ཁ་སང་ཕྱི་དྲོའི་ཆུ་ཚོད་ ༢།༣༠ སྟེང་བཀའ་ཤག་གི་ཚོགས་ཁང་ནང་། སྲིད་སྐྱོང་བློ་བཟང་སེང་གེ་མཆོག་གིས་བོད་རྒྱ་ཞི་མོལ་ལས་དོན་ཚོགས་ཆུང་གི་ཚོགས་འདུ་ཐེངས་ཉེར་བརྒྱད་པའི་སྐོར་ལ་གསར་འགོད་གསལ་བསྒྲགས་ཤིག་སྤེལ་ཏེ། ཉིན་གསུམ་གྱི་སྔོན་ལ་བོད་རྒྱ་ཞི་མོལ་ལས་དོན་ཚོགས་ཆུང་གི་ཚོགས་འདུ་ཐེངས་ཉེར་བརྒྱད་པའི་ཐོག དེང་གི་རྒྱ་ནག་ཆབ་སྲིད་དཔལ་འབྱོར་གྱི་འགྱུར་ལྡོག་དང་འབྲེལ་ཏེ་མ་འོངས་བོད་རྒྱ་འབྲེལ་མོལ་ཡོང་ཐབས་སྐོར་ལ་བགྲོ་གླེང་ལྷུག་པོ་གནང་ཡོད་སྐོར་གསུངས་སོང་།
ལྷན་ཚོགས་ཐོག་སྲིད་སྐྱོང་མཆོག་གིས་གསུངས་དོན། ཉིན་གཉིས་ཀྱི་སྔོན་ལ་བོད་རྒྱ་ཞི་མོལ་ལས་དོན་ཚོགས་ཆུང་གི་ཚོགས་འདུ་ཐེངས་ ༢༨ པ་དེ་ཚོགས་ཚར་བ་རེད། དེ་སྔ་བཀའ་ཤག་སྐབས་བཅུ་བཞི་པས་ཐེངས་ ༦ ཚོགས་པ་རེད། བཀའ་ཤག་སྐབས་བཅོ་ལྔ་པའི་ཚོགས་འདུ་ཐེངས་དང་པོ་རེད། སྲིད་ཇུས་འགྲོ་སྟངས་ཀྱི་ཐོག་ནས་ཚང་མས་མཁྱེན་པའི་ལོ་རེར་བོད་རྒྱ་ཞི་མོལ་ལས་དོན་ཚོགས་ཆུང་གི་ཚོགས་འདུ་ཐེངས་རེ་འཚོགས་ཀྱི་ཡོད་པ་མ་ཟད། མཚམས་རེར་ཆབ་སྲིད་ཀྱི་འགྱུར་ལྡོག་ལ་བརྟེན་ཏེ་ཚང་མས་མ་འཁྱེན་པའི་ཐོག་ནས་ཀྱང་ཚོགས་འདུ་ཧྲག་བསྡུས་ཐེངས་གཅིག་གཉིས་འཚོགས་ཀྱི་ཡོད། ད་ལོའི་བཀའ་སྤྱི་གཉིས་ཀྱི་འོས་བསྡུའི་ལས་རིམ་གྱི་རྐྱེན་པས། ལྷག་གཅིག་དང་ཕྱེད་ལྷག་རིང་ཚོགས་ཐུབ་ཡོད་པ་མ་རེད།
