འཕྲོད་བསྟེན་ལས་ཁུངས་མདུན་དུ་ཟས་བཅད་ངོ་རྒོལ།

མངོན་དགའ་སློབ་གྲྭའི་ལས་བྱེད་ཅིག་གིས་དབུས་འཕྲོད་བསྟེན་ལས་ཁུངས་མདུན་དུ་ཟས་བཅད་ངོ་རྒོལ་བྱེད་བཞིན་འདུག

ཁ་སང་ཞོགས་པ་ནས་བཟུང་རྡེ་ར་རྡུན་མངོན་དགའ་སློབ་གྲྭའི་ཡིག་གད་དང་གློག་ཆུ་དོ་དམ་ལས་བྱེད་བློ་བཟང་རྒྱལ་མཚན་གྱིས། གངས་སྐྱིད་དབུས་འཕྲོད་བསྟེན་ལས་ཁུངས་ཀྱི་མདུན་དུ་ཟས་བཅད་ངོ་རྒོལ་བྱེད་བཞིན་འདུག་ལ། ཁོས་དེ་སྔོན་མངོན་དགའ་སློབ་གྲྭ་དང་འབྲེལ་བའི་གནས་ཚུལ་ཁག་ཅིག་སྙན་འབུལ་ཞུས་པ་དེར་ཞིབ་འཇུག་བྱས་ནས་དྲང་བདེན་གྱི་ཐག་གཅོད་ཅིག་མ་གནང་བར་དུ་ཟས་བཅད་ངོ་རྒོལ་བྱས་ནས་འདུག་རྒྱུ་ཡིན་སྐོར་བརྗོད་བྱུང་།

ཁ་སང་བློ་བཟང་རྒྱལ་མཚན་གྱིས་འདི་གའི་གསར་འགོད་པར་བརྗོད་དོན། ཕྱི་ལོ་ ༢༠༡༥ ཟླ་ ༡༡ ཚེས་ ༦ ཉིན། ངས་དབུས་དྲུང་ཆེ་མཆོག་ལ་སྙན་ཞུ་ཞིག་ཕུལ་ཏེ། ང་ཚོ་ལས་བྱེད་གསུམ་གྱི་ཐོག་ལ་ཁྲིམས་དང་སྒྲིག་གཞིར་བརྒལ་བའི་ལས་ཀ་བྱེད་ཀྱི་འདུག ང་ཚོ་ལས་བྱེད་དང་ཕྲུ་གུར་བརྙས་བཅོས་བྱེད་ཀྱི་འདུག དེའི་སྒང་ལ་ལག་ལེན་ཞིག་བསྟར་རོགས་གནོངས། གལ་སྲིད་བདེན་པ་མི་འདུག་བསམ་ན་ང་ལ་ཉེས་པ་གཏང་ན་འགྲིག་གི་རེད། བདེན་པ་འདུག་བསམ་ན་ཁོ་ཚོ་ལ་ཉེས་པ་ཞིག་གཏང་རོགས་ཞེས་ཞུས་པ་ཡིན། ཉི་མ་ཁ་ཤས་ཀྱི་རྗེས་སུ་ང་ལ་ཡིག་ལན་ཞིག་འབྱོར་བྱུང་། ཡིག་ལན་དེའི་ནང་ག་རེ་ལབ་འདུག་ཞུས་ན། ཁྱེད་རང་ཀོ་ལི་གྷལ་སྨན་ཁང་དུ་གནས་སྤོར་འགྲོ་དགོས་ཞེས་བརྗོད་འདུག སྤྱིར་བཏང་སྒྲིག་གཞིའི་ནང་དུ་གནས་སྤོར་འགྲོ་དགོས་པ་རེད་ཟེར་བ་དེ་ཡོད་པ་རེད་ལ། གནས་སྤོར་མ་འགྲོ་ན་རྩ་དགོངས་ཞུ་བའི་ཐོབ་ཐང་ཡང་ཡོད་པ་རེད། ངས་རྩ་དགོངས་འགྲོ་དང་མི་འགྲོ་ཡི་སྐད་ཆ་བཤད་ཀྱི་མེད། བདེན་པའི་ཐག་གཅོད་བྱས་མ་སོང་ཟེར་གྱི་ཡོད། ཅེས་བརྗོད་བྱུང་།

