སྲིད་སྐྱོང་བློ་བཟང་སེང་གེ་མཆོག་གི་དམ་འབུལ་གསུང་བཤད།

དེ་རིང་སྔ་དྲོའི་ཆུ་ཚོད་ ༩།༣༠ སྟེང་། དྷ་ས་ཐེག་ཆེན་ཆོས་གླིང་གཙུག་ལག་ཁང་གི་ཆོས་རྭར། སྐབས་བཅུ་བཅོ་ལྔ་པའི་བཀའ་ཤག་གི་སྲིད་སྐྱོང་བློ་བཟང་སེང་གེ་མཆོག་གིས་ལས་ཡུན་གཉིས་པའི་ལས་འཁུར་དམ་འབུལ་མཛད་སྒོ་ཚོགས་པའི་སྟེང་། སྐུ་མགྲོན་གཙོ་བོ་བོད་མི་ཡོངས་ཀྱི་སྐྱབས་མགོན་༧རྒྱལ་བ་རིན་པོ་ཆེ་མཆོག་དབུ་བཞུགས་ཐོག སྲིད་སྐྱོང་མཆོག་གིས་ཁྲིམས་ཞིབ་པ་ཆེ་བ་བཀའ་བརྒྱུད་དོན་གྲུབ་མཆོག་གི་མདུན་དུ་དམ་འབུལ་དང་ལས་འཁུར་མཚན་རྟགས་བསྐྱོན།

སྲིད་སྐྱོང་བློ་བཟང་སེང་གེ་མཆོག་གིས་གསུང་བཤད་གནང་དོན། “གུས་ནས་དེ་རིང་སྲིད་སྐྱོང་གི་ལས་ཡུན་གཉིས་པ་དམ་འབུལ་ཞུས་པའི་སྐབས་འདིར། བོད་མིའི་བླ་ན་མེད་པའི་དབུ་འཁྲིད་༧སྤྱི་ནོར་གོང་ས་༧སྐྱབས་མགོན་ཆེན་པོ་མཆོག་ལ་ཇི་ལྟར་གསོལ་བ་བཏབ་པ་ལྟར། བདག་ཅག་བོད་འབངས་རྣམས་ཐུགས་རྗེའི་སྐྱབས་འོག་ནས་ནམ་ཡང་འདོར་བ་མེད་པར་ཐུགས་བརྩེ་བ་ཆེན་པོས་དམ་འབུལ་གྱི་མཛད་སྒོའི་ཚོགས་མགོན་དུ་ཆིབས་སྒྱུར་བཀྲིན་བསྐྱངས་པར་གུས་ནས་ལྷ་ཕྱག་གྲངས་མེད་དང་བཅས་སྙིང་ཐག་པ་ནས་བཀའ་དྲིན་བླ་མེད་དུ་ཆེ་ཆེ་ཞེས་ལན་བརྒྱར་ཞུ་རྒྱུ་དང་། ༧གོང་ས་༧སྐྱབས་མགོན་ཆེན་པོ་མཆོག་དགུང་གྲངས་བརྒྱ་དང་བཅུ་གསུམ་བར་བཞུགས་རྒྱུའི་བཀའ་བཞེས་བཟང་པོ་ཡོད་པ་བཞིན་མགོན་པོ་གང་ཉིད་ཀྱི་སྐུ་ཚེའི་རིང་བོད་མིའི་མངོན་འདོད་འགྲུབ་ཐུབ་པ་ཡོང་ཆེད་བཀའ་ཤག་གི་ངོས་ནས་འབད་བརྩོན་ཞུ་སྒོ་ཅི་མཆིས་འཐུས་ཤོར་མེད་པ་ཞུ་རྒྱུའི་དམ་བཅའ་འབུལ་རྒྱུ་ཡིན།