དུས་རྒྱུན་བོད་རྒྱ་ཞི་མོལ་ལས་དོན་ཚོགས་ཆུང་གི་ཚོགས་འདུའི་ཐོག་བགྲོ་གླེང་ལྷུག་པོ་ཞེ་དྲགས་ཡོང་གི་ཡོད་སྟབས། དེས་ཕན་ཐོགས་ཞེ་དྲགས་འདུག ཉེ་ཆར་ཨ་རིའི་འོས་བསྡུ་དང་འབྲེལ་བའི་ཐོག་ནས་ཡིན་ན་རེད། ཨ་རྒྱ་གཉིས་དབར་གྱི་འབྲེལ་ལམ་ཡོང་སྟངས་དང་། ཨ་རི་དང་རྒྱ་ནག་གཉིས་བར་འབྲེལ་བ་ག་འདྲ་ཡོང་གི་འདུག ཨ་རི་དང་རྒྱ་ནག་གི་གནད་ཡོད་མི་སྣ་མཇལ་འཕྲད་བྱུང་བའི་སྐབས་ལ་བོད་དོན་ཐོག་བཀའ་མོལ་ག་རེ་གནང་ཡོད་མེད་དང་། དེ་བཞིན། ཡུ་རོབ་མཐུན་ཚོགས་དང་རྒྱ་ནག་བར་གྱི་འབྲེལ་ལམ་དང་། དམིགས་བསལ་ཉེ་ཆར་དབྱིན་ཇིའི་མི་མང་ནས་འོས་ཤོག་གི་ལམ་ནས་དབྱིན་ཇི་ཡུ་རོབ་སྤྱི་མཐུན་ཚོགས་ཁོངས་ནས་ཕྱིར་འཐོན་རྒྱུའི་ཐག་ཆོག་བྱུང་བར་བརྟེན་ཏེ། མ་འོངས་པར་དབྱིན་ཇི་དང་རྒྱ་ནག་བར་འབྲེལ་བ་ག་རེ་ཡོང་མིན། དེ་དང་འབྲེལ་ཏེ་བོད་དོན་དང་འགྲོ་བ་མིའི་ཐོབ་ཐང་གི་གནས་སྟངས་ག་འདྲ་ཡོང་མིན། ཉེ་ཆར་རྒྱ་གར་རྡུལ་ཕྲན་མཚོན་ཆའི་ཚོགས་པའི་ནང་གི་འཐུས་མིར་ལངས་རྒྱུར་འབད་འབད་བརྩོན་བྱས་ཡོད་ཀྱང་། རྒྱ་ནག་གིས་ངོ་རྒོལ་བྱས་པར་བརྟེན་ཏེ། རྒྱ་དཀར་ནག་གཉིས་བར་ག་རེ་ཆགས་ཡོད་མེད་དང་། དེ་ལ་བརྟེན་ཏེ་བོད་དོན་སྐོར་ལ་ག་རེ་ཆགས་མིན། ཉི་ཧོང་དང་རྒྱ་ནག་བར་དང་། ཐའེ་ཝན་དང་རྒྱ་ནག་བར་དེ་དག་སྤྱི་ཡོངས་ཐོག་བགྲོ་གླེང་བྱས་ཏེ། ད་ལྟ་བོད་ཀྱི་གནས་སྟངས་གང་དུ་བསླེབས་ཡོད་པ་རེད། མ་འོངས་པར་ག་བར་འགྲོ་རྒྱུ་རེད་སོགས་ལ་བགྲོ་གླེང་བྱས་པ་ཡིན། གང་ཡིན་ཟེར་ན། རྒྱལ་སྤྱི་རང་བཞིན་ཅན་གྱི་ཆབ་སྲིད་ལྟ་གྲུབ་དང་རྒྱལ་ཞེན་ཅན་གྱི་ཆབ་སྲིད་ལྟ་གྲུབ་དང་། གུ་ཡངས་ཅན་གྱི་ཆབ་སྲིད་ལྟ་གྲུབ་དང་མཁྲེགས་འཛིན་ཅན་གྱི་ཆབ་སྲིད་ལྟ་གྲུབ་བར་འགལ་ཟླ་ཆེན་པོ་ཞིག་འགྲོ་བཞིན་ཡོད་པ་རེད། མཁས་པ་མང་པོ་ཞིག་གིས་རྒྱལ་སྤྱི་རང་བཞིན་གྱི་ལྟ་གྲུབ་