ད་ལོའི་བཙན་བྱོལ་བོད་མིའི་ཡར་ཐོན་ཚོང་པ་གསར་པའི་མ་དངུལ་རོགས་སྐྱོར་གཟེངས་རྟགས་དེ་གནའ་དེང་ཟུང་འབྲེལ་གྱི་བོད་ཆས་བཟོ་ཚོང་ཁང་སྐེ་རགས་ཞེས་པ་དང་ལྡི་ལི་རྐང་འཁོར་གཡར་གླ་ཚོང་གཉེར་ཁང་གཉིས་ལ་ཐོབ་སྟེ་ཧིན་སྒོར་འབུམ་གཉིས་དང་ཕྱེད་ཀ་རེ་གནང་བ་གསལ་བསྒྲགས་བྱས་སོང་།
བཙན་བྱོལ་བོད་མིའི་ཡར་ཐོན་ཚོང་པའི་འདུ་འཛོམས་ཉིན་གྲངས་ ༢ རིང་གངས་སྐྱིད་གཉའ་ཁྲི་ཚོགས་ཁང་དུ་ཚོགས་ཏེ་ཁ་སང་ཕྱི་དྲོར་མཇུག་སྒྲིལ་ཡོད་པ་དང་། མཇུག་བསྡོམས་ཀྱི་མཛད་སྒོའི་ཐོག་སྲིད་སྐྱོང་བློ་བཟང་སེང་གེ་མཆོག་ཕེབས་ཏེ། ཐེངས་འདིའི་འདུ་འཛོམས་ཐོག་གདན་ཞུས་གནང་བའི་གཏམ་བཤད་པ་དང་། བགྲོ་གླེང་གནང་མཁན། དེ་བཞིན་ཚོང་པ་གསར་པའི་མ་དངུལ་རོགས་སྐྱོར་གཟེངས་རྟགས་འགྲན་སྡུར་གྱི་འདེམས་སྒྲུག་པ་རྣམས་ལ་མཇལ་དར་དང་ཕྱག་རྟགས་གནང་བ་དང་། འདི་ལོའི་མ་དངུལ་རོགས་སྐྱོར་གཟེངས་རྟགས་ཀྱི་འགྲན་སྡུར་ནང་ཞུགས་མཁན་བོད་རིགས་ཚོང་པ་ ༩ ལ་མཇལ་དར་དང་། སྔོན་འགྲོའི་སྐྱེད་སྲིང་སྦྱོང་བརྡར་ཐོན་པའི་ཡར་ཐོན་ཚོང་པ་རྣམས་ལ་མཇལ་དར་དང་ཕྱག་འཁྱེར་གནང་སོང་བ་དང་། འདི་ལོའི་ཡར་ཐོན་ཚོང་པ་གསར་པའི་མ་དངུལ་རོགས་སྐྱོར་གཟེངས་རྟགས་དེ་གནའ་དེང་ཟུང་འབྲེལ་གྱི་བོད་ཆས་བཟོ་ཚོང་ཁང་སྐེ་རགས་(Keraa)ཞེས་པ་དང་། ལྡི་ལིར་ཡོད་པའི་རྐང་འཁོར་གཡར་གླ་ཚོང་གཉེར་ཁང་(Delhi By Bike)གཉིས་ལ་ཐོབ་སྟེ། ཧིན་སྒོར་འབུམ་གཉིས་དང་ཕྱེད་ཀ་རེ་གནང་བ་གསལ་བསྒྲགས་བྱས་སོང་།
སྲིད་སྐྱོང་མཆོག་ནས་མཇུག་བསྡོམས་ཀྱི་གསུང་བཤད་གནང་སྐབས། བོད་མི་རྒན་པ་ཚོང་ལས་གཉེར་མཁན་ཚོས་རྒྱ་གར་གྱི་ཚོང་པ་ཚོར་ཆ་འཇོག་ཆེན་པོ་བསྐྲུན་ཐུབ་ཡོད་པ་ལྟར། གཞོན་སྐྱེས་ཚོང་པ་ཚོས་ཀྱང་བཟང་སྤྱོད་ལྡན་པའི་ཐོག་ནས་སྔར་གྱི་ཆ་འཇོག་རྣམས་མ་བརླག་ཅིག་གནང་གལ་ཆེ་བའི་སྐོར་ལམ་སྟོན་གནང་དོན། མི་ཐོག་རྒན་པ་ཚོས་རྒྱ་གར་གྱི་ལག་ནས་དངུལ་དང་སོ་ཌ་(Sweater)བླངས་ཏེ། ལོ་ལྟར་དངུལ་ཕར་སྤྲད་དེ་དྲང་པོ་དྲང་བཞག་དང་ལྷག་བསམ་རྣམ་དག་གི་ཐོག་ནས་ཚོང་བརྒྱབ་ནས་མི་ཡག་པོ་ཆགས་པར་བརྟེན། རྒྱ་གར་ངོ་མི་ཤེས་བ་ཞིག་གིས་དངུལ་(Crore)༤༠༠ ཡི་ནང་ནས་བརྒྱ་ཆ་ ༥༠ ཞིག་ང་ཚོར་གཡར་གྱི་ཡོད་པ་རེད། དེ་དངོས་གནས་མི་ཐོག་རྒན་པ་ཚོས་དཀའ་ལས་བརྒྱབ་པའི་གྲུབ་འབྲས་ལ་བརྟེན་ནས་བྱུང་བ་རེད། ད་ལྟ་འདི་ལ་ཡོད་པའི་ང་ཚོའི་ཚོང་པ་མང་ཆེ་བ་གཞོན་པ་རེད་འདུག་པས། ང་ཚོར་ཆ་འཇོག་ག་ཚོད་ཅིག་འདུག་མི་འདུག དེར་དགོངས་པ་བཞེས་དགོས་པ་དཔེ་གལ་ཆེན་པོ་རེད། གང་ཡིན་ཟེར་ན། ཚོང་བརྒྱབ་ཡོང་དུས་ཚོང་རྟགས(Brand) ཆ་འཇོག་(Credibility)དཔེ་གལ་ཆེན་པོ་རེད། ད་ལྟ་མང་ཆེ་བས་ལེགས་བཅོས་(Innovation )དང་གསར་གཏོད་(Creativity) དེ་ཚོ་མང་པོ་བཤད་ཀྱི་ཡོད་ཀྱང་། དངོས་གནས་ཚོང་གི་ཕུགས་བརྟན་པོ་ཡོང་བར་ཚོང་རྟགས་(Brand)དང་ཆ་འཇོག་ (Credibility) ངེས་པར་དུ་དགོས་པ་རེད། དེ་ཚོ་མེད་ན་ལོ་གཅིག་ལ་ཁེ་བཟང་རག་སྟེ་ལོ་གཅིག་ལ་ཁེ་བཟང་རག་གི་མ་རེད། ཅ་ལག་ལོ་གཅིག་ལ་ཉོས་ནས་ལོ་གཅིག་ལ་ཉོ་ཡི་མ་རེད། མི་ཐོག་རྒན་པར་ཆ་འཇོག་ཡོད་པ་དེ་དཔེ་རྩ་ཆེན་པོ་རེད། བོད་པར་སྤྱི་ཡོངས་ནས་ཆ་འཇོག་ཡོད་པ་ང་ཚོས་ཤེས་ཀྱི་ཡོད་པ་རེད། ཡིན་ནའང་། མི་ཐོག་གཞོན་པ་ཚོར་ཆ་འཇོག་དཔེ་གལ་ཆེན་པོ་རེད། ཚོང་རྒྱག་དགོས་ལ། ཁེ་བཟང་བཟོ་དགོས་ཀྱི་ཡོད་པ་དེ་ཡིན་དང་ཡིན། འོན་ཀྱང་། མི་ཐོག་རྒན་པས་དཀའ་ལས་བརྒྱབ་སྟེ་གྲུབ་འབྲས་སྨིན་པའི་ཆ་འཇོག་དེ་བརླགས་པ་ཡིན་ན། ༧གོང་ས་མཆོག་ནས་བཀའ་སློབ་གནང་བའི་ཡ་རབས་བཟང་སྤྱོད་དགོས་གསུང་བ་དེ་གཙོ་བོ་དེར་ཟེར་གྱི་ཡོད་པ་རེད། དེ་རྣམ་པ་ཚོས་ཡིན་གཅིག་མིན་གཅིག་གིས་ཐུགས་ལ་ཉར་རོགས་གནང་། ཚོང་ཚོང་རེད། ཁེ་བཟང་གཙོ་བོ་རེད་ཅེས་ལབ་ན་འགྲིག་གི་ཡོད་པ་མ་རེད། ཚོང་གི་ཁེ་བཟང་ཐོག་བོད་པའི་འགན་ཡོད་པ་དེ་ཡིན་གཅིག་མིན་གཅིག་གིས་ཐུགས་ལ་འཇོག་རོགས་གནང་། ཞེས་གསུངས་སོང་།
