ཚོགས་ཆུང་གཉིས་དང་ཟིན་བྲིས་གཅིག་བཟོ་བཞིན་ཡོད།

སྲིད་སྐྱོང་མཆོག་གིས་བཀའ་ཤག་དང་སྤྱི་འཐུས། འོས་བསྡུ་ལྷན་ཁང་བཅས་ཚོགས་འདུ་རིམ་པ་ཚོགས་ཏེ། འཕྲོད་བསྟེན་སྔོན་འགོག་གི་ཚོགས་ཆུང་ཞིག་དང་། ཉམས་ཐག་བསྐྱར་ཞིབ་ཀྱི་ཚོགས་ཆུང་། འོས་བསྡུའི་ལས་རིམ་བསྐྱར་བཅོས་ཀྱི་ཟིན་བྲིས་ཤིག་བཅས་གྲ་སྒྲིག་ཞུ་བཞི་ཡོད་གསུངས།

ཁ་སང་ཕྱི་དྲོའི་ཆུ་ཚོད་ ༢།༣༠  བོད་མིའི་སྒྲིག་འཛུགས་སྲིད་སྐྱོང་མཆོག་གིས་ཕྱི་དྲིལ་ལྷག་པ་ཚེ་རིང་དྲན་རྟེན་ཚོགས་ཁང་དུ་གསར་འགོད་ལྷན་ཚོགས་ཤིག་གནང་ཡོད། སྐབས་དེར་སྲིད་སྐྱོང་མཆོག་གིས་ཉེ་ལམ་སྨན་རྩིས་ཁང་ལོ་བརྒྱ་འཁོར་བའི་མཛད་སྒོའི་སྟེང་༧གོང་ས་མཆོག་གིས་བཀའ་ནན་གནང་བའི་ཐད། བོད་མིའི་སྒྲིག་འཛུགས་བཀའ་ཤག་དང་སྤྱི་འཐུས། དེ་བཞིན། དབུས་འོས་བསྡུ་ལས་ཁང་སོགས་ཀྱིས་ཚོགས་འདུ་སྔ་ཕྱི་ཚོགས་ཏེ། མ་འོངས་པར་ལས་འཆར་གང་དག་བསྒྲིགས་པའི་སྐོར་གསལ་བསྒྲགས་གནང་དོན། དེ་རིང་འདིར་གསར་འགོད་ལྷན་ཚོགས་བསྐོང་དགོས་དོན་ནི་དེ་སྔོན་སྤེལ་ཟིན་པའི་གསར་འགོད་གསལ་བསྒྲགས་ཀྱི་མཇུག་སྣོན་ཞིག་ཡིན། གཞི་རྩའི་ཚང་མས་མཁྱེན་གསལ་རེད། སྨན་རྩིས་ཁང་དབུ་བརྙེས་ནས་ལོ་ ༡༠༠ འཁོར་བའི་མཛད་སྒོར་༸གོང་ས་མཆོག་གིས་བཀའ་སློབ་ནན་པོ་ཕེབས་པ་གཞིར་བཟུང་། དེ་སྔོན་ཡང་རྣམ་པ་ཚོར་སྙན་གསེང་ཞུས་ཟིན་པ་ལྟར། བཀའ་ཤག་གི་ངོས་ནས་༸གོང་ས་མཆོག་གི་དགོངས་པ་དྭངས་ཆེད་དགོངས་སེལ་ཞུ་རྒྱུ་ཙམ་མིན་པར་ཕྱག་ལས་ལག་བསྟར་གནང་རྒྱུ་དེ་གལ་ཆེན་པོར་བརྩི་བཞིན་ཡོད། ༸གོང་ས་མཆོག་གིས་ཉམ་ཐག་དང་འཕྲོད་བསྟེན་སྔོན་འགོག་སྐོར་བཀའ་སློབ་ཕེབས་ཡོད།

