སེར་བྱེས་མཁས་སྙན་གྲྭ་ཚང་གི་མཁན་རབས་དོན་ལྔ་པ་ཏྲེ་ཧོར་དགེ་བཤེས་བློ་བཟང་བདེ་ལེགས་མཆོག་མཁན་པོའི་ལས་ཡུན་ཁྱུར་བའི་ཚབ་ཏུ་སེར་བྱེས་ཏྲེ་ཧོར་དགེ་བཤེས་དགེ་འདུན་ཆོས་འཕེལ་མཆོག་མཁན་རབས་དོན་དྲུག་པར་བསྐོས་ཡོད་འདུག
ཁ་སང་ཚེས་ ༡༨ ཉིན་གྱི་སྔ་དྲོའི་ཕྱག་ཚོད་ ༡༡ ཐོག སེར་བྱེས་མཁས་སྙན་གྲྭ་ཚང་གི་གཙུག་ལག་ཁང་དུ། ༧གོང་ས་རྒྱལ་བ་རིན་པོ་ཆེ་མཆོག་གིས་སེར་བྱེས་མཁན་སྙན་གྲ་ཚང་གི་མཁན་རབས་དོན་ལྔ་པ་ཏྲེ་ཧོར་དགེ་བཤེས་བློ་བཟང་བདེ་ལེགས་མཆོག་མཁན་པོའི་ལས་ཡུན་ཁྱུར་བའི་ཚབ་ཏུ། སེར་བྱེས་ཏྲེ་ཧོར་དགེ་བཤེས་དགེ་འདུན་ཆོས་འཕེལ་མཆོག་སེར་བྱེས་མཁན་སྙན་གྲ་ཚང་གི་མཁན་རབས་དོན་དྲུག་པར་བསྐོ་བཞག་གནང་བའི་བཀའ་ཡིག་ཕེབས་པ་བཞིན་མཁན་པོར་ཁྲི་འདོན་མཛད་སྒོ་ཚོགས་སོང་།
མཛད་སྒོའི་ཐོག་སེ་ར་བྱེས་སྨད་གཉིས་ཀྱི་མཁན་ལས་ཟུར་དང་བོད་མིའི་སྒྲིག་འཛུགས་ཀྱི་སྐུ་ཚབ་དང་་ཕྱོགས་བཞུགས་བོད་མིི་མང་སྤྱི་འཐུས་རྣམ་པ་སྦེང་ལོར་གྲོང་ཁྱེར་ནང་རྟེན་གཞི་བྱས་པའི་ཏུམ་ཀུར་གཙུག་ལག་སློབ་གཉེར་ཁང་གི་སློབ་སྤྱི་རིས་མེད་དགོན་སྡེ་ཁག་གི་སྐུ་ཚབ་དང་། གཞུང་དང་གཞུང་འབྲེལ་མ་ཡིན་པའི་ཚོགས་པ་སྐུ་ཚབ། སེ་ར་ཐེག་ཆེན་གླིང་གི་ཁང་ཚན་སོ་སོའི་འཐུས་མི། གྲོང་སྡེ་ཁག་གི་མི་མང་བཅས་སེར་སྐྱ་མི་མང་ ༢༠༠ ཙམ་ཞིག་ཕེབས་འདུག་ལ། མཁན་རིན་པོ་ཆེ་བཞུགས་ཁྲིར་འཁོད་རྗེས་རིམ་པ་བཞིན་གསོལ་ཇ་འབྲས་སིལ་དང་མཎྟལ་རྟེན་གསུམ་འདེགས་འབུལ། དེ་བཞིན་མཇལ་དར་སོགས་ཕུལ་སོང་།
