ད་ལོའི་རྒྱ་གར་རྒྱལ་ཡོངས་འཛིན་རིམ་བཅུ་གཉིས་ཀྱི་ཡིག་རྒྱུགས་ཁྲོད་བོད་པའི་སློབ་ཕྲུག་ཚོའི་གྲུབ་འབྲས་སྔར་ལོ་ལས་དམའ་བ་ཆགས་ཡོད་པ་མ་ཟད། རྒྱུགས་འབྲས་བརྒྱ་ཆ་ ༩༥ བླངས་ཏེ་སྲིད་སྐྱོང་སློབ་ཡོན་གཟེངས་རྟགས་ཐོབ་མཁན་གཅིག་ཀྱང་བྱུང་མི་འདུག
ད་ལོའི་རྒྱ་གར་རྒྱལ་ཡོངས་འཛིན་རིམ་ ༡༢ པའི་ཡིག་རྒྱུགས་ཁྲོད། བོད་པའི་སློབ་གྲྭ་ ༡༧ གྱི་སློབ་ཕྲུག་ ༡༣༥༩ མཉམ་ཞུགས་བྱས་ཡོད་པའི་ཁོངས་ནས་སློབ་མ་ ༡༢༢༤ ཡིས་ཡིག་རྒྱུགས་འཕྲོད་ཡོད་པ་དང་། བསྐྱར་རྒྱུགས་གཏོང་དགོས་མཁན་ ༡༡༥ དང་། རྒྱུགས་མ་འཕྲོད་པའི་སློབ་མ་ ༡༨ བཅས་ཡོད་འདུག ད་ལོར་སྤྱི་ཡོངས་ཀྱི་རྒྱུགས་འཕྲོད་པའི་བརྒྱ་ཆ་ ༩༠།༧ ཡིན་འདུག
ད་ལོའི་ཡིག་རྒྱུགས་འཕྲོད་ཚད་བརྒྱ་ཆ་ ༡༠༠ ལེན་མཁན་སློབ་གྲྭ་བཞི་ཡོད་པ་ནི་སེ་ལ་ཁུ་བོད་ཁྱིམ་དང་། སུ་ཇཱ་བོད་ཁྱིམ། སྤོན་ཊ་གཏན་སློབ། སྦེལ་ཀོབ་བོད་ཁྱིམ་བཅས་ཡིན་འདུག སློབ་ཕྲུག་ ༣༤༢ ཀྱིས་བརྒྱ་ཆ་ ༧༥ ཡན་བླངས་ཡོད་པ་དང་། དེ་དག་ཁྲོད་སློབ་ཕྲུག་ ༡༠ ཡིས་བརྒྱ་ཆ་ ༩༠ ཡན་བླངས་ཡོད་འདུག
ད་ལོར་ཚན་རིག་དང་ཚོང་རིག འབྱུང་རིག་བཅས་ཀྱི་ཁོངས་ནས་བརྒྱ་ཆ་རྩེ་ཕུད་ཐོབ་མཁན་དག་ནི། ཚན་རིག་ཁོངས་ནས་ཨང་དང་པོ་སེ་ལ་ཁུ་བོད་ཁྱིམ་སློབ་གྲྭའི་སློབ་མ་བསྟན་འཛིན་མཚོ་མོ་ལ་བརྒྱ་ཆ་ ༩༤།༢ དང་། ཚོང་རིག་ཁོངས་ནས་ཨང་དང་པོ་དྷ་སྟེང་བོད་ཁྱིམ་གྱི་སློབ་མ་བསྟན་འཛིན་ནོར་སྒྲོན་ལ་བརྒྱ་ཆ་ ༨༨། སྒྱུ་རྩལ་ཁོངས་ནས་ཨང་དང་པོ་མ་སུ་རི་བོད་ཁྱིམ་གྱི་སློབ་མ་བསྟན་འཛིན་ཕུན་ཚོགས་ལ་བརྒྱ་ཆ་ ༩༢།༨ བཅས་ཐོབ་ཡོད་འདུག
ད་ལོར་དགའ་ལྡན་ཕོ་བྲང་གི་བྱ་དགའ་འཐོབ་མཁན་དག་ནི། ཚན་རིག་ཁོངས་ནས་ཨང་དང་པོ་སེ་ལ་ཁུ་བོད་ཁྱིམ་གྱི་སློབ་མ་བསྟན་འཛིན་མཚོ་མོ་ལ་བརྒྱ་ཆ་ ༩༤།༢ དང་། ཨང་གཉིས་པ་ཀ་སྦུག་གཏན་སླབོ་ཀྱི་སློབ་མ་བསྟན་འཛིན་བདེ་ཆེན་ལ་བརྒྱ་ཆ་ ༩༡། ཨང་གསུམ་པ་སེ་ལ་ཁུ་བོད་ཁྱིམ་གྱི་སློབ་མ་ཚེ་རིང་བསོད་ནམས་ལ་བརྒྱ་ཆ་ ༨༩།༦ བཅས་ཐོབ་ཡོད་འདུག
