ངའི་མིག་ལམ་ནས་མཐོང་བཞིན་པའི་ ༢༠༡༦ ལོའི་སྲིད་སྐྱོང་འོས་བསྡུ།

སྐལ་བཟང་སྤེན་པ།

འདི་ལོའི་སྲིད་སྐྱོང་གི་འོས་བསྡུའི་སྐོར་ལ་རྒྱུད་ལམ་འདྲ་མིན་ཐོག བགྲོ་གླེང་དང་གླེང་སློང་སྣ་ཚོགས་བྱས་པས། མི་མང་ལ་གོ་རྟོགས་ངེས་ཅན་ཐེབས་ཡོད་པ་སྨོས་མེད་རེད། སྐབས་རེ་རྒྱུད་ལམ་དེ་དག་གི་ཐོག་རྩོད་གླེང་ཡང་མི་ཉུང་བ་ཞིག་བྱུང་བ་དེ་ཡང་དོན་དངོས་རེད། ཕྱོགས་གཞན་ཞིག་ནས་བསམ་ན། གཞི་མེད་སྐྱོན་འཛུགས་ལ་སོགས་པའི་གནད་དོན་ཅི་འདྲ་ཞིག་ཡིན་ཡང་།   མི་མང་ཁྲོད་གླེང་སློང་བྱས་ཚེ། གཞི་ནས་གསལ་ཁ་ཞིག་རང་བཞིན་གྱི་ཡོང་གི་ཡོད།

དེ་ནི་དགེ་མཚན་གྱི་རང་བཞིན་ཞིག་ཀྱང་ཡིན་པར་འདོད། འོན་ཀྱང་། ངས་སྲིད་སྐྱོང་འོས་མི་རྣམ་པར་གཞི་མེད་སྐྱོན་འཛུགས་བྱེད་དགོས་པའི་སྐུལ་མ་རྩ་བ་ནས་ཞུ་གི་མེད། གང་ལྟར། ད་རེས་ཀྱི་འོས་བསྡུའི་ཁྲོད་མི་མང་གི་བགྲོ་གླེང་གི་ཆ་ཤས་ལེན་པ་ནི་ཧ་ཅང་གི་ཚད་མཐོ་པོ་རེད། དེ་ནི་གསར་ལམ་ཁག་དང་། སྐད་ཕྲིན། ངོ་དེབ། དེ་མིན་དྲ་ལམ་ཁག་གི་བཀའ་དྲིན་ཡིན་པ་སྨོས་མེད་རེད། སྔོན་འགྲོའི་འོས་བསྡུའི་གོང་ལ་སྲིད་སྐྱོང་འོས་མི་བཀྲ་ཤིས་དབང་འདུས་ལགས་དང་ཀླུ་མཁར་འབྱམས་གཉིས་ཀྱིས་སྲིད་སྐྱོང་འོས་མི་གཞན་པ་གསུམ་ལས་ཁྱབ་བསྒྲགས་ཤུགས་ཆེར་བྱས་པ་རེད། ལྷག་པར་དུ། ཀླུ་མཁར་འབྱམས་ཀྱིས་༧གོང་ས་མཆོག་ལ་མཚན་སྨད་ཞུས་པའི་གཏམ་བཤད་དེ་དག་གིས། མི་མང་གི་དུས་ཚོད་མི་ཉུང་བ་ཞིག་ཆུད་ཟོས་སུ་བཏང་པ་རེད། གང་ཡིན་ཟེར་ན། མི་མང་མང་པོ་ཞིག་གི་བགྲོ་གླེང་དེ་ཀླུ་མཁར་འབྱམས་ཀྱིས་བཤད་པའི་གཏམ་བཤད་དེའི་མཐའ་ཁོར་དུ་ལྷུང་སོང་བ་རེད།

