དེ་རིང་བོད་མིའི་སྒྲིག་འཛུགས་བཀའ་དྲུང་ཡིག་ཚང་གིས་གནས་ཚུལ་སྤེལ་བར། ད་ལྟའི་དྲིལ་བསྒྲགས་དྲུང་ཆེ་ལས་ཐོག་བཀྲ་ཤིས་ཕུན་ཚོགས་ལགས་ཡུ་རོབ་སྦེལ་ཇམ་གྱི་རྒྱལ་ས་སྦར་སིལ་གྱི་སྐུ་ཚབ་དོན་གཅོད་དུ་བསྐོ་བཞག་གནང་ཡོད་འདུག
གནས་ཚུལ་ནང་བཀོད་དོན། “ཕྱི་ལོ་ ༢༠༡༦ ཟླ་ ༥ ཚེས་ ༡༠ ཉིན་དཔལ་ལྡན་སྲིད་སྐྱོང་མཆོག་གི་མཚན་འཁོད་དང་། བཀའ་ཤག་གི་ལམ་སྟོན་ལྟར་བཀའ་དྲུང་ཡིག་ཚང་ནས་བཀོད་ཁྱབ་ཅིག་སྤེལ་བའི་ནང་། སྦར་སིལ་སྐུ་ཚབ་དོན་གཅོད་ཆོས་སྐྱབས་པ་ཚེ་བརྟན་བསམ་གྲུབ་ལགས་རྩ་དགོངས་ཞུས་འཁྲོལ་བྱུང་ཚབ་ཏུ་དྲིལ་བསྒྲགས་དྲུང་ཆེ་བཀྲ་ཤིས་ཕུན་ཚོགས་ལགས་བསྐོ་གཞག་གནང་ཡོད་ལ། སྦེལ་ལྗམ་གྱི་ལས་གཉེར་ཐོངས་མཆན་ཐོན་ཚེས་དང་འདི་ལོའི་ཕྱི་ཟླ་ ༧ ཚེས་ ༡ ཉིན་གང་སྔ་ནས་ལས་འཁུར་ཞུ་དགོས་སྐོར་བཀོད་རྒྱའི་ནང་གསལ་འདུག” ཅེས་འཁོད་འདུག
དྲིལ་བསྒྲགས་དྲུང་ཆེ་བཀྲ་ཤིས་ཕུན་ཚོགས་ལགས་ནི། ཕྱི་ལོ་ ༡༩༧༣ ལོར་རྒྱ་གར་ཅན་དྷི་སྒར་པན་ཇབ་གཙུག་ལག་སློབ་གཉེར་ཁང་དུ་ལོ་གསུམ་རིང་སློབ་སྦྱོང་གནང་རྗེས། སྦེང་ལོར་དུ་དགེ་རྒན་འོས་སྦྱོང་གནང་ཡོད་པ་དང་། ཕྱི་ལོ་ ༡༩༧༧ ལོར་ཀོ་ལི་གྷལ་དོན་ལྡན་གླིང་བོད་མིའི་སློབ་གྲྭར་ལོ་ངོ་དྲུག་རིང་སློབ་དགེ་གནང་། ཕྱི་ལོ་ ༡༩༨༣ ལོར་སླར་ཡང་ཅན་ངྷི་སྒར་པན་ཇབ་གཙུག་ལག་སློབ་གཉེར་ཁང་དུ་ལོ་གསུམ་རིང་ཁྲིམས་ལུགས་ཀྱི་ཆེད་ལས་ཐོག་སློབ་སྦྱོང་གནང་རྗེས། ཕྱི་ལོ་ ༡༩༨༦ ལོར་བོད་ཀྱི་གཞོན་ནུ་ལྷན་ཚོགས་དབུས་སྤྱི་ཁྱབ་རྒྱུན་ལས་ཁང་གི་རྒྱུན་ལས་སུ་བསྐོ་གཞག་གནང་བ་ལྟར། ལོ་དྲུག་རིང་ཟུང་དྲུང་དང་དྲུང་ཆེའི་ལས་འགན་ཐོག་ཕྱག་ལས་གནང་། ཕྱི་ལོ་ ༡༩༩༡ ལོར་བོད་མི་མང་སྤྱི་འཐུས་རྒྱ་སྐྱེད་ཀྱི་འོས་འདེམས་སྐབས་དབུས་གཙང་ཆོལ་ཁའི་འོས་གཞི་ཨང་གཉིས་པ་ཐོབ་ཡོད་ཀྱང། མུ་མཐུད་གཞོན་ནུ་ལྷན་ཚོགས་སུ་ཕྱག་ལས་གནང་ཆེད་འོས་མི་ནས་ཕྱིར་འཐེན་གནང་ཡོད་འདུག ཕྱི་ལོ་ ༡༩༩༧ ནས་ཕྱི་ལོ་ ༢༠༠༡ བར་ལྷོ་ཨ་ཕི་རི་ཀའི་སྐུ་ཚབ་དོན་གཅོད་དང་། ཕྱི་ལོ་ ༢༠༠༡ ནས་ ༢༠༠༥ བར་ཧྥ་རན་སི་དང་སྦར་སིལ་སྐུ་ཚབ་དོན་གཅོད་དུ་གནས་སྤོས་གནང་། དེའི་རྗེས་མ་སུ་རི་བོད་ཁྱིམ་གྱི་དྲུང་ཆེ་དང་། སྦེང་ལོར་ལྷོ་སྤྱིའི་ལས་འགན་ཐོག་ཕྱག་ལས་གནང་། ཕྱི་ལོ་ ༢༠༡༣ ཟླ་ ༢ ཚེས་ ༨ ནས་དྲིལ་བསྒྲགས་ལས་ཁུངས་ཀྱི་དྲུང་ཆེར་བསྐོ་གཞག་གནང་ཡོད་འདུག
གསར་འགོད་པ། པདྨ་མཚོ།
