འདི་ལོའི་ཨེ་ཤ་ཡའི་མཛངས་མའི་འགྲན་སྡུར་ནང་བོད་རིགས་བུ་མོ་བློ་བཟང་སྐྱིད་འཛོམས་ལགས་མཉམ་ཞུགས་གནང་འདུག
འདི་ལོའི་ཨེ་ཤ་ཡའི་མཛངས་མའི་འགྲན་སྡུར་དེ་རིང་ཕྱི་ཚེས་ ༡༢ ཉིན་ནས་ ༡༨ བར་རྒྱ་གར་ལྷོ་ཕྱོགས་ཀེ་རི་ལ་(Kerala)མངའ་སྡེའི་ཁོ་ཅི་(Kochi)ནང་ཚོགས་བཞིན་ཡོད་པ་དང་། ཐེངས་འདིའི་འགྲན་སྡུར་ནང་རྒྱ་གར་དང་བལ་ཡུལ། འབྲུག འབར་མ། ཨུ་རུ་སུ། ཡུག་ཁི་རིན། མ་ལི་ཞེ་ཡ་སོགས་ཨེ་ཤ་ཡའི་རྒྱལ་ཁབ་ ༡༨ ཙམ་ནས་འགྲན་ཞུགས་པ་བུ་མོ་ ༡༨ ཡོད་པ་དང་། ཐེངས་འདིའི་འགྲན་སྡུར་ནང་བོད་རིགས་བུ་མོ་བློ་བཟང་སྐྱིད་འཛོམས་ལགས་ཀྱང་བོད་རྒྱལ་ཁབ་ཀྱི་འཐུས་ཚབ་བྱས་ཏེ་མཉམ་ཞུགས་གནང་ཡོད་འདུག
བོད་རིགས་བུ་མོ་བློ་བཟང་སྐྱིད་འཛོམས་ལགས་ཀྱིས་མོ་རང་ཨེ་ཤ་ཡའི་མཛངས་མའི་འགྲན་སྡུར་ནང་ཞུགས་དོན་ནི། ཐེངས་འདིའི་འགྲན་སྡུར་ནང་ཨེ་ཤ་ཡའི་རྒྱལ་ཁབ་མང་པོ་ཞིག་ནས་འཐུས་ཚབ་མཉམ་ཞུགས་བྱེད་ཀྱི་ཡོད་སྟབས། མོ་རང་གིས་བོད་རྒྱལ་ཁབ་ཅིག་གི་འཐུས་ཚབ་བྱས་ཏེ་མཉམ་ཞུགས་གནང་བ་ཡིན་ལ། འགྲན་སྡུར་ཁྲོད་མོས་རྒྱལ་ཁབ་གཞན་གྱི་འགྲན་ཞུགས་པ་ཚོར་བོད་དོན་ངོ་སྤྲོད་དང་གསལ་བཤད་བྱ་རྒྱུ་ཡིན་ལ། མོ་རང་ཐེངས་འདིའི་འགྲན་སྡུར་ནང་ཞུགས་པ་དེ་བོད་རིགས་བུ་མོ་ཚོར་སེམས་ཤུགས་སྤར་བ་དང་མིག་དཔེ་སྟོན་པའི་ཆེད་དུ་ཡིན་སྐོར་བརྗོད་འདུག
རང་ལོ་ ༢༢ ཡིན་པའི་བློ་བཟང་སྐྱིད་འཛོམས་ལགས་བལ་ཡུལ་དུ་སྐྱེས་ཤིང་། གཞི་རིམ་སློབ་གྲྭ་ནས་མཐོ་སློབ་བར་བལ་ཡུལ་ནང་སློབ་སྦྱོང་བྱས་ཡོད་པ་དང་། ད་ལྟའི་ཆར་རྒྱ་གར་ལྷོ་ཕྱོགས་བྷང་ལོར་གཙུག་ལག་སློབ་ཆེན་དུ་གསར་འགོད་རིག་པའི་ཐོག་གཙུག་ལག་རབ་འབྱམས་པའི་སློབ་སྦྱོང་གནང་བཞིན་ཡོད་ལ། ཕྱི་ལོ་ ༢༠༡༥ ལོར་མོ་རང་བོད་ཀྱི་མཛངས་མའི་འགྲན་སྡུར་ནང་ཞུགས་ཏེ་ཨང་གཉིས་པ་ཐོབ་ཡོད་པ་རེད།
ཨེ་ཤ་ཡའི་མཛངས་མའི་འགྲན་སྡུར་འདི་ནི་རྒྱ་གར་གྱི་ (house of Pegasus )ཞེས་པའི་དྲིལ་བསྒྲགས་ཚོང་གཉེར་ཁང་ཞིག་གིས་གོ་སྒྲིག་བྱེད་བཞིན་ཡོད་པ་དང་། ད་ལོ་མཛངས་མའི་འགྲན་སྡུར་ཐེངས་གཉིས་པ་དེ་ཆགས་ཡོད་འདུག
གསར་འགོད་པ། པདྨ་མཚོ།