གོང་ཞུས་སྲིད་སྐྱོང་འོས་མི་གཉིས་ཀྱིས། རང་ཉིད་ཁྱབ་བསྒྲགས་ཤུགས་ཆེར་བྱས་མིན་ལ་མ་ལྟོས་པར། དངོས་གཞིའི་འོས་མི་གཉིས་ནི་སྲིད་སྐྱོང་བློ་སེང་ལགས་དང་། སྤྱི་འཐུས་ཚོགས་གཙོ་སྤེན་ཚེ་ལགས་གཉིས་ཡིན་པ་མངོན་དཔག་ཐུབ་ཀྱི་ཡོད། ཁོང་གཉིས་ལའང་དེ་ལྟ་བུའི་གདེང་ཚོད་ཡོད་པ་འདྲ། ཁོང་གཉིས་ཀྱིས་སྔོན་འགྲོའི་གོང་ལ་རང་ཉིད་ཁྱབ་བསྒྲགས་ཀྱི་ལས་འགུལ་མངོན་གསལ་ཅན་གང་ཡང་སྤེལ་མེད། སྔོན་འགྲོའི་འོས་བསྡུའི་སྐབས། ལས་ཐོག་སྲིད་སྐྱོང་དང་ལས་ཐོག་སྤྱི་འཐུས་ཚོགས་གཙོ་གཉིས་ལ་ཐོབ་པའི་འོས་གྲངས་ཀྱི་བར་ཁྱད། ༡༩༧༧༦ དེ་རེད། ཚོགས་གཙོ་སྤེན་ཚེ་ལ། སྔོན་འགྲོའི་སྐབས་ཀྱི་སྲིད་སྐྱོང་འོས་མི་བྱིངས་ཚོའི་འོས་གྲངས་ ༤༤༩༣ ཚང་མ་ཐོབ་པའི་དབང་དུ་བཏང་ཡང་། བློ་སེང་ལས་རྣམ་པར་རྒྱལ་ཐབས་མེད་པ་ལྟ་བུ་རེད།

དེ་ལྟ་བུའི་འོས་བསྡུའི་གྲུབ་འབྲས་དེས། ཚོགས་གཙོ་སྤེན་ཚེ་མཆོག་ཡིད་ཐང་ཆད་དགོས་པ་ལྟ་བུ་ཞིག་རེད། འོན་ཀྱང་། དེ་ནི་སྔོན་འགྲོའི་འོས་བསྡུའི་གྲུབ་འབྲས་དེ་འདྲ་ཞིག་ཡིན་ཡང་། ལས་ཐོག་སྲིད་སྐྱོང་མཆོག་གི་མཐའ་མའི་རྒྱལ་ཁ་དེ་མ་རེད་ལ་ལས་ཐོག་ཚོགས་གཙོ་མཆོག་གི་མཐའ་མཇུག་གི་ཕམ་ཁ་ཡང་མ་རེད། དེ་བས་འཁྲུག་ཆ་དོད་པའི་འོས་བསྡུའི་ལས་རིམ་ནི་ད་དུང་ཡང་ཚ་ཚ་འུར་འུར་ཐོག་འགྲོ་བཞིན་ཡོད། ལྷག་པར་དུ། ཚོགས་གཙོ་མཆོག་དང་ཁོང་གི་རྒྱབ་སྐྱོར་བ་ཚོས། སྔོན་འགྲོའི་འོས་བསྡུའི་མཇུག་འབྲས་ལ་ཡིད་ཞུམ་ནས་མ་བསྡད་པར། སྔར་བས་འབད་བརྩོན་དང་སྔར་བས་ཁྱབ་བསྒྲགས་ཤུགས་ཆེན་བྱེད་བཞིན་ཡོད། ཚོགས་གཙོ་སྤེན་ཚེ་ལགས་ཀྱིས་སྔོན་འགྲོའི་འོས་བསྡུའི་གོང་དང་མི་འདྲ་བར། དེང་སྐབས་འོས་བསྡུའི་ཁྱབ་བསྒྲགས་ཆེད། ནུབ་ཕྱོགས་ཡུལ་གྲུ་མི་ཉུང་བ་ཞིག་ཏུ་ཕེབས་པ་མ་ཟད། བློ་སེང་སྲིད་གཞུང་གི་འཐུས་ཤོར་ཕྱིན་པའི་སྲིད་བྱུས་དང་། མཛད་ཕྱོགས་རྣམས་ལ་སྐྱོན་བརྗོད་གནང་ཞོར་རང་ཉིད་ལ་སྲིད་སྐྱོང་གི་འོས་ཐོབ་ཚེ། བློ་སེང་སྲིད་གཞུང་གི་སྲིད་བྱུས་དང་མི་འདྲ་བའི་སྲིད་བྱུས་ཅི་འདྲ་ཟིག་ལག་སྟར་གནང་མིན་མི་མང་ལ་གསལ་ཁ་བཏོད་བཞིན་ཡོད། ཁོང་གིས་གནང་བའི་བཀའ་མོལ་དེ་དག་གིས་ཁོང་ལ་སྔོན་འགྲོའི་འོས་ཐོབ་ཀྱི་གྲངས་འབོར་ལས་མང་བ་ཐོབ་པ་སྨྲོས་མེད་ཡིན་པ་མ་ཟད། ཐ་ན། སྲིད་སྐྱོང་གི་ཞབས་སྟེགས་ཚ་པོ་དེ་ཁོང་ལ་མི་ཐོབ་པའི་ངེས་པའང་མེད་པ་ཞིག་རང་བཞིན་གྱི་མཐོང་ཡོང་གི་འདུག

དེ་ཡང་། སྲིད་སྐྱོང་འོས་མི་སྤེན་པ་ཚེ་རིང་མཆོག་གིས་བློ་བཟང་སེང་གེ་མཆོག་གི་སྲིད་གཞུང་གི་འཐུས་ཤོར་འབུར་བཏོན་གནང་པ་གཙོ་བོ་ཁག་ནི་། ༡) བློ་སེང་སྲིད་གཞུང་གིས། བོད་རྒྱ་ཞི་མོལ་ཚོགས་ཆུང་དེ་ཚོགས་ཆེན་ལྟ་བུ་བསྒྱུར་བ་ཙམ་ལས། བོད་རྒྱ་ཞི་མོལ་གྱི་མི་འགྲོ་ད་དུང་ཡང་ངེས་གཏན་ཐུབ་མེད་ཁར། བོད་ཞི་མོལ་ཆེད་ལས་དོན་ཅི་བྱས་གང་ཡང་སྟོན་རྒྱུ་མེད་པ། གལ་ཏེ་སྲིད་སྐྱོང་གི་འོས་ཤོག་ཚོགས་གཙོ་མཆོག་ལ་ཐོབ་ཚེ། ཁོང་གིས་ཚོགས་ཚུང་གི་ཚོགས་མི་ཉུང་འཕྲི་དང་སྦྲགས། ༧གོང་ས་མཆོག་ལ་དགོངས་སྐོར་ཞུས་ཏེ། མི་འགྲོ་ངེས་གཏན་གྱིས་མ་འོངས་པར་བོད་རྒྱ་ཞི་མོལ་གྱི་ལས་དོན་ཐད། རང་ཉིད་ཀྱི་སྲིད་གཞུང་གིས་ཤུགས་སྣོན་ག་རེ་རྒྱབ་མིན་རྣམས་མི་མང་ལ་འགན་ཁྱེར་བའི་ཐོག་ནས། ལས་སྙན་ཞུ་རྒྱུ་ཡོད་པ་བྱ་རྒྱུ། ༢)བློ་སེང་སྲིད་ཞུང་གིས་བོད་སློབ་འཛིན་སྐྱོང་འོག་ཡོད་པའི་སློབ་གྲ་རྣམས། བོད་མིའི་སྒྲིག་འཛུགས་ཤེས་ལས་ཀྱི་ཁྱབ་ཁོངས་སུ་ལེན་མ་ཐུབ་པར་བར་སར་ལྷག་སྟབས། ཕྲུ་གུའི་ཤེས་ཡོན་ལ་འཐུས་ཤོར་ཕྱིན་པ། གལ་ཏེ་སྲིད་སྐྱོང་གི་ཞབས་སྟེགས་ཁོང་ལ་ཐོབ་ན། ཁོང་གིས་བོད་སློབ་འཛིན་སྐྱོང་འོག་ཡོད་པའི་སློབ་གྲ་རྣམས། བོད་མིའི་སྒྲིག་འཛུགས་ཀྱི་འོག་ཏུ་ལེན་ཐུབ་མིན་བཟང་ཐག་ངན་ཐག་གཙང་མ་བཅད་རྒྱུ་ཡིན་ལུགས། ༣) བློ་སེང་སྲིད་གཞུང་གིས། ཆོས་རིག་ལས་ཁུངས་ཀྱི་ནུས་པ་ཆེར་སྐྱེད་བྱེད་མ་ཐུབ་པ། སྤེན་ཚེ་སྲིདགཞུང་གིས། ཆོས་རིག་ལས་ཁུང་གིས་བོད་པའི་སྤྱི་ཚོགས་དང་དགོན་སྡེ་ཁག་གི་ཟམ་པ་བྱས་ཏེ། གཞོན་སྐྱེས་རྣམས་ལ་བོད་ཀྱི་ནང་བསྟན་ཤེས་རིག་ལ་སོགས་པའི་ལེགས་བྱང་ངོ་སྤྲོད་བྱ་རྒྱུར་ཤུགས་སྣོན་རྒྱག་རྒྱུ། ༤)བློ་གསེང་སྲིད་གཞུང་གིས་བོད་དོན་རྒྱབ་སྐྱོར་ཚོགས་པ་སོགས་ལ་སྲིད་བྱུས་ངེས་གསལ་མེད་རྐྱེན། བོད་དོན་ཚོགས་པའི་ནུས་ཤུགས་ཉམས་གུད་དུ་འགྲོ་བཞིན་པ། སྤེན་ཚེ་སྲིད་གཞུང་གིས་བོད་མིའི་སྒྲིགས་འཛུགས་ཀྱི་བོད་དོན་རྒྱབ་སྐྱོར་ཚོགས་པ་ཁག་ལ་འཛིན་པའི་སྲིད་བྱུས་གསལ་བརྡ་སྤྲད་ཏེ། མ་འོངས་པར་བོད་དོན་རྒྱབ་སྐྱོར་ཚོགས་པའི་ནུས་པ་གོང་སྤེལ་གཏོང་རྒྱུ། ༥) བློ་སེང་སྲིད་གཞུང་གིས། གཞིས་ཆགས་ཁག་ཏུ་ལས་བྱ་རེ་བཟུང་མངགས་གཏོང་ཙམ་ལས། གཞིས་ཆགས་སྲ་བརྟན་གྱི་ནུས་པ་བཏོན་ཐུབ་མེད་པ། སྤེན་ཚེ་སྲིད་གཞུང་གིས། ཟླ་བ་གསུམ་ནང་ཚུད་ལ་གཞིས་ཆགས་ཁག་གི་གནད་དོན་ལ་ཉམས་ཞིབ་བྱས་ཏེ། གཞིས་མིའི་དགོས་འདུན་གཙོར་བཟུང་ཐོག སྲིད་བྱུས་ལག་སྟར་བྱ་རྒྱུ། ༦) བློ་སེང་སྲིད་གཞུང་གིས། བོད་མིའི་དང་བླུངས་བཅའ་དངུལ་ལག་དེབ་སྤྲོད་ཕྱོགས་ཐད། ད་དུང་ཡང་དཀའ་ངལ་སེལ་མ་ཐུབ་པར་ནུབ་ཕྱོགས་སུ་ཡོད་པའི་བོད་མི་མི་ཉུང་བ་ཞིག་ལ་དཀའ་ངལ་འཕྲད་བཞིན་པ། སྤེན་ཚེ་སྲིད་གཞུང་གིས། བོད་མིའི་སྒྲིགས་འཛུགས་ཀྱི་རྩ་བའི་ཆེ་མཐོང་མི་བརླགས་པའི་ཐོག དང་བླངས་ལག་དེབ་མེད་པའི་བོད་མི་ཚོར་ལག་དེབ་སྤྲོད་ཐབས་གནང་རྒྱུ། ༧) བློ་སེང་སྲིད་གཞུང་གིས། བོད་མིའི་སྒྲིག་འཛུགས་ཀྱི་རྒྱ་ཡིག་སྡེ་ཚན་ནུས་མེད་དུ་སྐྱུར་འཇོག་བྱས་པ་མ་ཟད། ཨ་རིའི་དོན་གཅོད་ནང་བོད་རྒྱ་འབྲེལ་མཐུད་པའི་ས་མིག་ཀྱང་། དུས་ཐོག་ཏུ་བཀང་མ་ཐུབ་པར་ལས་དོན་ལ་འཐུས་ཤོར་ཕྱིན་པ། སྤེན་ཚེ་སྲིད་གཞུང་གིས། རྒྱ་ཡིག་སྡེ་ཚན་དེ། དྲུང་ཆེའི་གནས་རིམ་ཞིག་གི་ཐོག་ནས་བོད་རྒྱ་འབྲེལ་མཐུད་ལ་སོགས་པའི་ལས་དོན་ཐད་ནུས་པ་ཆ་ཚང་འདོན་སའི་ཁོར་ཡུག་བསྐྲུན་རྒྱུ།