འདས་པའི་མི་ལོ་དྲུག་ཅུ་ལྷག་རིང་བོད་ཀྱི་ལོ་རྒྱུས་ནང་ཛ་དྲག་གི་གནས་སྟངས་ཆུ་གཉེར་བཞིན་གཅིག་རྗེས་གཉིས་མཐུད་ཀྱི་རུ་འཛིངས་པའི་སྐབས་སུ་༧གོང་ས་༧སྐྱབས་མགོན་ཆེན་པོ་མཆོག་ནས་ཐུགས་བརྩེ་བ་ཆེན་པོའི་སྒོ་ནས་དཀའ་བ་བརྒྱ་ཕྲག་ཁྱད་དུ་བསད་ནས་བོད་མི་མང་ལ་ཡང་དག་པའི་དབུ་འཁྲིད་ལམ་སྟོན་གནང་བ་དང་། ཁྱད་པར་བཙན་བྱོལ་བོད་མིའི་མང་གཙོའི་ལམ་ལུགས་སྲོལ་གཏོད་གནང་བ་བཅས་ཀྱི་བཀའ་དྲིན་ནི་བསྐལ་བའི་བར་དུ་ཡང་གཞལ་ཐབས་བྲལ་བ་ཡིན།

བཙན་བྱོལ་རྒྱ་ཆེའི་མང་ཚོགས་ནས་གུས་པར་སྲིད་སྐྱོང་གི་ལས་ཡུན་གཉིས་པ་ཞབས་ཕྱི་ཞུ་རྒྱུའི་གོ་སྐབས་གནང་བར་གུས་བརྩིའི་སྒོ་ནས་སྙིང་ཐག་པ་ནས་ཐུགས་རྗེ་ཆེ་ཞུ་བ་དང་ཆབས་ཅིག རང་ནུས་གང་ལྕོགས་ལྷག་བསམ་རྣམ་དག་གི་སྒོ་ནས་ཞབས་ཞུ་བྱ་རྒྱུའི་ཁས་ལེན་ཞུ་རྒྱུ་ཡིན་ན། གཞིས་བྱེས་རྒྱ་ཆེའི་མང་ཚོགས་ནས་ཀྱང་བོད་རིགས་སྤྱི་བོ་གནམ་བསྟན་ཡོངས་སུ་རྫོགས་པ་ཆོལ་ཁ་དང་ལུང་ཚན་ཆོས་ལུགས་བཅས་ཀྱི་དབྱེ་བ་མེད་པར་ཕུགས་ཀྱི་བསམ་འདུན་གཅིག་གྱུར་ཡིན་པ་དང་། ཤ་ཁྲག་གཅིག་པའི་བོད་རིགས་སྤུན་ཟླ་ཡིན་པའི་འདུ་ཤེས་བརྟན་པོར་བཟུང་སྟེ་མུ་མཐུད་རྒྱབ་སྐྱོར་དང་ཕྱྭར་གྲུ་མཉམ་འདེགས་གནང་བའི་རེ་བ་དང་ཡིད་ཆེས་གཙང་མ་ཞུ་གི་ཡོད།

