བོད་མིའི་སློབ་ཟུར་ཚོགས་པ་ཕྱི་ལོ་ ༡༩༨༨ ལོར་མགོ་བཙུགས་པ་ནས་ད་ལྟའི་བར་ཨ་རིའི་བོད་མིའི་སློབ་ཡོན་ལས་གཞིའི་ནང་སློབ་ཞུགས་སློབ་མ་ ༤༠༠ ལྷག་ཡོད་པའི་གྲས་ནས་བཙན་བྱོལ་སྤྱི་ཚོགས་ནང་གཞུང་སྒེར་གཉིས་ཀྱི་ལས་སྒོར་ཞུགས་མཁན་ ༢༠༠ བྱུང་ཡོད་འདུག
ཁ་སང་ཕྱི་དྲོའི་ཆུ་ཚོད་ ༧།༣༠ སྟེང་མག་གྷན་ནོར་བུ་གསོལ་མགྲོན་ཁང་དུ། བོད་མིའི་སློབ་ཟུར་ཚོགས་པའི་གོ་སྒྲིག་འོག་ཨ་རིའི་བོད་མིའི་སློབ་ཡོན་ལས་གཞིའི་དབྱིན་ཡིག་དྲ་ཚིགས་(http://www.tspalumni.org)དབུ་འབྱེད་གནང་སོང་ལ། མཛད་སྒོའི་སྐུ་མགྲོན་གཙོ་བོར་ཤེས་རིག་བཀའ་བློན་དངོས་གྲུབ་ཚེ་རིང་མཆོག་དང་ཨ་རིའི་གཞུང་ཚབ་ཁང་གི་རིག་གཞུང་དང་སློབ་གསོ་བརྗེ་རེས་ཚན་པའི་དྲུང་ཆེ་སྐུ་ཞབས་ཨ་ས་ཌ་ (Mathew Asada) ལགས་གཉིས་ཀྱི་གཙོས་པའི་སློབ་ཟུར་མི་གྲངས་ ༤༠ ཙམ་འཛོམས་འདུག
བོད་མིའི་སློབ་ཟུར་ཚོགས་པའི་རྒྱུན་ལས་འབྲེལ་མཐུད་པ་བསྟན་འཛིན་འཇམ་དབྱངས་ལགས་ཀྱིས་ཨ་རིའི་བོད་མིའི་སློབ་ཡོན་ལས་གཞིའི་བྱུང་རབས་དང་དྲ་ཚིགས་གསར་བཟོའི་དགོས་དམིགས་ངོ་སྤྲོད་གནང་དོན། ཨ་རིའི་བོད་མིའི་སློབ་ཡོན་ལས་གཞི་འདི་ཐོག་མར་ཕྱི་ལོ་ ༡༩༨༨ ལོར་མགོ་བཙུགས་ཏེ་ཐོག་མར་སློབ་མ་ ༤ བྱུང་བ་དང་། སྐབས་དེའི་སློབ་མ་བཞིའི་གྲས་ཀྱི་སློབ་ཟུར་གསུམ་དེ་རིང་གི་མཛད་སྒོའི་སྟེང་བཅར་བའི་བཀའ་དྲུང་བསོད་ནམས་བསྟན་འཛིན་ལགས་དང་བོད་ཀྱི་སྲིད་བྱུས་ཉམས་ཞིབ་ཁང་གི་འགན་འཛིན་ཐུབ་བསྟན་བསམ་འཕེལ་ལགས། བོད་མིའི་སྒྲིག་འཛུགས་ཀྱི་དབུས་འོས་བསྡུ་ལྷན་ཁང་གི་འགན་འཛིན་ཟུར་བ་སྐུ་ངོ་འཇམ་དཔལ་ཆོས་བཟང་ལགས་བཅས་ཡིན་སྐོར་བརྗོད་སོང་།
