རྡོ་རྗེ་ཚེ་རིང་ལཊ་སྐུ་གྲོངས།

སྐུ་ལུས་མེར་སྲེག་གནང་མཁན་རྡོ་རྗེ་ཚེ་རིང་ལགས་ལ་མྱུར་སྐྱོབ་བྱས་ཏེ་ཕན་འབྲས་མ་ཐོན་པར་མདང་དགོང་སྨན་ཁང་དུ་སྐུ་གྲོངས་འདུག

ཁ་སང་ཕྱི་ཚེས་ ༣ ཉིན་གྱི་དགོང་མོའི་ཆུ་ཚོད་ ༨།༢༥ ཐོག་བོད་རྩ་དོན་ཆེད་སྐུ་ལུས་མེར་སྲེག་གནང་མཁན་རྡོ་རྗེ་ཚེ་རིང་ལགས་སྨན་ཁང་ནས་སྐུ་གྲོངས་ཡོད་པ་དང་། སང་ཉིན་ཞོགས་པར་ཁོང་གི་སྐུ་ཕུང་བཞུགས་སྒར་དྷ་རམ་ས་ལར་གདན་འདྲེན་ཞུ་འཆར་ཡོད་འདུག

རྡོ་རྗེ་ཚེ་རིང་ལགས་ཀྱིས་ཕྱི་ཟླ་ ༢ ཚེས་ ༢༩ ཉིན་གྱི་སྔ་དྲོའི་ཆུ་ཚོད་ ༨།༣༠ ཙམ་ལ་རྡེ་ར་རྡུན་དུ་སྐུ་ལུས་མེར་བསྲེགས་གནང་ཡོད་པ་དང་། དེ་མ་ཐག་ཁོང་གི་ཨ་མ་ལགས་སོགས་མི་མང་གིས་ཁོང་གི་ལུས་ཀྱི་མེ་བསད་དེ་ལྡི་ལིའི་སྨན་ཁང་(Safdarjung hospital)དུ་བསྐྱལ་ནས་ཛ་དྲག་མྱུར་སྐྱོབ་བྱས་ཡོད་ཀྱང་། ཕན་འབྲས་མ་ཐོན་པར་མདང་དགོང་སྨན་ཁང་དུ་སྐུ་གྲོངས་འདུག

སྨན་ཁང་དུ་མྱུར་སྐྱོབ་བྱེད་བཞིན་ཡོད་པའི་སྐབས་དེར་བརྙན་ཐུང་ནང་ཁོང་གིས་སྐུ་ལུས་མེར་བསྲེགས་གནང་དགོས་དོན་སྐོར་བརྗོད་སྐབས། ངས་ཕ་མ་གཉིས་བློས་བཏང་སྟེ་བོད་ཀྱི་ཆེད་དུ་རང་ལུས་མེར་བསྲེགས་བཏང་བ་ཡིན། མཐའ་དོན་༧གོང་ས་མཆོག་སྐུ་ཚེ་ཁྲི་ལོ་ནས་ཁྲི་ལོར་བརྟན་པ་དང་། བོད་རང་བཙན་མྱུར་ཏུ་འཐོབ་པའི་སྨོན་ལམ་ཡོད། བོད་རྒྱལ་ལོ། ཞེས་བརྗོད་འདུག

གསར་འགོད་པ། པདྨ་མཚོ།