ཕྱི་ལོ་ ༡༩༥༩ ལོར་བཙན་བྱོལ་དུ་ཕེབས་རྗེས་༸གོང་ས་༸སྐྱབས་མགོན་ཆེན་པོ་མཆོག་ནས་ཆོལ་ཁ་དང་ཆོས་བརྒྱུད་དབྱེ་བ་མེད་པར་བཙན་བྱོལ་ནང་བོད་མིའི་སྒྲིག་འཛུགས་མུ་མཐུད་འཛུགས་རྒྱུའི་གསལ་བསྒྲགས་གནང་བ་མ་ཟད། རིམ་བཞིན་སློབ་གྲྭ་དང་། གཞིས་ཆགས། རིས་མེད་ཆོས་སྒར་ཁག་དང་བཅས་པ་གསར་འཛུགས་གནང་བ་དང་། ཆོལ་གསུམ་བོད་རིགས་ཡོངས་རྫོགས་དམ་ཚིག་རྡོག་རྩ་གཅིག་སྒྲིལ་ལྕགས་ཀྱི་གོང་བུ་ལྟ་བུར་གནས་གལ་ཆེ་བའི་བཀའ་སློབ་དང་ལམ་སྟོན་ཡང་ཡང་ཕེབས་པ་བཅས་ལ་བརྟེན་ནས། ད་བར་བོད་མིའི་གཅིག་སྒྲིལ་གྱི་ནུས་ཤུགས་ཇེ་ཆེར་འགྲོ་བཞིན་པ་ཡིན་ནའང་། རང་ཉིད་སྒེར་ངོས་ནས་བློ་ཕམ་ཆེན་པོའི་སྒོ་ནས་ཞུ་རྒྱུར། ད་ལན་སྲིད་སྐྱོང་དང་སྤྱི་འཐུས་ཀྱི་འོས་བསྡུ་ཆེན་མོའི་བརྒྱུད་རིམ་ཁྲོད་བོད་མི་ནང་ཁུལ་ཕན་ཚུན་སྐྱོན་བརྗོད་དང་། བོད་མིའི་ཡ་རབས་བཟང་སྤྱོད་དང་འགལ་བའི་བྱ་སྤྱོད་ཐལ་བ་སོགས་ལ་བརྟེན་ནས་༧གོང་ས་༧སྐྱབས་མགོན་ཆེན་པོ་མཆོག་གང་ཉིད་ལ་ཐུགས་དམ་སད་རྐྱེན་ཅི་ཆེར་བྱུང་བ་དང་། གུས་ཅག་རྣམས་ནས་མ་ཤེས་པ་དང་བག་མེད་པའི་དབང་གིས་ཉེས་འཛོལ་དང་ནོངས་འགལ་ཇི་བྱུང་ལ་གནོངས་འགྱོད་དྲག་པོས་སྙིང་ནས་བཟོད་གསོལ་དང་མཐོལ་བཤགས་ལན་བརྒྱར་ཞུ་རྒྱུ་ཡིན། སླད་ཕྱིན་ཐུགས་ཕམ་འགྱུར་གཞི་དེ་རིགས་གཏན་ནས་མི་ཡོང་བའི་ཁས་ལེན་དམ་བཅའ་བརྟན་པོ་ཞུ་རྒྱུ་དང་། བོད་མི་ནང་ཁུལ་ཆོལ་ཁ་དང་ཤོག་ཁག་ཕྱོགས་སྒྲིལ་མེད་པར་མཐུན་ལམ་རྡོག་རྩ་གཅིག་སྒྲིལ་དགོས་པའི་འབོད་སྐུལ་ཤུགས་དྲག་ཞུ་རྒྱུ་ཡིན། དེ་མཚུངས་མ་འོངས་པར་འོས་བསྡུའི་ཁྲིམས་སྒྲིག་ཁག་ལ་ལེགས་བཅོས་ཇི་དགོས་དབུས་འོས་བསྡུ་ལས་ཁང་དང་གོ་བསྡུར་གྱིས་བསྐྱར་བཅོས་ཡོང་ཐབས་འབད་བརྩོན་བྱ་རྒྱུ་ཡིན།

འདས་པའི་ལོ་ལྔའི་རིང་ལས་འཁྱུར་ཟིན་པའི་བཀའ་ཤག་སྐབས་བཅུ་བཞི་པའི་བཀའ་བློན་ལས་རོགས་རྣམས་ནས་ཆབ་སྲིད་དང་འཛིན་སྐྱོང་གི་ལས་དོན་གང་ཅིའི་ཐོག་ནུས་པ་མཉམ་སྤུངས་ཀྱི་སྒོ་ནས་ཕྱག་ལས་གནང་བ་དང་། བོད་བསྟན་སྲིད་མི་རིགས་གཉན་འཕྲང་ཆེ་བའི་དུས་སྐབས་འདིར་སྤྱི་པའི་རྩ་དོན་སྙིང་ལ་བཅང་སྟེ་ཐུགས་ཁུར་ཆེན་པོས་ཞབས་ཞུ་གནང་བར་ལེགས་གསོལ་བསྔགས་བརྗོད་དང་ཐུགས་རྗེ་ཆེ་ཞུ་རྒྱུ་ཡིན། དེ་བཞིན་ཉིན་རེའི་འཛིན་སྐྱོང་གི་ལས་དོན་འགན་ཁུར་རྐང་ལེན་ཞུ་མཁན་སྲི་ཞུ་ལས་བྱེད་རྣམས་ལའང་ཐུགས་རྗེ་ཆེ་ཞུ་འདོད་བྱུང་།

འབྱུང་འགྱུར་བཀའ་ཤག་སྐབས་བཅོ་ལྔ་པའི་ལས་ཡུན་རིང་སྔར་བཞིན་གཅིག་སྒྲིལ་དང་། གསར་གཏོད། རང་ཁ་རང་གསོ་བཅས་ཀྱི་གཞི་རྩའི་ལྟ་གྲུབ་གསུམ་རྒྱབ་རྟེན་དུ་བཟུང་སྟེ་བཀའ་ཤག་སྐབས་བཅུ་བཞི་པའི་རིང་ལས་འཆར་མང་དག་ཅིག་བསྒྲིགས་ཡོད་པ་རྣམས་མུ་མཐུད་མཇུག་སྐྱོང་ཐོག ཆབ་སྲིད་དང་འཛིན་སྐྱོང་གི་ལས་དོན་སྔར་ལྷག་ནུས་པ་ཐོན་པ་ཡོང་ཆེད་ལས་གཞི་གསར་པ་ཇི་དགོས་དུས་ནས་དུས་སུ་བརྟག་ཞིབ་ཟབ་ནན་གྱིས་འབད་བརྩོན་ཞུ་རྒྱུ་ཡིན།

ཉེ་སྔོན་༧གོང་ས་༧སྐྱབས་མགོན་ཆེན་པོ་མཆོག་ནས་བཙན་བྱོལ་བོད་མིའི་སྤྱི་ཚོགས་ནང་ནད་རིགས་སྔོན་འགོག་དང་ཉམ་ཐག་ལྟ་སྐྱོང་ཐད་འཐུས་ཤོར་ཕྱིན་གནས་བཀའ་སློབ་ལམ་སྟོན་ཕེབས་པ་ལྟར། འཐུས་ཤོར་ཕྱིན་པའི་རྐྱེན་ཇི་ཡིན་དང་། མ་འོངས་པར་ཡར་རྒྱས་གཏོང་ཕྱོགས་ཇི་དགེ་ཞིབ་འཇུག་སླད་ཆེས་མཐོའི་ཞིབ་འཇུག་ཚོགས་ཆུང་ཁག་གཉིས་བསྐོ་འཛུགས་ཟིན་པ་དང་། འཕྲོད་བསྟེན་སྐོར་དངོས་སུ་ལས་དོན་འགན་ཁུར་ཞུ་མཁན་སྨན་པ་དང་འགན་འཛིན་ལས་སྣེ་ཡོངས་ཀྱི་ཚོགས་ཆེན་ཞིག་ཀྱང་བསྐོང་ཚོགས་ཀྱིས་བསམ་འཆར་བསྡུ་ལེན་ཞུས་ཟིན་པ་ཡིན་ཞིང་། རིང་མིན་ཚོགས་ཆུང་ཁག་གི་སྙན་ཐོ་འབྱོར་འཕྲལ་བཀའ་ཤག་གི་ངོས་ནས་ལག་ལེན་དོན་འགེལ་ཞུ་སྒོ་གང་མཆིས་ཞུ་རྒྱུ་དང་། དེའི་ཆེད་འགྲོ་གྲོན་ཇི་དགོས་ཐབས་འཚོལ་ཞུས་ཏེ་ལས་གཞི་དེ་དག་ལེགས་འགྲུབ་ཐུབ་པ་ཞུ་རྒྱུ་ཡིན། དེ་མཚུངས་རང་རེའི་སྤྱི་ཚོགས་ནང་དོལ་རྒྱལ་རྗེས་འབྲང་བ་ཉུང་ཤས་ཤིག་ནས་ཆོས་ཁ་ལ་འཁྱེར་ནས་དོན་དུ་ཕ་རོལ་པོའི་གཡོ་བྱུས་འོག་ཚུད་དེ་གཞིས་བྱེས་བོད་མི་ཡོངས་ཀྱི་བླ་སྲོག་༧གོང་ས་༧སྐྱབས་མགོན་ཆེན་པོར་གཞི་མེད་སྒྲོ་སྐུར་གྱི་མཚན་སྨད་གང་བྱུང་ཞུ་བཞིན་པ་དང་། བོད་མི་ནང་ཁུལ་དང་བོད་རྒྱུད་ནང་བསྟན་གྱི་ཆོས་བརྒྱུད་ནང་ཕན་ཚུན་ཐུགས་སྣང་མི་མཐུན་པ་བཟོ་བཞིན་པ་བཅས་ལ་གདོང་ལེན་ཡན་པོར་མ་སོང་བ་བྱ་རྒྱུ་ཡིན།