དེ་བཞིན། བཀའ་ལུང་ནང་འོས་བསྡུ་དང་འབྲེལ་བའི་ཐོག་བཀའ་ལུང་ཕེབས་ཡོད་པར་བརྟེན། དེའི་ཐོག་བཀའ་ཤག་ལྷན་རྒྱས་ཐེངས་མང་འཛོམས་ཡོད་པ་མ་ཟད། བཀའ་སྤྱི་ཐེངས་གཉིས་གསུམ་ཙམ་འཛོམས་ནས་བཀའ་བསྡུར་བྱེད་རྒྱུ་བྱུང་། དེ་བཞིན་ཚོགས་གཙོ་སྦྲེལ་པོའི་ལྷན་ཐེངས་ཁ་ཤས་འཛོམས་ཏེ་བཀའ་བསྡུར་རིམ་པ་བྱུང་ཡོད། འོས་བསྡུ་དང་འབྲེལ་བའི་ཐོག་འོས་བསྡུ་ལྷན་ཁང་གི་འགན་འཛིན་དང་འགན་འཛིན་ལས་རོགས་དང་ལྷན་བཀའ་བསྡུར་རིམ་པ་བྱུང་ཡོད། བཀའ་བསྡུར་བྱུང་འབྲས་སུ་ད་ཐེངས་ཚོགས་ཆུང་རིམ་པ་གཉིས་དང་ཟིན་བྲིས་གཅིག་བཅས་གཏན་འཁེལ་བྱུང་ཡོད། ཚོགས་ཆུང་དང་པོ་དེ་འཕྲོད་བསྟེན་སྔོན་འགོག་དང་འབྲེལ་བའི་ཚོགས་ཆུང་འཛུགས་ཆེད་ང་ཚོས་རེ་འདུན་ཞུས་པ་ལྟར་ཁྲིམས་ཞིབ་པ་ཆེ་བ་ཟུར་པ་ངག་དབང་འཕེལ་རྒྱས་མཆོག་གིས་མོས་མཐུན་གནང་ཡོད། ངག་དབང་འཕེལ་རྒྱས་ལགས་ནི་ཁྲིམས་ཞིབ་པ་ཆེ་བ་ཟུར་པ་ཙམ་མིན་པར་དེ་སྔ་འཕྲོད་བསྟེན་ལས་ཁུངས་ནང་ཕྱག་ལས་གནང་མྱོང་ཡོད་པ་མ་ཟད། ལྷན་ཁང་ཁག་གཞན་དང་སྐུ་ཚབ་དོན་ཁང་སོགས་ཀྱི་ནང་དུའང་ཕྱག་ལས་གནང་མྱོང་ཡོད། ཁོང་ལ་གང་ཅིའི་ཐད་ཉམས་མྱོང་ཚད་དང་ལྡན་པ་ཞིག་ཡོད་སྟབས་འཕྲོད་བསྟེན་ཚོགས་ཆུང་གི་ཚོགས་གཙོ་གནང་རྒྱུར་རེ་འདུན་ཞུས་པ་ལྟར་མོས་མཐུན་ཡང་གནང་བར་ཧ་ཅང་དགའ་པོ་བྱུང་། ཁོང་གི་ཕྱག་རོགས་སུ་དྲུང་ཟུར་ཡོངས་གྲགས་སུ་ཚེ་རྡོར་ལགས་སམ་ཚེ་རིང་རྡོ་རྗེ་ལགས་བསྐོས་ཡོད། ཁོང་གིས་འཕྲོད་བསྟེན་ལས་ཁུངས་ཀྱི་དྲུང་ཆེ་གནང་མྱོང་ཡོད་པ་མ་ཟད་ལྷན་ཁང་ཁག་གཞན་གི་ནང་དུའང་ཕྱག་ལས་གནང་མྱོང་ཡོད།

དེ་ནས་ཉམ་ཐག་ཚོགས་ཆུང་ནང་བཀའ་ཟུར་ཚེ་རིང་ཕུན་ཚོགས་མཆོག་བསྐོ་གཞག་གནང་ཡོད། ཁོང་གིས་ཆོས་རིག་བཀའ་བློན་གནང་ཡོད་པ་མ་ཟད་སྤྱི་འཐུས་ཀྱང་གནང་མྱོང་ཡོད། དེ་བཞིན་དེ་སྔ་གྲོས་ཚོགས་ནང་ཉམ་ཐག་ཚོགས་ཆུང་ནང་ཕྱག་ལས་གནང་སྟེ་ཉམས་མྱོང་མཆོག་ཏུ་གྱུར་བ་ཞིག་ཡོད། ཁོང་གི་ཕྱག་རོགས་སུ་དྲུང་ཟུར་བཀྲ་ཤིས་ཕུན་ཚོགས་ལགས་བསྐོ་གཞག་གནང་ཡོད། ཁོང་ནི་དེ་སྔ་ནང་སྲིད་ལས་ཁུངས་ཀྱི་དྲུང་ཆེ་ཡུན་རིང་གནང་མྱོང་ཡོད་པ་མཟད། ལྷན་ཁང་ཁག་དང་འཛིན་སྐྱོང་སོགས་སྤྱི་ཡོངས་ཀྱི་ཉམས་མྱོང་ཚད་དང་ལྡན་པ་ཡོད་པའི་མི་སྣ་ཞིག་ཆགས་ཡོད།