ཡང་ཁོས་སྔ་ཕྱི་མང་པོར་བདེ་སྡུག་ཡར་ཞུ་བྱས་ཡོད་སྐོར་བརྗོད་དོན། ངས་འཕྲོད་བསྟེན་བཀའ་བློན་མཆོག་ལ་ང་གནས་སྤོར་འགྲོ་དགོས་ན་དཀའ་ངལ་ཡོད། ནང་དུ་ཕ་མ་རྒན་འཁོགས་དང་བཟའ་ཟླ་བུ་ཕྲུག་ཡོད་པས་འགྲོ་བར་དཀའ་ངལ་འདུག་ཅེས་ཞུས་པ་ཡིན་ལ། ངས་སྲིད་སྐྱོང་མཆོག་ལའང་ཞུས་པ་ཡིན་ཏེ་འབྲས་བུ་ཐོན་མ་སོང་། དེ་ནས་ཕྱི་ཟླ་ ༢ ཚེས་ ༡ ཉིན་ངས་ཡང་བསྐྱར་སྲིད་སྐྱོང་མཆོག་ལ་སྙན་ཞུ་ཞིག་ཕུལ་ཏེ། གནད་དོན་འདི་ལ་བདེན་པའི་ཐག་གཅོད་ཅིག་གནང་རོགས། ངས་དྲང་པོ་བཤད་པར་མིས་བརྙས་བཅོས་བྱས་སོང་བས་བདེན་པའི་ཐག་གཅོད་ཅིག་གནང་རོགས། གལ་སྲིད་བདེན་པའི་ཐག་གཅོད་ཅིག་མ་གནང་བ་ཡིན་ན། ཕྱི་ཟླ་ ༢ ཚེས་ ༢༣ ཉིན་ངས་ཟས་བཅད་ངོ་རྒོལ་བྱ་རྒྱུ་ཡིན་ཞེས་ཞུས་པ་ཡིན། དེ་ནས་ཉིན་ཤས་རྗེས་མངོན་དགའ་སློབ་གྲྭའི་འགན་འཛིན་གྱིས་ང་ལ་སྐད་བཏང་སོང་། ཁོང་གིས་ཁྱེད་རང་གནས་སྐབས་རིང་གནས་སྤོར་ཕར་འགྱངས་རེད་ཅེས་གསུངས་བྱུང་། ངས་ཡི་གེ་དེ་ཡིག་ཐོག་ནས་སྤྲོད་རོགས་ཞུས་ཏེ་ཡར་མར་བྱས་ནས་རྗེས་སུ་སྤྲད་གནང་སོང་། ཡི་གེ་དེའི་ནང་དུ་ཁྱེད་རང་གནས་སྐབས་གནས་སྤོར་ཕར་འགྱངས་ཡིན་གསུངས་པ་མ་གཏོགས་ཕར་འགྱངས་ཀྱི་དུས་ཚོད་དང་གནད་དོན་དྲང་པོ་ཡིན་མིན་སོགས་གང་ཡང་བཀོད་མི་འདུག དེ་ནས་ཡང་བསྐྱར་ངས་སྲིད་སྐྱོང་མཆོག་ལ་སྙན་ཞུ་ཞིག་ཕུལ་ཏེ། ཟླ་འདིའི་ཕྱི་ཚེས་ ༡༤ སྔོན་ལ་བདེན་པའི་ཐག་གཅོད་ཅིག་གནང་རོགས། ངས་དྲང་པོའི་ཐོག་ནས་ང་རང་སྒེར་གྱི་གནད་དོན་མ་ཡིན་པར་མངོན་དགའ་སློབ་གྲྭ་སྤྱི་པའི་ཆེད་དུ་ཞུས་པ་ཡིན་ཞེས་ཞུས་ཀྱང་ཐག་གཅོད་གང་ཡང་གནང་མ་སོང་། ཁ་སང་ང་ལ་ཡི་གེ་ཞིག་འབྱོར་བྱུང་། ཁྱེད་རང་གི་གནད་དོན་དེར་ང་ཚོས་ཞིབ་འཇུག་ཅིག་བྱ་རྒྱུ་ཡིན་ཞེས་གསུངས་ཡོད་པ་དང་། ང་གནས་སྤོར་གཏང་རྒྱུ་ཡིན་མིན་ཐད་ཅི་གསུངས་མི་འདུག དེ་ནས་ས་གནས་མགོ་འཛིན་ལ་ང་ལ་བདེན་པའི་ཐག་གཅོད་དགོས་མ་གཏོགས་ཕར་འགྱངས་མི་དགོས་ཞེས་ཞུས་ཏེ་མདང་དགོང་མཚན་གུང་ཕར་ནས་ཐོན་ཏེ། དེ་རིང་ཞོགས་པར་འདིར་བསླེབས་པ་ཡིན། ཞེས་དང་།