ཡང་ཁོས་སློབ་ཟུར་ཚོགས་པའི་དྲ་ཚིགས་གསར་པ་བཟོ་དགོས་པའི་སྐོར་ལ། དྲ་ཚིགས་འདི་བཟོ་དགོས་པའི་རྒྱུ་མཚན་གཙོ་བོ་མ་འོངས་པར་ཨ་རིའི་བོད་མིའི་སློབ་ཡོན་ལས་གཞིའི་ནང་གསར་ཞུགས་གཞོན་སྐྱེས་མང་པོར་འབྲེལ་གཏུག་ཡོང་བ་དང་། ༡༩༨༨ ལོར་སློབ་ཡོན་ལས་གཞི་འདི་བཙུགས་པ་བརྒྱུད་དེ་ད་ལྟའི་བར་ཨ་རིའི་གཙུག་ལག་སློབ་ཆེན་ཧྭ་བར་ཌི་དང་ཁོ་ལུམ་བྷེ་ཡ་གཙོ་བའི་ཨ་རིའི་སློབ་ཆེན་ཁག་ཏུ་སློབ་ཞུགས་སློབ་མ་ ༤༠༠ ལྷག་བྱུང་ཡོད་པ་དང་། དེ་ཚོ་ཚང་མ་དེང་སྐབས་ས་གནས་དང་ཡུལ་ལུང་སོ་སོར་ཁ་འཐོར་དུ་གནས་བསྡད་ཡོད་སྟབས། ཁོང་ཚོ་ཚང་མར་འབྲེལ་གཏུག་བྱེད་སའི་སྡིངས་ཆ་ཞིག་དང་། ཁོང་རྣམ་པ་ཚོའི་ཤེས་ཡོན་སློབ་གསོ་དང་མི་ཚེ་ལོ་རྒྱུས་སྐོར་ངོ་སྤྲོད་གནང་རྒྱུ་བཅས་སོགས་ཡིན་སྐོར་བརྗོད་སོང་།
དྲི་བ་དྲིས་ལན་སྐབས་སུ། འདི་གའི་གསར་འགོད་པས་སློབ་ཡོན་ལས་གཞི་འདིའི་ནང་སློབ་མ་ ༤༠༠ ལྷག་ཞུགས་ཡོད་པའི་ཁྲོད་ནས་བཙན་བྱོལ་སྤྱི་ཚོགས་ནང་ཞབས་ཞུ་སྒྲུབ་མཁན་ག་ཚོད་བྱུང་ཡོད་མེད་དྲིས་པར་ཁོས། སློབ་མཐར་ཕྱིན་རྗེས་ཚུར་ཡོང་ནས་བཙན་བྱོལ་སྤྱི་ཚོགས་ནང་མུ་མཐུད་ཞབས་ཞུ་གནང་མཁན་ ༢༠༠ ལྷག་ཟིན་གྱི་ཡོད་པ་རེད། ཁོང་རྣམ་པ་ཚོས་ནུས་པ་ཧ་ཅང་ཡག་པོ་ཐོན་ཡོད་པ་རེད། དཔེར་ན། སྲིད་སྐྱོང་མཆོག་དང་དཔལ་འབྱོར་བཀའ་བློ། བླ་སྨན་པ་ཚེ་བརྟེན་ལགས། དེ་བཞིན། བོད་མི་མང་སྤྱི་འཐུས་ལྷན་ཚོགས་ནང་སྒྲོལ་མ་ཚེ་རིང་ལགས་དང་དབུ་དཀར་ཚང་གཡུ་སྒྲོན་ལགས་བཅས་གཞུང་ཞབས་མང་པོ་ཡོད་པ་རེད་ལ། དེ་བཞིན་གཞུང་འབྲེལ་མིན་པའི་ཚོགས་སྡེ་ཁག་ཏུའང་མང་པོ་ཞིག་ཡོད་པ་རེད། ཅེས་བརྗོད་སོང་།
