ཅི་ཝིན་ལིན་ལ་ལོ་ ༡༢ ཡི་ཁྲིམས་ཐག་བཅད།

ཐེན་ཅིན་གྲོང་ཁྱེར་འབྲིང་རིམ་མི་དམངས་ཁྲིམས་ཁང་དང་པོས་ཅི་ཝིན་ལིན་ལ་བཅུ་གཉིས་ཀྱི་ཁྲིམས་ཐག་དང་དམངས་སྒོར་ས་ཡ་གཅིག་གི་ཆད་པ་བཅད་འདུག

རྒྱ་ནག་གཞུང་འབྲེལ་ཞིན་ཧྭ་གསར་ཁང་གིས་གནས་ཚུལ་བསྒྲགས་དོན་ལྟར་ན། དེ་རིང་སྔ་དྲོར་ཐེན་ཅིན་གྲོང་ཁྱེར་འབྲིང་རིམ་མི་དམངས་ཁྲིམས་ཁང་དང་པོས་ཧེ་ནན་ཞིང་སྤྱི་ཁྱབ་གཞོན་པ་ཟུར་བ་ཅི་ཝིན་ལིན་ལ་ལྐོག་ཟ་རུལ་སུངས་ཀྱི་ནག་ཉེས་ཐོག་ལོ་ ༡༢ ཁྲིམས་ཐག་དང་དམངས་སྒོར་ས་ཡ་ ༡ གི་ཉེས་ཆད་བཅད་ཡོད་འདུག ཅི་ཝིན་ལིན་ནི་དེ་སྔ་རྒྱ་ནག་སྲིད་ཁྲིམས་ལྷན་ཁང་གི་འགན་འཛིན་ཟུར་བ་ཀྲུག་ཡོང་ཁཱང་གི་དྲུང་ཡིག་ཡིན་འདུག

གནས་ཚུལ་འདིའི་ནང་། ཅི་ཝིན་ལིན་གྱིས་ལྐོག་རྔན་སྤྲོད་ལེན་གྱི་ནག་ཉེས་ཁས་ལེན་བྱས་པའི་ཐོག ཁོ་ལ་ལོ་ ༡༢ ལ་ཁྲིམས་ཐག་བཅད་ཡོད་ལུགས་དང་། འདི་ནི་རྒྱ་ནག་གི་ལྐོག་ཟ་རུལ་སུངས་གཙང་བཤེར་ལས་འགུལ་ཁྲོད་དམར་ཤོག་ཚོགས་པའི་མཐོ་རིམ་དཔོན་རིགས་ཚོར་ཞིབ་བཤེར་དང་ཁྲིམས་ཆད་ཆེས་མཐའ་མ་དེ་ཆགས་ཀྱི་ཡོད་ཚུལ་སོགས་བརྗོད་འདུག

ཕྱི་ལོ་ ༢༠༡༤ ལོའི་ཟླ་ ༧ པའི་ཚེས་ ༢ ཉིན་ཅི་ཝིན་ལིན་དམར་ཤོག་ཚོགས་ཁོངས་སུ་ཕྱིར་ཕུད་བཏང་སྟེ་ཆེས་མཐོའི་མི་དམངས་ཞིབ་བཤེར་ཁང་གིས་ཅི་ཝིན་ལིན་གྱི་ལྐོར་རྔན་སྤྲོད་ལེན་གྱི་ནག་ཉེས་ཐད་ཞིབ་བཤེར་བྱེད་མགོ་བཙུགས་ཡོད་པ་དང་། དེ་རིང་ཐེན་ཅིན་གྲོང་ཁྱེར་འབྲིང་རིམ་མི་དམངས་ཁྲིམས་ཁང་དང་པོས། ཅི་ཝིན་ལིན་གྱིས་སྔོན་ཆད་ཧེ་ནན་ཞིང་ཆེན་དང་ཟི་ཁྲོན་ཞིང་ཆེན་གྱི་སྤྱི་བདེ་ལྷན་ཁང་དུ་བྱ་བ་བསྒྲུབས་སྐབས། དམངས་སྒོར་ས་ཡ་ ༢༠ དངུལ་དངོས་ཀྱི་ལྐོག་རྔན་སྤྲོད་ལེན་བྱས་པའི་ནག་ཉེས་ཐོག་ལོ་ ༡༢ ཁྲིམས་ཆད་དང་དམངས་སྒོར་ས་ཡ་ ༡ ཆད་པ་བཅད་ཡོད་པ་རེད།

ཅི་ཝིན་ལིན་ནི་ཀྲུའུ་ཡོང་ཁང་གི་ལས་རོགས་ཡིན་པ་དང་། ཕྱི་ལོ་ ༢༠༡༤ ལོའི་ཟླ་ ༡ པོར་ཧེ་ནན་ཞིང་ཆེན་སྤྱི་ཁྱབ་གཞོན་པར་བསྐོ་བཞག་བྱས་ཡོད་པ་དང་། ཕྱི་ལོ་ ༢༠༡༤ ཟླ་ ༢ པར་ལས་གནས་ནས་ཕྱིར་ཕུད་བཏང་སྟེ་ཀྲུང་ཧྭ་མི་དམངས་ཆེས་མཐོའི་ཞིབ་བཤེར་ཁང་ཟེར་བས་ཁོ་ལ་ཞིབ་བཤེར་བྱེད་མགོ་བཙུགས་ཡོད་པ་རེད།

ན་ནིང་ཕྱི་ཟླ་ ༡ པོའི་ནང་ཐེན་ཅིན་གྲོང་ཁྱེར་འབྲིང་རིམ་མི་དམངས་ཁྲིམས་ཁང་གཉིས་པས་ཀྲུང་ཧྭ་མི་དམངས་སྤྱི་བདེ་ལྷན་ཁང་གི་སྤྱི་ཁྱབ་གཞོན་པ་ལེ་ཏོང་ཧྲིན་ (Li Dongsheng) ལ་ལྐོག་རྔན་སྤྲོད་ལེན་གྱི་ནག་ཉེས་ཐོག་ལོ་ ༡༥ ཁྲིམས་ཐག་བཅད་པ་དང་། ཕྱི་ཟླ་ ༡༠ པའི་ནང་ཧུ་པེ་ཞིང་ཆེན་ས་གནས་མི་དམངས་ཁྲིམས་ཁང་གིས་རྒྱལ་ཁབ་ཀྱི་ཐོན་ཁུངས་རྟོག་ཞིབ་དོ་དམ་ལྷན་ཚོགས་ཀྱི་ཆེས་མཐོའི་སྐུ་ཚབ་ཟུར་པ་ཅིང་ཅི་མེན་ (Jiang Jiemin) ལ་ལྐོག་རྔན་སྤྲོད་ལེན་བྱས་པའི་ནག་ཉེས་ཐོག་ལོ་ ༡༦ ཁྲིམས་ཐག་བཅད་ཡོད་པ་རེད།

གསར་འགོད་པ། པདྨ་རྒྱལ།