ཚོང་རིག་ཁོངས་ནས་ཨང་དང་པོ་དྷ་སྟེང་བོད་ཁྱིིམ་གྱི་སློབ་མ་བསྟན་འཛིན་ནོར་སྒྲོན་ལ་བརྒྱ་ཆ་ ༨༨ དང་། ཨང་གཉིས་པ་མོན་གྷོ་ཊི་གཏན་སློབ་ཀྱི་སློབ་མ་བསྟན་འཛིན་རྣམ་གྲོལ་ལ་བརྒྱ་ཆ་ ༨༣།༦། ཨང་གསུམ་པ་དྷ་སྟེང་བོད་ཁྱིམ་གྱི་སློབ་མ་བསྟན་འཛིན་ཡིད་དགའ་ལ་བརྒྱ་ཆ་ ༨༢།༤ བཅས་ཐོབ་ཡོད་འདུག
སྒྱུ་རྩལ་སྡེ་ཚན་ཁོངས་ནས་ཨང་དང་པོ་མ་སུ་རི་བོད་ཁྱིམ་སློབ་མ་བསྟན་འཛིན་ཕུན་ཚོགས་ལ་བརྒྱ་ཆ་ ༩༢།༨ དང་། ཨང་གཉིས་པ་སུ་ཇཱ་བོད་ཁྱིམ་སློབ་མ་བསྟན་འཛིན་བུ་ཁྲིད་དང་བསྟན་འཛིན་ནོར་ལྡན་ལ་ ༩༡།༦། ཨང་གསུམ་པ་སྦེལ་ཀོབ་གཏན་སློབ་ཀྱི་སློབ་མ་ཟླ་བ་ཆོས་སྒྲོན་ལ་བརྒྱ་ཆ་ ༩༡ བཅས་ཐོབ་ཡོད་འདུག
སྲིད་སྐྱོང་ལགས་གྲུབ་འབྲས་ཡག་སྡུག་བྱུང་ཡང་གསུང་རྒྱུ་གལ་འགངས་ཆེ་བ་མཐོང་། བརྒྱ་ཆ་༩༥ལོན་སྐབས་ཁྱབ་བསྒྲགས་དང་། ཤེས་ཡོན་ཡར་རྒྱས་སོང་ཚུལ་དུ་མ་ཞིག་གསུངས། གྲུབ་འབྲས་དམའ་པོའི་སྐབས་སུ་འཇམ་ཐིངས་བཞུགས་ན་ལེན་པོ་ཞིག་འདུག་གམ།
སྒྱུ་རྩལ་ལས་བྱུང་རིག་སྡེ་ཚན་ཟེར་ན་ལེགས་པ་མཐོང་།
ལོ་འདི་བོད་མི་སྒྲིག་འཛུགས་འམ་སྲིད་སྐྱོང་གཟེངས་རྟགས་གཞེས་མ་བྱུང་བ་འདི་སློབ་གྲྭ་ཁག་གིས་ལས་བྱེད་ཀྱི་ནོར་འཁྲུལ་ཞིག་མ་རེད་བསམ་གྱི་འདུག། ལོ་སྔོན་མའི་ནང་སྲིད་སྐྱོང་གི་སློབ་གྲྭ་ཁག་ཡར་རྒྱས་འགྲོ་གི་ཡོད་ལབ་པ་དེ་ད་ལོའི་གནས་ཚད་མ་མཐུན་པ་ཕྱོགས་གང་ནས་ཐུས་ཤོར་འགྲོ་པ་ཞིག་ཡིན་ མ་འོངས་དེའི་ཐད་ལ་ཁ་བཤད་པ་བཞིན་དོན་འཁྱོངས་ཡོང་བ་རེ་བ་བྱེད་བཞིན་ཡོད། གཏམ་དཔེ་ལ་༼ཁ་ཤས་ཆུ་ཡི་སྦུལ་པ། ལག་ལེན་གསེར་གྱི་ཐིགས་པ། ་༽ ཟེར་བ་མ་ཡོང་བའི་རེ་བ་ཞུ་རྒྱུ་ཡིན
ད་ལོ་སྲིད་སྐྱོང་གཟེངས་རྟགས་འཐོབ་མཁན་ཞིག་ཀྱང་མ་བྱུང་བ་དེ་ཧ་ཅང་ཐབས་སྐྱོ་བ་རེད། ཡིག་རྒྱུགས་སྤྱི་ཡོངས་ཀྱི་ཆ་ནས་ཀྱང་ 2015 ལོ་དང་བསྡུར་ན་བརྒྱ་ཆ་མང་པོ་ཞིག་གིས་སྐྱོ་བ་ཆགས་འདུག་པ་དེ་ཧ་ཅང་བློ་ཕམ་གྱི་རང་བཞིན་རེད།