དང་གུ་ཡངས་ཅན་གྱི་ལྟ་གྲུབ་དེ་འཛམ་གླིང་དམག་ཆེན་དང་པོ་དང་གཉིས་པའི་ཉམས་མྱོང་གི་ཐོག་ནས་བསླེབས་པ་ཞིག་རེད་ཟེར་གྱི་ཡོད་པ་རེད། མཉམ་འབྲེལ་རྒྱལ་ཚོགས་དང་ཡུ་རོབ་མཐུན་ཚོགས་སོགས་རྒྱལ་སྤྱིའི་མཐུན་ཚོགས་མང་པོ་ཞིག་བཙུགས་པ་རེད། ཡིན་ནའང་རྒྱལ་སྤྱི་ཅན་གྱི་ལྟ་གྲུབ་ཉམས་པ་དང་། རྒྱལ་ཞེན་ཅན་གྱི་ལྟ་གྲུབ་ཤུགས་ཆེ་རུ་འགྲོ་བ་དང་། གུ་ཡངས་ཅན་གྱི་ལྟ་གྲུབ་ཉམས་པ་དང་། མཁྲེགས་འཛིན་ཅན་གྱི་ལྟ་གྲུབ་ཤུགས་ཆེ་རུ་ཕྱིན་ན། དམག་ཆེན་དང་པོ་དང་གཉིས་པའི་གནས་སྟངས་ལྟར་བོད་དོན་དེའང་ཁྱོན་ཡོངས་ནས་རྒྱལ་ཁབ་རང་བཞིན་གྱི་ག་རེ་ཆགས་སྲིད་པ་རེད།
ཡུ་རོབ་སྤྱི་མཐུན་ཚོགས་ཁོངས་ནས་ཕྱིར་བུད་པའི་དབྱིན་ཇི་དང་རྒྱ་གར། རྒྱ་ནག་དང་ཨ་རི་སོགས་རྒྱལ་ཁབ་གང་ཡིན་ཡང་དེ་འདྲ་འབྱུང་སྲིད་པ་ཞིག་ཆགས་ཀྱི་ཡོད་པ་དང་། དེ་ཡང་སྔོན་མ་དམག་ཆེན་དང་པོ་གཉིས་པའི་སྐབས་ཀྱི་རྒྱལ་སྤྱིའི་ཁོར་ཡུག་ལྟར་ཡིན་མིན་དང་། གལ་སྲིད་ཡིན་ནའང་བོད་ཀྱི་གནད་དོན་དེ་རྒྱ་ཆེ་ས་ནས་ག་བར་ཡོད་མེད། བོད་དང་རྒྱལ་ཁབ་གཞན་དག་བར་གྱི་འབྲེལ་བ་ག་འདྲ་ཡོད་མེད་སོགས་ཀྱི་སྐོར་ལ་བགྲོ་གླེང་ཆ་ཚང་ཞིག་བྱས་པ་རེད། དེ་དག་ཐོག་བགྲོ་གླེང་གནང་བ་ཡིན་ན། དམིགས་བསལ་བཀའ་ཤག་ནང་འཆར་ལས་གནང་མཁན་ཚོར་བསམ་བློ་གཏོང་སྟངས་དང་འཆར་གཞི་གཏོང་སྟངས་ཐད་ཧ་ལས་པའི་ཕན་ཐོགས་ཆེན་པོ་ཡོང་གི་རེད། དེར་བརྟེན། རྒྱལ་ཁབ་ག་འདྲ་ཞིག་ཡིན་ནའང་འབྲེལ་མཐུད་ཚོགས་ཆུང་ (Task Force) འཛུགས་ཀྱི་ཡོད་པ་རེད། ཚོགས་ཆུང་དེའི་བགྲོ་གླེང་ལྷུག་པོ་བྱུང་བ་ཡིན་ན། མ་འོངས་པར་རྒྱ་ནག་དང་རྒྱལ་སྤྱི་དང་འབྲེལ་བའི་གནས་ཚུལ་ཆེ་ཆུང་ག་འདྲ་ཞིག་བསླེབ་པ་ཡིན་ནའང་། བསམ་བློའི་ཐོག་ནས་གྲ་སྒྲིག་གང་ལ་གང་འཚམ་ཡོང་བར་ཧ་ལས་པའི་ཕན་ཐོགས་ཡོང་གི་རེད།
