གྲངས་ཉུང་མི་རིགས་ཀྱི་སྐད་ཡིག་ཤེས་མཁན་བསྡུ་ལེན།

རྒྱ་ནག་རྒྱལ་ཁབ་བདེ་འཇགས་ལྷན་ཁང་གིས་གྲངས་ཉུང་མི་རིགས་ལ་ལྟ་རྟོག་ཤུགས་ཆེ་རུ་གཏོང་ཆེད་བོད་དང་ཡུ་གུར་སོགས་གྲངས་ཉུང་མི་རིགས་ཀྱི་སྐད་ཡིག་ཤེས་མཁན་བསྡུ་ལེན་བྱེད་བཞིན་འདུག

རྒྱ་ནག་རྒྱལ་ཁབ་བདེ་འཇགས་ལྷན་ཁང་གི་མི་སྣ་སློབ་ཆེན་ཁག་གི་ནང་ཆེད་གཏོང་གིས་བོད་དང་ཡུ་གུར། སོག་པོ་སོགས་གྲངས་ཉུང་མི་རིགས་ཀྱི་སྐད་ཡིག་ཤེས་མཁན་དང་། ཉི་ཧོང་དང་འཇར་མན། དབྱིན་ཇི་སོགས་ཕྱི་རྒྱལ་གྱི་སྐད་ཡིག་ཤེས་མཁན་གྱི་ལས་བྱེད་གསར་པ་བསྡུ་བའི་ལས་གཞི་ཞིག་སྤེལ་བཞིན་ཡོད་པ་དང་། གནད་དོན་དབྱེ་ཞིབ་པ་ཚོས་དེ་ནི་གྲངས་ཉུང་མི་རིགས་ལ་ལྟ་རྟོག་ཤུགས་ཆེ་རུ་གཏོང་བ་དང་ཕྱིའི་རྒྱལ་ཁབ་ཁག་ལ་འཐབ་པའི་ལྐོག་ཇུས་ཤིག་ཡིན་སྐོར་རྗོད་ཀྱི་འདུག

ཉེ་སྔོན་རྒྱ་ནག་ཧྭ་ཏུང་དགེ་འོས་སློབ་ཆེན་ཞབས་ཞུ་ལྟེ་གནས་ཀྱི་དྲ་རྒྱའི་ཐོག ཧྲང་ཧེ་གྲོང་ཁྱེར་རྒྱལ་ཁབ་བདེ་འཇགས་ལྷན་ཁང་གི་མི་སྣ་སློབ་ཆེན་ཁག་ཏུ་ཆེད་གཏོང་གིས། གྲངས་ཉུང་མི་རིགས་ཀྱི་སྐད་ཡིག་དང་ཕྱི་སྐད་ཤེས་མཁན་གྱི་ལས་བྱེད་བསྡུ་རྒྱུ་ཡིན་པའི་བརྡ་ཐོ་ཞིག་ཕྱིར་གྱར་ཡོད་པ་དང་། ཕྱིས་སུ་བརྡ་ཐོ་དེ་དྲ་ལམ་ནས་ནག་གསུབ་བཏང་ཡོད་ཀྱང་། ཧྭ་ཏུང་སློབ་ཆེན་ཞབས་ཞུ་ལྟེ་གནས་ཀྱི་ལས་བྱེད་ཅིག་གིས་དེ་ནི་ནང་ཁུལ་གྱི་གསང་བའི་བརྡ་ཐོ་ཞིག་ཡིན་ལ། ལས་གཞི་དེ་སྤེལ་བ་ཐེངས་དང་པོ་མིན་པར་དེ་སྔོན་ཧང་ཀྲུའུ་ཀྲེ་ཅང་སློབ་ཆེན་དང་པེ་ཅིན་གྱི་རྒྱ་ནག་སྲིད་ཁྲིམས་སློབ་ཆེན། ཁྲིན་ཏུའུ་གློག་རྡུལ་ཚན་རྩལ་སློབ་ཆེན་བཅས་ཀྱི་ནང་སྤེལ་ཡོད་ལུགས་དང་། ཕྱི་ལོ་ ༢༠༡༧ ལོའི་ལས་འཚོལ་སློབ་མར་དམིགས་ཏེ་འདི་ལོའི་ཕྱི་ཟླ་ ༦ པའི་ནང་ཧྭ་ཏུང་སློབ་ཆེན་ནང་བསྐྱར་དུ་ལས་གཞི་དེ་སྤེལ་རྒྱུ་ཡིན་ལ། བདེ་འཇགས་ལྷན་ཁང་གིས་བཏོན་པའི་ཆ་རྐྱེན་གྱི་ལོ་ཚད་མི་འདྲ་བ་ལ་དགོས་འདུན་ཡང་མི་འདྲ་བ་ཡོད་ལ། ལྷན་ཁང་གི་དགོས་མཁོ་ལྟར་ཐག་གཅོད་རྒྱུ་ཡིན་པ་མ་ཟད། འབྲེལ་ཡོད་མི་སྣའི་རྒྱབ་ལྗོངས་ཀྱི་ཚད་གཞི་ལའང་འགྱུར་ལྡོག་ཡོད་སྐོར་བརྗོད་འདུག