ཡང་ཁོང་གིས་ཚོང་པ་གསར་པའི་མ་དངུལ་རོགས་སྐྱོར་གཟེངས་རྟགས་ཐོབ་མཁན་གཉིས་ཀྱི་ཚོང་ལས་ཐད་གསུང་བཤད་གནང་སྐབས། ཁོང་རང་གཉིས་ལ་མ་དངུལ་རོགས་སྐྱོར་ཐོབ་པ་དེས་ཕྱོགས་གཅིག་ནས་འཕྲོད་བསྟེན་དང་ཕྱོགས་གཅིག་ནས་ང་ཚོ་བོད་པའི་རིག་གཞུང་སྲུང་སྐྱོབ་བྱེད་པར་གནད་འགག་ཅིག་ཆགས་བསྡད་ཡོད་སྟབས། འཚམས་འདྲི་བཀྲ་ཤིས་བདེ་ལེགས་དང་རྗེས་སུ་ཡི་རང་ཞུ་ཡི་ཡོད་ཅེས་གསུངས་བ་དང་འབྲེལ། ཐེངས་འདིའི་འགྲན་སྡུར་ནང་ཞུགས་ཏེ་མ་དངུལ་རོགས་སྐྱོར་མ་ཐོབ་མཁན་ཚོས་ལོ་རྗེས་མར་འཆར་གཞི་ཡག་པོ་བསྒྲིགས་ཏེ། འགྲེལ་བཤད་སོགས་ཡག་པོ་བཟོས་ནས་ཡོང་བ་ཡིན་ན་རྗེས་མ་འཐོབ་ངེས་ཡིན་ལ། གལ་སྲིད་མ་འཐོབ་པ་ཡིན་ནའང་སོ་སོའི་འཆར་གཞི་དེ་ལམ་ལྷོང་མ་ཡོང་བ་དང་། ཡག་པོ་མིན་པས་ཁྱབ་ཀྱི་མེད་སྟབས། མུ་མཐུད་འབད་བརྩོན་གནང་བ་ཡིན་ན་ཡག་པོ་ཡོང་གི་ཡོད་སྐོར་དང་། ལས་རིགས་གཞན་གྱི་ནང་བུད་མེད་ཀྱིས་བརྒྱ་ཆ་མང་པོ་ཟིན་ཡོད་ཀྱང་། ཚོང་ལས་གཉེར་མཁན་ནང་བརྒྱ་ཆ་ ༡༥ ཙམ་ལས་མེད་སྟབས། མ་འོངས་པར་སྐྱེས་པ་ཚོང་པ་ཚོས་སོ་སོའི་ཨ་མ་ལགས་དང་བཟའ་ཟླ། དགའ་རོགས། བུ་མོ་བཅས་མཉམ་དུ་འཁྲིད་དེ་ཚོང་ལས་ཀྱི་ལམ་ལ་ཞུགས་ཐུབ་པ་ཡིན་ན། སྤྱི་ཡོངས་ནས་བོད་པའི་སྤྱི་ཚོགས་ཡར་རྒྱས་འགྲོ་བར་ཕན་ཐོགས་ཡོད་སྐོར་དང་། གཞོན་སྐྱེས་རྣམས་སོ་སོའི་གཞིས་ཆགས་ཁག་ནང་འཁོར་བ་དང་འཕྲོད་བསྟེན་ཡར་རྒྱས་ཡོང་ཆེད། བོད་མིའི་གཞིས་ཆགས་ཁག་ཡོངས་རྫོགས་ཀྱི་ནང་དུ་རྐང་རྩེད་སྤོ་ལོ་དང་ལག་རྩེད་སྤོ་ལོའི་རྩེད་ཐང་། དེ་བཞིན་བྱ་སྒྲོའི་རྩེད་མོ་དང་སྒྲོམ་སྟེགས་སྤོ་ལོ་སོགས་རྩེད་ས་དང་། ལུས་སྦྱོང་ཁང་(Gym)། དཔེ་མཛོད་ཁང་། རང་ལས་ཟ་ཁང་(Cafeteria )སོགས་རྒྱག་འཆར་ཡོད་སྐོར་གསུངས་སོང་།
