ཨ་རིའི་སྲིད་འཛིན་འོས་མི་སྐུ་ཞབས་ཊི་རུམ་ཕི་མཆོག་གི་སྲིད་བྱུས་ལངས་ཕྱོགས།

ད་ལྟ་ཨ་རིའི་སྲིད་འཛིན་སྐབས་ ༥༨ པའི་འོས་བསྡུ་ཆེན་མོ་འགྲོ་བཞིན་པའི་སྐབས་འདིར། སྤྱི་མཐུན་ཚོགས་པའི་སྲིད་འཛིན་འོས་མི་ཕྱུག་བདག་སྐུ་ཞབས་ཊི་རུམ་ཕི་མཆོག་གི་ཕྱི་སྲིད་དང་ནང་སྲིད། རྒྱལ་སྤྱིའི་ཐོག་གི་གནད་དོན་ཆེ་ཁག་བཅས་ཀྱི་ཐོག་ལ་འཛིན་པའི་སྲིད་བྱུས་ལངས་ཕྱོགས་དང་ཨ་རིའི་མི་མང་ཁྲོད་ཀྱི་གླེང་ཕྱོགས་ཁག་ཅིག་བསྡུ་བསྒྲིགས་བྱས་ཡོད།

སྐུ་ཞབས་ཊི་རུམ་ཕི་མཆོག་གིས་དཀྱིལ་ཤར་ཡུལ་གྲུའི་པ་ལི་སི་ཐན་དང་ཨེ་སི་རལ་གྱི་རྩོད་རྙོག་སྐོར་ལ། ད་ལོའི་ཕྱི་ཟླ་ ༢ ཚེས་ ༥ ཉིན་ཊ་ཁི་སེ་ (Texas) མངའ་སྡེ་ནང་གཏམ་བཤད་སྤེལ་སྐབས། “ང་ཚོས་ཨེ་སི་རལ་ (Israel) ལ་རྒྱབ་སྐྱོར་དང་པ་ལི་སི་ཊེན་ཡ་མེད་གཏོང་བའི་ལས་ཀ་དེ་མ་བྱས་པ་ཡིན་ན། ང་ཚོས་ཨེ་སི་རལ་དང་པ་ལི་སི་ཊེན་ (Palestine) གཉིས་ཞི་འགྲིག་གྲོས་ཆོད་ཀྱི་ལམ་དུ་འཁྲིད་ཐུབ། སྲིད་འཛིན་ཨོ་བྷ་མས་ཨེ་སི་རལ་གཞུང་ལ་ལྟ་སྟངས་མི་ལེགས་པ་འཛིན་གྱིན་འདུག ཨེ་སི་རལ་དང་ང་རང་སྒེར་གཉིས་བར་འབྲེལ་ལམ་ཟབ་མོ་ཡོད། ཨེ་སི་རལ་གྱིས་ང་ལ་གཟེངས་རྟགས་མང་པོ་ཕྱིན་མྱོང་། གལ་ཏེ་ང་ལ་སྲིད་འཛིན་རྒྱལ་ཁ་ཐོབ་པ་ཡིན་ན། ངས་ཨེ་སི་རལ་དང་ཁྱིམ་མཚེས་རྒྱལ་ཁབ་ཁག་བར་ཞི་བདེ་བསྐྲུན་རྒྱུ་ཁོ་ན་ཡིན། ཞབས་ཞུ་དེ་ནི་མི་སྒེར་གྱི་མཚན་སྙན་ལ་དམིགས་པ་ཞིག་རྩ་བ་ནས་མིན། གཅིག་བྱས་ན་ལས་དོན་དེ་ནི་འཛམ་གླིང་སྟེང་གྲོས་ཆོད་དཀའ་ཤོས་ཤིག་ཡིན་སྟབས། ལས་དོན་དེ་ལེགས་འགྲུབ་འབྱུང་དཀའ་ནའང་ངས་