མི་ལོ་ ༤༠ ཞབས་ཞུར་ཆེ་བསྟོད་དང་བཀའ་དྲིན་རྗེས་དྲན།

 གྱང་གསར་ཚེ་རིང་དོན་གྲུབ། (ཧྥ་རན་སིའི་སྐུ་ཚབ་དོན་གཅོད་འབྲེལ་མཐུད་པ།)

༄༅། གུས་པ་ཉེ་ཆར་སྒེར་དགོངས་ཞུས་ནས་རྒྱ་གར་དུ་འགྲོ་དགོས་བྱུང་། དོན་དག་གཙོ་བོ་ནི་ ༢༠༡༦ ཟླ་བ་ ༥ ཚེས་ ༡ ཉིན་བདེ་སྲུང་བཀའ་ཟུར་འབྲོང་ཆུང་དངོས་གྲུབ་མཆོག་གིས་མི་ལོ་ཧྲིལ་པོ་བཞི་བཅུའི་རིང་བོད་གཞུང་མང་ཞབས་ཞུ་བསྒྲུབས་པར་བཀའ་དྲིན་རྗེས་དྲན་དང་། ཐུགས་རྗེ་ཆེ་ཞུའི་མཛད་སྒོ་དང་གསོལ་སྟོན་ཞིག་བདེ་སྲུང་ལས་བྱེད་ཐུན་མོང་ནས་གོ་སྒྲིག་གནང་ཡོད་པར་བཅར་རྒྱུ་དེ་ཡིན།

བཀའ་དྲིན་རྗེས་དྲན་དང་ཐུགས་རྗེ་ཆེ་ཞུའི་མཛད་སྒོ་དེ་གོང་ཚེས་ཉིན་གྱི་སྔ་དྲོ་ཕྱག་ཚོད་དགུ་དང་ཕྱེད་ཀའི་ཐོག་མཛེས་སྡུག་ལྡན་པའི་རྡ་སའི་རི་ཆུང་སྟེང་ཆགས་པའི་ནོར་བུ་གསོལ་མགྲོན་ཁང་དུ་གྲ་སྒྲིག་གནང་འདུག སྐུ་མགྲོན་གཙོ་བོར་དཔལ་ལྡན་བཀའ་ཁྲི་དང་བདེ་སྲུང་བཀའ་བློན་གཅིག་ལྕོག་ཟུར་པ་སློབ་དཔོན་ཟམ་གདོང་རིན་པོ་ཆེ་དང་། དམིགས་བསལ་སྐུ་མགྲོན་དུ་བདེ་སྲུང་ཟུར་པ་སྐུའི་གཅུང་པོ་མངའ་རིས་རིན་པོ་ཆེ་ཕེབས་འདུག

དེ་མིན་སྐུ་མགྲོན་གྱི་ཁོངས་སུ་ས་གནས་རྒྱ་གར་དཔོན་རིགས་ཁ་ཤས་དང་། དཔལ་ལྡན་དགའ་ལྡན་ཕོ་བྲང་གི་དྲུང་ཆེ་རྣམ་པ་དང་། བདེ་སྲུང་དྲུང་ཆེ་དང་ལས་བྱེད་ཟུར་པ། གཙུག་ལག་ཁང་ཁོར་ཡུག་སྲུང་སྐྱོན་ཚན་པའི་འགན་འཛིན་ཐོག་བདེ་སྲུང་ལས་བྱེད་རྣམ་པ་བཅས་ཁྱོན་མི་གྲངས་ ༡༡༨ ཙམ་མཉམ་འཛོམས་བྱུང་འདུག་པའི་ཁོངས་སུ་ཡུ་རོབ་དང་། ཨ་རི། བལ་ཡུལ་ནང་ཡོད་པའི་བདེ་སྲུང་ལས་བྱེད་ཟུར་པ་ཡང་འདུག་པ་དེ་དག་གིས་ཆེ་ཆུང་འཚམས་ཞིང་བཀོད་པ་མཛེས་པའི་ནོར་བུ་གསོལ་མགྲོན་ཁང་གི་ཚོགས་ཁང་ཁེངས་ཤིང་། དེ་ཉིན་བདེ་སྲུང་ལས་བྱེད་ཆེ་ཕྲ་ཚང་མ་བྲེལ་ལ་ཤིན་ཏུ་ཆེ་ཡང་མཛད་སྒོ་དང་། གསོལ་སྟོན། སྤྲོ་སྐྱིད་བཅས་ཀྱི་གྲ་སྒྲིག་ལས་དོན་རྣམས་དེ་འདྲའི་ཚགས་ཚུད་པ་ལ་ཨང་བསམ་པའི་ཚོར་བ་བྱུང་།