དེའི་ནང་ནས་ཀྱང་དམིགས་བསལ་ང་ཚོས་བཀའ་བསྡུར་གནང་ཡུལ་དེ་རྒྱ་ནག་ནང་འགྱུར་ལྡོག་ཆེན་པོ་ག་རེ་འགྲོ་བཞིན་འདུག ཉེ་བའི་ཆར་ནས་ཞི་ཅིན་ཕིན་གྱིས་དབང་ཆ་ཆ་ཚང་འཛིན་བཞིན་འདུག དམིགས་བསལ་དམག་གི་ཐོག་ནས་དབང་ཆ་བཟུང་སྟེ། དམག་སྤྱིའི་གོ་གནས་གཙོས་པའི་དམག་སྒར་གྱི་འགྲོ་ལུགས་འགྲོ་སྟངས་ཐོག་འགྱུར་བ་ཆེན་པོ་བཏང་པ་རེད། དེར་བརྟེན། ཞི་ཅིན་ཕིན་གྱིས་ཏང་སྲིད་དམག་གསུམ་གྱི་དབང་ཆ་བཟུང་བར་བརྟེན་ཏེ། རྒྱ་ནག་ནང་གི་གནད་དོན་ཆེ་ཁག་ཐོག་འགྱུར་བ་ཆེན་པོ་གཏོང་ཐུབ་ཀྱི་འདུག ཡིན་ནའང་ཕྱོགས་གཞན་ཞིག་ནས་བལྟས་ན། ལྟ་བ་མཁྲེགས་པོའི་ཐོག་ནས་འགྱུར་བ་འགྲོ་རྒྱུ་ཡིན་པའི་བཟོ་འདྲ་བོ་ཞིག་འདུག ཉེ་ཆར་བོད་ནང་གསེར་རྟ་དགོན་ཆེན་ནང་ལོ་རེར་དགེ་འདུན་པ་དང་མི་སྐྱ་ཉུང་དུ་གཏོང་གི་ཡོད་པ་རེད། དེ་བཞིན། བོད་ཀྱི་གློག་བརྙན་བཟོ་མཁན་པདྨ་ཚེ་རྟེན་ལགས་ལྟ་བུ་ཡིན་ནའང་གློ་བུར་འཛིན་བཟུང་བྱས་པ་རེད། ཁོང་ལ་མཚོན་ན་རྒྱ་ནག་ནང་དང་རྒྱལ་སྤྱིའི་ཐོག་ན་སྙན་གྲགས་ཆེན་པོ་ཞེ་དྲགས་རེད། ཡིན་ནའང་ཁོང་གློ་བུར་དུ་འཛིན་བཟུང་བྱས་ཏེ་སྨན་ཁང་ནང་འགྲོ་དགོས་པ་བྱུང་བ་རེད། དེ་སྔ་རྒྱ་ནག་གི་ཁོར་ཡུག་ཐོག་བྱས་རྗེས་ཆེན་པོ་རེད་ཟེར་ནས་གཟེངས་རྟགས་ཕུལ་བ་དེ་འདྲ་རྗེས་སུ་ནག་ཉེས་བཙུགས་ཏེ་བཙོན་ཁང་དུ་ལྷག་པའི་གནས་ཚུལ་བྱུང་ཡོད། དེ་བཞིན་ཚོང་པ་སྙན་གྲགས་ཅན་དེ་འདྲ་ལའང་གཟེངས་རྟགས་ཕུལ་ཏེ་རྗེས་སུ་འཛིན་བཟུང་བྱས་ཡོང་དུས་བོད་མི་རིགས་ལ་དབྱེ་འབྱེད་བྱེད་ཀྱིན་ཡོད་པ་དང་། མཁྲེགས་འཛིན་སྲིད་བྱུས་མུ་མཐུད་གནས་ཀྱི་ཡོད་པ་གསལ་བོ་རེད། རྒྱ་ནག་གཞུང་གི་ཕུགས་ཀྱི་སྲིད་ཇུས་ག་རེ་ཡིན་པ་དང་ལག་བསྟར་ག་རེ་བྱེད་ཀྱིན་འདུག་དེ་དག་ལ་བལྟས་ཡོང་ན། བོད་རྒྱ་ཞི་མོལ་སྐུ་ཚབ་ཕེབས་ཐུབ་དང་མ་ཐུབ་ཐོག་གོ་བསྡུར་ཡོང་གི་ཡོད་པ་རེད། ཅེས་སོགས་གསུངས་སོང་།
སྲིད་སྐྱོང་མཆོག་གིས་ཐེངས་འདིའི་གསར་འགོད་གསལ་བསྒྲགས་དང་འབྲེལ་ཏེ། ༧གོང་ས་མཆོག་དང་བོད་མིའི་སྒྲིག་འཛུགས་ཀྱི་གྲོགས་པོ་པདྨ་མཁའ་འགྲོ་མཆོག་ཨ་རུ་ནཱ་ཅལ་མངའ་སྡེའི་སྤྱི་ཁྱབ་བློན་དུ་བདམས་འཐོན་བྱུང་བར་འཚམས་འདྲི་གནང་དོན། ཚང་མས་མཁྱེན་གསལ་ལྟར། ༧གོང་ས་མཆོག་ལ་དད་གུས་ཞུ་མཁན་དང་བོད་པར་ཤ་ཞེན་ཡོད་མཁན་པདྨ་མཁའ་འགྲོ་ལགས་ཨ་རུ་ནཱ་ཅལ་མངའ་སྡེའི་སྤྱི་ཁྱབ་བློན་ཆེན་དུ་འཁོད་གནང་བ་རེད། དེ་ང་ཚོ་ཚང་མ་དངོས་གནས་སྤོབས་པ་སྐྱེ་དགོས་པ་ཞིག་ཆགས་བསྡད་ཡོད་པ་རེད། གང་ཡིན་ཟེར་ན། ཁོང་གི་ཡབ་དམ་པ་རྡོ་རྗེ་མཁའ་འགྲོ་ལགས་བོད་དོན་ཐོག་ཧ་ལས་པའི་ཤ་ཞེན་ཡོད་མཁན་ཞིག་དང་། ༧གོང་ས་མཆོག་ལ་དད་གུས་བརྩི་བཀུར་ཡོད་མཁན། ཕྱི་ལོ་ ༢༠༡༢ ལོའི་དུས་འཁོར་དབང་ཆེན་གྱི་སྦྱིན་བདག་གནང་མཁན་ཞིག་ཡིན་པ་དང་། བོད་ཀྱི་མཐའ་མཚམས་དང་འབྲེལ་བའི་ཐོག་ནས་ཨ་རུ་ནཱ་ཅལ་མངའ་སྡེ་གལ་ཆེན་པོ་ཞེ་དྲགས་ཡིན་སྟབས། ང་རང་སྒེར་ངོས་ནས་དགའ་པོ་ཞེ་དྲགས་བྱུང་སོང་ལ། ང་རང་བོད་མིའི་སྒྲིག་འཛུགས་ཀྱི་སྲིད་སྐྱོང་ཡིན་པའི་ཆ་ནས། ཁོང་ལ་སྙིང་ཐག་པ་ནས་འཚམས་འདྲི་ཡོད་ལ། ཁོང་གིས་ཕྱག་ལས་ག་རེ་གནང་བ་ཡིན་ནའང་བྱ་བ་ལམ་འགྲོ་ཡོང་བ་ཤོག་ཞུ་བཞིན་ཡོད། ཅེས་སོགས་གསུངས་སོང་།
