རྔ་བ་ཁུལ་ནས་ཡིན་པའི་དགེ་འདུན་པ་ཞིག་གིས་ཁོའི་ཕ་ཡུལ་གྱི་སློབ་གྲྭ་ཁག་གི་བསླབ་གཞི་གཙོ་བོ་རྒྱ་ཡིག་ཡིན་ལ་དགེ་རྒན་མང་ཆེ་བ་རྒྱ་རིགས་ཡིན་ཡང་། ཕ་ཡུལ་གྱི་བླ་མ་དགེ་བཤེས་སོགས་ཀྱི་ལམ་སྟོན་འོག་སློབ་གྲྭ་ཁག་གི་ནང་བོད་ཡིག་སློབ་འཁྲིད་བྱེད་ཀྱིན་ཡོད་སྐོར་བརྗོད་བྱུང་།
ཟླ་འདིའི་ཕྱི་ཚེས་ ༢༠ ཉིན་དྷ་ས་དབུས་སྣེ་ལེན་ཁང་དུ་བོད་མི་ ༡༤ གསར་དུ་འབྱོར་ཡོད་ཅིང་། གསར་དུ་འབྱོར་མཁན་མང་ཆེ་བ་གྲྭ་བ་ཡིན་པ་དང་། འདི་གའི་གསར་འགོད་པས་གྲྭ་ལེགས་བཤད་ལགས་སུ་བོད་ནང་གི་སློབ་གྲྭ་ཁག་གི་སློབ་གསོའི་གནས་སྟངས་སྐོར་ནས་སྐད་ཆ་དྲིས་པར། ཁོའི་ཕ་ཡུལ་གྱི་བླ་མ་དགེ་བཤེས་དང་སློབ་གཉེར་བ་མང་པོས་སློབ་གྲྭ་ཁག་ནང་བོད་ཡིག་སློབ་འཁྲིད་དགོས་སྐོར་གོང་རིམ་ལ་ཡར་ཞུ་བྱས་པ་དང་། ལྷག་པར་དུ་སློབ་ཕྲུག་ཚོའི་ཕ་མ་ཚོར་ང་ཚོས་སོ་སོའི་སྐད་དང་ཡི་གེ་མ་ཤེས་ན་ངོ་ཚ་རེད་ཅེས་མང་པོ་བཤད་པར་བརྟེན་ནས་དེང་སང་ངའི་ཕ་ཡུལ་གྱི་སློབ་གྲྭ་ཁག་ནང་བོད་ཡིག་སློབ་འཁྲིད་བྱེད་ཀྱིན་ཡོད་ནའང་། འཁྲིད་གཞི་གཙོ་བོ་རྩིས་རིག་དང་ཚན་རིག་ཡིན་པ་དང་དེ་ཚོ་ཚང་མ་རྒྱ་ཡིག་ནང་སློབ་འཁྲིད་བྱེད་ཀྱིན་ཡོད་སྐོར་བརྗོད་བྱུང་།
ཁོང་ལ་དེང་སྐབས་ཁོའི་ཕ་ཡུལ་དུ་སློབ་གྲྭ་ག་ཚོད་ཡོད་མེད་དྲིས་པར་ཁོས། ང་ཚོའི་ཕ་ཡུལ་དུ་སློབ་གྲྭ་གཉིས་ཡོད་པ་དང་། འབར་ཁམས་རྫོང་ཐོག་ཏུ་སློབ་གྲྭ་བཞི། འབར་ཁམས་རྫོང་ཁོངས་སུ་ཕལ་ཆེར་སློབ་གྲྭ་ ༢༠ ལྷག་ཡོད་ས་རེད། ངའི་ཕ་ཡུལ་གྱི་སློབ་གྲྭའི་ནང་སློབ་ཕྲུག་ ༡༠༠ ཡས་མས་ཤིག་ཡོད་ས་རེད། དེང་སྐབས་ཕ་ཡུལ་གྱི་དཔལ་འབྱོར་ཡར་རྒྱས་ཕྱིན་ཡོད་སྟབས། ཕ་མ་མང་ཆེ་བས་སོ་སོའི་བུ་ཕྲུག་སློབ་གྲྭར་གཏོང་གི་ཡོད་ཅིང་། མང་ཆེ་བས་རྫོང་ཐོག་གི་སློབ་གྲྭ་ཁག་ཏུ་གཏོང་བཞིན་འདུག ཅེས་དང་།
