རྒྱ་གར་གྱི་ཨུ་ཊར་པར་དྷེ་ཤི་ནང་བུད་མེད་མང་པོར་བཙན་གཡེམ་བྱས་པའི་བརྙན་ཐུང་རིགས་ལ་ཧིན་སྒོར་ ༥༠ ནས་ ༡༥༠ བྱས་ཏེ་ཚོང་འགྲེམ་བྱེད་ཀྱིན་ཡོད་འདུག
རྒྱ་གར་གྱི་ཨུ་ཏར་པར་དྷེ་ཤི(Uttar Pradesh)ནང་ལོ་ཤས་སྔོན་ནས་བཟུང་བུད་མེད་ལ་བཙན་གཡེམ་བྱས་པ་དང་། བཙན་གཡེམ་བྱས་རྗེས་གདུག་རྩུབ་ཆེན་པོས་དམར་གསོད་བཏང་བ། སྲིད་གཞུང་དང་ཉེན་རྟོག་པས་ཉེས་དོན་ལ་རྟོག་ཞིབ་ནན་པོ་མ་བྱས་པ་སོགས་ཀྱི་གནད་དོན་མང་དག་ཅིག་གསར་འགྱུར་བརྒྱུད་ལམ་ཁག་ཏུ་ཐོན་དང་འཐོན་མུས་ཡོད་པ་ལྟར། ཁ་སང་རྒྱ་གར་དུས་བབ་ཀྱི་གསར་འགོད་པ་ཨར་ཝིན་ཏ་ཅོ་ཧན་(Arvind Chauhan)ལགས་གྱིས་ཡ་ང་ཞིང་སྐྱུག་བྲོ་བའི་བཙན་གཡེམ་གྱི་གནས་ཚུལ་ཞིག་དྲ་ཐོག་ཏུ་སྤེལ་ཡོད་པ་རེད།
གནས་ཚུལ་དེའི་ནང་ཨུ་ཏར་པར་དྷེ་ཤི(Uttar Pradesh)ནང་གི་བུར་ཤིང་(sugarcane)གི་ཞིང་ཁ་ཞིག་གི་ནང་། སྐྱེས་པ་འགའ་ཞིག་གིས་སློབ་ཕྲུག་བུ་མོ་ཞིག་གི་མཐའ་ནས་བསྐོར་ཡོད་པ་དང་། བུ་མོ་དེའི་དམ་དུ་བསྡམས་པའི་ལག་ཟུང་འདར་སིག་སིག་བྱེད་ཅིང་། འཇིགས་སྣང་གིས་ཁེངས་བའི་མིག་ཟུང་ཆེས་ཆེར་བགྲད་དེ་འ་ཆད་འུ་ཐུག་གིས་གཡས་གཡོན་ལ་ལྟ་བ་དང་། ཁོ་མོས་འོ་དོད་ཆེན་པོ་བྱས་ཀྱང་ཐོས་མཁན་མེད་ཁར། བརྙན་ཐུང་ནང་མི་གསལ་པའི་སྐྱེས་པའི་ཁྲེལ་དགོད་གསལ་པོར་ཐོས་ཐུབ་ལ། དེ་མུར་སྐྱེས་པ་ཞིག་གིས་བྱ་གླག་གིས་ལུ་གུ་འཛིན་པ་བཞིན་ཁོ་མོའི་སྟེང་མཆོང་བའི་བརྙན་ཐུང་ཞིག་ཁྲོམ་རར་འཚོང་འགྲེམ་བྱེད་ཀྱིན་ཡོད་པ་རེད།
ཨུ་ཏར་པར་དྷེ་ཤིའི་སྲིད་གཞུང་གི་གལ་ཆེའི་མི་སྣ་དང་ཉེན་རྟོག་པའི་མིག་མདུན་གྱི་ཚོང་ཁང་གང་སར། བུད་མེད་ལ་བཙན་གཡེམ་བྱས་པའི་བརྙན་ཐུང་རིགས་མངོན་གསལ་དོད་པོས་འགྲེམ་འཚོང་བྱེད་ཀྱིན་ཡོད་ལ། བརྙན་ཐུང་དེ་དག་གི་དུས་ཡུན་ཐུང་བ་སྐར་ཆ་༣༠ནས་རིང་བ་སྐར་མ་ ༥ ཡི་བར་ཡོད་པ་དང་། ས་གནས་སུ་བརྙན་ཐུང་དེ་རིགས་འབེལ་པོ་ཡོད་མེད་ཀྱིས་རིན་གོང་སྒོར་༥༠ ནས་ ༡༥༠ བར་བྱས་ཏེ་འཚོང་འགྲེམ་བྱེད་ཀྱི་ཡོད་འདུག
མངའ་སྡེ་དེའི་ཨག་ར་གྲོང་ཁྱེར་ཀ་སི་གྷན་ཇི་(Agra’s Kasganj)ཁྲོམ་རའི་ཚོང་བདག་ཞིག་གིས། སྤྱིར་བཙན་གཡེམ་བྱས་པའི་བརྙན་ཐུང་དེ་དག་འགྲེམ་འཚོང་བ་རང་ཉིད་ཀྱིས་ཡིད་ཆེས་བློས་འགེལ་བྱ་ཡུལ་གྱི་མིར་མ་གཏོགས་འཚོང་གི་མེད། འོན་ཀྱང་ཚོང་རྗས་དེ་རིགས་ཁྲོམ་ར་གང་སར་ཁྱབ་གདལ་འགྲོ་བཞིན་ཡོད་ལ། འཆལ་སྤྱོད་ཀྱི་བརྙན་འཕྲིན་ནི་དངུལ་ཡིན་པ་དང་། དོན་དངོས་ཁྲིམས་འགལ་གྱི་འཆལ་སྤྱོད་ལ་འཇུག་པ་ནི་ཁོང་ཁྲོའི་རྒྱུ་རེད། ཅེས་བརྗོད་འདུག
ཡང་གནས་ཚུལ་དེའི་ནང་དུ། བརྙན་ཐུང་འགྲེམ་ཚོང་བ་ཚོས་ཚོང་ཤག་གི་ལག་ཐོགས་ཁ་པར་(smart phone)དང་ཡང་ན། མཐེབ་སྡེར་(pen drive)ནང་བརྙན་ཐུང་ཐད་ཀར་ཕབ་ལེན་བྱས་ཏེ་འཚོང་བ་དང་། སྐབས་རེ་མི་སྒེར་པ་དང་ཚོགས་པའི་ངོ་དེབ་(facebook)། ཊུཡི་ཊར་(Twitter)སོགས་ལས་བརྙན་པར་ཕབ་ལེན་བྱས་ཏེ་འཚོང་འགྲེམ་བྱེད་ཀྱི་ཡོད་པ་དང་། ཉེས་ཅན་པ་དོ་བདག་གིས་བཙན་གཡེམ་བྱས་པའི་བརྙན་ཐུང་དྲ་ཐོག་ཏུ་འགྲེམས་སྤེལ་བྱེད་པ་ཡང་མང་པོ་ཡོང་གི་ཡོད་འདུག
ཨག་ར་གྲོང་ཁྱེར་གྱི་ཁྲོམ་ར་དེ་གའི་ཚོང་ཁང་གཞན་ཞིག་ཏུ་སྐྱེས་པ་ཞིག་གིས་གཞོན་ནུ་ཞིག་ལ་བརྙན་ཐུང་གསར་པའི་ནང་གི་བུ་མོ་དེ་ངོ་ཤེས་ཀྱི་ཡོད་སྐོར་བརྗོད་ཡོད་པ་དང་། འཇིགས་སྣང་ཆེ་བའི་བརྙན་ཐུང་དེའི་ནང་ལོ་ན་༢༠ཙམ་ལ་སོན་པའི་བུད་མེད་ཅིག་སྐྱེས་པ་གཉིས་ཀྱིས་མར་ས་ལ་མནན་ཡོད་པ་དང་། ཁོ་མོའི་དགའ་རོགས་དེར་རྡུང་རྡེག་གཏོང་བཞིན་ཡོད་ལ། དགའ་རོགས་དེས་དགོངས་དག དགོངས་དག་(maaf karo, maaf karo)ཞེས་འོ་དོད་བྱེད་པ་དང་། བུ་མོ་དེས་མ་མཐའ་ཡང་བརྙན་པར་མ་ལེན་རོགས་(kamse kam video toh mat utaaro)ཞེས་ངུ་འབོད་བྱེད་ཀྱིན་ཡོད་པ་རེད།