བདེ་སྲུང་སྐུ་ཕྱྭའི་དྲུང་ཆེ་ཕ་ཟུར་དབང་ཕྱུག་ལགས་ནས་དགའ་བསུའི་གསུང་བཤད་གནང་སྐབས། སྐུ་མགྲོན་གཙོ་བོས་དབུས་སྐུ་མགྲོན་ཡོངས་དང་། བདེ་སྲུང་ལས་ཟུར་རྣམ་པ་ཡོངས་ལ། མགྲོན་འབོད་དང་ལེན་གྱིས་མཛད་སྒོར་ཆེད་ཕེབས་གནང་བར་ཐུགས་རྗེ་ཆེ་ཞུས་པ་དང་། དེ་རིང་གི་མཛད་སྒོ་འདི་ནི་བདེ་སྲུང་ལས་བྱེད་རྣམས་ཀྱི་འབད་བརྩོན་དང་། དེའི་ཐོག་རྒྱ་གར་དང་ཕྱི་རྒྱལ་ཡུལ་གྲུ་ཁག་ཏུ་བཞུགས་མཁན་བདེ་སྲུང་ལས་བྱེད་ཟུར་པ་རྣམས་དང་། དེ་སྔ་བཀའ་ཟུར་མཆོག་དང་ལོ་མང་རིང་ལས་དོན་གྱི་འབྲེལ་བ་ཡོད་པའི་བློ་དཀར་གྱི་མི་སྣའི་དཔལ་འབྱོར་གྱི་རྒྱབ་སྐྱོར་དང་། བསམ་བློའི་རྒྱབ་སྐྱོར་ལ་བརྟེན་ནས་བྱུང་བ་ཞིག་ཡིན། ས་ཐག་རྒྱང་རྐྱེན་དང་དུས་ཚོད་དབང་གིས་དངོས་སུ་ཕེབས་མ་ཐུབ་པའི་བདེ་སྲུང་ཟུར་པ་ཚོའི་ལུས་པོ་ཕྱི་ལ་ཡོད་ཀྱང་། བསམ་པ་ཚོགས་ཁང་འདིའི་ནང་ཡོད་པར་ངོས་འཛིན་ཞུ་གི་ཡོད་ཅེས་གསུངས།

མགྲོན་གྱི་གཙོ་བོ་སློབ་དཔོན་ཟམ་གདོང་རིན་པོ་ཆེ་མཆོག་གིས་བཀའ་སློབ་གནང་སྐབས། བཀའ་ཟུར་མཆོག་སྔོན་མ་ཌལ་ཧོར་སློབ་གྲྭར་སློབ་སྦྱོང་གནང་སྐབས་ཀྱི་ཐུགས་གཤིས་དང་། བདེ་སྲུང་དྲུང་ཆེ་དང་བཀའ་བློན་གྱི་མཛད་འཁུར་བཞེས་སྐབས་མཉམ་དུ་ཕྱག་ལས་གནང་བའི་ཐུགས་ཀྱི་མྱོང་ཚོར། གནད་དོན་ཐག་གཅོད་དང་། དབྱེ་ཞིབ་དཔྱད་པ་གནང་སྟངས་སྐོར་སོགས་གསུང་སྟེ། མདོ་དོན་བཀའ་ཟུར་མཆོག་གིས་མི་ལོ་བཞི་བཅུའི་ཞབས་ཞུར་གདེང་འཇོག་ཧ་ཅང་ཆེན་པོ་མཛད།

སྐུའི་གཅུང་པོ་མངའ་རིས་རིན་པོ་ཆེ་མཆོག་ནས་གསུང་བཤད་གནང་སྐབས། ང་སྔོན་མ་བདེ་སྲུང་དུ་ལོ་མང་པོ་བསྡད་པ་རེད། དངོས་གྲུབ་ལགས་ནི་གཤིས་ཀ་ཧ་ཅང་འཇམ་ཞིང་བཟང་བ་དང་། བབ་རླིང་བརྟན་གསུམ་གྱི་ཕྱག་ལས་གནང་མཁན་ཡིན་པའི་སྐོར་དང་། ལོ་མང་དངོས་གྲུབ་ལགས་དང་མཉམ་ཕྱག་ལས་གནང་རིང་ཉིན་མ་གཅིག་རླུང་ལངས་པ་གཟིགས་མྱོང་མེད། དངོ་གྲུབ་ལགས་དང་། ཁོང་གི་ནང་མི་ཚང་མ་མི་ཚེ་སྐྱིད་པོ་ཡོང་བའི་སྨོན་ལམ་ཡོད་ཅེས་གསུང་སོང་།

བཀའ་ཟུར་མཆོག་དང་ལྷན་དུ་ལོ་མང་ཕྱག་ལས་གནང་མྱོང་བའི་བདེ་སྲུང་དྲུང་ཟུར་བློ་བཟང་སྦྱིན་པ་མཆོག་དང་། བདེ་སྲུང་ལས་བྱེད་ཟུར་པའི་སྐུ་ཚབ་བདེ་སྲུང་དྲུང་ཟུར་ཡེ་ཤེས་ཆོས་གྲགས་ལགས། སྐུ་ངོ་མཆོག་གི་རྒྱ་གར་གྲོགས་པོ་རྙིང་པ་སྐུ་ཞབས་ནོར་བུ་རམ་གྱིས་ཀྱང་གསུང་བཤད་མདོར་བསྡུས་རེ་གནང་སོང་བ་ཚང་མས་ཐུགས་མྱོང་གཞི་ལ་བཞག་ནས་བཀའ་ཟུར་མཆོག་གི་ཕྱག་ལས་གནང་སྟངས་ལ་གདེང་འཇོག་ཆེན་པོ་གནང་།

མཛད་སྒོ་གཙོ་སྐྱོང་པས་བཀའ་ཟུར་མཆོག་ལ་ཡི་རང་མངོན་བསྟོད་གྱི་ཕྱག་བྲིས་ཤིག་སྒྲོག་སྦྱང་གནང་བའི་ནང་། སྐུ་ངོ་མཆོག་གིས་མི་ལོ་ཧྲིལ་པོ་ ༤༠ རིང་བོད་བསྟན་སྲིད་མི་རིགས་ཀྱི་བདེ་དོན་ཆེད། ལྷག་བསམ་སྙིང་སྟོབས་ཆེན་པོས་༸རྒྱལ་བའི་སྐུ་ཕྱྭ་དང་། བདེ་སྲུང་གི་ཕྱི་ནང་གསང་བའི་ལས་དོན། འཛིན་སྐྱོང་བཅས་ཀྱི་ཆེད་དུ་ཞབས་འདེགས་གཟེངས་ཐོན་ངོ་གནོང་མི་དགོས་པ་བསྒྲུབས་པ་གནང་བར་བཀའ་དྲིན་ཆེ་ཞེས་ཞུ་ཆེད། ལྷག་བསམ་དཀར་བའི་མཚོན་དོན་དུ་རིན་ཆེན་གཉིས་པ་ལས་གྲུབ་པའི་སྐལ་བཟང་མཆོད་ཀོང་ཞིག་དང་། རྣམ་དཔྱོད་ཕུལ་དུ་བྱུང་བའི་མཚོན་དོན་དུ་འཇམ་དཔལ་དབྱངས་ཀྱི་ཞལ་ཐང་འཚེམས་དྲུབས་མ། འཇོན་ནུས་ཟླ་མེད་ཀྱི་མཚོན་དོན་དུ་ཡི་རང་མངོན་བསྟོད་ཀྱི་ཡི་གེ་འདི་བཅས་གུས་ཚོ་བདེ་སྲུང་ལས་བྱེད་ཐུན་མོང་ནས་འབུལ་ལམ་ཞུས་ཤིང་། སྐུ་ངོ་མཆོག་གི་ཡུམ་བདེ་སྐྱིད་ལགས་དང་སྐུ་ཟླ་ངག་དབང་ཆོས་འཛོམས་ལགས་ཀྱིས་ཀྱང་སྐུ་ངོ་མཆོག་གི་ཕྱག་ལས་ལ་རྒྱབ་སྐྱོར་རྒྱུན་མཐུད་དུ་གནང་བར་བསྔགས་བརྗོད་བཅོས་མིན་ཞུ་རྒྱུ་དང་། སླད་སྐུ་ངོ་ཆོག་གང་དུ་ཕེབས་ཀྱང་སྐུ་ཁམས་གསལ་ཐང་ཐོག་ང་ཚོར་མུ་མཐུད་ལམ་སྟོན་ཡོང་བའི་རེ་འདུན་ཞུ་རྒྱུ་ཡིན་ཞེས་འཁོད་འདུག

