རྒྱ་ནག་གི་བཙོན་འོག་ཏུ་ཡོད་པའི་འགྲོ་བ་མིའི་ཐོབ་ཐང་འཐབ་རྩོད་པ་བོད་རིགས་གཞོན་སྐྱེས་རྩོམ་པ་པོ་ཞོགས་ལྗང་ལགས་ཀྱིས་རྒྱ་ནག་གཞུང་གིས་ཁོང་ལ་ཉེས་མེད་བཙན་འགེལ་གྱིས་ཁྲིམས་ཐག་བཅད་པ་དེར་ངོས་ལེན་མེད་པའི་ཞུ་གཏུག་ཡི་གེ་ཕུལ་འདུག
བོད་ནང་གི་འགྲོ་བ་མིའི་ཐོབ་ཐང་དང་རང་དབང་འཐབ་རྩོད་པ་ཞོགས་ལྗང་ལགས་ ༢༠༡༥ ཟླ་ ༣ ཚེས་ ༡༩ ཉིན་མཚོ་སྔོན་རེབ་གོང་ཁུལ་ཐོག་ཏུ་རྒྱ་ནག་གི་ཉེན་རྟོག་པས་འཛིན་བཟུང་བཙན་ཁྲིད་བྱས་ཡོད་པ་དང་། ཉེ་ལམ་ཕྱི་ཟླ་ ༡༧ ཉིན་ཉིན་རེབ་གོང་ཐུན་རིན་ཁྲིམས་ཁང་གིས་ཁྲིམས་བཤེར་དང་ཁྲིམས་རྩོད་པ་སོགས་ཀྱི་གོ་རིམ་གང་ཡང་མེད་པར། ཞོགས་ལྗང་གིས་མི་རིགས་ཁ་བྲལ་གྱི་ཟིང་ཆ་བསླངས་པ་དང་ཕྱི་གྱར་ཁ་བྲལ་བར་ལྐོག་འབྲེལ་བྱས་པ། ཆ་འཕྲིན་བརྒྱུད་ལམ་ཁག་ཏུ་ཐེངས་མང་པོར་སྤྱི་ཚོགས་བརྟན་བརླིང་ལ་གནོད་པའི་བརྗོད་བྱ་སྤེལ་བ་སོགས་ནག་ཉེས་བཞི་ཙམ་བགྲང་སྟེ། ལོ ༣ ཡི་ཁྲིམས་ཐག་གཅོད་རྒྱུ་ཡིན་སྐོར་བརྗོད་སྐབས། ཞོགས་ལྗང་ལགས་ཀྱིས་བཅད་ཁྲ་དེར་ངོས་ལེན་མ་གནང་བར་བསྐྱར་དུ་ཞུ་གཏུག་བྱ་ཡིན་ཚུལ་བརྗོད་ཡོད་པ་རེད།
