ཟླ་འདིའི་ཚེས་ ༢༤ ནས་དེ་རིང་ ༢༦ བར། བཞུགས་སྒར་དྷ་རམ་ས་ལའི་ནོར་བུ་མགྲོན་ཁང་དུ། བོད་རྒྱལ་ཡོངས་མང་གཙོ་ཚོགས་པའི་ཚོགས་ཆེན་སྐབས་བདུན་པ་ཚོགས་ཡོད་པ་ལྟར། དེ་རིང་ཕྱི་དྲོའི་ཆུ་ཚོད་ ༦ པའི་སྟེང་ཉིན་མཐའ་མའི་མཇུག་སྡོམ་ཐོག འོས་ཤོག་གི་ལམ་ནས་སྐབས་བདུན་པའི་རྒྱུན་ལས་གསར་འདེམས་གནང་སོང་།
ཐེངས་འདིར་རྒྱུན་ལས་གསར་པ་༧ བདམས་ཡོད་པ་དག་ལས། ཚེ་བརྟན་ནོར་བུ་ལགས་ཚོགས་གཙོ་དང་། གཞན། དྷ་སར་གནས་སྡོད་དགེ་འདུན་ཆོས་འཕེལ་ལགས་དང་རྒྱལ་ཐང་སྤྲུལ་སྐུ་ལགས། ཤེས་རབ་ཚེས་རྡོར་ལགས། བསྟན་འཛིན་རྣམ་སྲས་ལགས། བལ་ཡུལ་གནས་སྡོད་ཉི་མ་རྒྱལ་མཚན་ལགས། བདེ་སྐྱིད་གླིང་དུ་གནས་སྡོད་ཚེ་རིང་གཡང་འཛོམས་ལགས་བཅས་བདམས་ཡོད་ཀྱང་། ཚེ་རིང་གཡང་འཛོམས་ལགས་ཀྱིས་མོ་རང་གི་ནང་མིའི་དཀའ་ངལ་འོག་མང་གཙོ་ཚོགས་པའི་སྐབས་བདུན་པའི་རྒྱུན་ལས་ནས་དགོངས་པ་ཞུས་སོང་།
ཐེངས་འདིའི་ཚོགས་ཆེན་ཐོག་གྲོས་ཆོད་དོན་ཚན་ ༩ བཞག་ཡོད་པ་དག་ནི། དང་པོ། མང་གཙོ་ཚོགས་པའི་དབུས་ས་གཉིས་ཀྱི་ལས་བསྡོམས་དང་རྩིས་ཁྲ་སླ་བཅོས་འཕྲལ་སེལ་མི་བྱེད་པར་ཞིབ་ཕྲ་འགོད་འབུལ་གནང་རྒྱུ། གཉིས་པ། ༧གོང་ས་མཆོག་གི་སྐུ་ཕྱྭའི་སླད་དབུས་ས་གཉིས་ནས་ཞབས་རིམ་དགེ་སྦྱོར་དང་སྲོག་བླུ་གནང་རྒྱུ་དང་། ཆོལ་ཁ་ཆོས་ལུགས་དང་ཕོ་མོ་རྒན་གཞོན་དབྱེར་མེད་ཐོག་མཐུན་སྒྲིལ་ཡོང་རྒྱུར་འབོད་བརྩོན་ཞུ་རྒྱུ། གསུམ་པ། དབུས་ས་གཉིས་ནས་མཁས་དབང་གདན་ཞུས་ཀྱིས་མང་ཚོགས་ལ་དམངས་གཙོའི་སྐོར་ངོ་སྤྲོད་དང་། མཐོ་སློབ་ཁག་གི་བོད་ཕྲུག་ཚོར་དམངས་གཙོ་དང་ཆབ་སྲིད་སྐོར་སློབ་སྟོན་གནང་རྒྱུ། བཞི་བ། གལ་འགངས་ཆེ་བའི་ཡིག་ཆའི་རིགས་ས་གནས་ཁག་ཏུ་གཏོང་སྐབས་ཤོག་ཐོག་ཏུ་གནང་སྟེ་ཟླ་དུས་ཚེས་གྲངས་བཅས་གསལ་བོར་དགོས་རྒྱུ།
ལྔ་བ། དབུས་རྒྱུན་ཕྱོགས་བཞུགས་རྣམས་ནས་སོ་སོའི་བཞུགས་ཡུལ་ས་གནས་དག་ཏུ་ལམ་སྟོན་གྱི་འགན་འཁུར་རྒྱུ། དྲུག་པ། བོད་རྒྱལ་ཡོངས་དམངས་གཙོ་ཚོགས་པའི་ཚོགས་མི་སུ་ཞིག་ཕྱི་རྒྱལ་གང་དུ་ཕེབས་ཀྱང་། དམངས་གཙོ་ཚོགས་པའི་ཚོགས་མིར་མུ་མཐུད་བཞུགས་ཏེ་ཚོགས་པར་མཐུན་རྐྱེན་རོགས་རམ་གནང་རྒྱུ། བདུན་པ། བོད་རྒྱལ་ཡོངས་དམངས་གཙོ་ཚོགས་པ་བོད་མིའི་སྒྲིག་འཛུགས་བཀའ་སྤྱི་གཉིས་ཀྱིས་སྲིད་དོན་ཚོགས་པ་ཞིག་ལ་ངོས་འཛིན་ཡོང་ཆེད་སྙན་ཞུ་འབུལ་རྒྱུ། བརྒྱད་པ། མ་འོངས་པར་སྲིད་སྤྱི་གཉིས་ཀྱི་འོས་མི་འདོན་སྐབས། གལ་ཏེ་ལོ་རྒྱུས་ནང་རྙོག་གླེང་ཅན་གྱི་འོས་མི་བྱུང་ཚེ་ཕྱིར་འཐེན་བྱ་རྒྱུའི་དབང་ཚད་དབུས་སྤྱི་ཁྱབ་རྒྱུན་ལས་ཁང་ལ་ཡོད་པ། དགུ་བ། བོད་གཞོན་ནུ་ལྷན་ཚོགས་དང་བོད་རྒྱལ་ཡོངས་དམངས་གཙོ་ཚོགས་པ་གཉིས་ཕ་མ་དང་བུ་ཕྲུག་ལྟ་བུའི་འབྲེལ་ལམ་བཟང་བོ་ཡོད་སྟབས། བོད་གཞོན་ནུ་ལྷན་ཚོགས་ནས་རྒྱལ་ཡོངས་དམངས་གཙོ་ཚོགས་པའི་ལས་བྱེད་ཀྱི་གླ་ཕོགས་དང་ཁང་གླར་རོགས་རམ་ཡོང་བའི་རེ་སྐུལ་ཞུ་རྒྱུ། ཞེས་སོགས་ཡིན་འདུག
གསར་འགོད་པ། པདྨ་རྒྱལ།