ཁྱད་པར་༧གོང་ས་༧སྐྱབས་མགོན་ཆེན་པོའི་དགོངས་གཞི་ལྟར་བོད་མི་མང་སྤྱི་འཐུས་ལྷན་ཚོགས་ཀྱིས་སྤྱི་མོས་གྲོས་ཆོད་ཀྱི་ལམ་ནས་གཏན་ལ་ཕབ་པའི་གཉིས་སྨན་དབུ་མའི་ལམ་གྱི་སྲིད་བྱུས་མུ་མཐུད་ལག་བསྟར་ཞུ་རྒྱུ་བཀའ་ཤག་སྐབས་བཅོ་ལྔ་པའི་རྩ་དོན་གལ་འགངས་ཆེ་ཤོས་ལ་བརྩི་རྒྱུ་མ་ཟད། བོད་དོན་དཀའ་རྙོག་སེལ་ཐབས་སུ་གཉིས་སྨན་དབུ་མའི་ལམ་གྱི་ཐབས་བྱུས་ལས་ལྷག་མེད་པ་ད་བར་ལན་མང་ཞུས་ཟིན་པ་ལྟར། ཐབས་བྱུས་འདིའི་བརྒྱུད་རྒྱ་ནག་གཞུང་གི་སྐུ་ཚབ་དང་༧གོང་ས་༧སྐྱབས་མགོན་ཆེན་པོའི་སྐུ་ཚབ་དབར་གྲོས་མོལ་ཡོང་ཐབས་འབད་བརྩོན་སྔར་ལྷག་ཞུ་རྒྱུ་ཡིན། རྒྱ་ནག་གི་དབུ་འཁྲིད་ཚོས་བོད་དོན་དཀའ་རྙོག་སེལ་འདོད་དང་། བོད་རྒྱ་མི་རིགས་དབར་དོན་དམ་པའི་བརྟན་ལྷིང་དང་གཅིག་སྒྲིལ་ཡོང་ཐབས་བྱེད་ཀྱི་ཡོད་ན། གུ་དོག་མཁྲེགས་འཛིན་ཁོ་ན་མ་ཡིན་པར་བློ་རྒྱ་ཡངས་པོའི་སྒོ་ནས་དངོས་ཡོད་གནས་སྟངས་དང་འཚམས་པའི་སྲིད་བྱུས་ཡང་དག་པ་ཞིག་ལག་བསྟར་བྱ་རྒྱུའི་དུས་ལ་བབས་ཡོད།

ད་བར་བསྟན་སྲིད་མི་རིགས་ཀྱི་དོན་དུ་གཅེས་པའི་ལུས་སྲོག་ལོངས་སྤྱོད་བློས་བཏང་གནང་བའི་རྒྱལ་གཅེས་དཔའ་བོ་དཔའ་མོ་ཡོངས་དང་། ལྷག་དོན་བོད་ནང་ཕྱི་ལོ་ ༢༠༠༩ ནས་བཟུང་བོད་མི་ ༡༤༤ ཡིས་རང་ལུས་མེར་སྲེག་གནང་བའི་བློས་བཏང་རྣམས་མི་རབས་ནས་མི་རབས་བར་ང་ཚོས་ནམ་ཡང་བརྗེད་ཐབས་མེད་པ་དང་། ཁོང་རྣམས་ཀྱི་མངོན་འདོད་འགྲུབ་ཆེད་ཐབས་ཤེས་གང་ཐུབ་བྱ་རྒྱུ་ཡིན། དེ་མཚུངས་རྒྱ་ནག་གཞུང་གི་དམ་བསྒྲགས་འོག་རིས་མེད་ཆོས་སྒར་ཁག་ནང་ཡོད་པའི་ཆོས་བྱེད་གྲྭ་བཙུན་སྔགས་གསུམ་དང་། ཤེས་ཡོན་ཅན་དང་རྩོམ་པ་པོ། དགེ་རྒན་དང་སློབ་ཕྲུག གཞས་པ་དང་གཞས་མ། ཞིང་པ་དང་འབྲོག་པ་རྣམས་ནས་ཉིན་ལྟར་དཀའ་སྡུག་སྣ་ཚོགས་མྱོང་བཞིན་པར་ཇི་མི་སྙམ་པར་སྙིང་སྟོབས་ཞུམ་པ་མེད་པའི་སྒོ་ནས་མི་རིགས་ཀྱི་ལ་རྒྱ་བརྟན་པོ་འཛིན་བཞིན་པར་ཡི་རང་བསྔགས་བརྗོད་དང་ཐུགས་རྗེ་ཆེ་ཞུ་རྒྱུ་ཡིན། གྲངས་ཉུང་མི་རིགས་ཀྱི་རང་ཁྱིམ་རང་བདག་ཡང་དག་པ་ཞིག་ཡོང་བར་མི་རིགས་གཞན་དང་དཔུང་པ་མཉམ་གཤིབ་ཐུབ་པའི་ཤེས་ཡོན་གྱི་གནས་ཚད་ལོངས་ངེས་དགོས་སྟབས། མཐོ་སློབ་དང་གཙུག་ལག་སློབ་ཁང་ཁག་ནང་ཡོད་པའི་སློབ་ཕྲུག་རྣམས་གཙོ་བོར་གྱུར་པའི་བོད་རིགས་གཞོན་སྐྱེས་ཚོས་ཤེས་ཡོན་ཐོག་ནུས་ཤུགས་སྒྲིལ་དགོས་པའི་སྐུལ་མ་ཞུ་རྒྱུ་ཡིན།

མདོར་ན། རེ་བ་བཟང་ས་དང་གྲ་སྒྲིག་སྡུག་ས་ནས་བྱེད་དགོས་ཞེས་༧གོང་ས་༧སྐྱབས་མགོན་ཆེན་པོས་བཀའ་སློབ་ལམ་སྟོན་ཡང་ཡང་ཕེབས་པ་ལྟར། གུས་ནས་ནམ་རྒྱུན་ལོ་ལྔ་དང་ལྔ་བཅུའི་ཐབས་བྱུས་འགྲེལ་བརྗོད་ཞུས་པ་དྲན་སྐུལ་ཞུས་ན། འབྱུང་འགྱུར་ལོ་ལྔའི་ནང་གཉིས་སྨན་དབུ་མའི་ལམ་གྱི་སྲིད་བྱུས་ལ་བརྟེན་ནས་བོད་རིགས་ཡོངས་ལ་མིང་དོན་མཚུངས་པའི་རང་སྐྱོང་ཐོབ་ཐབས་སུ་ཚང་མས་ནུས་ཤུགས་ཟོང་ཁ་གཅིག་ཏུ་བསྒྲིལ་ནས་འབད་བརྩོན་ཞུ་དགོས་པ་སྨོས་ཅི་དགོས། ཅི་སྟེ་ངེས་མེད་ཀྱིས་ལོ་མང་པོའི་བར་བོད་དོན་བདེན་མཐའ་གསལ་ཐབས་བྱ་དགོས་བྱུང་ན། འབྱུང་འགྱུར་ལོ་ལྔ་བཅུའི་བར་ང་ཚོའི་འཐབ་རྩོད་མུ་མཐུད་རྒྱུན་གནས་ཐུབ་པའི་ལས་འཆར་བསམ་ཞིབ་བྱ་གལ་ཆེ་བར་སོང་། ཕ་མེས་ནས་བརྒྱུད་པའི་བོད་མི་རིགས་ཀྱི་ཐུན་མོང་མ་ཡིན་པའི་ཆོས་རིག་གོམས་གཤིས་རྣམས་ཉམས་ཆག་མེད་པར་རྒྱུན་འཛིན་ཐུབ་པ་བྱ་རྒྱུ་དང་། ཤེས་ཡོན་དང་དཔལ་འབྱོར་གྱི་གནས་སྟངས་རང་རྐྱ་འཕེར་བའི་སྒོ་ནས་བོད་མིའི་སྒྲིག་འཛུགས་ཀྱི་ནུས་ཤུགས་གོང་འཕེལ་གཏོང་དགོས། སྔ་ཕྱི་མ་གཏོགས་རྒྱ་ནག་ནང་རིམ་བཞིན་འགྱུར་བ་འགྲོ་ངེས་ཡིན་པ་དང་། དེ་འདྲའི་འགྱུར་བ་བྱུང་མཚམས་བོད་མི་རྣམས་ལ་མ་མཐར་ཡང་རྨང་གཞིའི་རང་དབང་ལོངས་སུ་སྤྱོད་ཐུབ་པ་ཞིག་ཡོང་རྒྱུ་ཡིན། དེར་བརྟེན་འཕྲལ་ཕུགས་གཉིས་ཀའི་ལས་དོན་གལ་ཆེར་བརྩིས་ནས་འབད་བརྩོན་ཞུས་ན་འབྱུང་འགྱུར་ལོ་ལྔ་དང་ལྔ་བཅུ་གཉིས་ཀའི་གནས་སྐབས་སུ་རྒྱལ་ཁ་ལོན་ཐུབ་པ་ཡོང་རྒྱུ་ཡིན་པས་འདིའི་ཐད་ཚང་མས་ཐུགས་སྣང་གནང་རོགས་ཞེས་འབོད་སྐུལ་ཞུ་འདོད་བྱུང་།

