རྒྱ་ནག་རྒྱལ་ཁབ་བདེ་འཇགས་ལྷན་ཁང་གིས་རྒྱ་ནང་དུ་ཉུལ་ཞིབ་བྱས་ཏེ་རྒྱལ་ཁབ་ཀྱི་གསང་བ་རྐུ་འཁྱེར་བྱས་པའི་ཉེས་འཛུགས་འོག སྔ་རྗེས་སུ་ཁེ་ན་ཌའི་མི་སེར་གཉིས་འཛིན་བཟུང་དང་བཀག་བསྐྱིལ་བྱས་ཡོད་འདུག
རོའུ་ཊར་གསར་ཁང་གིས་གནས་ཚུལ་སྤེལ་དོན་ལྟར་ན། ཁ་སང་ཁེ་ན་ཌའི་གཞུང་གིས་ཕྱི་ལོ་ ༢༠༡༤ ལོའི་ཕྱི་ཟླ་ ༨ ནང་རྒྱ་ནག་དང་བྱང་ཀོ་རི་ཡའི་ས་མཚམས་ནས་རྒྱ་ནག་རྒྱལ་ཁབ་བདེ་འཇགས་ལྷན་ཁང་གིས་རྒྱ་ནང་དུ་གནས་སྡོད་མཁན་ཁེ་ན་ཌའི་མི་སེར་གྷ་ར་ཊི་ (Garratt) དང་ཁོང་གི་བཟའ་ཟླ་ཇུ་ལེ་ཡ་ (Julia) གཉིས་ཀྱིས་རྒྱ་ནག་ནང་ཉུལ་ཞིབ་དང་རྒྱལ་ཁབ་ཀྱི་གསང་བ་རྐུ་འཁྱེར་བྱས་པའི་ཉེས་འཛུགས་འོག་སྔ་རྗེས་སུ་འཛིན་བཟུང་དང་བཀལ་བསྐྱིལ་བྱས་ཡོད་སྐོར་བརྗོད་འདུག
གྷ་ར་ཊི་བཟའ་ཟླ་གཉིས་ཀྱི་ཁྲིམས་རྩོད་པ་ཇམ་སི་ཙེམ་མིར་མན་ (James Zimmerman) ཟེར་བ་ཞིག་གིས། ད་ལྟའི་ཆར་ཁོས་རྒྱ་ནག་ལྷོ་ཤར་ལཱོ་ཉིན་ཞིང་ཆེན་ (Liao Ning Province) གྱི་ཏན་ཏུང་གྲོང་ཁྱེར་ (Dandong City) མི་དམངས་བཤེར་ཁང་གི་གཞུང་འབྲེལ་ཡིག་ཆར་སྒུག་བསྡད་ཡོད་ལུགས་སོགས་འཁྱོག་བཤད་བྱས་ཡོད་འདུག
ཁེ་ན་ཌའི་ཕྱི་སྲིད་ལྷན་ཁང་གི་མགྲིན་ཚབ་པ་ཧྥི་རན་ཁཱོ་སི་ལ་ས་ལི་ (Francois Lasalle) ཟེར་བ་ཞིག་གིས། ཁེ་ན་ཌའི་གཞུང་ནས་རྒྱ་ནག་གིས་གྷ་ར་ཊི་ལ་ནག་མེད་ཉེས་འཛུགས་བྱས་ཡོད་པ་ཤེས་རྟོགས་བྱུང་ཡོད་སྐོར་བརྗོད་ཅིང་། རྒྱ་གཞུང་འབྲེལ་གསར་འགོད་གསལ་བསྒྲགས་ཤིག་གི་ཐོག རྒྱ་ནག་ཕྱི་སྲིད་ལྷན་ཁང་གི་མགྲིན་ཚབ་པ་ཧྭ་ཁྲུན་ཡེན་ (Hua Chunying) ཟེར་བས། རྒྱ་ནག་གི་བཅའ་ཁྲིམས་དབང་འཛིན་པ་ཚོས་རྒྱ་ནག་གི་བཅའ་ཁྲིམས་གཞིར་བཟུང་ཐོག གྷ་ར་ཊིའི་གནད་དོན་ཐག་གཅོད་བྱ་རྒྱུ་ཡིན་ལུགས་བརྗོད་འདུག
གནས་ཚུལ་ལྟར་ན། ཁེ་ན་ཌའི་མི་སེར་གྷ་ར་ཊི་དང་ཁོང་གི་ཆུང་མ་ཇུ་ལེ་ཡ་གཉིས་ཀྱིས་ལྷོ་ཀོ་རི་ཡའི་མཐའ་མཚམས་སུ་འཁེལ་བའི་རྒྱ་ནག་ལྷོ་ཤར་ལཱོ་ཉིན་ཞིང་ཆེན་ (Liao Ning Province) གྱི་ཏན་ཏུང་གྲོང་ཁྱེར་ (Dandong City) ནང་མི་མང་གི་དགའ་བསུ་ཡི་རངས་ཐོབ་པའི་འཚིག་ཇ་ཁང་ཞིག་ཕྱེས་ཡོད་པ་དང་། ཁོང་བཟའ་གཉིས་འདས་པའི་ལོ་ ༣༠ རིང་རྒྱ་ནང་དུ་བསྡད་ཡོད་ཅིང་། ཕྱི་ལོ་ ༢༠༡༤ ལོའི་ཕྱི་ཟླ་ ༨ ནང་རྒྱ་ནག་རྒྱལ་ཁབ་བདེ་འཇགས་ལྷན་ཁང་ཟེར་བས། ཁོང་བཟའ་ཟླ་གཉིས་ཀྱིས་རྒྱ་ནང་དུ་ཉུལ་ཞིབ་བྱས་ཏེ་རྒྱལ་ཁབ་ཀྱི་གསང་བ་རྐུ་འཁྱེར་བྱས་པའི་ཉེས་འཛུགས་ཐོག འཛིན་བཟུང་དང་བསྐྱིལ་བྱས་ཡོད་པ་དང་། ཕྱི་ལོ་ ༢༠༡༥ ལོའི་ཕྱི་ཟླ་ ༢ ནང་ཀློད་གྲོལ་བཏང་ཡོད་ནའང་། རེས་གཟའ་སྔོན་མར་ཁེ་ན་ཌའི་གཞུང་གིས་རྒྱ་ནག་གི་དྲ་ཐོག་གསང་ཉུལ་བ་ཚོས་ཁེ་ན་ཌ་གཞུང་མང་གཉིས་ཀྱི་དྲ་ཚིགས་དང་གློག་ཀླད་མ་ལག་འཕྲུལ་ཆས་ནང་ལྐོག་འཛུལ་བྱས་པའི་གནད་དོན་ལ་སྐྱོན་བརྗོད་གནང་རྗེས། རྒྱ་ནག་གཞུང་གིས་གྷ་ར་ཊི་བཟའ་ཟླ་གཉིས་བསྐྱར་དུ་འཛིན་བཟུང་བྱས་ཡོད་པ་དང་། གནད་དོན་འདི་ལ་བརྟེན་ནས་ཁེ་ན་ཌ་དང་རྒྱ་ནག་གཉིས་བར་དོ་ཕོག་ཆེ་རུ་འགྲོ་བཞིན་ཡོད་འདུག
གསར་འགོད་པ། པདྨ་རྒྱལ།