ཨེ་སི་རལ་ལ་རྒྱལ་སྐྱོབ་བྱེད་ཀྱིན་ཡོད་ཅེས་ཨེ་སི་རལ་གྱི་ཁྱིམ་མཚེས་རྒྱལ་ཁབ་ཁག་ལ་དམའ་འབེབས་བྱས་ན་ཕན་ཐོགས་ཡོད་པ་མ་རེད། ངས་ཞི་བའི་གྲོས་ཆོད་ལ་བརྟེན་ནས་ཨེ་སི་རལ་དང་ཁྱིམ་མཚེས་རྒྱལ་ཁབ་པ་ལི་ས་ཊེན་བར་གྱི་འཁྲུག་རྩོད་ཞི་འཇགས་བཟོ་རྒྱུ་ཡིན།” ཞེས་བརྗོད་འདུག ཕྱི་ཟླ་ ༢ ཚེས་ ༡༣ ཉིན་ལྷོ་ཁ་རོ་ལེ་ན་ (Carolina) མངའ་སྡེའི་གཙུག་ལག་སློབ་ཆེན་ནང་གཏམ་བཤད་སྤེལ་སྐབས་ཁོང་གིས། “ངས་ནི་ཨེ་རན་ (Iran) དང་ཨ་རི་གཉིས་བར་གྱི་རྡུལ་ཕྲན་ཚོང་འབྲེལ་དེ་ཐབས་སྐྱོ་ཤོས་ཤིག་ཏུ་མཐོང་གི་ཡོད། ཨ་རིའི་གཞུང་གིས་ཨེ་རན་ལ་རྡུལ་ཕྲན་ཚོང་འབྲེལ་བྱས་པ་དེ་ནི་ངོ་ཚ་ཞིག་རེད།” ཅེས་བརྗོད་འདུག

ཊི་རུམ་ཕི་མཆོག་གིས་ཁ་ཆེ་དྲག་སྤྱོད་པ་དང་འབྲེལ་ཏེ་ཨུ་རུ་སུར་འཛིན་པའི་སྲིད་བྱུས་དང་། ལྷག་དོན་དུ་ཨུ་རུ་སུའི་སྲིད་འཛིན་ཕུ་ཊེན་སྐོར་ལ། ཕྱི་ཟླ་ ༡༡ ཚེས་ ༡༠ ཉིན་གཏམ་བཤད་སྤེལ་བའི་ནང་། “ཨུ་རུ་སུའི་སྲིད་འཛིན་ཕུ་ཊེན་ (Putin) གྱིས་སི་རི་ཡའི་ནང་གི་ཁ་ཆེ་འཇིགས་སྐུལ་བར་ (ISIS) འཐབ་རྩོད་བྱེད་འདོད་ཡོད་སྟབས། ངས་ཁོང་ལ་བརྒྱ་ཆ་བརྒྱ་རྒྱབ་སྐྱོར་བྱེད་རྒྱུ་ཡིན་ལ། ཁ་ཆེ་འཇིགས་སྐུལ་དྲག་སྤྱོད་པ་རྩ་མེད་བཟོ་བའི་སྲིད་ཇུས་ཐད་ནས། ང་ཚོས་ཨུ་རུ་སུ་དང་གཞི་མཐུན་གྱི་འབྲེལ་ལམ་ཞིག་རྙེད་ངེས་ཡིན། ངའི་ལངས་ཕྱོགས་འདིར་ངོ་རྒོལ་བྱེད་མཁན་ཞིག་ཡོང་གི་མ་རེད་སྙམ།” ཞེས་དང་། གལ་ཏེ་ང་ལ་སྲིད་འཛིན་རྒྱལ་ཁ་ཐོབ་པ་ཡིན་ན། ངས་ཨ་རིའི་ནང་གི་ཐོངས་མཆན་མེད་པའི་སི་རི་ཡའི་སྐྱབས་བཅོལ་བ་ཕྱིར་འཕུད་གཏོང་གི་ཡིན་ཞེས་སོགས་བརྗོད་འདུག

