བལ་པོར་གློག་དྲ་མཉམ་འབྲེལ་བྱ་རྒྱུ་ཡིན་ཟེར།

རྒྱ་གཞུང་གིས་བོད་ནས་བལ་པོ་དང་རྒྱ་གར། འབྲུག་བཅས་ཀྱི་ས་མཚམས་བར་ལྕགས་ལམ་བཟོ་རྒྱུ་དང་བལ་པོར་གློག་དྲ་མཉམ་འབྲེལ་བྱ་རྒྱུ་ཡིན་སྐོར་བསྒྲགས་འདུག

དེ་རིང་རྒྱ་ནག་གཞུང་གིས་ཕྱི་ལོ་ ༢༠༢༠ ལོར་རྒྱ་ནག་དང་བལ་པོའི་གློག་གི་དྲ་བ་མཉམ་འབྲེལ་བྱ་རྒྱུ་ཡིན་པ་དང་། གློག་དྲ་མཉམ་འབྲེལ་གྱི་ལས་གཞི་དེ་མ་འོངས་པར་ལྷོ་ཨེ་ཤ་ཡའི་གློག་དྲ་དང་མཐུད་པའི་གལ་ཆེའི་འབྲེལ་ཟམ་ཞིག་ཏུ་ཆགས་རྒྱུ་ཡིན་ལུགས་དང་། ཕྱི་ལོ་ ༢༠༢༠ ལོར་གཞིས་རྩེ་ནས་རྒྱ་གར་དང་འབྲུག་ཡུལ་གྱི་མཐའ་མཚམས་བར་དང་། གཞིས་རྩེ་ནས་བལ་པོའི་མཐའ་མཚམས་སུ་བསྐྱོད་པའི་ལྕགས་ལམ་བཟོ་རྒྱུ་དང་། ཨ་སྒོར་དུང་ཕྱུར་གཅིག་ཙམ་གྱི་མ་དངུལ་གཏང་སྟེ་བལ་པོའི་རྒྱལ་ས་ནས་བོད་ལྗོངས་བར་གྱི་གཞུང་ལམ་ལེགས་བཅོས་བྱ་རྒྱུ་ཡིན་སྐོར་བསྒྲགས་འདུག

རྒྱ་གཞུང་གིས་བལ་པོའི་ནང་གློག་དྲ་མཐུད་རྒྱུ་ཡིན་པའི་སྐོར་ལ་བརྗོད་དོན། གློག་དྲ་མཉམ་འབྲེལ་དེ་ནི་ས་ཡོམ་རྗེས་ཀྱི་བལ་པོའི་ངོས་ནས་བརྗོད་ན་དུས་ཐོག་གི་ཆར་པ་ལྟ་བུ་ཞིག་ཏུ་གྱུར་ཡོད། དེས་བལ་པོར་འཕྲད་པའི་ཁ་ཚ་དགོས་ཐུག་གི་གློག་གི་དཀའ་ངལ་ཐག་གཅོད་བྱས་པ་ཞིག་ཡིན། བལ་པོའི་རྨང་གཞིའི་སྒྲིག་བཀོད་ཀྱི་ཆུ་ཚད་ཧ་ཅང་རྗེས་ལུས་ཡིན་པ་དང་གློག་ཤུགས་ནི་དེ་བས་ཀྱང་ཤིན་ཏུ་དགོས་མཁོ་ཆེ་བ་ཞིག་ཏུ་གྱུར་ཡོད། བལ་པོའི་རྒྱལ་ས་ཀ་ཊ་མན་ཏུའི་ནང་ས་ཁུལ་དབྱེ་བ་ཕྱེ་སྟེ་ཉིན་རེ་བཞིན་རེས་བསྐོར་ཏེ་གློག་གཏོང་མཚམས་འཇོག་གི་ཡོད་པ་དང་། དེ་སྔོན་ཉིན་རེར་ཆུ་ཚོད་༡༤ རིང་གློག་གཏོང་མཚམས་འཇོག་པའི་བྱ་ཐབས་ཀྱང་སྤེལ་མྱོང་ཡོད་པ་རེད། ཅེས་བརྗོད་འདུག

ཡང་གནས་ཚུལ་ནང་། རྒྱ་ནག་དང་བལ་པོ་གཉིས་བར་ཕྱི་འབྲེལ་གྱི་འབྲེལ་བ་བཙུགས་ནས་ལོ་ངོ་ ༦༠ ཕྱིན་ཡོད་པ་དང་། ཕྱི་ལོ་ ༢༠༡༤ ལོར་རྒྱ་ནག་གི་ཕྱི་འབྲེལ་བློན་ཆེན་ཝང་ཡས་བལ་ཡུལ་དུ་ཡོང་སྟེ། བལ་པོ་ནས་རྒྱ་ནག་ནང་ཚོང་འདྲེན་བྱེད་པའི་དཔྱ་ཁྲལ་བརྒྱ་ཆ་ ༩༧ རྩ་ཆག་བཏང་བ་སོགས་རྒྱབ་ཁབ་གཉིས་ཀྱི་དོན་དངོས་མཉམ་ལས་ཐད། ཁྱབ་ཁོངས་ཆེན་པོ་དགུ་དང་ཁག་ཐེག་གསུམ་གྱི་དམིགས་ཚད་བཏོན་ཡོད་པ་མ་ཟད། འདས་ལོར་བལ་ཡུལ་དུ་ས་ཡོམ་བྱུང་རྗེས་རྒྱ་ནག་གི་ཕྱོགས་ནས་བསྟུན་མར་ཐེངས་གསུམ་ལ་རོགས་སྐྱོར་བྱས་ཡོད་པར་བརྟེན། བལ་པོས་རྒྱ་ནག་ལ་བཀའ་དྲིན་ཞུ་ཆེད་འདི་ལོའི་ལོ་མགོ་ནས་བཟུང་རྒྱ་ནག་གི་མི་སེར་བལ་པོའི་ནང་སྤྲོ་འཆམ་གནས་སྐོར་དུ་ཡོང་བར་ཐོངས་མཆན་ཐོ་འགོད་མི་དགོས་པའི་དམིགས་བསལ་སྤྲད་ཡོད་སྐོར་བརྗོད་འདུག

གསར་འགོད་པ། པདྨ་མཚོ།