དམིགས་བསལ་ཉམས་ཐག་ཞེས་རྗོད་སྐབས་ནང་ཤེས་འཕྲོད་གསུམ། ནང་སྲིད། ཤེས་རིག དེ་བཞིན་འཕྲོད་བསྟེན་བཅས་གསུམ་ཀར་འབྲེལ་བ་ཡོད་སྟབས། ཉམས་ཐག་ཚོགས་ཆུང་ཞིག་ཡོད་པ་རེད། ཚོགས་ཆུང་དེའི་ཐོག་ལ་བཀའ་ཟུར་ཚེ་རིང་ཕུན་ཚོགས་ལགས་དང་། དྲུང་ཟུར་བཀྲ་ཤིས་ཕུན་ཚོགས་ལགས་རྣམ་གཉིས་ཕྱག་ལས་ནང་རྒྱུར་ཐུགས་གཏན་འཁེལ་ཡོད། ཁོང་རྣམ་པ་ཚོ་ད་ལན་ཕལ་ཆེར་ཕྱི་ཟླ་ལྔ་པའི་ཟླ་དཀྱིལ་མ་འགྱང་པར་ཕྱག་ལས་དབུ་འཛུགས་གནང་གི་རེད། ང་ཚོས་བཀའ་ཤག་ནས་ཁོང་རྣམ་པར་ཟླ་བ་གསུམ་ནང་ཚུན་སྙན་ཐོ་ཞིག་འབུལ་ཚར་བ་གནང་རོགས་གནང་ཞེས་རེ་སྐུལ་ཞུས་ཡོད། གང་ཡིན་བརྗོད་ན་ཟླ་བ་གསུམ་ནང་ཚུན་སྙན་ཐོ་དེ་ཚ་ཚ་འུར་འུར་ཐོག་ནས་བྱུང་བ་ཡིན་ན་བཀའ་ཤག་གསར་པ་ཕེབས་སྐབས་ལག་བསྟར་གནང་རྒྱུར་ཐུགས་ཕན་གསོས་པ་ཡོང་གི་རེད། འཕྲོད་བསྟེན་ལྟ་བུར་མཚོན་ན། འཕྲོད་བསྟེན་བཀའ་བློན་དང་དྲུང་ཆེ་ཟུར་པ། ས་གནས་ཁག་ལ་ཡོད་པའི་སྨན་ཁང་གི་འགན་འཛིན་དང་བཀའ་བསྡུར་གནང་རྗེས། ཁོ་རང་ཚོའི་དགོངས་ཚུལ་ཚུར་སྤུངས་ནས་སྙན་ཐོའི་ནང་ལ་བཀའ་ཤག་འདིའི་ཐོག་ནས་རེད།

དམིགས་བསལ་འཕྲོད་བསྟེན་ལས་ཁུངས་ཐོག་ནས་ག་རེ་གནང་དགོས་ཡོད་མེད་ཐོག་ང་ཚོས་རེ་བ་ཞུ་གི་ཡོད། དེ་དང་འབྲེལ་བའི་ཐོག་ནས་ཕྱི་ཟླ་ལྔ་པའི་ཚེས་ ༡༦།༡༧།༡༨ བཅས་ལ་འཕྲོད་བསྟེན་ལས་ཁུངས་ནས་དམིགས་བསལ་སྔོན་འགོག་དང་འབྲེལ་བའི་ཐོག་ནས་འཕྲོད་བསྟེན་གྱི་ཚོགས་ཆེན་ཞིག་ཚོགས་རྒྱུ་རེད། ཉིན་གསུམ་དེའི་རིང་ས་གནས་འཕྲོད་བསྟེན་ཡན་ལག་སྨན་ཁང་ཁག་དང་། སློབ་གྲྭ དགོན་སྡེ་ཁག་གི་སྐུ་ཚབ་བཅས་ཁྱོན་མི་གྲངས་དྲུག་ཅུ་ནས་བརྒྱད་ཅུ་བར་ཕེབས་ནས་ཉིན་གསུམ་རིང་འཕྲོད་བསྟེན་སྔོན་འགོག་ཆེད་དུ་ག་རེ་གནང་རྒྱུ་ཡོད་མེད་སྐོར་སོགས་ཀྱི་ཐོག་ལ་བཀའ་བསྡུར་གནང་ནས་ལས་རིམ་དེ་འདྲ་ཞིག་བང་བསྒྲིགས་ཡོད། ཚང་མས་མཁྱེན་གསལ་བཞིན་ཨ་རིའི་རོགས་ཚོགས་ USAID ནས་ང་ཚོ་བོད་ཀྱི་ཐེབས་རྩ་བརྒྱུད་ནས་འཕྲོད་བསྟེན་ལས་ཁུངས་ལ་ཨ་རིའི་སྒོར་མོ་ཌོ་ལར་ས་ཡ་གསུམ་ཡོང་གི་ཡོད།

