ཕྱི་ཚེས་ ༡༨ ཉིན་གྱི་སྔ་དྲོ་ནས་སྲིད་སྤྱིའི་འོས་མི་ཁྱབ་བསྒྲགས་ཡོངས་སུ་མཚམས་འཇོག་དགོས་པ་མ་ཟད། འོས་བསྡུའི་ཉིན་མོར་ཕྱི་ནང་གི་འགོག་རྐྱེན་སྣ་ཚོགས་འབྱུང་སྲིད་པས་ཚང་མས་ཐུགས་གཟབ་དཀྱིལ་ཡངས་གནང་དགོས།
བོད་མིའི་སྒྲིག་འཛུགས་དབུས་འོས་བསྡུ་ལས་ཁང་གིས་སྲིད་སྤྱི་གཉིས་ཀྱི་དངོས་གཞིའི་འོས་བསྡུ་དང་འབྲེལ་བའི་གནད་དོན་ཁག་ཅིག་གི་ཐོག་གསལ་བསྒྲགས་སྤེལ་ཡོད་པའི་ནང་བཀོད་དོན། ༡༽། འོས་བསྡུའི་སྒྲིག་གཞིའི་འབྲུ་དོན་ལྟར། ༢༠༡༦ ཟླ་ ༣ ཚེས་ ༡༨ སྔ་དྲོར། ས་གནས་སོ་སོའི་སྔོན་འགྲོའི་འོས་བསྡུ་བྱ་ཡུལ་དང་། ས་གནས་དེའི་གཡས་གཡོན་རྒྱབ་མདུན་གང་སར་འོས་མི་ལངས་མཁན་སྒེར་དང་ཚོགས་སྡེ་ཁག་གིས་ཁྱབ་བསྒྲགས་ཚང་མ་བཀོག་དགོས་པ་དང་། སྤྱི་ཚོགས་དྲ་ལམ་ཁག་དང་སྐད་འཕྲིན་སོགས་སུའང་དྲིལ་བསྒྲགས་རིགས་མཚམས་འཇོག་དགོས་པ། དེ་བཞིན། འོས་བསྡུའི་དྲིལ་བསྒྲགས་དང་འབྲེལ་བའི་གཏམ་བཤད་རིགས་ཀྱང་མི་ཆོག
༢༽། ས་གནས་སོ་སོར་འོས་ཤོག་གྲངས་བཤེར་ཟིན་རྗེས་འོས་གཞི་དོ་བདག་སོ་སོར་ས་གནས་དེ་ནས་འོས་གྲངས་ཇི་ཐོབ་ས་གནས་དེ་གའི་འོས་བསྡུའི་ཚོགས་མི་དང་། ཟུར་དཔང་མཉམ་འཛོམས་ཐོག་ས་གནས་འོས་བསྡུའི་འགན་འཛིན་ནས་གསལ་བསྒྲགས་བྱེད་རྒྱུ་དང་། རྒྱ་བལ་འབྲུག་གསུམ་དང་། ཕྱི་རྒྱལ་ཁག་ཏུ་མི་མང་བསྡུ་སྐོང་དང་གསར་འགོད་གསལ་བསྒྲགས་སོགས་མི་དགོས་པར། སོ་སོའི་ས་གནས་ཀྱི་གྱང་ངོས་སུ་སྦྱོར་འགྲེམས་ཀྱིས་འཐུས་རྒྱུ་དང་། ཞིབ་ཁྲའི་སྤྱི་ཡོངས་ཕྱོགས་བསྡོམས་དེ་རྗེས་ལ་གསར་འགོད་གསལ་བསྒྲགས་སྤེལ་རྒྱུ་ཡིན་སྐོར་སོགས་བཀོད་འདུག
༢༽ འོས་བསྡུ་ཆེན་མོའི་ཉིན་མང་ཚོགས་ནང་བསམ་ཚུལ་མཐུན་མིན་གྱིས་སྐད་ཆ་མཐོ་དམན། རྣམ་འགྱུར་འདྲ་མིན་ཡོང་སྲིད་པ་དང་། གཞན་ཡང་རེ་ཟུང་ནས་བསམ་བཞིན་དུ་འོས་བསྡུའི་ལས་རིམ་ལ་བར་ཆད་ཀྱི་རྐྱེན་སློང་བྱེད་པ་སོགས་ཡོང་སྲིད་པར་བརྟེན་སྔོན་ཚུད་ནས་ས་གནས་ཉེན་རྟོག་པར་འབྲེལ་གཏུགས་གནང་རྒྱུ་དང་། ལྷག་པར་འོས་བསྡུའི་ཚོགས་མི་རྣམས་ནས་གནད་དོན་དེ་རིགས་ལ་བཟོད་སྲན་དང་དོགས་ཟོན་ཆེན་པོའི་སྒོ་ནས་བལྟ་རྟོག་ནན་མོ་གནང་དགོས་པ།