བཀའ་དྲིན་རྗེས་དྲན་དང་ཐུགས་རྗེ་ཆེ་ཞུའི་མཚོན་དོན་སྐལ་བཟང་མཆོད་ཀོང་དང་། འཇམ་དབྱངས་སྐུ་ཐང་། ཡི་རང་སྔོན་བསྟོད་ཀྱི་ཕྱག་བྲིས་བཅས་སྐུ་གྲོན་གཙོ་བོ་དང་། དམིགས་བསལ་སྐུ་མགྲོན་གྱི་ཕྱག་ནས་བཀའ་ཟུར་མཆོག་ལ་ཕུལ་བ་གནང་།

དང་སློབ་འགོ་ལས་ཡོངས་དང་། གཙུག་ལག་ཁང་ཁོར་ཡུག་སྲུང་སྐྱོབ་སྡེ་ཚན་གྱིས་བཀའ་ཟུར་མཆོག་ལ་བཀའ་དྲིན་རྗེས་དྲན་དང་། ཐུགས་རྗེ་ཆེ་ཞུའི་མཚོན་དོན་འབུལ་སྐྱེས་རེ་གྲ་སྒྲིག་གནང་ཡོད་པ་དེ་ཁག་སོ་སོར་བདེ་སྲུང་སྐུ་ཕྱྭའི་དྲུང་ཆེ་དང་། འཛིན་སྐྱོང་དྲུང་ཆེ་བཀའ་ཟུར་མཆོག་ལ་ཕུལ་བ་གནང་སོང་།

དེ་རྗེས་བདེ་སྲུང་ལས་བྱེད་ཁག་ཅིག་ནས་བཀའ་ཟུར་མཆོག་ལ་བཀའ་དྲིན་རྗེས་དྲན་གྱི་མཉམ་གཞས་ཞིག་གཟིགས་འབུལ་ཞུས་སོང་བ་དེའི་གཞས་མདངས་བོད་ནས་ཡིན་པ་དང་། གཞས་ཚིག་ལས་བྱེད་ཚོས་བརྩམས་འདུག བོད་ཀྱི་ཟློས་གར་ཚོགས་པའི་སྒྱུ་རྩལ་བ་བཞིས་སྲོལ་རྒྱུན་གླུ་གཞས་ནང་མ་དང་། སྟོད་གཞས་གཟིགས་འབུལ་དང་། བདེ་སྲུང་ལས་བྱེད་ངག་དབང་གཡང་འཕེལ་ལགས་ཀྱིས་ཆབ་སྲིད་བཙོན་ཟུར་མགོ་ལོག་འཇིགས་མེད་ལགས་ནས་བཀའ་ཟུར་མཆོག་ལ་བསྟོད་པའི་ཆེད་རྩོམ་སྙན་ངག་སྐུར་འབྱོར་སྙན་སྒྲོན་ཞུས་ཞིང་། བདེ་སྲུང་ལས་བྱེད་ཐུན་མོང་ནས་དཔར་སྐྲུན་ཞུས་པའི་མི་ལོ་བཞི་བཅུའི་ཞབས་ཞུར་གདེང་འཇོག་ཞེས་པའི་རྩོམ་ཡིག་ཕྱོགས་སྒྲིག་གི་དེབ་གཅིག་སྐུ་མགྲོན་ཚང་མར་འགྲེམས་སྤེལ་གནང་།

