ཁ་སང་རྒྱ་གར་བྱང་ཤར་ཨ་རུ་ན་ཅཱལ་མོན་རྟ་དབང་གྲོང་སྡེའི་མི་མང་གིས་ཉེ་ལམ་འཛིན་བཟུང་བྱས་པའི་གྲྭ་བློ་བཟང་རྒྱ་མཚོ་ཀློད་གྲོལ་གཏོང་དགོས་པར་ཞི་རྒོལ་བྱས་སྐབས་ཉེན་རྟོག་པས་མེ་མདའ་བརྒྱབ་སྟེ་མི་གཉིས་བསད་འདུག
རྒྱ་གར་བང་ཆེན་གསར་ཁང་གིས་གནས་ཚུལ་སྤེལ་བ་ལྟར་ན། ཁ་སང་གཟའ་ཟླ་བའི་ཉིན་རྒྱ་གར་བྱང་ཤར་ཨ་རུ་ནཱ་ཅལ་མངའ་སྡེ་མོན་རྟ་དབང་གྲོང་སྡེའི་ནང་རྟ་དབང་མི་མང་ཁག་ཅིག་གིས་ཉེ་སྔོན་ཕྱི་ཟླ་ ༤ ཚེས་ ༢༨ ཉིན་འཛིན་བཟུང་བྱས་པའི་དགེ་འདུན་པ་བློ་བཟང་རྒྱ་མཚོ་ལགས་ཀློད་གྲོལ་གཏོང་དགོས་པའི་རེ་འདུན་དང་སྦྲགས། ས་གནས་སྐོར་སྲུང་ལས་ཁང་དུ་ཞི་རྒོལ་སྐད་འབོད་བྱེད་སྐབས་ཉེན་རྟོག་པས་མི་མང་ཁྲོད་མེ་མདའ་བརྒྱབ་སྟེ་མི་གཉིས་བསད་པ་དང་མི་བཅུ་ལ་རྨས་སྐྱོན་ཚབས་ཆེན་ཕོག་ཡོད་འདུག
དེ་ཡང་ཨ་རུ་ནཱ་ཅལ་མངའ་སྡེའི་རྒྱལ་ས་ཨི་ཊ་ན་གྷར་ནས་གཞུང་འབྲེལ་ཐོག་གནད་དོན་དེའི་སྐོར་བརྗོད་པའི་ནང་། དེ་སྔོན་དགེ་འདུན་པ་བློ་བཟང་རྒྱ་མཚོས་སྣེ་ཁྲིད་ཀྱིས་ས་གནས་མི་མང་ཁག་ཅིག་གིས་ཨ་རུ་ནཱ་ཅལ་མངའ་སྡེའི་ནང་ཆུ་རགས་རྒྱག་རྒྱུའི་ལས་གཞིའི་གནད་དོན་དེར་དགག་པ་བྱས་སྟབས་ཁོང་ཉིད་འཛིན་བཟུང་བྱས་པ་དང་། ཁ་སང་གཟའ་ཟླ་བའི་ཉིན་མི་མང་ཁག་ཅིག་གིས་དགེ་འདུན་པ་ཁོང་ཀློད་གྲོལ་དགོས་པའི་ཞུ་ཡིག་དང་སྦྲགས། ས་གནས་ཁྲིམས་ཁང་ལ་ཞུ་གཏུགས་བྱས་པར་ཁྲིམས་ཁང་ནས་རྩིས་མེད་ཡོད་སྟབས། མི་མང་གིས་ཉེན་རྟོག་ལས་ཁུངས་མདུན་དུ་ཞི་བའི་སྐད་འབོད་བྱེད་སྐབས། ཉེན་རྟོག་པས་མི་མང་ལ་སྡིག་ར་བསྐུལ་ཆེད་མེ་མདའ་བརྒྱབ་ནས་དགེ་འདུན་པ་ཞིག་དང་། གཞན། གཞན་མི་སྐྱ་གཅིག་བཅས་མི་ ༢ བསད་པ་དང་མི་ ༡༠ ལ་གནོད་སྐྱོན་ཚབས་ཆེན་ཕོག་ཡོད་སྐོར་བརྗོད་འདུག