༤༽ འོས་སྒམ་ཚད་ལྡན་སྒོ་ལྕགས་ཅན་དགོས་པ་མ་ཟད་བལྟ་རྟོག་བདག་ཉར་གང་གཟབ་བྱ་དགོས་པ་སོགས་བཀོད་འདུག
གསར་འགོད་པ། པདྨ་རྒྱལ།
དབུས་འོས་བསྡུ་ལྷན་ཁང་གི་འགན་འཛིན་མཆོག་ལ།
འོས་བསྡུ་ལྷན་ཁང་གི་བཟོས་པའི་འོས་བསྡུའི་ཁྲིམས་དང་སྒྲིག་གཞི་དེ་དག་སུའི་ཆེད་དུ་བཟོས་པ་རེད་དམ། གལ་སྲིད་འོས་མི་ཚོའི་ཆེད་དུ་བཟོས་ན་ལག་བསྟར་དོན་འཁྱོལ་ཡོང་བ་བྱེད་རོགས། འོས་བསྡུའི་སྒྲིག་གཞི་ལག་བསྟར་མ་བྱས་ཚེ་ཚད་དང་ལྡན་པའི་སྲིད་སྤྱི་གཉིས་ཀྱི་འོས་མི་སླེབས་རྒྱུ་དཀའ་བས་དེ་དོན་དགོངས་འཇགས་ཡོད་པ་ཞུ།
སྲིད་སྐྱོང་གིས་འོས་ཤོག་མང་ཚོགས་ཉེན་རྟོག་པར་རྩིས་སྤྲོད་ཡ་ཡིན་གསུངས་པ་དང་། ཨོ་རི་ས་ནས་སྲིད་སྐྱོང་གི་རྒྱབ་སྐྱོར་བས་བགྲེས་སོང་ཞིག་དང་མང་ཚོགས་གཉིས་ལ་རྡུང་རྡེག་བཏང་འདུག་པར་འོས་བསྡུ་ལས་ཁུངས་ན་ལམ་སྟོན་མི་གནང་བ་ཡིད་ཆད་བློ་ཕམ་ཚད་མེད་བྱུང་།
ད་དུང་གསར་འགོད་པ་ཚོ་ཡང་གཉིད་དུ་ཡུར་བ་མིན་ཚེ་ཨོ་རི་སའི་གནས་ཚུལ་མཁྱེན་རྟོགས་དགོས་ཡིན།
དབུས་འོས་བསྡུ་འགན་འཛིན་མཆོག་ལ་ཞུ་གསོལ།
འོས་བསྡུ་ཆེན་མོ་འདིའི་སྐབས་འོས་མི་སོ་སོའི་རྒྱབ་སྐྱོར་བ་དང་དོན་བདག་སོ་སོའི་དངོས་གནས་ཀྱང་འོས་ཁྲིམས་དང་མི་མཐུན་པ་གང་མང་ཞིག་བྱུང་དང་འབྱུང་བཞིན་ཡོད་པ་དཔེར་ན་མོ་གྷོ་ཌར་བྱུང་བའི་གནས་ཚུལ་གྱི་གཙོའི་བའི་དེ་དང་དེ་འདྲ་བ་གང་མང་ཞིག་ཡོད་ན་ཡང་འོས་བསྡུ་ལྷན་ཁང་ནས་རྒྱུ་མཚན་མང་པོ་ཞིག་གསུང་ནས་སྣང་མེད་ངང་འཇོག་དོན་གང་ཡིན་ནམ་ལགས། དེ་ཚོ་ཐག་གཅོད་བྱེད་པར་སྐུ་ཉིད་ལ་ཡང་དབང་ཚད་ཡོད་ཀྱང་སྐུ་སྲུང་ལ་སོགས་པའི་མཐུན་རྐྱེན་གང་མང་ཞིག་མེད་པས་ཡིན་ནམ། གང་། སྔོན་འགྲོ་སྐབས་ལྟར་དངོས་གཞིའི་སྐབས་ཀྱང་གཙང་མ་ཞིག་ཡོང་ཐུབ་པའི་རེ་བ་ཤིན་ཏུ་ཆུང་བར་མཐོང་། འོན་ཀྱང་གཞུང་དང་གཞུང་འབྲེལ་རྒྱུད་ལམ་སོགས་སུ་བཙན་ཤེད་དབང་ཤེད་ཀྱིས་རྐྱེན་པས་གང་སྙན་སྙན་མཛེས་མཛེས་ཤིག་གསལ་བསྒྲག་བྱེད་རྒྱུ་ཡིན་པ་ཟུར་བལྟས་ལེབ་མཐོང་རེད་ལགས།