ཁ་སང་རྒྱ་ནག་རྒྱལ་ཡོངས་དམངས་ཆེན་གྱི་ཚོགས་ཆེན་ཐོག་བཅར་བའི་འཐུས་མི་ཞིག་ལ་དེ་རིང་ཞིབ་བཤེར་བྱེད་བཞིན་ཡོད་འདུག
དེ་རིང་སྔ་དྲོར་རྒྱ་ནག་དབུས་སྒྲིག་ཁྲིམས་ཞིབ་བཤེར་ཁང་གིས། རྒྱལ་ཡོངས་དམངས་ཆེན་གྱི་སློབ་གསོ་ཚན་རིག་རིག་གནས་འཕྲོད་བསྟེན་ལྷན་ཚོགས་ཀྱི་ལས་ཐོག་ཚོགས་གཙོ་གཞོན་པ་དང་། ལོ་ལིན་ཞིང་ཆེན་གྱི་དམར་ཤོག་དྲུང་ཆེ་ཟུར་པ་ཝང་མིན་གྱིས། ཁྲིམས་འགལ་ཚབས་ཆེན་བྱས་ཡོད་པའི་དོགས་གཞིའི་འོག་ཞིབ་བཤེར་བྱེད་བཞིན་ཡོད་སྐོར་བསྒྲགས་འདུག
ཝང་མིན་དང་ད་ལྟའི་སྡོད་ཁང་དང་གྲོང་སྡེ་འཛུགས་སྐྲུན་ཁང་གི་འགན་འཛིན་ཁྲིན་ཀྲིན་གོ་གཉིས་ནི་ཅང་ཙེ་མིན་ཚོགས་པའི་སྟག་རྒན་གཉིས་ཡིན་ལ། དེ་སྔོན་ཅང་ཙེ་མིན་ཚོགས་པས་ཡུན་རིང་དབང་བསྒྱུར་བའི་ལོ་ལིན་ཞིང་ཆེན་གྱི་དམར་ཤོག་དྲུང་ཆེ་དང་ཞིང་ཆེན་སྤྱི་ཁྱབ་དཔོན་གྱི་གོ་གནས་བཟུང་ཡོད་པ་དང་། ལོ་ལིན་ཞིང་ཆེན་ནི་ལྐོག་ཟ་རུལ་སུངས་དང་དབང་ཆ་ལོག་སྤྱོད་ཀྱི་བྱ་སྤྱོད་རིགས་མང་ཤོས་ཀྱི་ཞིང་ཆེན་ཞིག་ཏུ་རྩི་ཡི་ཡོད་པ་ལྟར། ཞི་ཅིན་ཕིན་དང་ཝང་ཅི་ཧྲན་གཉིས་ཀྱི་ལྐོག་ཟ་རུལ་སུངས་ལ་རྒོལ་རྡུང་གཏོང་བའི་འཐབ་རྩོད་ཁྲོད། ལོ་ལིན་ཞིང་ཆེན་གྱི་མཐོ་རིམ་དཔོན་རིགས་མང་པོར་ཞིབ་བཤེར་དང་གནས་དབྱུང་གཏོང་བཞིན་ཡོད་པ་དང་། འདས་ལོའི་ཕྱི་ཟླ་ ༥ པའི་ནང་ཝང་མིན་ལོ་ལིན་ཞིང་ཆེན་གྱི་དམར་ཤོག་དྲུང་ཆེ་ནས་དམངས་ཆེན་གྱི་སློབ་གསོ་ཚན་རིག་རིག་གནས་འཕྲོད་བསྟེན་ལྷན་ཚོགས་ཀྱི་ཚོགས་གཞོན་དུ་ལས་གནས་སྤར་ཏེ། དབང་ཆ་མེད་པར་མིང་ཙམ་བཏགས་ནས་བཞག་ཡོད་པ་དང་། སྔ་ཕྱི་མ་གཏོགས་སྡོད་ཁང་དང་གྲོང་སྡེ་འཛུགས་སྐྲུན་ཁང་གི་འགན་འཛིན་ཁྲིན་ཀྲིན་གོ་སོགས་ཅང་ཙེ་མིན་གྱི་ཕྱོགས་གཏོགས་དཔོན་རིགས་གང་མང་ཞིག་གོ་གནས་ནས་ལྷུང་རྒྱུ་ཡིན་པའི་ཚོད་དཔག་བྱེད་བཞིན་འདུག
གསར་འགོད་པ། པདྨ་མཚོ།
