“འཛམ་གླིང་ཡུ་གུར་ལྷན་ཚོགས”ཀྱི་ཚོགས་གཙོ་ཌོལ་ཀུན་ཨེ་ས་ནི་འཇིགས་སྐུལ་དྲག་སྤྱོད་པ་ཡིན་སྟབས། ཁོང་རྒྱ་གར་བྱང་ཕྱོགས་དྷ་རམ་སར་འཚོགས་འཆར་ཡོད་པའི་བགྲོ་གླེང་ཚོགས་འདུའི་སྟེང་མཉམ་ཞུགས་མི་ཆོག་ཟེར།
དེ་རིང་རྒྱ་གར་གྱི་ (indiatoday) ཞེས་པའི་བརྒྱུད་ལམ་དུ་གནས་ཚུལ་སྤེལ་བ་ལྟར་ན། ཁ་སང་རྒྱ་ནག་ཕྱི་སྲིད་ལྷན་ཁང་གིས་གཞུང་འབྲེལ་བསྒྲགས་གཏམ་ཞིག་སྤེལ་བའི་ནང་། ཕྱི་སྡོད་ཡུ་གུར་མི་རིགས་ཀྱི་ཚོགས་པ“འཛམ་གླིང་ཡུ་གུར་ལྷན་ཚོགས” (WUC) ཀྱི་ཚོགས་གཙོ་ཌོལ་ཀུན་ཨེ་ས་ (Dolkun Isa) ཟེར་བ་དེ་འཇིགས་སྐུལ་དྲག་སྤྱོད་པ་ཡིན་ལུགས་དང་། འཛམ་གླིང་རྒྱལ་ཁབ་ཚང་མར་ཁོ་ལ་ཁྲིམས་བཤེར་བྱེད་པའི་འགན་འཁུར་ཡོད་ལུགས་སྟབས། ཁོང་ཟླ་འདིའི་ཕྱི་ཚེས་ ༢༨ ཉིན་ཨ་རིའི་ནང་རྟེན་གཞི་བྱེད་པའི་ (Initiatives for China) ཞེས་པའི་སྒྲིག་འཛུགས་ཀྱིས་གོ་སྒྲིག་འོག རྒྱ་གར་བྱང་ཕྱོགས་དྷ་རམ་ས་ལར་ཉིན་གསུམ་རིང་བགྲོ་གླེང་ཚོགས་འདུ་ཞིག་ཚོགས་འཆར་ཡོད་པའི་སྟེང་མགྲོན་འབོད་བྱས་པ་ལྟར། རྒྱ་གར་གཞུང་གིས་ཁོང་ལ་ཐོངས་མཆན་སྤྲད་ཡོད་སྟབས། རྒྱ་ནག་ཕྱི་སྲིད་ལྷན་ཁང་གིས་རྒྱ་གར་གཞུང་གིས་རྒྱ་ནག་གི་འཇིགས་སྐུལ་དྲག་སྤྱོད་པར་ཐོངས་མཆན་སྤྲད་པའི་སྐྱོན་བརྗོད་བྱས་ཡོད་འདུག
རྒྱ་ནག་ཕྱི་སྲིད་ལྷན་ཁང་གི་མགྲིན་ཚབ་པས། ངས་གནས་ཚུལ་འདི་རྟོགས་ཐབས་མི་འདུག ཌོལ་ཀུན་ཨེ་ས་རྒྱལ་སྤྱིའི་ཉེན་རྟོག་སྒྲིག་འཛུགས་ (Interpol) ཀྱི་ཉེན་བརྡ་དམར་པོའི་སྟེང་བཀོད་པའི་འཇིགས་སྐུལ་དྲག་སྤྱོད་པ་ཞིག་རེད། འབྲེལ་ཡོད་རྒྱལ་ཁབ་ཁག་གིས་ཁོ་ལ་ཁྲིམས་བཤེར་བྱེད་རྒྱུ་ནི་གཡོལ་དུ་མེད་པའི་འགན་འཁུར་ཞིག་ཡིན་ལུགས་སོགས་བཤད་འདུག
