རྒྱ་ནག་དམངས་ཆེན་ཚོགས་འདུའི་སྟེང་ཐའེ་ཝན་མཚོ་འགག་ལ་འཛིན་པའི་སྲིད་ཇུས་རྒྱུན་འཁྱོང་དང་ཐའེ་ཝན་ཁ་བྲལ་བའི་རང་བཙན་ལས་འགུལ་ལ་ཁ་གཏད་གཅོག་རྒྱུ། རྒྱ་ནག་གི་མངའ་ཁོངས་གཅིག་གྱུར་བདག་དབང་ལ་སྲུང་སྐྱོབ་བྱ་རྒྱུ་ཡིན་ཟེར།
རོའུ་ཊར་གསར་ཁང་གིས་གནས་ཚུལ་སྤེལ་དོན་ལྟར་ན། དེ་རིང་རྒྱ་ནག་གི་སྲིད་བློན་ལེ་ཁི་ཆང་གིས། འདི་ལོའི་ཕྱི་ཟླ་དང་པོར་ཐའེ་ཝན་དམངས་གཙོ་ཡར་ཐོན་ཚོགས་པར་སྲིད་འཛིན་རྒྱལ་ཁ་ཐོབ་པ་དང་འབྲེལ། ཐའེ་ཝན་མཚོ་འགག་གི་ཞི་བདེ་བརྟན་ལྷིང་ལ་འགན་སྲུང་དང་ཐའེ་ཝན་ཁ་བྲལ་བའི་ལས་འགུལ་ལ་མཐའ་གཅིག་ཏུ་ཁ་གཏད་གཅོག་གི་ཡིན་ལུགས་བཤད་འདུག
ལི་ཁེ་ཆང་གིས་རྒྱ་ནག་རྒྱལ་ཡོངས་དམངས་ཆེན་སྐབས་བཅུ་གཉིས་པའི་གྲོས་ཚོགས་ཐེངས་བཞི་བའི་སྟེང་། རྒྱ་ནག་གཞུང་གིས་ཐའེ་ཝན་མཚོ་འགག་ཐོག་འཛིན་པའི་སྲིད་ཇུས་རྒྱུན་འཁྱོང་དང་། ཐའེ་ཝན་ཁ་བྲལ་བའི་རང་བཙན་ལས་འགུལ་ལ་ཁ་གཏད་གཅོག་རྒྱུ། དེ་བཞིན་རྒྱ་ནག་གི་མངའ་ཁོངས་གཅིག་གྱུར་བདག་དབང་ལ་སྲུང་སྐྱོབ་དང་ཐའེ་རྒྱ་གཉིས་བར་གྱི་ཞི་བདེ་བརྟན་ལྷིང་གི་འབྲེལ་ལམ་རྒྱུན་སྐྱོང་བྱ་རྒྱུ་ཡིན་ལུགས་སོགས་བརྗོད་འདུག
གནས་ཚུལ་ལ་གཞིག་ན། ཐའེ་ཝན་གྱི་སྲིད་འཛིན་གསར་བ་ལྕམ་ཚའེ་ཡེན་ཝན་གྱིས། ཐའེ་རྒྱ་གཉིས་ཀྱི་ཞི་བའི་འབྲེལ་ལམ་རྒྱུན་འཁྱོང་དང་། རྒྱ་ནག་གཞུང་འབྲེལ་བརྒྱུད་ལམ་ཁག་གིས་ཁོ་མོའི་ད་ལྟའི་ཐའེ་རྒྱ་གཉིས་ཀྱི་གནས་བབ་རྒྱུན་འཁྱོང་བྱེད་པའི་ཁག་ཐག་ལ་དོ་སྣང་དགོས་སྐོར་བརྗོད་ཡོད་ནའང་། པེ་ཅིན་གཞུང་གིས་མུ་མཐུད་ཐའེ་ཝན་མཚོ་འགག་དེ་བཞིན་རྒྱ་ནག་གི་ཞིང་ཆེན་བསྙོན་ཞིག་ཡིན་ལུགས་བཤད་དེ། ད་ལོའི་ཕྱི་ཟླ་དང་པོར་ཐའེ་ཝན་དམངས་གཙོ་ཡར་ཐོན་ཚོགས་པར་སྲིད་འཛིན་རྒྱལ་ཁབ་ཐོབ་པ་དང་འབྲེལ། ཞི་དྲག་གཉིས་ཀྱི་སྒོ་ནས་ཐའེ་ཝན་མཚོ་འགག་གི་རང་བཙན་ལངས་ཕྱོགས་ལ་ཉེན་བརྡ་རབ་དང་རིམ་པར་གཏོང་བཞིན་ཡོད་ཀྱང་། རྒྱ་ནག་རྒྱལ་ཡོངས་དམངས་ཆེན་སྐབས་བཅུ་གཉིས་པའི་གྲོས་ཚོགས་ཐེངས་བཞི་བའི་སྟེང་རྒྱ་ནག་གི་སྲིད་བློན་ལེ་ཁི་ཆང་གིས། པེ་ཅིན་གཞུང་གིས་ཐའེ་ཝན་མཚོ་འགག་གི་དཔལ་འབྱོར་ཡར་རྒྱས་གཏོང་རྒྱུ་དང་ཕྱོགས་གཉིས་བར་རིག་གནས་བརྗེ་རེས་ཀྱི་འབྲེལ་ལམ་སྲ་བརྟན་གཏོང་རྒྱུ་མ་ཟད། ཧོང་ཀོང་སྲིད་འཛིན་ས་ཁུལ་གྱི་དཔལ་འབྱོར་ཡར་རྒྱས་དང་བརྟན་ལྷིང་བཟོ་རྒྱུ་སོགས་བཤད་པ་ཙམ་ལས། ཁོས་འདི་ཟླའི་ནང་ལྕམ་ཚའེ་ཡེན་ཝན་གྱིས་ཐའེ་ཝན་དམངས་གཙོ་ཚོགས་པའི་སྲིད་གཞུང་གསར་བ་དངོས་སུ་འཛིན་སྐྱོང་བྱེད་རྒྱུ་ཡིན་པའི་སྐོར་གླེང་སློང་བྱས་མེད།
ཕྱི་ལོ་ ༢༠༠༨ ལོར་གོ་མན་ཏང་ཚོགས་པའི་གཙོ་འཛིན་མ་ཡེན་ཇོ་ཡིས་རྒྱ་ནག་གི་དཔལ་འབྱོར་ཁེ་ལས་ལ་དམིགས་ཏེ་ཐའེ་རྒྱ་གཉིས་ཀྱི་འབྲེལ་ལམ་ཡར་རྒྱས་བཏང་ཡོད་པ་དང་། འདས་ལོའི་ཕྱི་ཟླ་ ༡༡ པར་ཕྱོགས་གཉིས་ཀྱི་བར་གནས་རྒྱལ་ཁབ་སེང་གྷ་པོར་ནང་ཐའེ་ཝན་གྱི་སྲིད་འཛིན་མ་ཡེན་ཇོ་དང་རྒྱ་ནག་གི་སྲིད་འཛིན་ཞི་ཅིན་ཕིན་གཉིས་ཐུག་ཕྲད་སྐབས་སུ། ཐའེ་ཝན་གྱི་སྲིད་འཛིན་མ་ཡེན་ཇོ་ཡིས་པེ་ཅིན་གཞུང་དང་ཚོང་ལས་མཉམ་འབྲེལ་གྲོས་ཆོད་ལ་མིང་རྟགས་བཀོད་ཡོད་པ་རེད། ཡིན་ནའང་ཕྱི་ལོ་ ༢༠༠༤ ལོར་ཐའེ་རྒྱ་གཉིས་བར་ཚོང་ལས་མཉམ་འབྲེལ་མི་ཆོག་པའི་ཐའེ་ཝན་མི་མང་གི་ངོ་རྒོལ་ལས་འགུལ་ལ་བརྟེན་ནས་ཕྱོགས་གཉིས་ཀྱི་ཚོང་ལས་མཉམ་འབྲེལ་གྲོས་ཆོད་ལ་དོན་ཕན་བྱུང་ཐུབ་མེད་པ་རེད། དེ་བཞིན་ཕྱི་ལོ་ ༢༠༡༤ ལོར་ཧོང་ཀོང་གྲོང་ཁྱེར་གྱི་དམངས་གཙོའི་ལས་འགུལ་ལ་ཉིན་གྲངས་ ༧༠ རིང་དྲག་གནོན་བྱས་ཡོད་པ་དང་། པེ་ཅིན་གཞུང་གིས་མེས་རྒྱལ་ཁ་བྲལ་གྱི་ལས་འགུལ་ལ་ཁ་གཡར་ནས་ད་ལོའི་ལོ་གསར་སྐབས་བྱུང་བའི་ཟིང་འཁྲུག་ཁྲོད་ཧོང་ཀོང་གི་ཡུལ་མི་ ༦༠ ལྷག་འཛིན་བཟུང་བཀག་བསྐྱིལ་བྱས་ཡོད་པ་དང་། འཁྲུག་ཟིང་དེའི་འབྱུང་རྐྱེན་གཙོ་བོ་ཧོང་ཀོང་ས་གནས་སྲིད་གཞུང་གིས་སྲང་ལམ་གྱི་ཁྲིམས་མཐུན་ཡིག་ཆ་མེད་པའི་ཁྲིམས་ར་མང་པོའི་སྒོ་རྒྱག་ཏུ་བཅུག་པར་བརྟེན་ནས་བྱུང་བ་ཞིག་ཡིན་འདུག
གསར་འགོད་པ། པདྨ་རྒྱལ།
