རྒྱ་གར་ལྷོ་ཕྱོགས་སྦེལ་ཀོབ་དང་མོན་གྷོ་ཊི། ཀོ་ལི་གྷལ་བཅས་སུ་གཞུང་འབྲེལ་མིན་པའི་ཚོགས་པ་ཁག་གིས་ཁྲིད་དེ་རྒྱལ་བའི་ཞབས་རིམ་དང་བོད་ནང་རང་ལུས་མེར་བསྲེགས་གནང་མཁན་ཚོའི་ཆེད་དུ་མཆོད་འབུལ་སྨོན་ལམ་གནང་ཡོད་འདུག
དེ་རིང་ཕྱི་ཟླ་ ༥ ཚེས་ ༡༡ ལྷག་དཀར་ཉིན་མོ་དང་བསྟུན་ཏེ། རྒྱ་གར་ལྷོ་ཕྱོགས་སྦེལ་ཀོབ་བོད་ཀྱི་གཞོན་ནུ་དང་བུད་མེད་ལྷན་ཚོགས་ཐུན་མོང་གི་གོ་སྒྲིག་འོག་༧རྒྱལ་བའི་སྐུ་ཚེ་མཛད་འཕྲིན་དང་བོད་བསྟན་སྲིད་ཆེད་ཁུལ་དེའི་གཞིས་ཆགས་གཉིས་ཀྱི་མི་མང་ཚོས་སྦེལ་ཀོབ་བདེ་སྐྱིད་སླར་གསོའི་མི་མང་ཚོགས་ཁང་ནང་། སྒྲོལ་མ་འབུམ་ཐེར་དང་རྒྱལ་བའི་ཞབས་རིམ་སོགས་བསྟན་སྲིད་ཀྱི་ཞབས་རིམ་གསོག་སྒྲུབ་མགོ་འཛུགས་གནང་ཡོད་པ་རེད།
དེ་དང་ཆབས་ཅིག་བོད་དོན་ཆེད་རང་ལུས་མེར་བསྲེགས་གནང་མཁན་བསོད་ནམས་མཚོ་ལགས་ཀྱི་ཆེད་དམིགས་བསལ་གདུང་སེམས་མཉམ་སྐྱེའི་མཆོད་འབུལ་སྨོན་ལམ་སོགས་གནང་ཡོད་པ་རེད།
ཐེངས་འདིའི་ཞབས་རིམ་དེ་ནི་དེ་རིང་ཕྱི་ཚེས་ ༡༡ ནས་ ༡༨ བར་དུས་ཡུན་བདུན་ཕྲག་གཅིག་རིང་ཡིན་པ་དང་། ཉིན་ལྟར་མར་མེ་སྟོང་མཆོད་གནང་གི་ཡོད་པ་མ་ཟད། ཕྱི་ཚེས་ ༡༨ ཉིན་ཐ་མར་རྒྱལ་བའི་ཡོངས་འཛིན་གླིང་མཆོག་སྤྲུལ་རིན་པོ་ཆེ་ཆེ་མཆོག་ནས་མང་ཚོགས་ལ་སྤྱན་རས་ཟིགས་དང་སྒྲོལ་མའི་བཀའ་དབང་སྩོལ་རྒྱུ་ཡིན་འདུག
གོ་སྒྲིག་ཚོགས་པ་གཉིས་ངོས་ནས་མི་མང་ཚོར་ཉིན་ལྟར་ཕར་ཚུར་འགྲིམ་འགྲུལ་གྱི་མཐུན་རྐྱེན་དང་གསོལ་ཇ་ཞལ་ལག་སོགས་ཀྱང་གོ་སྒྲིག་གནང་ཡོད་པ་རེད་འདུག
དེ་དང་ཕྱོགས་མཚུངས་ཀོ་ལི་གྷལ་དོན་ལྡན་གླིང་བོད་ཀྱི་གཞོན་ནུ་ལྷན་ཚོགས་ཀྱི་གོ་སྒྲིག་འོག བོད་དོན་ཆེད་བློས་གཏོང་གནང་མཁན་བསོད་ནམས་མཚོ་ལགས་ཀྱི་དགོངས་རྫོགས་ཞེ་དགུ་སྲུང་གཙིའི་ཆེད་ཀོ་ལི་གྷལ་མི་མང་གིས་སྨོན་ལམ་གསུང་འདོན་དང་མར་མེའི་ཁྲོམ་སྐོར་གནང་ཡོད་སྐོར་ཀོ་ལི་གྷལ་གཞོན་ནུའི་ཚོགས་གཙོ་ཚེ་རིང་རྡོ་རྗེ་ཅུང་ལགས་ཀྱིས་བརྗོད།
མོན་གྷོ་འདོད་རྒུ་གླིང་གཞོན་ནུའི་ཚོགས་གཙོ་རྡོ་རྗེ་ཚེ་རིང་ལགས་ཀྱིས་བརྗོད་པ་ལྟར་ན། མོན་གྷོ་འདོད་རྒུ་གླིང་གི་ས་གནས་བོད་ཀྱི་བུད་མེད་ལྷན་ཚོགས་དང་གཞོན་ནུ་ལྷན་ཚོགས་གཉིས་ཐུན་མོང་གི་གོ་སྒྲིག་འོག་བསོད་ནམས་མཚོ་ལགས་ཀྱི་ཆེད་ས་གནས་མི་མང་ཚོས་གདུང་སེམས་མཉམ་སྐྱེའིི་སྨོན་ལམ་དང་མར་མེའི་ཁྲོམ་སྐོར་གནང་ཡོད་འདུག་ལ། གཞིས་གྲོང་ཁག་སོ་སོའི་ནང་༧གོང་ས་སྐྱབས་མགོན་ཆེན་པོ་མཆོག་གི་སྐུ་ཕྱའི་ཞབས་རིམས་ཆེད་མ་ནི་ཡིག་དྲུག་དང་སྒྲོལ་མ་གསོག་སྒྲུབ་སོགས་གནང་བཞིན་ཡོད་འདུག
རྒྱ་གར་ལྷོ་ཕྱོགས་གསར་འགོད་པ་དོན་གྲུབ་བཀྲ་ཤིས།