ཡང་ཁོང་གིས། ཞོགས་པ་ང་འདིར་བསླེབས་ནས་གནས་ཆུང་དགོན་པར་མཇལ་དུ་འགྲོ་སྐབས་འཕྲོད་བསྟེན་བཀའ་བློན་མཆོག་ལ་ཐུག་སོང་བ་དང་། ང་ལས་ཁུངས་ལ་སྐད་བཏང་བྱུང་། ངས་གནས་ཚུལ་ཚང་མ་ཁྱེད་ཚོས་ཧ་གོ་ཡི་ཡོད་པ་རེད། ངས་འོག་ནས་སྒང་བར་དུ་བདེན་པའི་ཨུ་ཚུགས་བརྒྱབ་པ་ཡིན་ལ། དྲང་བདེན་གནང་རོགས་དྲང་བདེན་མ་གནང་བ་ཡིན་ན་མ་འོངས་པར་ལས་བྱེད་ཚོའི་སེམས་ཤུགས་ཆགས་ངེས་རེད་ཅེས་ཞུས་པ་མ་ཟད། དེ་རིང་བཀའ་བློན་མཆོག་ལ་ག་རེ་ཞུས་ཡོད་ལབ་ན། དང་པོ་ཁྲིམས་དང་ལུགས་ལ་འགལ་བའི་མངོན་དགའ་སློབ་གྲྭའི་རྩིས་པ་དེར་ཉེས་པ་གཏོང་གི་ཡིན་ལབ་དགོས་པ་དང་། གཉིས་པ་ང་གནས་སྤོར་འགྲོ་དགོས་པ་མ་རེད་ཅེས་པའི་ཐག་གཅོད་ཅིག་ཡིག་ཐོག་ནས་སྤྲོད་རོགས། དེ་སྤྲད་པ་ཡིན་ན་ང་མར་ལོག་འགྲོ་རྒྱུ་ཡིན། གལ་སྲིད་དེ་འདྲ་མ་བྱུང་བ་ཡིན་ན་ང་ཟས་བཅད་ངོ་རྒོལ་དུ་འདུག་རྒྱུ་མ་གཏོགས་མི་ཉམ་ཆུང་ཞིག་ལ་བྱ་རྒྱུ་གང་ཡང་མི་འདུག་ལབ་པ་ཡིན། ངས་ཞབས་ཞུ་ཞུས་ཏེ་ལོ་ ༨ འགྲོ་ཡི་ཡོད་པ་དང་། ངའི་ནང་དུ་ཅི་ནི་ཚ་ན་ཡོད་པའི་པ་ལགས་དང་། ཕོ་བ་ནད་པ་ཡིན་པའི་ཨ་མ་རྒན་འཁོགས་ཤིག་ཡོད། དེ་ནས་བཟའ་ཟླ་དང་ཕྲུ་གུ་གཉིས་ཡོད། ངའི་བཟའ་ཟླས་ཕ་མ་རྒན་འཁོགས་གཉིས་སྲུང་ནས་བསྡད་ཡོད་པས་ལས་ཀ་ཡོད་པ་མ་རེད། ང་གནས་སྤོར་ཕྱིན་ན་ངའི་ནང་ལ་དཀའ་ངལ་ཞེ་དྲགས་ཡོད། ཅེས་བརྗོད་བྱུང་།