སྤྱིར་དགེ་འདུན་པ་བློ་བཟང་རྒྱ་མཚོས་དེ་སྔོན་ས་གནས་མི་མང་ཁག་གཅིག་གི་སྣེ་ཁྲིད་ཐོག་མངའ་སྡེའི་ནང་ཆུ་རགས་རྒྱག་རྒྱུའི་ལས་གཞི་དེར་དགག་པ་བྱས་པ་དང་། དེ་བཞིན། དགེ་འདུན་པ་བློ་བཟང་རྒྱ་མཚོས་རྟ་དབང་དགོན་པའི་བླ་མ་གུ་རུ་རིན་པོ་ཆེ་མཆོག་ལ་ཆུ་རགས་དང་འབྲེལ་བའི་ཆབ་སྲིད་ཀྱི་གནད་དོན་ཐོག་འཛུལ་ཞུགས་མ་བྱས་ན་བཟང་སྐོར་སོགས་ཞུས་པའི་རྒྱུ་མཚན་ལ་བརྟེན་ནས་ཁོང་ཉིད་འཛིན་བཟུང་བྱས་པ་ཞིག་ཡིན་འདུག
ཛ་དྲག་ཅན་གྱི་གནད་དོན་དེ་འབྱུང་སྐབས་མངའ་སྡེའི་སྤྱི་ཁྱབ་བློན་ཆེན་སྐུ་ཞབས་ཀ་ལི་ཁོ་པུལ་(Kalikho Pul) མཆོག་ལྡི་ལིར་ཡོད་པ་དང་། ཁོང་གིས་གནད་དོན་དེའི་ཐོག་ཁྲིམས་ཐོག་ནས་རྩད་ཞིབ་དགོས་པའི་བཀའ་བཏང་བ་དང་སྦྲགས། འདས་གྲོངས་སུ་སོང་བའི་ནང་མི་རྣམས་ལ་ཧིན་སྒོར་འབུམ་ ༥ སྤྲོད་རྒྱུའི་གསལ་བསྒྲགས་ཤིག་ཀྱང་སྤེལ་ཡོད་འདུག
དེ་བཞིན་རྒྱ་གར་ནང་སྲིད་བློན་ཆེན་གཞོན་པ་སྐུ་ཞབས་ཀི་རན་རི་ཇུ་ཇི་(Kiren Rijiju)མཆོག་གིས་ཀྱང་མངའ་སྡེའི་དྲུང་གཞོན་དང་། ཉེན་རྟོག་འགན་འཛིན་པ་བཅས་ཀྱི་འགན་འཁུར་ཐོག་སླད་མར་འབྲེལ་ཡོད་སྡེ་ཚན་ཚང་མ་མཉམ་རུབ་ཀྱིས་གནད་དོན་དེའི་ཐོག་རྩད་ཞིབ་དང་ཞི་བའི་གྲོས་མོལ་གྱི་ལམ་ནས་ལྷིང་འཇགས་བསྐྲུན་དགོས་སྐོར་གྱི་བསམ་ཚུལ་བཏོན་ཡོད་འདུག
བསྟན་འཛིན་རབ་རྒྱས་ཀྱིས་བསྡུ་སྒྲིག་བྱས།
དུས་བབ་ཀྱི་ལས་སྣེ་རྣམས་པར་གནས་ཚུལ་འདིའི་མགོ་བརྗོད་དུ་མོན་རྟ་དབང་ཉེན་རྟོགས་པས་བོད་མིའི་གྲྭ་བ་ཞིག་དང་སྐྱ་བོ་ཞིག་བསད་འདུག་ཞེས་ཏེ་གསལ་པོ་བཀོད་མ་ཐུབ་པར་རྒྱུ་མཚན་ཅི་ལ་ཐུག
གང་དྲག་་་་་ཆབ་སྲིད་པ་བསམ་སྦྱོར་ངན་པ་དག་གི་རིང་ནས་བཅངས་པའི་བསམ་ངན་ཅི་མཆིས་ཀུན་རང་སར་ཞི་ནས་་་ཉམས་ཆུང་མི་མང་དག་གི་རེ་འདུན་རྣམས་བདེ་བླག་ཏུ་འགྲུབ་སྟེ་སྔར་མུས་བཞིན་ཞི་བདེའི་དཔལ་ཡོན་ལ་ལོངས་སྤྱོད་ཡོང་བའི་རེ་སྨོན་གྱིས་མཚམས་འབྱོར་དང་བཅས་་་མོན་རྒྱལ་ལོ།།