བོད་མི་རིགས་ཀྱི་གནས་བབ་གཉན་འཕྲང་ཆེ་བའི་དུས་སྐབས་འདིར་རྒྱ་གར་གཞུང་མང་གཉིས་ནས་ད་བར་གཏོང་ཕོད་ཆེན་པོའི་སྒོ་ནས་མཐུན་འགྱུར་རོགས་རམ་གནང་བར་བཀའ་དྲིན་རྗེས་དྲན་ཞུ་རྒྱུ་དང་། དེ་མཚུངས་བོད་དོན་ལ་ཤ་ཚ་རྒྱབ་སྐྱོར་གནང་མཁན་གྱི་སྲིད་གཞུང་དང་། གྲོས་ཚོགས་ཀྱི་འཐུས་མི། ཚོགས་པ་དང་གང་ཟག་བྱེ་བྲག་པ་བཅས་ཡོངས་ལ་ཐུགས་རྗེ་ཆེ་ཞུས་པ་དང་ཆབས་ཅིག བོད་ཀྱི་གནད་དོན་ནི་བོད་མི་ས་ཡ་དྲུག་གི་བདེ་དོན་ཁོ་ན་ཙམ་མ་ཡིན་པར། དྲང་བདེན་དང་ཞི་བདེའི་གནད་དོན་གལ་ཆེན་ཞིག་ཀྱང་ཡིན་སྟབས་ཇི་སྲིད་བོད་དོན་བདེན་མཐའ་མ་གསལ་གྱི་བར་མུ་མཐུད་རྒྱབ་སྐྱོར་གནང་བའི་འབོད་སྐུལ་ཞུ་བཞིན་ཡོད།

མཐའ་དོན། ༧གོང་ས་༧སྐྱབས་མགོན་ཆེན་པོ་མཆོག་སྐུ་ཚེ་བསྐལ་བརྒྱར་བརྟན་ཅིང་། ཐུགས་བཞེད་མ་ལུས་ལྷུན་གྱིས་འགྲུབ་པ་དང་། བོད་དོན་བདེན་མཐའ་གསལ་ཏེ་གཞིས་བྱེས་མཉམ་འཛོམས་ཀྱི་སྐལ་བཟང་ཉི་མ་མགྱོགས་ནས་མྱུར་དུ་འཆར་བའི་སྨོན་འདུན་ཤུགས་དྲག་ཞུ་རྒྱུ་བཅས། སྲིད་སྐྱོང་བློ་བཟང་སེང་གེས་ཕྱི་ལོ་ ༢༠༡༦ ཟླ་ ༥ ཚེས་ ༢༧ ཉིན་སྤེལ།” ཞེས་འཁོད་འདུག