དེ་དང་འབྲེལ་བའི་ཐོག་ནས་ USAID ཡིན་ནའང་ཉམས་ཞིབ་བྱས་དང་བྱེད་བཞིན་པ་རེད། དེ་ཡང་ཁྱད་མཁས་མི་སྣ་མང་པོ་ཞིག་དང་མཉམ་དུ་བཀའ་བསྡུར་གནང་ནས་འཕྲོད་བསྟེན་ལས་ཁུངས་ནས་ལོ་གསུམ་ནང་སྔོན་འགོག་དང་འབྲེལ་བའི་ལས་དོན་ག་རེ་ག་རེ་བྱས་ཡོད་པ་ཁྱད་མཁས་མི་སྣ་ཚོའི་དགོངས་ཚུལ་དེ་དག་ཀྱང་སྤུངས་ནས་འཕྲོད་བསྟེན་ཚོགས་ཆུང་ངོས་ནས་མང་ཚོགས་ནང་ཐུགས་ཕན་གསོས་པའི་ལས་གཞི་ཁག་ཏན་ཏན་ཐོན་ཡོང་གི་རེད་བསམས་པའི་རེ་བ་ཞུ་གི་ཡོད། ཚོགས་ཆུང་གཉིས་ཀྱི་སྐོར་དེ་ཙམ་ཡིན།

དོན་ཚན་གསུམ་པ་དེ། ད་ལམ་བཀའ་ལུང་ནང་ཕེབས་ཡོད་པ་མ་ཟད། སྤྱི་ཚོགས་ནང་ལའང་ངོས་ལེན་བྱེད་ཀྱི་ཡོད། ང་ཚོའི་སྤྱི་ཚོགས་ནང་ལ་གཞི་རྩའི་སྔོན་འགྲོའི་འོས་བསྡུའི་བར་དུ་སྤྱི་ཚོགས་ལྷིང་འཇགས་པོ་བྱུང་ཡོད། དངོས་གཞིའི་སྔོན་གྱི་ཟླ་བ་གསུམ་ནང་སྤྱི་ཚོགས་འཁྲུག་ཆ་དོད་པོ་བྱུང་ཡོད། ཁ་སང་དཔལ་ལྡན་ཚོགས་གཙོ་མཆོག་གིས་འདིར་ཕེབས་ནས་ཞུས་པ་རེད། དེ་བཞིན་ཚོགས་གཙོས་གྲོས་ཚོགས་ནང་ལའང་གསུངས་ཡོད། སྲིད་སྐྱོང་འདིར་བཅར་ནས་དམངས་ལའང་ཞུས་པ་ཡིན། འོས་བསྡུའི་ནང་ཆ་ཤས་ལེན་མཁན་ཚང་མས་འགན་དེ་འཁྱེར་དགོས་ཀྱི་ཡོད། ད་ལན་སྤྱི་ཚོགས་ནང་ཧ་ཅང་འཁྲུག་པོ་བྱུང་ཡོད། དེར་བརྟེན་མ་འོངས་པ་དེ་འདྲ་མི་ཡོང་བའི་ཆེད་དུ་ག་རེ་བྱེད་རྒྱུ་ཡོད་རེད། ཅེས་བཀའ་བསྡུར་རིམ་པ་མང་པོ་བྱུང་སོང་། འོས་བསྡུའི་འགན་འཛིན། འགན་འཛིན་ལས་རོགས་རྣམ་པ། ཚོགས་གཙོ་ཚོགས་གཞོན་བཅས་བཀའ་སྤྱི་ཚོགས་འདུའི་སྐབས་འོས་བསྡུའི་སྒྲིག་གཞིར་འགྱུར་བ་གཏོང་དགོས་མིན་ཐད་བཀའ་བསྡུར་གནང་དགོས་འདུག་ཅེས་གོ་བསྡུར་རིམ་པ་མང་པོ་བྱུང་ཡོད། ཚང་མས་མོས་མཐུན་ཡོད་པ་དེ་ག་རེ་རེད་བརྗོད་ན། འོས་བསྡུའི་ལས་རིམ་དེ་རིང་དྲགས་འདུག