལ་སྐྱོམ་ཐེབས་བཅུག་ཡོད། དེ་ནི་ལྷོ་ཁོ་རི་ཡར་འཕེལ་རྒྱས་བྱུང་བའི་ཐེ་ཝན་གྱི་སྒྱུ་རྩལ་པ་ཞིག་སྟེ། རང་ལོ་ ༡༦ ལ་སོན་པའི་བུ་མོ་ཞིག་གིས་རྒྱ་ནག་མི་སེར་རྒྱལ་ཁབ་ཀྱི་རྒྱལ་དར་གྱི་པར་རིས་ཞིག་ལག་ཏུ་འཕྱར་བར་བརྟེན་ནས་དྲག་གནོན་མྱངས་དགོས་བྱུང་ཡོད། དེའི་ཐད་ཆབ་སྲིད་ཚོགས་ཁག་གི་དབྱེ་བ་མེད་པར་ཐེ་ཝན་པ་ཚང་མས་མི་འཐད་པའི་རྣམ་འགྱུར་བསྟན་ཡོད། གནས་ཚུལ་དེས་ང་ལ་རྒྱལ་ཁབ་འདི་ཉིད་ཆིག་སྒྲིལ་དང་རྒྱལ་ཁབ་འདི་ཉིད་སྟོབས་ལྡན་དུ་བསྒྱུར་དགོས་པ་དུས་གཏན་དུ་དྲན་སྐུལ་བྱ་ངེས་ཡིན། དེར་མ་ཟད། ང་རང་རྒྱ་ནག་མི་སེར་རྒྱལ་ཁབ་ཀྱི་འབྱུང་འགྱུར་སྲིད་འཛིན་ཡིན་པའི་ངོས་ཐད་ནས་ཕྱི་འབྲེལ་ནི་འོས་འགན་གལ་ཆེན་ཞིག་ཆགས་ཡོད།

མ་གཞི་ཕྱི་ཕྱོགས་དང་ནང་ཁུལ་གཉིས་ཆ་ནས་ཐེ་ཝན་ལ་འགོག་རྐྱེན་མང་པོ་ཡོད། ད་ལྟ་འོས་བསྡུ་མཇུག་སྒྲིལ་ཟིན་པ་རེད། འོས་བསྡུའི་སྐབས་ཀྱི་འགལ་བ་དང་རྩོད་གླེང་ཡོད་ཚད་ཀྱང་མཚམས་འཇོག་དགོས། ང་ཚོ་མི་དམངས་ས་ཡ་ཉེར་གསུམ་དང་ལྷན་མདུན་དུ་བསྐྱོད་དགོས། ཐུན་མོང་གི་ཐོག་ནས་རྒྱལ་ཁབ་འདིའི་དཀའ་ངལ་སེལ་དགོས། ང་ཚོ་འོས་བསྡུའི་ཕྱིར་དུ་ཁ་བྲལ་ཏུ་འགྲོ་མི་སྲིད། ང་ཚོ་དམངས་གཙོའི་ཆེད་དུ་ཆིག་སྒྲིལ་བྱ་ངེས་ཡིན། ཚང་མར་ཐུགས་རྗེ་ཆེ་ཞུ།

ཚེ་རིང་རྒྱལ་གྱིས་བོད་བསྒྱུར་ཞུས།