སློབ་ཟུར་ཚོགས་པའི་གསལ་བསྒྲགས་ཡིག་ཆའི་ནང་། ཨ་རིའི་བོད་མིའི་སློབ་ཡོན་ལས་གཞི་བརྒྱུད་ད་ལྟའི་བར་རྒྱ་བལ་འབྲུག་གསུམ་གྱི་བོད་རིགས་སློབ་ཞུགས་སློབ་མ་ ༤༡༠ བྱུང་བའི་གྲས་ཀྱི་སློབ་ཟུར་ ༡༥༠ བཙན་བྱོལ་སྤྱི་ཚོགས་ནང་ཞབས་ཞུ་གནང་མུས་ཡིན་པ་དང་། དེའི་གྲས་ཀྱི་སློབ་ཟུར་ ༨༥ དབུས་བོད་མིའི་སྒྲིག་འཛུགས་ནང་ཕྱག་ལས་གནང་གི་ཡོད་པ། དེ་བཞིན། སློབ་ཟུར་ ༦༥ བོད་སློབ་ཁག་ཏུ་ཞབས་ཞུ་གནང་གི་ཡོད་སྐོར་དང་། ཨ་རིའི་གཞུང་གི་སློབ་ཕྲུག་བརྗེ་གཏོང་ལས་གཞི་བརྒྱུད་རྒྱ་གར་ནང་རྟེན་གཞི་བྱེད་པའི་ཨ་རིའི་གཞུང་ཚབ་ཁང་གི་རིག་གཞུང་དང་སློབ་གསོ་ཚན་པས་ལོ་རེར་རྒྱ་བལ་འབྲུག་གསུམ་གྱི་སློབ་མ་ ༣༠༠ ལྷག་རྒྱལ་ཁབ་ཕན་ཚུན་གྱི་སློབ་ཆེན་ཁག་ནང་གཏོང་གི་ཡོད་སྐོར་འཁོད་འདུག
སློབ་ཟུར་ཚོགས་པའི་དྲ་ཚིགས་ནང་ཚོགས་པ་ངོ་སྤྲོད་དང་། ཚོགས་པའི་ལས་དོན་དང་མཁས་པའི་ལོ་རྒྱུས་ངོ་སྤྲོད། གཟུགས་མཐོང་དྲ་བརྙན་དང་ཚོགས་པའི་དྲ་ཚིགས་ལ་རྒྱབ་སྐྱོར་ཡིག་ཚགས། འབྲེལ་གཏུག་དྲ་བྱང་སོགས་འཁོད་འདུག་ལ། ཚོགས་པའི་ལས་གཞི་གཙོ་བོ་ཁག་ཅིག་འཁོད་པའི་ནང་། ༡༽སློབ་ཟུར་དང་གསར་ཞུགས་སློབ་མ་ཕན་ཚུན་བར་འབྲེལ་ལམ་བརྒྱུད་ཨ་རིའི་བོད་མིའི་སློབ་ཡོན་ལས་གཞིའི་སྐོར་གྱི་གོ་རྟོགས་སྤེལ་ཐབས། ༢༽ སློབ་ཟུར་ཕན་ཚུན་བར་སོ་སོའི་མི་ཚེ་ལོ་རྒྱུས་དང་འབྲེལ་བའི་ཉམས་མྱོང་བརྗེ་རེས་བརྒྱུད། མ་འོངས་གསར་ཞུགས་སློབ་མའི་མདུན་ལམ་ལ་ཕན་ཐོག་ཡོང་བའི་སྡིངས་ཆ་བསྐྲུན་ཐབས། ༣༽ ཨ་རིའི་བོད་མིའི་སློབ་ཡོན་ལས་གཞིའི་འབྲེལ་མཐུད་པ་དང་ཨ་རིའི་བོད་མིའི་སློབ་ཡོན་ལས་གཞི་གསར་བའམ་གོ་སྐབས་དང་འབྲེལ་བའི་སློབ་ཟུར་གཉིས་བར་འབྲེལ་གཏུག་བྱ་ཐབས་སོགས་ཡིན་སྐོར་འཁོད་འདུག
གསར་འགོད་པ། པདྨ་རྒྱལ།