ས་གནས་དེ་གའི་ཉེན་རྟོག་པ་མཐོ་གྲས་ཤིག་གིས་རྒྱ་གར་དུས་བབ་(TOI)ཀྱི་གསར་འགོད་པར། བཙན་གཡེམ་བྱེད་མཁན་གྱིས་ཁྲིམས་འགལ་འཆལ་སྤྱོད་དེ་དག་རང་ཉིད་ཀྱི་ལག་ཐོགས་ཁ་པར་གྱིས་བརྙན་པར་དུ་བླངས་ཏེ། བུད་མེད་དེ་དག་ལ་མཚང་འདོན་སྡིགས་ར་སྐུལ་བ་དང་། ཉེན་རྟོག་པར་ཞུ་གཏུག་བཀག་འགོག ཕྱིས་འབྱུང་འཁྲིག་སྤྱོད་དང་ལེན་སོགས་ཀྱི་འདོད་དོན་སྒྲུབ་ཀྱིན་ཡོད་པ་དང་། གནོད་འཚེ་ཕོག་ཡུལ་བུད་མེད་ཚོར་བརྙན་པར་དྲ་ཐོག་ཏུ་སྤེལ་རྒྱུ་ཡིན་པའི་འཇིགས་སྐུལ་བྱས་ཏེ། ཉེས་ཅན་དོ་བདག་ལ་རྒྱལ་ཁ་ཆེན་པོ་ཐོབ་ཀྱི་ཡོད་པ་རེད། ཅེས་བརྗོད་ཡོད་པ་རེད།
ཨག་ར་གྲོང་ཁྱེར་གྱི་ཉེན་རྟོག་འགོ་དཔོན་ཅན་དྷྲ་བྷན་(SP Chandrabhan)ལགས་ཀྱིས། དེ་སྔོན་ང་ཚོས་ཏ་ཅ་གྷན་ཇི་(Tajganj)དང་སར་ཏར་(Sardar)ས་ཁུལ་དུ་གློ་བུར་སྔོག་གཤེར་བྱས་ཏེ་ཁྲིམས་འགལ་གྱི་བརྙན་པར་འཚོང་འགྲེམ་བྱེད་མཁན་ཞིག་འཛིན་བཟུང་བྱས་པ་ཡིན། མ་འོངས་པར་ཡང་ང་ཚོས་ས་ཁུལ་དེ་རིགས་སུ་མུ་མཐུད་སྔོག་གཤེར་བྱ་རྒྱུ་ཡིན། ཞེས་བརྗོད་འདུག
ཟླ་འདིའི་ཕྱི་ཚེས་ ༢ ཉིན་རྒྱ་གར་དུས་བབ་ཀྱི་གསར་འགོད་པ་ས་ཁུལ་དེའི་བྷེ་ལང་གྷན་ཇི་(Belanganj)དང་། བྷལ་ཀེ་ཤི་ཝར་(Balkeshwar) ཀམ་ལ་ན་གར་(Kamla Nagar)བཅས་ཀྱི་ཁྲོམ་རར་ཆེད་དུ་ཕྱིན་ཏེ་ཞིབ་འཇུག་བྱེད་སྐབས། ཁྲོམ་ར་དེ་དག་ཏུ་བརྙན་ཐུང་དེ་རིགས་ལས་སླ་པོར་ཉོ་རྒྱུ་ཡོད་པ་དང་། མི་རུ་ཏི་(Meerut)གྲོང་ཁྱེར་དང་། བྷ་རི་ལི་(Bareilly)གྲོང་ཁྱེར་སོགས་གང་དུ་ཡིན་ཡང་གནས་སྟངས་གཅིག་མཚུངས་ཡིན་པ་ཤེས་རྟོགས་བྱུང་ཡོད་པ་རེད། བདུན་ཕྲག་སྔོན་མར་ཁུལ་དེའི་བུ་མོ་རང་ལོ་ ༢༡ སོན་པ་ཞིག་ལ་བཙན་གཡེམ་བྱས་པའི་བརྙན་ཐུང་དྲ་ཐོག་ཏུ་སྤེལ་བར་བརྟེན། བུ་མོ་དེས་རང་སྲོག་བཅད་ཡོད་པ་དང་། བཙན་གཡེམ་བྱེད་མཁན་སྐྱེས་པ་ཞིག་གིས་བུ་མོ་དེ་གཅེར་བུར་ཕུད་ནས་བརྒྱབ་པའི་འདྲ་པར་རེར་སྒོར་ ༣ བྱས་ཏེ་བཙོང་ཡོད་འདུག
སྐལ་ལྡན་གྱིས་སྒྱུར་སྒྲིག་བྱས།