སེར་བྱེས་ཏྲེ་ཧོར་དགེ་བཤེས་དགེ་འདུན་ཆོས་འཕེལ་མཆོག་ལ་ཐེངས་འདིར་༧གོང་ས་མཆོག་ནས་སེར་བྱེས་མཁནས་སྙན་གྲ་ཚང་གི་མཁན་རབས་དོན་དྲུག་པར་བསྐོ་བཞག་གནང་བར་དམིགས་བསལ་ཚོར་བ་གང་བྱུང་ཡོ་ད་མེད་སྐོར་བཅར་དྲི་ཞུས་པར། ཁོང་གིས་དེ་ནི་༧གོང་ས་སྐྱབས་མགོན་ཆེན་པོ་མཆོག་གིས་ཐུགས་རྗེའི་རྗེས་སུ་བཟུང་གི་འདུག་སྙམ་པའི་དགའ་ཚོར་ཡོང་གི་འདུག སྲིད་ཕྱོགས་ནས་བཤད་ཀྱང་ང་ཚོ་སྐྱབས་བཅོལ་བ་ཞིག་ཡིན་པའི་ཆ་ནས་རང་ཁ་རང་གསོ་བྱེད་ཐུབ་པ་དང་མ་འོངས་བོད་ཀྱི་འཐབ་རྩོད་དེ་མི་རབས་ནས་མི་རབས་བར་གནས་དགོས་བྱུང་ཚེ་དགོན་སྡེ་གྲྭ་ཚང་ཁག་ཡིན་ནའང་བརྟན་པོ་གནས་ཐུབ་དགོས་པ་དེ་གལ་ཆེན་པོ་ཡིན་པ་ལྟར། འདས་པའི་མཁན་པོ་རིམ་བྱོན་རྣམས་ཀྱིས་དེ་ལྟར་གནང་ཡོད་པ་བཞིན་རང་ཉིད་ནས་ཀྱང་དེའི་ཐོག་ག་ཚོད་ཙམ་ཞབས་འདེབས་སྒྲུབ་ཐུབ་ཨེ་ཡོང་སྙམ་པའི་སེམས་ཁྲལ་ཡང་ཡོང་གི་འདུག ཅེས་གསུངས་བྱུང་།
མཁན་རབས་དོན་དྲུག་པ་རྗེ་བཙུན་དགེ་འདུན་ཆོས་འཕེལ་མཆོག་ནི། ༡༩༤༡ ལོར་ཏྲེ་ཧོར་དཀར་མཛེས་གྲོང་ཁྱེར་གྱི་ཉེ་འདབས་སུ་ཆགས་པའི་སུ་ངོ་ཞེས་པའི་གྲོང་ཚོ་ཞིག་ཏུ་ཡབ་ཨ་དགའ་དང་ཡུམ་བསོད་ནམས་སྒྲོལ་མ་གཉིས་ཀྱི་སྲས་སུ་སྐུ་འཁྲུངས་ཤིང་། དགུང་ལོ་བརྒྱད་ཀྱི་སྟེང་དཀར་མཛེས་དགོན་དུ་ཆོས་བཞུགས་གནང་ཞིང་ལོ་ཤས་བཞུགས་རྗེས་གྲྭ་སར་ཕེབས། ༡༩༥༥ ལོར་གདན་ས་ཆེན་པོ་སེ་ར་དགོན་དུ་ཕེབས་ཏེ། སེར་བྱེས་མཁས་སྙན་གྲྭ་ཚང་དུ་གསར་ཞུགས་བྱས་ཏེ་གཞུང་ཀ་པོད་ལྔའི་ཐོག་སློབ་གཉེར་གནང་བ་དང་། བོད་ལ་དུས་གྱུར་བྱུང་རྗེས་བཙན་བྱོལ་དུ་ཕེབས་ཏེ་སྦག་ས་ཆོས་སྒར་དང་བྱེས་ཀྱི་སེ་ར་དགོན་དུ་རིམ་བཞིན་སློབ་གཉེར་འཕྲོ་སྐྱོང་གནང་། ལྷག་དོན་གདན་སའི་ནང་ལོ་མང་རིང་གྲྭ་གཞོན་སློབ་གཉེར་བ་རྣམས་ལ་དཔེ་ཁྲིད་གནང་སྟེ་ད་ལྟའི་ཆར་དགུང་གྲངས་ ༧༦ ལ་ཕེབས་ཡོད་འདུག
རྒྱ་གར་ལྷོ་ཕྱོགས་ས་གནས་གསར་འགོད་པ་དོན་འགྲུབ་བཀྲ་ཤིས།