དྲི་བ་དྲིས་ལན་སྐབས་སུ་གསར་འགོད་པས་མ་འོངས་ལོ་ ༥ ནང་བོད་རྒྱ་འབྲེལ་མོལ་གནང་ཐུབ་པའི་ལས་འཆར་གསར་བ་ག་རེ་ཡོད་མེད་དྲིས་པར་སྲིད་སྐྱོང་མཆོག་གིས། ཁ་ཤས་ཤིག་གིས་བོད་རྒྱ་འབྲེལ་མོལ་གནང་གི་ཡོད་པ་མ་རེད་ཅེས་ཤོད་ཀྱི་ཡོད་ནའང་ངས་དུས་རྒྱུན་ཞུས་བསྡད་ཡོད་པ་ལྟར། བོད་རྒྱ་ཞི་མོལ་གྱི་གནད་དོན་དེ་རང་བཞིན་གྱིས་གསང་བ་ཟེར་ན་རེད། ནང་ཁུལ་གྱི་གནད་དོན་ཞིག་ཆགས་ཀྱི་ཡོད་པ་རེད། དེ་སྔ་བཀའ་ཤག་གི་འབད་བརྩོན་ག་རེ་གནང་ཡོད་པ་དེ་ལས་ལྷག་མེད་ནའང་དེ་ནང་བཞིན་བྱས་ཏེ་འགྲོ་བཞིན་ཡོད་ཅེས་ཐག་ཆོད་པོའི་སྒོ་ནས་བཤད་ཐུབ་ཀྱི་ཡོད། ཞི་མོལ་ལས་དོན་ཚོགས་ཆུང་ནང་ད་ལྟ་ག་རེ་བྱུང་ཡོད་མེད་ཆ་ཚང་ཞུས་པ་ཡིན་ན། ཚང་མས་དེ་ག་རང་རེད་གསུང་གི་ཡོད་པ་རེད། མ་འོངས་ལོ་ ༥ དེ་རྒྱ་ནག་དང་རྒྱལ་སྤྱིའི་ཐོག་གནད་འགག་ཆེན་པོ་ཞེ་དྲགས་རེད། ཞི་ཅིན་ཕིན་སྲིད་འཛིན་སྐབས་གཉིས་པ་ཆགས་ཡོད་པ་དང་། འཛམ་གླིང་གི་འགྲོ་སྟངས་ལྟར། ཨ་རིའི་སྲིད་འཛིན་སྐབས་གཉིས་པའི་སྐབས་སུ་སོ་སོའི་ལོ་རྒྱུས་དང་འབྲེལ་བའི་བྱས་རྗེས་ཟེར་ན་རེད། ནམ་རྒྱུན་ལག་པ་མ་འཆང་བ་དེ་འདྲའི་ཐོག་ལག་པ་འཆང་ཡོད་པ་རེད། དཔེར་ན། ཨ་རིའི་སྲིད་འཛིན་གྱིས་ཁུ་བྷ་དང་ཨེ་རན་མཉམ་དུ་འབྲེལ་བ་བྱས་པ་རེད། ཞི་ཅིན་ཕིན་གྱིས་ཀྱང་སྲིད་འཛིན་གྱི་ལས་ཡུན་གཉིས་པའི་སྐབས་སུ་གནད་དོན་གལ་ཆེན་ཁག་གི་ཐོག་སྲིད་ཇུས་གུ་ཡངས་ཀྱི་ཐོག་ནས་ལག་པ་འཆང་ཐབས་བྱས་པ་ཡིན་ན། བོད་