གསར་འགོད་པས་ཚོང་པ་གསར་པའི་མ་དངུལ་རོགས་སྐྱོར་གཟེངས་རྟགས་ཐོབ་མཁན་སྐེ་རགས་བཟོ་ཚོང་ཁང་གི་སྦྱིན་བདག་ཡེ་ཤེས་དཔལ་འབྱོར་ལགས་སུ། མ་དངུལ་གཟེངས་རྟགས་ཐོབ་པའི་སེམས་ཚོར་དང་མ་འོངས་འཆར་གཞི་ག་རེ་ཡོད་འདྲི་སྐབས་ཁོང་གིས། ཐོག་མ་དེར་བྱ་དགའ་ཐོབ་པ་ཙམ་གྱིས་སེམས་པ་སྐྱིད་པོ་དང་སེམས་ཤུགས་འདྲ་བོ་ཞེ་དྲག་སྐྱེད་བྱུང་། སྤྱིར་བཏང་ང་རང་ཚོས་ཡར་རེ་བ་ཞུས་པའི་དངུལ་དེ་ཏོག་ཙམ་ཆེན་པོ་ཡོད་པ་རེད། དེའི་ནང་ནས་བརྒྱ་ཆ་ ༣༠ ལྷག་ཅིག་ལས་ང་ཚོར་རག་མེད་ཀྱང་། མཁས་དབང་རང་གིས་ང་ཚོར་སྟངས་འཛིན་འདྲ་བོ་བྱས་ཏེ། ང་ཚོའི་ཚོང་གི་ངོ་བོར་གཟིགས་ནས་ཐག་གཅོད་གནང་ཡོད་པ་དང་། ང་ཚོའི་ཚོང་གི་ངོ་བོར་ངོས་འཛིན་བྱུང་བ་དེས་སེམས་ཤུགས་ཆེན་པོ་སྐྱེད་བྱུང་། ན་ནིང་ནས་ང་ཚོས་ཚོང་མགོ་བཙུགས་ཏེ་ཟླ་བ་ ༡༠ ལྷག་འགྲོ་ཚར་ཡོད་པ་དང་། ང་ཚོའི་འཆར་གཞི་དེ་མུ་མཐུད་ནས་འགྲོ་རྒྱུ་རེད་ལ། ཁོ་རང་ཚོའི་ངོས་ནས་ཆ་རྐྱེན་ཞིག་བཞག་ཡོད་པས་ཆ་རྐྱེན་དེ་ང་ཚོས་བསྒྲུབ་ཐུབ་སོང་ན་གཞི་ནས་ང་ཚོར་དངུལ་དེ་རག་གི་ཡོད་སྟབས། ཆ་རྐྱེན་བསྒྲུབ་རྒྱུ་དེ་ང་ཚོའི་འཆར་གཞི་གཙོ་བོ་ཡིན། ཞེས་ཟེར།
ཚོང་པ་གསར་པ་ཞིག་གི་ངོས་ནས་བཤད་ན་ཆ་རྐྱེན་དེ་ཚོ་འགྲུབ་ཁག་པོ་ཡོད་མེད་དྲིས་པར་ཁོང་གིས། ང་ཚོའི་ཚོང་གི་ངོ་བོའི་ཐོག་ནས་བཤད་པ་ཡིན་ན། ཁོང་ཚོའི་ཆ་རྐྱེན་འཇོན་སྟངས་དེ་དངོས་ཡོད་ལ་རན་པ་ཞིག་དང་དགོས་མཁོ་དང་མཐུན་པ་ཞིག་ཏུ་མཐོང་སོང་། ཆ་རྐྱེན་དེ་ཚོ་སྒྲུབ་མི་ཐུབ་པ་དང་ཁག་པོ་འདྲ་བོ་མཐོང་མ་སོང་། ང་རང་ཚོའི་སེམས་ལ་མ་འཁོར་བ་ཞིག་ཁོང་ཚོས་བསམ་འཆར་བཏོན་པ་འདྲ་བོ་ཞིག་དང་། དངོས་གནས་ང་ཚོའི་ཚོང་ལ་ཕན་ས་རེད་བསམ་བསམ་ཞིག་ཚོར་སོང་། ཞེས་བརྗོད་བྱུང་།