༨) དེ་བས་ཚབས་ཆེ་ཤོས་ཀྱི་གནད་དོན་གཅིག་ནི། དུས་འཁོར་དབང་ཆེན་ཕྱིར་འཐེན་གནང་དགོས་བྱུང་བའི་གནད་དོན་དེ་རེད། བཀའ་ཤག་གི་ཡོངས་ཁྱབ་གསལ་བསྒྲགས་ནང་། དུས་འཁོར་དབང་ཆེན་ཕྱིར་འཐེན་གནང་དགོས་བྱུང་བའི་རྒྱུ་མཚན་ནི། ༧གོང་ས་མཆོག་གི་སྐུའི་འཕྲོད་བཞེས་དང་འབྲེལ་བ་ཡོད་ལུགས་དེ་རེད། དེ་བཞིན་དུ། ༧གོང་ས་མཆོག་གིས་ཀྱང་། བཀལ་མོལ་དེ་ལྟར་གནང་ཡོད། འོན་ཀྱང་། ཉེ་དུས་སྤྱི་འཐུས་ཚོགས་གཙོ་མཆོག་གིས། དུས་འཁོར་དབང་ཆེན་ཕྱིར་འཐེན་གནང་དགོས་པའི་རྒྱུ་མཚན་ངོ་མ་ནི། ཚོགས་པ་གཅིག་གིས་༧གོང་ས་མཆོག་ལ་དུས་དབང་སྐབས་བརྟན་བཞུགས་འབུལ་རྒྱུའི་འཆར་གཞི་ཡོད་པ་དེའི་རྒྱབ་ལོག་ནས་བྱུང་ལུགས་གསུངས་ཡོད། གནད་དོན་དེའི་ཐད། ཞིབ་ཕྲའི་གནས་ཚུལ་མི་ཉུང་བ་ཞིག་མཐོན་བཞིན་ཡོད། གང་ལྟར། དོན་དངོས་ཐོག་དུས་དབང་ཕྱིར་འཐེན་གནང་དགོས་པའི་རྒྱུ་མཚན་ངོ་མ་དེ། སྲིད་སྐྱོང་ལ་ཐུག་པ་དེ་ཡང་རང་བཞིན་གྱི་གསལ་པོ་ཆགས་ཡོང་གི་འདུག དེ་བཞིན་དུ་ལས་ཐོག་དྲིལ་དང་ནང་སྲིད་བཀའ་བློན་གཉིས་ཀས་སྐབས་རྗེས་མའི་བཀའ་བློན་གྱི་ལས་གནས་བཞེས་རྒྱུ་མིན་པའི་སྐད་ཆ་ཞིག་ཀྱང་མཐོན་ཡོང་གི་འདུག གནད་དོན་དེ་བདེན་པ་ཡིན་ཚེ། མི་མང་ལ་སླར་ཡང་དྲི་བ་མང་པོ་ཞིག་ཡོང་གི་ཡོད་པ་ནི་སྨྲོས་མེད་རེད།

