རྒྱ་ནག་རྒྱལ་ཡོངས་དམངས་འཐུས་ཚོགས་ཆེན་སྐབས་བཅུ་གཉིས་པའི་གྲོས་ཚོགས་ཐེངས་བཞི་བའི་སྟེང་སི་ཁྲོན་ཞིང་ཆེན་ཁྲིན་ཏུའུ་ལྷ་སའི་བར་མེ་འཁོར་ལྕགས་ལམ་གསར་འཛུགས་ཀྱི་ལས་གཞི་ཞིག་གཏན་འབེབས་བྱས་ཡོད་འདུག
རོའུ་ཊར་གསར་ཁང་གིས་གནས་ཚུལ་སྤེལ་དོན་ལྟར་ན། དེ་རིང་རྒྱ་ནག་གཞུང་འབྲེལ་བརྒྱུད་ལམ་ཞིན་ཧྭ་གསར་ཁང་གིས་སི་ཁྲོན་ཞིང་ཆེན་ཁྲིན་ཏུའུ་གྲོང་ཁྱེར་ནས་ད་ལྟའི་བོད་རང་སྐྱོང་ལྗོངས་འོག་གི་ཉིང་ཁྲི་བརྒྱུད་དེ་བོད་ཀྱི་རྒྱལ་ས་ལྷ་སའི་བར་ལྕགས་ལམ་གསར་འཛུགས་བྱ་འཆར་ཡོད་པ་འདུག
དེ་ཡང་རྒྱ་ནག་གཞུང་འབྲེལ་ཞིན་ཧྭ་གསར་ཁང་གིས། མི་འགྱང་བར་མེ་འཁོར་ལྕགས་ལམ་གསར་འཛུགས་ལེགས་འགྲུབ་ཡོང་བའི་རེ་བ་ཡོད། ལྕགས་ལམ་གསར་འཛུགས་ཀྱི་ལས་གཞི་འདི་ནི་འགྲིམ་འགྲུལ་ལས་རིགས་གཙོས་པའི་སྤྱི་ཚོགས་ཁོར་ཡུག་ཡར་རྒྱས་ཀྱི་བྱ་འགུལ་ཞིག་ཡིན་ལུགས་དང་། མེ་འཁོར་ལྕགས་ལམ་གསར་འཛུགས་ཀྱི་ལས་གཞི་ལེགས་འགྲུབ་བྱུང་རྗེས། སི་ཁྲོན་ཞིང་ཆེན་ཁྲིན་ཏུའུ་གྲོང་ཁྱེར་ནས་བོད་ཀྱི་རྒྱལ་ས་ལྷ་སར་ཆུ་ཚོད་ ༡༥ རིང་འབྱོར་ཐུབ་ཀྱི་ཡོད་ཚུལ་སོགས་བརྗོད་ཅིང་། ད་ལན་གྱི་མེ་འཁོར་ལྕགས་་ལམ་གསར་འཛུགས་ཀྱི་ལས་གཞི་འདི་ནི་རྒྱ་ནག་རྒྱལ་ཡོངས་དམངས་འཐུས་ཚོགས་ཆེན་སྐབས་བཅུ་གཉིས་པའི་གྲོས་ཚོགས་ཐེངས་བཞི་བའི་སྟེང་གཏན་འབེབས་པ་བྱས་པ་ཞིག་ཡིན་འདུག
གནས་ཚུལ་ལྟར་ན། རྒྱ་ནག་གི་དཔལ་འབྱོར་འཛུགས་སྐྲུན་གྱི་བཙན་འཛུལ་ལ་བོད་ཙམ་མ་ཟད། རྒྱ་ནག་གི་ཁྱིམ་མཚེས་རྒྱལ་ཁབ་རྒྱ་གར་དང་བལ་པོ། འབར་མ་སོགས་ཀྱིས་ཀྱང་མི་འདོད་པའི་རྣམ་འགྱུར་སྟོན་གྱི་ཡོད་པ་དང་། ཕྱི་ལོ་ ༢༠༠༦ ལོར་རྒྱ་ནག་གཞུང་གིས་མཚོ་བོད་མཐོ་སྒང་ནས་རྒྱལ་ས་ལྷ་སའི་བར་མཐོ་ཚད་རྒྱ་མཚོའི་ངོས་ལས་སྨི་ ༥༠༠༠ ཟིན་པའི་མེ་འཁོར་ལྕགས་ལམ་གསར་འཛུགས་བྱས་ཡོད་པ་དང་། དེས་བོད་ཁུལ་གྱི་རང་བྱུང་ཁོར་ཡུག་དང་རི་སྐྱེས་སྲོག་ཆགས་མང་པོར་གནོད་འཚེ་ཚབས་ཆེན་ཐེབས་བཞིན་ཡོད་པ་རེད།
གསར་འགོད་པ། པདྨ་རྒྱལ།