འདི་གའི་གསར་འགོད་པས་འཕྲོད་བསྟེན་བཀའ་བློན་ཚེ་རིང་དབང་ཕྱུག་མཆོག་ལ་གནད་དོན་དེའི་སྐོར་བཀའ་འདྲི་ཞུས་པར། ཕྱི་ལོ་ ༢༠༡༥ ཟླ་ ༡༡ ཚེས་ ༦ ཉིན་ཁོ་རང་གིས་ང་ཚོར་སྙན་ཞུ་ཞིག་བརྒྱབ་ཡོད་པ་དང་། དེ་བཞིན་དུས་ཚོད་མི་འདྲ་བའི་ནང་སྙན་ཞུའི་བརྗོད་གཞིའང་ཁ་ཁ་མང་པོ་ཞིག་གཏོང་ཡོང་གི་འདུག ཕྱི་ཟླ་ ༡༡ ཚེས་ ༦ ཉིན་བཏང་བ་དེའི་ནང་མངོན་དགའ་སློབ་གྲྭའི་ལས་བྱེད་ཁ་ཤས་ཀྱིས་ཕྱག་ལས་ཡག་པོ་གནང་གི་མི་འདུག་ལབ་པ་སོགས་ཀྱི་སྐྱོན་འཛུགས་འདྲ་པོ་བྱས་འདུག་ལ། ཁོ་རང་གིས་བཏང་བའི་སྙན་ཞུ་དེའི་སྐོར་ལ་ད་ལྟ་ང་ཚོས་མངོན་དགའ་སློབ་གྲྭའི་འགན་འཛིན་ལ་འབྲེལ་བ་ཞུས་ཏེ་འཕྲོད་བསྟེན་ལས་ཁུངས་ནས་ལྟ་དང་ལྟ་བཞིན་པ་རེད། ང་ཚོས་ཁོ་རང་ལ་ཁྱེད་རང་བོད་མིའི་སྒྲིག་འཛུགས་ཀྱི་ལས་བྱེད་ཅིག་ཡིན་པའི་ཆ་ནས་ལས་ཁུངས་མདུན་དུ་ལངས་ནས་འདི་འདྲ་བྱས་པ་ཡིན་ན་ཡག་པོ་མ་རེད། ཁྱེད་རང་གིས་མ་ཉན་ན་གནས་ཚུལ་ག་རེ་བྱུང་བ་ཡིན་ནའང་འགན་དེ་ཁྱེད་རང་གིས་འཁུར་དགོས་པ་རེད་ཅེས་གསལ་པོ་ཞུས་ཡོད། ཅེས་གསུངས་སོང་།

ཡང་བཀའ་བློན་མཆོག་གིས། ང་ཚོས་ཁོ་ལ་ཁྱེད་རང་བོད་མིའི་འཛུགས་སྒྲིག་འཕྲོད་བསྟེན་ལས་ཁུངས་ཀྱི་ཁྱབ་ཁོངས་མངོན་དགའ་སློབ་གྲྭའི་ལས་བྱེད་ཅིག་ཡིན་པའི་ཆ་ནས་ལས་བྱེད་སུ་ཡིན་ནའང་ལས་ཁུངས་ལ་བདེ་སྡུག་ཞུ་ཆོག་གི་རེད་ལ། དེ་རིང་ཁྱེད་རང་འདིར་ཡོང་བ་དེའང་བདེ་སྡུག་ཞུ་རུ་ཡོང་བ་ཞིག་ལ་ང་ཚོས་ངོས་འཛིན་ཞུ་ཡི་ཡོད། ཁྱེད་རང་ལ་དཀའ་ངལ་ག་རེ་ཡོད་པ་དེ་ཡིག་ཐོག་ལའང་འདུག་ཆ་ཚང་སྐུ་ངོ་དྲུང་ཆེ་དང་ལས་བྱེད་ཚང་མའི་མདུན་ནས་རྟོགས་སོང་། ཆ་ཚང་རྟོགས་པའི་ཐོག་ནས་ང་ཚོས་ལན་སྤྲོད་ཡོང་གི་ཡིན། ཡིན་ནའང་། དེ་རིང་རང་ཐག་གཅོད་ཡོང་བ་དེ་འདྲ་ཡོད་པ་མ་རེད་ཅེས་ཞུས་ཡོད་ལ། ང་ཚོའི་དྲུང་འཕར་ལགས་མངོན་དགའ་སློབ་གྲྭར་སྤྱིན་བདག་ཅིག་ཕེབས་ཡོད་པ་དེར་སྣེ་ལེན་ཞུ་བར་བཅར་བའི་ཞོར་དུ་སྙན་ཞུ་དེའི་སྐོར་ལ་ཅིག་ལྟོས་ཟེར་ནས་མངགས་བཞག་ཡོད། ཅེས་གསུངས་བྱུང་།