མདོར་བསྡུས་ནས་བཤད་ན། སྲིད་སྐྱོང་བློ་སེང་མཆོག་དང་ཁོང་གིས་རྒྱབ་སྐྱོར་བ་ཚོས། གོང་ཞུས་སྲིད་སྐྱོང་འོས་མི་སྤེན་ཚེ་ལགས་ཀྱིས་གནང་བའི་སྐྱོན་བརྗོད་དེ་དག་ལ། རེ་རེ་བཞིན་མི་ཡིད་ཆེས་པ་དང་འདྲེ་ཁོ་ཐག་ཆོད་པའི་གསལ་བཤད་ཡག་པོ་ཞིག་གནང་རྒྱུ་མེད་ཚེ། དངོས་གཞིའི་འོས་བསྡུའི་ཕམ་ཁ་ཉོ་མཁན་དེ་སྲིད་སྐྱོང་བློ་སེང་ལགས་ཡིན་པ་ཆུ་དང་ཉ་གསལ་ལྟ་བུ་ཆགས་ཡོང་གི་འདུག་ཀོ།

གོང་ཞུས་ཕྲན་གྱིས་ལུང་འདྲེན་བྱས་པའི་ཚོགས་གཙོའི་བཀའ་མོལ་ཐད་ནོར་འཛོལ་ཡོད་ན། ལེགས་གཅོས་གནང་སྐྱོང་ཡོང་བའི་རེ་བ་ཞུ།