ཁོང་གིས་ངོ་སྤྲོད་གནང་བ་ལྟར་ན། སྐེ་རགས་ཞེས་པའི་བཟོ་ཚོང་ཁང་དེ་གློག་ཀླད་ཆེད་སྦྱོང་བ་ཡེ་ཤེས་དཔལ་འབྱོར་ལགས་དང་། གསར་འགོད་རིག་པའི་ཆེད་སྦྱོང་བ་བྱམས་པ་བསྟན་དར་ལགས། ཚོང་ལས་ཆེད་སྦྱོང་བ་ལྷ་མོ་བཀྲ་ཤིས་ལགས་བཅས་མཉམ་འབྲེལ་གྱིས། ཐོག་མར་རྡེ་ར་རྡུན་དུ་སྐེ་རགས་ཞེས་པའི་བཟོ་བསྐྲུན་ཁང་ཞིག་བཙུགས་ཏེ། བོད་པའི་སྲོལ་རྒྱུན་གྱི་གྱོན་ཆས་རིགས་དང་དེང་དུས་དཔེ་གསར་བོད་ཀྱི་གྱོན་ཆས་རིགས། དེ་བཞིན་བོད་ཀྱི་བཟོ་རྩལ་གྱི་ཁྱད་ཆོས་ལྡན་པའི་ཁུག་མ་རིགས་བཅས་བཟོ་ཡི་ཡོད་པ་དང་། ད་ལྟའི་ཆར་རྡེ་ར་རྡུན་དང་ལྡི་ལི་རུ་ཚོང་ཁང་གཉིས་བཙུགས་ཡོད་འདུག
རྐང་འཁོར་གཡར་གླ་ཚོང་གཉེར་ཁང་གི་སྦྱིན་བདག་བསྟན་འཛིན་རྒྱལ་པོ་ལགས་སུ་མ་དངུལ་གཟེངས་རྟགས་ཐོབ་དུས་སེམས་ཚོར་ཅི་བྱུང་དང་། མ་འོངས་པར་རྐང་འཁོར་ཚོང་ལས་ཡར་རྒྱས་ཆེད་འཆར་གཞི་གསར་པ་ཅི་ཡོད་དྲིས་པར་ཁོང་གིས། ང་རང་ལ་རྔན་པ་དེ་རག་དུས་དགའ་བོ་ཞེ་དྲག་བྱུང་། ང་རང་གི་ལས་ཀ་ཡིན་ན་རེད། ལས་བྱེད་ཚོར་གླ་ཕོག་གིས་ཕན་ཐོགས་ཡོད་ནའང་རེད། དེ་བཞིན་རྐང་འཁོར་སྤྲོ་འཆམ་ཡིན་དུས་ཁོར་ཡུག་ཐོག་ལ་ཕན་ཐོགས་ཡོད་ནའང་རེད། ང་རང་གི་ཚོང་ལས་ལ་ཆེ་མཐོང་ཐོབ་པར་དཔེ་དགའ་བོ་བྱུང་།
སྔོན་མ་ངས་རྐང་འཁོར་ ༡༠ ནས་མགོ་བཙུགས་པ་དང་། ན་ནིང་ལོར་དེའི་སྒང་ལ་རྐང་འཁོར་ ༡༠ ཉོས་ཏེ་ཁྱོན་རྐང་འཁོར་ ༢༠ ཡོད་པ་དང་། ད་ལོར་རྔན་པ་རག་ན་རེད་མ་རག་ནའང་རེད། ཡང་བསྐྱར་རྐང་འཁོར་ ༡༠ ཉོ་བའི་འཆར་གཞི་ཡོད་ལ། ད་ལྟ་ང་ལ་རྔན་པ་རག་ཡོད་པས་ད་ལོ་རྐང་འཁོར་ ༡༠ ཉོ་རྒྱུ་དང་། ལོ་རྗེས་མར་ཡང་རྐང་འཁོར་ ༡༠ ཉོ་བའི་འཆར་གཞི་ཡོད། རྐང་འཁོར་སྤྲོ་འཆམ་གྱི་ཚོང་དེ་ང་ལ་ཕན་ཐོགས་ཞེ་དྲགས་འདུག་པས་མུ་མཐུད་དུ་གཉེར་རྒྱུ་ཡིན་ལ། ང་རང་ཚོང་དེ་གཉེར་ན་སྐྱིད་པོ་འདུག ལས་བྱེད་ཚོ་ལའང་གླ་ཆ་ཡག་པོ་སྤྲོད་ཐུབ་ཀྱི་འདུག ད་ལྟའི་ཆར་ང་རང་མ་རྩིས་ན་སྣེ་འཁྲིད་པ་གཉིས་དང་། རྒྱ་གར་བ་ལས་རོགས་མི་ ༣ བཅས་ཁྱོན་ང་ཚོ་མི་ ༦ ཡོད། ཅེས་བརྗོད་བྱུང་།
གསར་འགོད་པ། པདྨ་མཚོ།