གནས་རིམ་ཕབ་ནས་གནས་སྤོར་བཏང་བྱུང་ལབ་པ་དེ་བདེན་པ་ཡིན་མིན་དྲིས་པར་ཁོང་གིས། གནས་རིམ་ཕབ་པ་དེ་འདྲ་ཅི་ཡོད་པ་མ་རེད། དེ་འདྲ་སྔོན་མའང་ཡོང་སྲིད་པ་ཞིག་ཆགས་བསྡད་ཡོད་པ་རེད། བཀའ་ཤག་སྔོན་མའི་སྐབས་སུའང་སྨན་ཁང་གི་འགན་འཛིན་ཞིག་སྨན་སྤྲོད་ལ་གནས་རིམ་ཕབ་ནས་ཉེས་པ་བཏང་བ་དེ་འདྲ་བྱུང་ཡོད་པ་རེད། ཡིན་ནའང་། ད་ལན་དེ་ཉེས་པ་བཏང་བ་དེ་འདྲ་གང་ཡང་མ་རེད། ཀོ་ལི་གྷལ་གྱི་མཚན་སྲུང་རྒན་ཡོལ་ཆགས་ནས་མར་ཐོན་པ་དང་། མངོན་དགའ་སློབ་གྲྭའི་སྤྱི་ཡོངས་ཀྱི་ལན་བབ་དེ་ཚོར་ལྟ་ཡོང་དུས། སྔོན་མ་དང་པོ་བཙུགས་སྐབས་དཀའ་ངལ་ཡོད་པ་རེད་དེ། ད་ལྟའི་གནས་སྟངས་ལ་ལྟ་སྐབས་ལན་བབ་དེ་ཙམ་མེད་པ་ཞིག་ང་ཚོ་འཕྲོད་བསྟེན་ལས་ཁུངས་ནས་གཟིགས་བསྡད་ཀྱི་ཡོད་པ་རེད། ཁོ་རང་གིས་བསམ་པར་ཁོ་རང་གི་སྙན་ཞུ་ཡི་གེ་དེ་ཡར་བསླེབས་པ་དང་ལམ་སང་མར་གནས་སྤོའི་ཡི་གེ་དེ་བཏང་བར་བརྟེན། སྙན་ཞུ་དེ་བཏང་རྐྱེན་གནས་སྤོ་བཏང་བ་རེད་གསུང་གི་ཡོད་ས་རེད་བཱ། དེ་འདྲ་མ་རེད། དེ་རིང་ཞོགས་པར་ང་ཚོས་ཁོ་རང་ལ་འབྲེལ་བ་ཞུས་ཏེ་འདིར་ཕེབས་སོང་། ང་ཚོས་ཁྱེད་རང་གི་གནས་སྤོ་དང་སྙན་ཞུ་ཡི་གེ་དེའི་བར་འབྲེལ་བ་ཡོད་པ་མ་རེད་དཱ། ཁྱེད་རང་གིས་དེ་གཉིས་དཀྲུག་དཀྲུག་གཏོང་གི་འདུག་སྟེ་དེ་གཉིས་འབྲེལ་བ་ཡོད་པ་མ་རེད་ཅེས་ཞུས་པ་ཡིན། ཞེས་གསུངས་བྱུང་།

གསར་འགོད་པ། པདྨ་མཚོ།