དོན་ཐོག་གནང་དགོས་ངེས་ཤིག་ཆགས་ཡོད་པ་རེད། གང་ཡིན་ཟེར་ན། ཞིན་ཅང་ནང་གི་གནས་སྟངས་དེ་བོད་ནང་གི་གནས་སྟངས་ལས་ཛ་དྲགས་པ་མེད་ནའང་དེ་ནང་བཞིན་གྱི་རེད། ཡིན་ནའང་སུ་དང་མཉམ་དུ་བཀའ་མོལ་གནང་རྒྱུ་དང་ཇི་ལྟར་གནང་རྒྱུའི་ཐོག་བཀའ་མོལ་ཞིག་འགྲོ་བསྡད་ཡོད་པ་རེད། དེ་བཞིན། ཐའེ་ཝན་ཡིན་ནའང་ཚའེ་ཡིན་ཝན་སྲིད་འཛིན་དུ་བསྐོས་ཚར་བ་རེད། རྒྱ་ནག་གཞུང་གིས་གཞུང་འབྲེལ་གྱི་འབྲེལ་ལམ་ཆད་ཡོད་ཟེར་གྱི་ཡོད་པ་རེད། དེར་བརྟེན་ཐའེ་ཝན་གྱི་མི་རབས་གསར་བའི་ལྟ་བ་འཁྱེར་སྟངས་དང་། སློབ་གྲྭའི་ནང་སློབ་སྦྱོང་བྱེད་སྟངས་ཡོངས་རྫོགས་རང་བཞིན་གྱིས་རྒྱ་ནག་གཞུང་དང་བར་ཐག་རིང་དུ་འགྲོ་གི་མེད་ནའང་། ཐག་ཉེ་རུ་འགྲོ་རྒྱུ་དེ་གནས་སྐབས་རིང་དཀའ་ལས་ཁག་པོ་མེད་འགྲོ་བསམ་གྱི་འདུག ཧོང་ཀོང་ནང་ ༢༠༡༧ ལོར་སྤྱི་ཁྱབ་འོས་བསྡུ་བྱ་དགོས་ཀྱི་ཡོད་པ་རེད། མི་མང་ནང་རང་བཞིན་གྱིས་རང་དབང་དམངས་གཙོ་བེད་སྤྱོད་མཁན་ཤུགས་ཆེ་རུ་ཡོང་གི་རེད། བོད་ལྟ་བུ་ཡིན་ནའང་༧གོང་ས་མཆོག་གི་སྐུ་ཚབ་མཉམ་དུ་བཀའ་མོལ་གནང་སྟེ་གནད་དོན་སེལ་ཐུབ་པ་ཡིན་ན། ཞི་ཅིན་ཕིན་དང་རྒྱ་ནག་གཞུང་གི་རླབས་ཆེན་གྱི་བྱས་རྗེས་ཆགས་ཀྱི་ཡོད་པ་རེད། ཏུན་ཞོ་ཕིན་ཁོ་རང་ཡིན་ནའང་ཆབ་སྲིད་ཀྱི་དབང་ཆ་ཆ་ཚང་བླངས་ཚར་བའི་རྗེས་ལ་བོད་དོན་དང་ཐའེ་ཝན་སོགས་ལ་ལག་པ་འཆང་པ་རེད། ཅང་ཙེ་མིན་གྱིས་སྲིད་འཛིན་སྐབས་གཉིས་སྐབས་སུ་ང་ཚོའི་སྐུ་ཚབ་ཕེབས་པ་རེད། ཡིན་ནའང་དེ་ལྟར་ཡོང་གི་རེད་ཅེས་བཤད་ཐུབ་པ་མ་རེད། ཅེས་གསུངས་སོང་།
གསར་འགོད་པ། པདྨ་རྒྱལ།