བདེ་སྲུང་འཛིན་སྐྱོང་དྲུང་ཆེ་འཕགས་པ་ཚེ་རིང་ལགས་ནས་སྐུ་མགྲོན་གཙོ་བོ་དང་། དམིགས་བསལ་སྐུ་མགྲོན་གྱིས་དབུས་ཕྱག་རོགས་དང་། རྒྱབ་སྐྱོར་གནང་མཁན་ཚང་མར་ཐུགས་རྗེ་ཆེ་ཞུའི་གསུང་བཤད་གྲུབ་མཚམས་སྐུ་མགྲོན་དང་། བདེ་སྲུང་ལས་ཟུར་ཚང་མས་སྐུ་ངོ་མཆོག་ལ་མཇལ་དར་སྒྲོན་འབུལ་ཞུས་བསྟུན་ཚོ་ཁག་བྱས་ནས་བཀའ་ཟུར་མཆོག་དང་སྐུ་པར་ལྷན་སྒྲོན་གནང་། ཕྱག་ཚོད་ ༡༢ ཐོག་མཛད་སྒོ་དངོས་གཞི་ལེགས་པར་གྲུབ་སྟེ། ཉིན་གུང་གསོལ་སྟོན་པད་མ་ཐང་གསོལ་མགྲོན་ཁང་དུ་འདེགས་འབུལ་ཞུས།

འོ་རེད། ང་རང་རིག་པ་སྐྱོ་བས་བཀའ་ཟུར་མཆོག་གིས་མཛད་སྒོར་བཀའ་སློབ་གནང་བ་ཚང་མ་མི་དྲན་ཡང་། གང་དྲན་ཆེས་སྙིང་བསྡུས་ཤིག་འདིར་བྲིས་ན་འདི་ལྟར་ཏེ།