ཁོང་ལ་སློབ་གྲྭ་ཁག་ནང་སློབ་ཚན་ག་རེ་འཁྲིད་ཀྱི་ཡོད་པ་དང་། རྒྱ་ཡིག་བོད་ཡིག་གང་གཙོ་གཉེར་བྱེད་ཀྱིན་ཡོད་མེད་དྲིས་པར་ཁོས། སྔོན་མ་ང་ཚོའི་སློབ་ཆུང་ནང་རྒྱ་ཡིག་མ་གཏོགས་བོད་ཡིག་ཡོད་པ་མ་རེད། སྐབས་དེར་འཁྲིད་གཞི་གཙོ་བོ་རྩིས་རིག་དང་ཚན་རིག་སྐོར་ཡིན་པ་དང་། སྐབས་རེར་དབྱིན་ཡིག་འཛིན་གྲྭ་རེ་ཡོད་པ་རེད། དེ་ཚང་མ་རྒྱ་ཡིག་ནང་སློབ་འཁྲིད་བྱེད་ཀྱིན་འདུག དེང་སྐབས་ངའི་ཕ་ཡུལ་གྱི་བླ་མ་དགེ་བཤེས་དང་སློབ་གཉེར་བ་མང་པོས་སློབ་གྲྭ་ཁག་ནང་བོད་ཡིག་སློབ་འཁྲིད་དགོས་སྐོར་གོང་རིམ་ལ་ཡར་ཞུ་བྱས་པ་དང་། ལྷག་པར་དུ་སློབ་ཕྲུག་ཚོའི་ཕ་མ་ཚོར་ང་ཚོས་སོ་སོའི་སྐད་དང་ཡི་གེ་མ་ཤེས་ན་ངོ་ཚ་རེད་ཅེས་མང་པོ་བཤད་པར་བརྟེན་ནས་དེང་སང་ངའི་ཕ་ཡུལ་གྱི་སློབ་གྲྭ་ཁག་ནང་བོད་ཡིག་སློབ་འཁྲིད་བྱེད་ཀྱིན་ཡོད་ནའང་། བསླབ་གཞི་གཙོ་བོ་རྩིས་རིག་དང་ཚན་རིག་ཡིན་པ་དང་དེ་ཚོ་ཚང་མ་རྒྱ་ཡིག་ནང་སློབ་འཁྲིད་བྱེད་ཀྱིན་འདུག ན་ནིང་དོ་ཚིགས་ངའི་ཨ་ཞང་གཙོས་པའི་ངའི་ཕ་ཡུལ་གྱི་སློབ་གཉེར་བ་ཚོས་དགུན་སེང་སྐབས་སུ་སྡེ་བའི་ནང་བོད་ཡིག་ཟུར་འཁྲིད་བྱེད་འདུག ངའི་ཨ་ཞང་རྔ་བ་ཀིརྟི་དགོན་པའི་གྲྭ་བ་ཡིན། ཞེས་བརྗོད་བྱུང་།
ཡང་ཁོའི་ཕ་ཡུལ་གྱི་སློབ་ཐོན་པ་ཚོས་ལས་ཀ་གཙོ་བོ་ག་རེ་གཉེར་གྱིན་ཡོད་མེད་དྲིས་པར་ཁོས། དེང་སང་སློབ་གྲྭར་འགྲོ་མཁན་སློབ་ཆེན་སློབ་མ་མང་པོར་ལས་ཀ་རག་གི་མི་འདུག སློབ་ཐོན་སློབ་མ་ཕལ་ཆེ་བ་སྨན་པ་དང་། རང་རྫོང་རང་ཤང་གི་ལས་བྱེད་པ་བྱེད་ཀྱིན་འདུག ལས་བྱེད་པ་ཚོས་ལས་ཀ་ཁག་པོ་ལས་མི་དགོས་པ་དང་གླ་ཕོག་ཡོང་གི་ཡོད་པ་རེད། ལས་བྱེད་པའི་ལས་གནས་རག་ན་ཅུང་སྐྱིད་པོ་ཡོད་ས་རེད། དེ་བས་མང་བ་ཆེ་བ་སྨན་པ་དང་ལས་བྱེད་པ་བྱེད་ཀྱིན་འདུག ཅེས་བརྗོད་བྱུང་།
ཁོའི་ཕ་ཡུལ་ནས་ཕ་མ་ཚོས་སོ་སོའི་བུ་ཕྲུག་སློབ་གྲྭར་བཏང་སྟེ་རེ་བ་གཙོ་བོ་ག་རེ་རྒྱག་གི་ཡོད་མེད་སྐོར་ལ་ཁོས། དེ་ངས་གསལ་བོ་ཞིག་མི་ཤེས་ཏེ། ཕལ་ཆེར་ཕ་མ་མང་ཆེ་བས་རྗེས་ཕྱོགས་ངའི་བུ་ཕྲག་ཡག་པོ་ཞིག་ཆགས་ན་བསམ་གྱི་ཡོད་པ་དང་། སོ་སོའི་བུ་ཕྲག་ཚོ་སློབ་གྲྭ་ཐོན་རྗེས་རྒྱལ་ཁབ་ཀྱི་ལས་བྱེད་པ་དང་། ཡང་ན་ལས་གནས་གཞན་ཡག་པོ་ཞིག་རག་ན་བསམ་གྱི་ཡོད་ཀྱི་རེད། སྔོན་ཆད་ཕ་མ་ཚོའི་མི་ཚེ་འཚོ་གནས་ལ་དཀའ་ལས་ཧ་ཅང་ཡོད་པ་རེད། དེ་བས་སོ་སོའི་བུ་ཕྲུག་ཚོར་རྗེས་ཕྱོགས་རྒྱལ་ཁབ་ཀྱི་ལས་བྱེད་པའི་ལས་གནས་ཤིག་རག་ན་བསམ་པའི་རེ་བ་རྒྱག་གི་ཡོད་པ་རེད་ཅེས་ཟེར།
ཁོའི་ཕ་ཡུལ་ནས་གཞོན་སྐྱེས་མང་ཆེ་བས་ལས་རིགས་ག་རེ་གཉེར་གྱིན་ཡོད་པ་དང་། སྤྱི་ཚོགས་ནང་མཐོང་ཆེ་ཤོས་དེ་ལས་རིགས་ག་རེ་ཡིན་མིན་དྲིས་པར་ཁོས། སྤྱིར་བཏང་ང་ཚོའི་ཕ་ཡུལ་དུ་ཞིང་ཕྱུག་གཉི་ག་གཉེར་གྱིན་ཡོད་ནའང་། གཙོ་ཆེ་བ་ཞིང་ལས་གཉེར་གྱིན་ཡོད། ཕ་ཆེར་རང་ལོ་ ༡༦ མན་ཆད་ཀྱི་ཞིང་འབྲོག་གི་བུ་ཕྲུག་མང་ཆེ་བ་སློབ་གྲྭར་འགྲོ་བཞིན་འདུག གཞན་ཁྱིམ་འཛིན་མང་ཆེ་བ་རང་དགར་སྡོད་པ་དང་། རེ་ཟུང་གིས་རྡོ་བཟོ་དང་ཤིང་བཟོ་སོགས་ཀྱི་ལས་རིགས་གཉེར་གྱིན་འདུག ཁྱིམ་འཛིན་མ་ཡིན་པའི་གཞོན་སྐྱེས་ཚོ་གྲོང་དང་གྲོང་ཁྱེར་ཁག་ཏུ་ཞོར་ལས་ལ་འགྲོ་བཞིན་འདུག ངའི་ཕ་ཡུལ་དུ་གཙོ་བོ་ཆོས་ཕྱོགས་ལ་དགའ་མོས་དད་གུས་བྱེད་ཀྱིན་འདུག ལས་རིགས་ཀྱི་ཕྱོགས་ནས་ཤིང་བཟོ་རྡོ་བཟོའི་ལས་རིགས་ལ་དོ་སྣང་བྱེད་ཀྱིན་འདུག་ཅིང་། མང་ཆེ་བས་རྒྱལ་ཁབ་ཀྱི་ལས་བྱེད་པའི་ལས་རིགས་ལ་མཐོང་ཆེན་བྱེད་ཀྱིན་འདུག ཅེས་བརྗོད་སོང་།
ཁོའི་ཕ་ཡུལ་གྱི་སློབ་གྲྭ་ཁག་གི་དགེ་རྒན་མང་ཤོས་བོད་རིགས་རྒྱ་རིགས་གང་ཡིན་མིན་སྐོར་ལ་ཁོས། ངའི་ཕ་ཡུལ་གྱི་དགེ་རྒན་མང་ཆེ་བ་རྒྱ་རིགས་རེད། བོད་རིགས་དགེ་རྒན་ཉུང་ཉུང་རེད། རྒྱ་རིགས་དགེ་རྒན་ཚོས་བོད་སྐད་ཤེས་ཀྱི་མི་འདུག སློབ་ཕྲུག་ཚོ་སློབ་གྲྭར་སོང་རྗེས་ངེས་པར་དུ་རྒྱ་ཡིག་རྒྱ་སྐད་སྦྱོང་དགོས་པ་རེད། ཁོར་ཡུག་གི་དབང་གིས་རྒྱ་ཡིག་རྒྱ་སྐད་སྦྱོང་རྒྱུ་ཅུང་སླ་པོ་འདུག