༧གོང་ས་མཆོག་དང་བོད་མིའི་སྒྲིག་འཛུགས་ཀྱི་གྲོགས་པོ་པདྨ་མཁའ་འགྲོ་མཆོག་ཨ་རུ་ནཱ་ཅལ་མངའ་སྡེའི་སྤྱི་ཁྱབ་བློན་དུ་བདམས་འཐོན་བྱུང་བར་འཚམས་འདྲི་གནང་དོན། ཚང་མས་མཁྱེན་གསལ་ལྟར། ༧གོང་ས་མཆོག་ལ་དད་གུས་ཞུ་མཁན་དང་བོད་པར་ཤ་ཞེན་ཡོད་མཁན་པདྨ་མཁའ་འགྲོ་ལགས་ཨ་རུ་ནཱ་ཅལ་མངའ་སྡེའི་སྤྱི་ཁྱབ་བློན་ཆེན་དུ་འཁོད་གནང་བ་རེད། དེ་ང་ཚོ་ཚང་མ་དངོས་གནས་སྤོབས་པ་སྐྱེ་དགོས་པ་ཞིག་ཆགས་བསྡད་ཡོད་པ་རེད། གང་ཡིན་ཟེར་ན། ???✍
རེད་ཡང་ཉིན་གཅིག་ཁོང་ལྐོག་བསད་གཏོང་གི་རེད།། ཨ་ནི་སྤོབས་པ་སྐྱེ་ས་ཉུང་ཉུང་ཆགས་ཀྱི་རེད།། བོད་རེ་བས་ཕུང་ཕུང་་་ པ་རེད་་་ བློ་བདེ་པོ་འདུག་ད་་་་་་
བོད་རྒྱ་འབྲེལ་མོལ་གནང་ཐུབ་མེན་ལས་འཆར་གསར་བ་ཐོག་ལ་བསལ་བཤད་མ་གནང་ན་ཡག་གི་རེད
ནད་ཚབས་ཆེན་ཕོག་ཉིན་ཨེམ་ཆི་མེད མི་འགངས་ཆེན་ཤི་ཉིན་བླ་མ་མེད གསར་འགོད་པའི་དྲི་བ་ལ་དྲིས་ལན་མེད
ལྷག་གཅིག་དང་ཕྱེད་ལྷག་ཟེར་བ་དེའི་ག་རེ་དོན་རེད།།
རྫུམ་གཏམ་ཁོ་ན་རེད། ད་ལྟ་མ་འཇོན་དུས་རྗེས་མ་ཞིག་ལ་རེ་བ་བྱེད་པ་བློ་སེང་གིས་ལྟ་གྲུབ་རེད། སྔོན་མའི་སྲིད་སྐྱོངས་སྐབས་སུ་༧རྒྱལ་བ་ཡིད་བཞིན་ནོར་བུ་བོད་ལ་གདན་འདྲེན་བྱེད་ཀི་ཡིན་ཟེར་ནས་སྐད་ཅོར་རྒྱབ་ཡོད་ཀྱང་། ད་ལྟའི་ཆར་སྐད་ཆ་དེ་དག་ཁོག་པའི་ནང་ལ་ཐིམ་ཡོད། ད་ལྟའི་འདི་ལྟའི་ཁ་བདེ་ལྕེ་རྐྱང་རྐྱང་བྱེད་ནས་བོད་མི་རྣམས་མགོ་འཐོམ་བཅུག་སྟེ། རང་གི་ཁྱིམ་གཞི་དང་རང་གི་ཆེད་དུ་ཨ་མི་རི་ཀར་ཁང་པ་ཡག་པོ་ཞིག་ཉོས། བོད་དོན་ཁ་ལ་ཁྱེར་ནས་དོན་དུ་ཁྱིམ་མའི་ཆེད་དུ་དངུལ་བག་ཁུག་གང་བསགས་རྒྱུ་དེ་ནི་ཁྱོའི་ལས་ཀ་རེད།