རྒྱ་གར་རྒྱལ་སྲུང་ལྷན་ཁང་གི་སློབ་སྟོན་པ་ཨ་ཅེ་ཊ་ཌོ་བལ་ (Ajit Doval) ཟེར་བ་ཞིག་གིས་རེས་གཟའ་ཕུར་བའི་ཉིན་རྒྱ་དཀར་ནག་གཉིས་ཀྱིས་འཇིགས་སྐུལ་དྲག་སྤྱོད་པ་འགོག་རྒོལ་དང་། དེ་མིན་ཐུན་མོང་གི་དམག་དོན་དཀའ་རྙོག་གཞན་གྱི་ཐད་ལ་མཐའ་མཚམས་གྲོས་མོལ་ཐེངས་བཅུ་དགུ་པའི་སྐབས་སུ་གླེང་སློང་བྱེད་རྒྱུ་ཡིན་སྐོར་དང་། ཉི་མ་དེར་ཁོང་གིས་པེ་ཅིན་གྲོང་ཁྱེར་གྱི་ཀྲུང་ནན་ཧྭེ་ (Zhongnanhai) ལྟེ་གནས་ཁང་དུ་རྒྱ་ནག་གི་སྲིད་བློན་ལེ་ཁི་ཆང་ (Li Keqiang) ལ་ཐུག་འཕྲད་སྐབས་སུ། ཟླ་རྗེས་མར་རྒྱ་གར་གྱི་སྲིད་འཛིན་ཕ་ར་ནབ་མག་ཧིར་རྗེ་ (Pranab Mukherjee) ལགས་རྒྱ་ནག་ནང་གཟིགས་སྐོར་དུ་ཡོང་འཆར་ཡོད་པ་དང་། དེ་ཡང་ཁོང་རྒྱ་གར་སྲིད་འཛིན་གྱི་མིང་ཐོག་ནས་རྒྱ་ནག་ནང་གཟིགས་སྐོར་བྱ་བ་ཐེངས་དང་པོ་དེ་ཆགས་ཀྱི་ཡོད་སྐོར་སོགས་བརྗོད་འདུག
གནས་ཚུལ་འདིའི་ནང་། “འཛམ་གླིང་ཡུ་གུར་ལྷན་ཚོགས”ཞེས་པ་དེ་ཕྱི་སྡོད་ཡུ་གུར་བ་ཁག་གིས་བཙུགས་པ་དང་། ཚོགས་པ་དེའི་ནང་ཕྱི་སྡོད་རྒྱ་རིགས་ཡོད་པ་དང་། ཨ་རིའི་ནང་རྟེན་གཞི་བྱེད་པའི་ (Initiatives for China) ཞེས་པའི་སྒྲིག་འཛུགས་དེ་ནི་དམངས་གཙོ་རྒྱབ་སྐྱོར་ཚོགས་པ་ཞིག་ཡིན་ཞིང་ཚོགས་དེའི་ཚོགས་གཙོ་ཕྱི་ལོ་ ༡༩༨༩ ལོར་གནམ་བདེ་སྒོ་མོ་ཆེའི་ཐང་ཆེན་དུ་ཡར་ལང་བྱེད་མཁན་རྒྱ་རིགས་སློག་ཕྲུག་ཚོའི་གྲས་ཀྱི་ཡང་ཅེན་ལེ་ (Yang Jianli) ཟེར་བ་ཞིག་ཡིན་ཞིང་། བགྲོ་གླེང་ཚོགས་འདུ་འདིའི་དགོས་དམིགས་གཙོ་བོ་ཡུ་གུར་བ་དང་བོད་མི། དེ་བཞིན་ཕྱི་སྡོད་རྒྱ་རིགས་ཡུལ་བྱོལ་སོགས་ལྷན་འཛོམས་ཐོག་རྒྱ་ནང་གི་དམངས་གཙོའི་འགྱུར་ལྡོག་སྐོར་ལ་བགྲོ་གླེང་བྱ་རྒྱུ་ཡིན་སྐོར་སོགས་འཁོད་འདུག