ཅེས་ཕྱི་ཟླ་དྲུག་པ་ནས་གསལ་བསྒྲགས་བྱས་ནས་བཞི་པ་བར་བྱས་ཡོང་སྐབས་ཟླ་བ་དགུའམ་བཅུ་ཆགས་ཀྱི་ཡོད། དུས་ཚོད་རིང་པོ་དེའི་ནང་ལ་ང་རང་སྒེར་གྱི་ཉམས་མྱོང་ཡིན། ངས་ཀྱང་འོས་བསྡུའི་ནང་ཆ་ཤས་ཐེངས་བཞི་ཙམ་བླངས་པ་རེད། དུས་ཚོད་རིང་པོ་ཆགས་པའི་རྐྱེན་གྱིས་ག་རེ་ཆགས་ཀྱི་འདུག་བརྗོད་ན། དེའི་ནང་ལ་གཙོ་ཆེ་ཤོས་འོས་མིས་ཆ་ཤས་བླང་དགོས་ཀྱི་ཡོད། རྒྱབ་སྐྱོར་བྱེད་མཁན་ཚོ་ཡིན་ནའང་ཏན་ཏན་ཁོ་རང་ཚོའི་གཏམ་བརྗོད་རང་དབང་དང་མང་གཙོའི་འགྲོ་སྟངས་ཀྱི་ཆ་ནས་གསུང་རྒྱུའི་གོ་སྐབས་བསྐྲུན་དགོས་ཀྱང་། དུས་ཚོད་རིང་དྲགས་པས་དུས་ཚོད་དེའི་ནང་དུས་རྒྱུན་སྤྱི་ཚོགས་ནང་འགན་ཁུར་དང་ཕྱག་ལས་མ་གནང་མཁན་ཞིག་གིས་སྤྱི་ཚོགས་དྲ་རྒྱའམ་སྐད་འཕྲིན་དེ་དག་གི་ནང་གཞི་མེད་ཀྱི་སྐྱོན་འཛུགས་འདྲ་མིན་སྣ་ཚོགས་གསུངས་པ་ལ་བརྟེན་ནས་དོལ་རྒྱལ་རྗེས་འབྲང་པ་ཚོས་གོ་སྐབས་འཇུས་ནས་སྤྱི་ཚོགས་ནང་དཀྲོག་གཏམ་སྤེལ་རྒྱུ། དེ་བཞིན་རྒྱ་ནག་གཞུང་དང་འབྲེལ་བ་ཡོད་པའི་ཐོག་ནས་སྤྱི་ཚོགས་དྲ་རྒྱའི་ནང་མིང་མེད་པའི་ཐོག་ནས་འདྲ་མིན་སྣ་ཚོགས་བཤད་སྐབས་རང་བཞིན་གྱི་སྤྱི་ཚོགས་འཁྲུག་ཆ་དོད་པོ་ཆགས་ཡོང་གི་ཡོད། དུས་ཚོད་རིང་དྲགས་པས་ཞེན་ཁོག་དང་འཐེན་འཁྱེར་ཡང་ཡོང་གི་ཡོད།

དངོས་འབྲེལ་བྱས་ན་འོས་མིས་གང་གསུང་རྒྱུ་འདུག འཆར་སྣང་དང་། འཆར་གཞི། ལས་གཞི་གང་འདུག དེ་དག་གཙོ་བོར་གཞི་ལ་བཞག་པའི་ཐོག་ནས་འོས་བསྡུའི་འགྲན་བསྡུར་བྱས་དགོས་ཀྱང་། འབྲེལ་བ་དང་ཇུས་གཏོགས་མེད་ཀྱང་དུས་ཚོད་ཡོད་མཁན་ཁག་གཅིག་གིས་བར་དུ་འཛུལ་ནས་སྤྱི་ཚོགས་ནང་དཀྲོག་གཏམ་སྤེལ་ཡོང་སྐབས། འཕྲལ་ཕུགས་རྒྱང་གསུམ་ནས་གནོད་རྒྱུ་མ་གཏོགས་ཕན་རྒྱུ་གང་ཡང་མེད་པར་བརྟེན། འོས་བསྡུའི་དུས་ཚོད་དེ་ཉུང་དུ་གཏང་དགོས་འདུག་པ་དང་། ཉུང་དུ་ཇི་ལྟར་གཏོང་དགོས་དེའི་ཐོག་བཀའ་བསྡུར་འགྲོ་བཞིན་ཡོད། གཙོ་ཆེ་ཤོས་འོས་བསྡུའི་སྒྲིག་གཞི་འདི་མཐའ་མའི་ཐག་གཅོད་གྲོས་ཚོགས་ནས་ཐག་གཅོད་གནང་དགོས། གྲོས་ཚོགས་ནང་འོས་བསྡུའི་སྒྲིག་གཞི་ཟིན་བྲིས་འཁྱེར་ནས་ཐག་གཅོད་གནང་བ་ཡིན་ན། དེ་གཞིར་བཟུང་འགྲོ་དགོས། འོན་ཀྱང་འོས་བསྡུའི་དུས་ཚོད་རིང་དྲགས་འདུག་ཅེས་མི་མང་སོགས་ཚང་མས་མོས་མཐུན་བྱུང་ཡོད་སྟབས། དེའི་ཐོག་ག་རེ་གནང་གི་ཡིན། ཞེས་ད་ལྟའི་ཆར་འོས་བསྡུ་ལས་ཁུངས་ནས་དེའི་ཐོག་ཕྱག་ལས་གནང་བཞིན་པ་རེད། རིམ་པས་གྲོས་ཚོགས་ནང་ཟིན་བྲིས་འཁྱེར་ཏེ་གྲོས་འཆར་འཁྱེར་དགོས་ཀྱི་ཡོད། དེ་གཞིར་བཟུང་ཏན་ཏན་གྲོས་ཚོགས་ནས་ཐུགས་ཐག་གཅོད་རྒྱུ་ཡིན་སྟབས། རིམ་པས་ཡོང་གི་རེད་སེམས་ཀྱི་འདུག

དེ་རིང་འདིར་རྣམ་པ་ཚོར་སྙན་སེང་ཞུ་རྒྱུ་དང་། གོང་དུ་ཞུས་པ་བཞིན་མཇུག་སྣོན་རང་ཡིན། ཁ་སྔོན་བཀའ་ཤག་ངོས་ནས་ཕྱག་ལས་གནང་གི་ཡིན། ཞེས་ཞུས་ཡོད་སྟབས། དེ་ལྟར་བར་མཚམས་རིང་པོ་ལྷག་པ་ཡིན་ན། མི་མང་ནང་གཅིག་བྱེད་ཀྱི་ཡིན། གཉིས་བྱེད་ཀྱི་ཡིན། ཞེས་གསལ་བསྒྲགས་བྱས་སོང་སྟེ། དོན་དག་དབབ་རྒྱུ་གང་ཡོད། ཅེས་ཏན་ཏན་དོགས་འདྲི་ཡོད་ངེས་རེད། དོགས་འདྲི་ཡོད་པ་ཡིན་ན། ད་རེས་བཀའ་ཟུར་དང་། སྤྱི་ཚོགས་ནང་ཆེ་མཐོང་ཡོད་པའི་མི་སྣའི་ཚོགས་ཆུང་བཙུགས་ཏེ་ལས་རིམ་ལག་བསྟར་འགྲོ་མུས་ཡིན། ཞེས་རྣམ་པ་ཚོར་ཞུ་རྒྱུ་གཙོ་བོ་འདི་ཡིན། ད་རེས་ངས་དོན་ཚན་གསུམ་གྱི་ཐོག་ནས་རྣམ་པ་ཚོར་སྙན་སེང་ཞུས་པ་ཡིན། དེ་ནས་ཉིན་གཉིས་གསུམ་ནང་གསར་འགོད་ལྷན་ཚོགས་ཏན་ཏན་བསྐོང་དགོས་ཆགས་ཀྱི་རེད་དྲན་གྱི་འདུག རྣམ་པ་ཚོར་དྲི་བ་གང་ཡོད་པ་རྣམས་སྐབས་དེར་ལན་ཞུས་ཆོག དེ་རིང་ངས་འཛིན་སྐྱོང་དང་ལས་དོན་ཐོག་རྣམ་པ་ཚོར་སྙན་སེང་ཞུ་ཆེད་ཡོང་བ་ཡིན།  ཞེས་གསུངས། །