ཟླ་འདིའི་ཕྱི་ཚེས་ ༢༢ ཉིན་ནེའུ་ཡོག་དུས་བབ་ཀྱིས། རྒྱ་ནག་བདེ་འཇགས་ལྷན་ཁང་གི་ལས་བྱེད་གསར་པ་བསྡུ་བའི་ལས་གཞི་དེ་ནི་གཙོ་བོ་རྩིས་འཕྲུལ་གྱི་གཉེན་ཆས་དང་ཆ་འཕྲིན་གྱི་བདེ་འཇགས། འཕྲིན་གཏོང་ལག་རྩལ་སོགས་ཀྱི་ཆེད་ལས་པ་དང་། རྒྱལ་སྤྱིའི་འབྲེལ་ལམ་དང་རྒྱལ་སྤྱིའི་ཆབ་སྲིད། དེ་བཞིན་ལོ་རྒྱུས་དང་གསར་འགྱུར། ཤེར་རྟོགས་རིག་པ་སོགས་ཀྱི་ཐོག་ཆེད་སྦྱོང་ཐོན་པའི་སློབ་མ་ཚོར་དམིགས་པ་ཞིག་ཡིན་ལ། ཞི་ཅིན་ཕིན་སྲིད་སྟེགས་སུ་བསླེབས་རྗེས་རྒྱལ་ཁབ་ཀྱི་བདེ་འཇགས་སྲུང་སྐྱོབ་སྔར་ལས་ཤུགས་ཆེ་རུ་བཏང་སྟེ། སྲིད་གཞུང་དང་ལྟ་བ་མི་མཐུན་པའི་ལས་འགུལ་བ་ཚོར་རྡུང་རྡེག་གཏོང་བ་དེ་སྲིད་སྐྱོང་གི་རྨང་གཞི་གཙོ་བོར་རྩི་ཡི་ཡོད་པ་ལྟར། བདེ་འཇགས་ལྷན་ཁང་གིས་ཉུང་མཐར་ལས་གཞི་དེའི་འོག་ནས་ལས་བྱེད་སྟོང་ཕྲག་མང་པོ་བསྡུས་ཡོད་སྐོར་བརྗོད་འདུག