དེང་སྐབས་ངའི་ཕ་ཡུལ་གྱི་སློབ་གྲྭའི་ནང་བོད་ཡིག་འཁྲིད་མཁན་བོད་ཡིག་དགེ་རྒན་འདུག་ཀྱང་། སློབ་གྲྭ་གཞན་ནང་ག་རེ་ཡོད་མེད་ངས་མི་ཤེས། ཕལ་ཆེར་འབར་ཁམས་རྫོང་ཁོངས་ཀྱི་སློབ་གྲྭ་ཁག་ནང་གི་དགེ་རྒན་མང་ཆེ་བ་རྒྱ་རིགས་ཡིན་ས་རེད། སྤྱིར་ན་ངའི་ཕ་ཡུལ་དུ་གཙོ་བོ་རྒྱལ་རོང་སྐད་དང་རྒྱ་སྐད་བཤད་ཀྱི་ཡོད་པ་རེད། དེང་སང་རྒྱ་སྐད་བཤད་ན་ངོ་ཚར་བརྩི་ཡི་འདུག བོད་ཡིག་ལ་ཅུང་མཐོང་ཆེན་བྱེད་ཀྱིན་འདུག མང་ཆེ་བས་རང་གི་སྐད་དང་ཡི་གེ་མ་ཤེས་ན་ངོ་ཚ་རེད་ཅེས་བཤད་ཀྱིན་འདུག་ལ། ལྷག་པར་དུ་སྐྱབས་མགོན་རིན་པོ་ཆེ་གཙོས་པའི་བླ་མ་དགེ་བཤེས་དང་མཁས་པ་དེ་ཚོས་རང་གི་སྐད་དང་ཡི་གེ་སྦྱོང་དགོས་སྐོར་གསུང་གི་འདུག དེ་བས་ངའི་ཕ་ཡུལ་གྱི་ཡུལ་མི་ཚོས་རྒྱལ་རོང་སྐད་བཤད་ཀྱི་འདུག རྒྱལ་རོང་སྐད་ནང་བརྡ་རྙིང་མང་པོ་ཡོད་པ་རེད། ང་ཕ་ཡུལ་ན་ཡོད་དུས་མཚམས་ལན་རེར་ངའི་ངོ་ཤེས་གྲོགས་པོ་ཚོའི་སྐད་འཕྲིན་དང་གླེང་མོལ་བརྒྱུད་ནས་ངས་ཕྱི་ཕྱོགས་ཀྱི་གནས་ཚུལ་ཕྲན་བུ་གོ་ཐོས་བྱུང་། ཅེས་བརྗོད་བྱུང།
ཞིང་འབྲོག་མང་ཚོགས་ཀྱི་འཚོ་བའི་གནས་སྟངས་དང་། སྤྱི་ཚོགས་ཁྱོན་ཡོངས་སུ་འགྱུར་ལྡོག་ག་འདྲ་ཕྱིན་ཡོད་མེད་དྲིས་པར་ཁོས། ངའི་ཡུལ་ལ་མཚོན་ན་གཙོ་བོ་བརྡ་འཕྲིན་རིག་གནས་དང་སྤྱི་ཚོགས་འཚོ་གནས་ལ་འགྱུར་ལྡོག་ཆེན་པོ་བྱུང་འདུག དེང་སྐབས་ངའི་ཕ་ཡུལ་ལ་མཚོན་ནས་བཤད་ན། ཞིང་ལས་དང་དབྱར་རྩྭར་བརྟེན་ནས་འཚོ་གནས་ལ་དཀའ་ངལ་ཡོད་པ་མ་རེད་ཟེར་ནའང་མི་ཆོག་རྒྱུ་མི་འདུག ཅེས་བརྗོད་བྱུང་།
ཁོ་རྒྱ་གར་དུ་ཡོང་བའི་ལམ་བར་ནས་དཀའ་ཁག་ཆེ་ཤོས་ག་རེ་འཕྲད་ཡོད་མེད་དྲིས་པར་ཁོས། ང་ཚོ་བལ་ཡུལ་སྣེ་ལེན་ཁང་དུ་འབྱོར་རྗེས། བལ་ཡུལ་གཞུང་ནས་ང་ཚོ་རྒྱ་གར་ནང་ཡོང་བའི་ཡིག་ཆ་དེ་ཚོ་མགྱོགས་པོར་མ་སྤྲད་པས། ང་ཚོས་བལ་ཡུལ་སྣེ་ལེན་ཁང་དུ་ཟླ་གཉིས་ཙམ་རིང་སྒུག་དགོས་བྱུང་སོང་། གོ་ཐོས་ལྟར་ན་བལ་ཡུལ་གྱི་དཔོན་པོ་དེ་ཕྱི་རྒྱལ་ལ་སོང་ནས་ཕྱིར་མགྱོགས་པོར་ཡོང་ཡོད་ས་མ་རེད། དེ་མིན་ང་ཚོ་འགྲམ་ནས་ཡོང་བ་ཡིན་སྟབས། ལམ་བར་ནས་དཀའ་ཁག་གཞན་ཅང་འཕྲད་མ་སོང་། ཅེས་བརྗོད་བྱུང་།
གསར་འགོད་པ། པདྨ་རྒྱལ།