“མཛད་སྒོ་དེ་འདྲ་གོ་སྒྲིག་ཞུས་པར་རང་ཉིད་འཚེར་པོ་འདྲ་པོ་བྱུང་ལ། དམིགས་བསལ་མཛད་སྒོའི་ཐོག་ལ་ཟམ་གདོང་རིན་པོ་ཆེ་མཆོག་དང་། མངའ་རིས་རིན་པོ་ཆེ་ཕེབས་པ་ལན་པོ་མེད་ཀྱང་། བུང་བ་གསེར་གཟིགས་ཀྱིས་ཕེབས་པར་བཀའ་དྲིན་ཆེ་ཞུ་རྒྱུ་ཡིན། རྣམ་པ་ཚོ་ཚང་མས་མཁྱེན་གསལ་ལྟར་ངའི་ལོ་རྒྱུས་ནང་རང་ཉིད་བོད་མིའི་སྒྲིག་འཛུགས་ཀྱི་ལས་བྱེད་རང་བྱས་ནས་སླེབས་པ་ཞིག་ཡིན་པ་ལས་ཆབ་སྲིད་པ་དེ་འདྲ་གང་ཡང་མ་རེད། ཕྱི་ལོ་ ༢༠༠༧ ལོར་བཀའ་བློན་ཁྲི་པ་ཟམ་གདོང་རིན་པོ་ཆེ་མཆོག་གིས་བུང་བ་གསེར་གཟིགས་ཀྱིས་བཀའ་བློན་བསྐོ་བཞག་གནང་བ་ལྟར་ཁས་ལེན་བྱ་དགོས་བྱུང་། ཆོས་ཕྱོགས་ནས་༸སྐྱབས་མགོན་རིན་པོ་ཆེའི་ཞབས་འོག་ལ་ལས་ཀ་བྱ་རྒྱུ་བྱུང་བར་དགའ་སྤོབས་དང་། འཇིག་རྟེན་ངོས་ནས་གཏམ་སྙན་གྲགས་ཤིག་ཀྱང་ཐོབ་པ་རེད། རྣམ་པ་ཚོའི་གསོལ་ལྕོགས་ཐོག་ལ་ཡོད་པའི་དེབ་དེ་ཉིན་ཤས་སྔོན་ལ་ལས་ཁུངས་ནས་ང་ལ་དེབ་ཁ་ཤས་གནང་བྱུང་བར་བལྟ་སྐབས་འགྲེམས་སྤེལ་བྱ་རྒྱུར་འོས་བབ་ཡོད་མེད་རང་ཉིད་ཀྱིས་ཤེས་ཀྱི་ཡོད་པར་བརྟེན་འགྲེམས་སྤེལ་བྱ་རྒྱུར་འོས་བབ་ཡོད་མེད་ཤེས་ཀྱི་མི་འདུག དེབ་འདི་ནི་ངོ་ཤེས་དང་ལས་བྱེད་ཁ་ཤས་ཀྱིས་ཚོར་བ་མཚོན་པའི་རྩོམ་ཡིག་ཕྱོགས་སྒྲིག་རེད་འདུག ང་སྐྱེས་ས་ནི་བོད་ཀྱི་ས་ཁུག་ལུང་ཁུག་གཅིག་ནང་ཡིན་པ་དང་། ད་ལྟ་བསམ་སྐབས་རང་ཉིད་བཙན་བྱོལ་ལ་སླེབས་པ་དེ་ནི་རྐྱེན་ངན་གྲོགས་ཤར་ལྟ་བུ་བྱུང་འདུག ང་ཆུང་དུས་སྐབས་ཀྱི་ཐལ་རྩེད་རྩེད་རོགས་ལོ་མཉམ་ཞིག་རྡོར་གདན་དུས་དབང་སྐབས་སུ་སླེབས་པ་ཐུག་འཕྲད་བྱུང་། ཁོང་གིས་བཤད་པ་དང་། ཁོང་གི་ཕྱིའི་རྣམ་པ་ལས་མཐོང་ཐོས་བྱུང་བར་གཞིགས་ན་རྒྱ་གཞུང་གིས་འགྲེལ་བརྗོད་བྱས་པ་ལྟར་མེད་པ་གསལ་པོ་རེད་འདུག ངའི་རོགས་པ་དེ་ནི་འབྲི་ཀློག་མ་ཤེས་པར་ཡིག་རྨོངས་སུ་ལུས་འདུག་ཀྱང་། རང་ཉིད་གཞུང་གི་བཀའ་དྲིན་གྱིས་ཡིག་རྨོངས་སུ་མ་ལུས་པར་སློབ་སྦྱོང་གི་གོ་སྐབས་ཐོབ་པ་རེད། རང་ཉིད་ད་བར་མི་ལོ་བཞི་བཅུའི་རིང་ལས་དོན་ནང་ཞུགས་པ་དང་ཕྱིས་སུ་ཆང་ས་རྒྱབ་པ་རེད། ངའི་བུ་མོས་ཐེངས་གཅིག་ང་ལ། པ་ལགས་ཁྱེད་རང་གི་ཆང་ས་དང་པོ་དེ་ལས་ཀ་མཉམ་དུ་རྒྱབ་པ་དང་། ཆང་ས་གཉིས་པ་ཨ་མ་ལགས་མཉམ་དུ་རྒྱབ་པ་རེད་ཅེས་བརྗོད་བྱུང་བ་བསམ་ཞིབ་བྱ་དགོས་ཞིག་བྱུང་། དགུང་གྲངས་མཐོ་བའི་ངའི་ཨ་མ་ལགས་དང་། བཟའ་ཟླས་ད་བར་རྒྱབ་སྐྱོར་ཇི་བྱས་ལ་ཐུགས་རྗེ་ཆེ་ཞུ་རྒྱུ་ཡིན། ད་བར་བདེ་སྲུང་གི་ལས་དོན་ཐོག་གྲུབ་འབྲས་བྱུང་ཡོད་པ་ཡིན་ན། བདེ་སྲུང་ལས་ཁུངས་ཀྱི་སྐུ་བགྲེས་འདས་སོན་རྣམ་པ་དང་། ད་ལྟའི་ལས་བྱེད་ཡོངས་ཀྱིས་ཕྱག་རོགས་དང་འབད་བརྩོན་གནང་བ་ལས་བྱུང་པ་ཞིག་ཡིན།” སོགས་གསུང་སོང་བ་བཅས། གུས་པ་ལྔ་པའི་གཅིག་ཉིན་མཛད་སྒོར་བཅར་སྐབས་ཀྱི་དངོས་མཐོང་གནས་ཚུལ་དང་དེ་འབྲེལ་གྱི་སྐུ་པར་ཁག་ཅིག་དྲན་ཐོའི་ཚུལ་དུ་རྒྱ་གར་རྒྱལ་ས་ལྡི་ལི་ནས་ཕ་རན་སིར་ཕྱིར་ལོག་བྱེད་ཁར་བྲེལ་འཚུབ་ངང་བཀོད་པའོ།