དྲ་ལམ་དུ་ཕྱི་ལོ་ ༢༠༠༧ ལོར་ལས་གཞི་དེའི་ནང་ཞུགས་པའི་སློབ་མ་ཞིག་གིས། ཁོ་རང་ལོ་གཅིག་རིང་ཚོད་ལྟའི་ངོ་བོའི་ཐོག་ནས་ལས་ཀ་དེར་ཞུགས་ཤིང་། གླ་ཕོགས་ཟླ་རེར་རྒྱ་སྒོར་ ༤༠༠༠ རེ་ཡོད་པ་དང་། ཉུང་མཐར་ལོ་ ༡༠ རིང་ལས་ཀ་བྱ་རྒྱུ་ཡིན་པའི་གན་རྒྱ་འཇོག་དགོས་ལ། ལས་གཞི་དེ་གཙོ་བོ་ཆ་འཕྲིན་བདེ་འཇགས་ཐད་ཀྱི་ཆེད་ལས་ཞིབ་འཇུག་སློབ་མ་ཚོར་དམིགས་ཡོད་པ་དང་། སྤྱིའི་ཆ་ནས་ཚེ་སྲོག་གི་ཉེན་ཁ་མེད་ཀྱང་ལས་ཀ་ཧ་ཅང་ཁག་པོ་ཡིན་པས་བུད་མེད་རྣམས་ཚུད་ཁག་ཙམ་ཡོད་སྐོར་བརྗོད་ཡོད་པ་རེད།

གྲངས་ཉུང་མི་རིགས་ལ་དམ་དྲག་ཤུགས་ཆེ་རུ་གཏོང་བའི་ལས་གཞི་དེའི་ཐད་འཛམ་གླིང་ཡུ་གུར་མི་རིགས་མཐུན་ཚོགས་ཀྱི་མགྲིན་ཚབ་པ་དི་ལི་ཞྭ་ལགས་ཀྱིས། རྒྱ་གཞུང་གིས་ཤིན་ཅང་ནང་ཞི་འཇགས་ཡོང་སླད་དང་། གྲངས་ཉུང་མི་རིགས་ཚོར་ལྟ་རྟོག་ཆེད་མི་རྒྱུ་གཉིས་ཐད་ནས་འགྲོ་སོང་དེ་འདྲ་མང་པོ་ཞིག་གཏོང་བ་ལས། ཁོང་ཚོ་རང་སྐྱོང་བྱེད་པར་མོས་མཐུན་དང་། ཁོང་ཚོའི་རིག་གནས་དང་ཆོས་ལུགས། ཡུལ་སྲོལ་གོམས་གཤིས་བཅས་ལ་བརྩི་བཀུར་བྱས་པ་ཡིན་ན་ཞི་འཇགས་རང་བཞིན་གྱིས་ཆགས་རྒྱུ་ཡིན་སྐོར་བརྗོད་འདུག

གནད་དོན་དབྱེ་ཞིབ་པ་ཚོས། ཞི་ཅིན་ཕིན་གྱིས་རྒྱལ་ཁབ་ཀྱི་མཐའ་མཚམས་བརྟན་སྲུང་དང་དྲ་ལམ་བདེ་འཇགས་ལ་ལྟ་རྟོག་ནན་པོ་དགོས་པའི་བཀོད་ཇུས་འོག བདེ་འཇགས་ལྷན་ཁང་གི་ལས་བྱེད་འདེམས་སྒྲུག་ཚོགས་པས་བོད་དང་ཡུ་གུར་མི་རིགས་སོགས་གྲངས་ཉུང་མི་རིགས་ཀྱི་སྐད་ཡིག་ཤེས་མཁན་ཚོ་བསྡུ་ལེན་བྱེད་བཞིན་ཡོད་པ་དང་། ལས་གཞི་དེ་ནི་སྔར་ལས་གྲངས་ཉུང་མི་རིགས་ལ་ལྟ་རྟོག་དང་དམ་དྲག་ཤུགས་ཆེ་རུ་གཏོང་ཆེད་ཡིན་པ་མ་ཟད། ལས་གཞི་དེའི་ཁྲོད་གྲངས་ཉུང་མི་རིགས་ཀྱི་སྐད་ཡིག་ཤེས་མཁན་རྒྱ་རིགས་ཚོར་གོ་སྐབས་མང་པོ་རག་གི་ཡོད་སྐོར་བརྗོད་འདུག

གསར་འགོད་པ། པདྨ་མཚོ།