གནས་ཚུལ་འདིའི་མུ་མཐུད་དུ། “འཛམ་གླིང་ཡུ་གུར་ལྷན་ཚོགས” ཀྱི་ཚོགས་གཙོ་ཌོལ་ཀུན་ཨེ་ས་ཐེངས་འདིའི་བགྲོ་གླེང་ཚོགས་འདུའི་སྟེང་མཉམ་ཞུགས་བྱ་མིན་གཏན་འཁེལ་མེད་ནའང་། རྒྱ་གར་གཞུང་གིས་ཁོང་ལ་ཐོངས་མཆན་སྤྲད་ཡོད་ཀྱང་། པེ་ཅིན་གཞུང་གིས་འཛམ་གླིང་རྒྱལ་ཁབ་ཁག་ལ་ཨེ་ས་འཛིན་བཟུང་དགོས་པའི་འབོད་སྐུལ་བསྒྲགས་ཡོད་པ་མ་ཟད། ཁོས་ཤིན་ཅང་ས་ཁུལ་དུ་འཇིགས་སྐུལ་དྲག་སྤྱོད་ཀྱི་ལས་འགུལ་སྤེལ་མཁན་མང་པོ་རྩ་འཛུགས་བྱས་པའི་ཁ་ཉེས་བཏང་ཡོད་པ་དང་། ཨེ་ས་འཇིགས་སྐུལ་དྲག་སྤྱོད་པའི་མིང་ཐོའི་ནང་བཏོན་རྗེས། ཕྱི་ལོ་ ༢༠༠༩ ལོར་ཁོང་ལྷོ་ཀོ་རི་ཡར་འགྲོ་བར་བཀག་སྡོམ་བྱས་ཡོད་པ་དང་། སྐབས་དེར་རྒྱ་ནག་གཞུང་འབྲེལ་བརྒྱུད་ལམ་ཁག་ཏུ་ཨེ་ས་ཡིས་ཕྱི་ལོ་ ༡༩༩༠ ལོར་ཤིན་ཅང་གི་ཊོག་སུ་ (Toksu) རྫོང་དུ་འགལ་རྫས་ཀྱི་དོན་རྐྱེན་བསླངས་ཡོད་སྟབས། རྒྱ་ནག་གི་སྤྱི་དམངས་བདེ་འཇགས་ལྷན་ཁང་གིས་ཁོ་འཛིན་བཟུང་བྱེད་འདོད་ཡོད་ལུགས་བཤད་ཅིང་། ཕྱི་ལོ་ ༡༩༩༧ ལོར་ཨེ་ས་རྒྱ་ནག་ནས་འཇར་མན་ནང་སྐྱབས་བཅོལ་དུ་ཕྱིན་ཡོད་པ་དང་། རྒྱ་ནག་གཞུང་གིས་ཤིན་ཅང་ས་ཁུལ་གྱི་ཟིང་འཁྲུག་དེ་ “འཛམ་གླིང་ཡུ་གུར་ལྷན་ཚོགས” ཀྱིས་རྒྱུད་སྐུལ་བཏང་བ་ཡིན་ལུགས་བཤད་ཡོད་ནའང་། ལྷན་ཚོགས་དེས་རྒྱ་ནག་གི་ཉེས་འཛུགས་དང་ལེན་མ་བྱས་པར་ཁོ་ཚོས་ཡུ་གུར་གྲངས་ཉུང་མི་རིགས་ལ་འཕྲད་བཞིན་པའི་རྒྱ་ནག་གི་དྲག་གནོན་ལ་གཏོང་ལེན་བྱེད་ཀྱི་ཡོད་སྐོར་བརྗོད་འདུག
གསར་འགོད་པ། པདྨ་རྒྱལ།