ཟླ་ ༩ ཚེས་ ༧ ཉིན་གྱི་སྲིད་འཛིན་འོས་མིའི་གཏམ་གླེང་སྐུབས། ཁོས་ཨུ་རུ་སུའི་སྲིད་འཛིན་ཕུ་ཊེན་དང་ཨ་རིའི་སྲིད་འཛིན་ཨོ་བྷ་མ་གཉིས་བསྡུར་ན། ཨོ་བྷ་མ་ལས་ཕུ་ཊེན་ལ་ཟིལ་ཤུགས་ཆེ་བ་དང་། ཨོ་བྷ་མ་དང་ཧེ་ལ་རེ་གཉིས་ཀྱི་སྲིད་དབང་འོག དེང་གི་ཨ་རིའི་མི་རབས་གསར་བ་ཉམས་རྒུད་ཐེབས་རྒྱུ་ཡིན་ཞིང་། ཉམས་རྒུད་དེ་ནི་ཨ་རིའི་ངོ་ཚ་ཡིན་པ་དང་། ད་ལྟའི་སྲིད་འཛིན་ཨོ་བྷ་མར་ཨ་རིའི་སྲིད་དབང་འཛིན་པའི་འཇོན་ནུས་གང་ཡང་མེད་སྐོར་བརྗོད་འདུག

ཕྱི་ཟླ་ ༡༢ ཚེས་ ༡༥ ཉིན་ཁོས། “ང་ཚོས་དང་པོ་ཁ་ཆེ་འཇིགས་སྐུལ་དྲག་སྤྱོད་པ་ (ISIS) རྩ་མེད་བཟོ་དགོས། དེ་རྩ་མེད་བཟོས་རྗེས་བསམ་བློ་གཏོང་དགོས། ཡིན་ནའང་ང་ཚོས་སི་རི་ཡའི་སྲིད་འཛིན་ཨ་ས་ཌི་ (Assad) ལ་འཐབ་འཛིང་བྱེད་མི་རུང་། ཨ་ས་ཌི་ལ་འཐབ་འཛིང་བྱེད་པ་ནི། དོན་ལ་ང་ཚོས་ཨུ་རུ་སུར་འཐབ་འཛིང་བྱས་པ་དང་གཅིག་མཚུངས་རེད། དེ་ལྟར་བྱས་ན་ཚོས་ང་ཚོའི་དམིགས་ཡུལ་ལས་ལོག་པ་ཞིག་ལ་འཐབ་འཛིང་བྱས་པ་རེད།” ཅེས་དང་། “ཁ་ཆེ་འཇིགས་སྐུལ་དྲག་སྤྱོད་པས་ (ISIS) ཨུ་རུ་སུའི་འགྲུལ་སྐྱེལ་གནམ་གྲུ་གཏོར་བ་ཡིན་སྟབས། ཕུ་ཊེན་ (Putin)ཁ་ཆེ་འཇིགས་སྐུལ་དྲག་སྤྱོད་པར་དགའ་བོ་ཡོད་པ་མ་རེད། ང་ཚོ་ཁ་ཆེ་འཇིགས་སྐུལ་དྲག་སྤྱོད་པ་རྩ་མེད་བཟོ་བའི་དམག་དོན་ནང་ཞུགས་པ་རེད་ལ་ཕུ་ཊེན་ཡང་ཞུགས་པ་རེད། རྒྱལ་སྤྱིའི་གཞུང་མང་ཚང་མ་ཞུགས་པ་རེད། ཡུ་ཁུ་རན་གྱི་གནད་དོན་ཐད་ང་ཚོར་འཇར་མན་གཙོས་པའི་རྒྱལ་ཁབ་ཁག་གི་ཤོག་ཁག་མང་པོའི་རྒྱབ་སྐྱོར་ཡོད། ང་ཚོས་དམག་འཁྲུག་དེ་ཅིའི་ཕྱིར་རྒྱག་དགོས་པ་ཡིན་ནམ། ངས་ཡུ་ཁུ་རན་གྱི་བདེ་འཇགས་ལ་སེམས་ཁུར་བྱེད་ཀྱིན་ཡོད། ཡུ་ཁུ་རན་གྱི་མཐའ་བསྐོར་བའི་རྒྱལ་ཁབ་མང་པོ་ཞིག་གིས་ཡུ་ཁུ་རན་སྲུང་སྐྱོབ་ཀྱི་ལས་དོན་ཅི་ཡང་སྒྲུབ་ཀྱི་མེད། ཡུ་ཁུ་རན་གྱིས་ང་ཚོར་ཞུ་འབོད་གཏོང་བཞིན་ཡོད། དེར་བརྟེན། ང་ཚོས་ཡུ་ཁུ་རན་སྲུང་སྐྱོབ་ལས་དོན་ལེགས་པོ་ཞིག་སྒྲུབ་དགོས་པ་ལས། ང་ཚོ་མུ་མཐུད་རྒྱལ་སྤྱིའི་ཉེན་རྟོག་པ་ཞིག་བྱ་མི་རུང་།” ཞེས་བརྗོད་འདུག

ཕྱི་ཟླ་ ༨ ཚེས་ ༡༡ ཉིན་སྐུ་ཞབས་ཊི་རུམ་ཕི་མཆོག་གིས། “མི་མང་གིས་སྲིད་འཛིན་ཨོ་བྷ་མར་བསྟོད་བསྔགས་གཏོང་གི་ཡོད། ཡིན་ནའང་བརྩི་བཀུར་མང་པོའི་ཁྲོད་དུ། དོན་དམ་ཁོང་ནི་ཁ་ཆེ་འཇིགས་སྐུལ་དྲག་སྤྱོད་པ་ (ISIS) རྩ་འཛུགས་བྱེད་མཁན་ཞིག་རེད།” ཅེས་བརྗོད་འདུག ཟླ་འདིའི་ཚེས་ ༩ ཚེས་ ༦ ཉིན། མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ཚན་པའི་འགན་འཛིན་ཝེལ་ཌིར་ (Wilders) ལགས་ཀྱིས། སྐུ་ཞབས་ཊི་རུམ་ཕི་ཡི་ཆབ་སྲིད་གླེང་ཕྱོགས་ཁྲོད་ཁོང་གིས། ཁ་ཆེ་ཡུལ་གྱར་བ་ཕྱིར་འཕུད་དང་རྒྱལ་མཚམས་བརྟན་སྲུང་བྱེད་རྒྱུ་དང་། ཨ་རིའི་ནང་གི་ཁ་ཆེའི་ཆོས་ལུགས་དང་ལྷ་ཁང་གི་སྒོ་རྒྱག་རྒྱུ་ཡིན་ལུགས་བཤད་པ་དེ་ནི་དགོད་བྲོ་བ་ཞིག་ཡིན་སྐོར་བརྗོད་འདུག

ཊི་རུམ་ཕི་མཆོག་གིས་ཨེ་ཤ་ཡ་ཞི་བདེ་རྒྱ་མཚོའི་མངའ་ཁུལ་གྱི་རྒྱལ་ཁབ་ཁག་གི་ཐད། ཟླ་ ༤ ཚེས་ ༡ ཉིན་སྐུ་ཞབས་ཊི་རུམ་ཕི་ཡིས། “ཤར་ཨེ་ཤེ་ཡའི་ཁྱིམ་མཚེས་རྒྱལ་ཁབ་ཁག་སྲུང་སྐྱོབ་ཡོང་ཆེད་ཨ་རིའི་གཞུང་གིས་ཉི་ཧོང་དང་ལྷོ་ཀོ་རི་ཡ་གཉིས་ལ་དྲག་ཆས་མང་པོ་མཁོ་འཚོང་བྱ་རྒྱུའི་བསམ་ཚུལ་བཏོན་པ་དང་། ཉི་ཧོང་དང་ལྷོ་ཀོ་རི་ཡའི་ཕྱི་འབྲེལ་བློན་ཆེན་གཉིས་ནས་ཨ་རིའི་བསམ་ཚུལ་དེ་ལ་ངོས་ལེན་མ་བྱས་པར་སྐྱོན་བརྗོད་བྱས་ཡོད།” ཅེས་དང་། ཕྱི་ཟླ་ ༢ ཚེས་ ༡༠ ཉིན་ཁོས། “རྒྱ་ནག་གིས་བྱང་ཀོ་རི་ཡར་སྟངས་འཛིན་བྱེད་དགོས་པ་དང་། ཨ་རིས་རྒྱ་ནག་ལ་སྟངས་འཛིན་བྱེད་དགོས། རྒྱ་ནག་གིས་བྱང་ཀོ་རི་ཡར་སྟངས་འཛིན་བྱས་ཏེ། ད་ལྟའི་རྡུལ་ཕྲན་བཟོ་སྐྲུན་དང་ཚོད་ལྟ་སོགས་ཀྱི་དཀའ་རྙོག་སེལ་དགོས། རྒྱ་ནག་གིས་ང་ཚོའི་ཟུངས་ཁྲག་འཇིབ་ནས་སྐམ་རིལ་དུ་བཏང་ཡོད། རྒྱ་ནག་གིས་ང་ཚོའི་དངུལ་ལོར་དང་ང་ཚོའི་ལས་གནས་བཙན་འཕྲོག་བྱས་སོང་། དེར་བརྟེན། ང་ཚོས་རྒྱ་ནག་གི་ཚོང་འབྲེལ་སྲིད་ཇུས་ལ་བཅོས་བསྒྱུར་གཏོང་དགོས།” ཞེས་དང་། “ང་ཚོས་རྒྱ་ནག་གི་ལྷོ་རྒྱུད་མཚོ་ཁུལ་དུ་དམག་དཔུང་མང་རུ་གཏོང་དགོས། དཔལ་འབྱོར་འཛུགས་སྐྲུན་ལ་བརྟེན་ནས། ང་ཚོས་རྒྱ་ནག་གི་དྲང་བདེན་མིན་པའི་ཁེ་ལས་ལ་ཉེས་ཆད་གཅོད་དགོས། ང་ཚོས་རྒྱ་ནག་གཞུང་གིས་དམངས་སྒོར་གྱི་འཛའ་ཐང་གཅོག་པ་དང་། ང་ཚོའི་གཞུང་འབྲེལ་དྲ་ལམ་ནང་ལྐོག་འཛུལ་བྱས་པའི་གནད་དོན་རིགས་བཀག་སྡོམ་བྱེད་དགོས།” ཞེས་བརྗོད་འདུག

ཊི་རུམ་ཕུ་མཆོག་གི་ཨ་རིའི་རྒྱལ་ནང་གི་དཔལ་འབྱོར་ཚོང་འབྲེལ་དང་མི་མང་གི་འཕྲོད་བསྟེན་སྐོར་ལ། ཁོས་ད་ལོའི་ཕྱི་ཟླ་ ༧ ཚེས་ ༢༡ ཉིན་གཏམ་བཤད་སྤེལ་བའི་ནང་། ཨ་རིའི་རྒྱལ་ཁབ་དེ་འཛམ་གླིང་སྟེང་གི་དཔྱ་ཁྲལ་མཐོ་ཤོས་ཀྱི་རྒྱལ་ཁབ་ཅིག་ཆགས་ཡོད་པ་དང་། གལ་ཏེ་ཁོང་ལ་སྲིད་འཛིན་རྒྱལ་ཁ་ཐོབ་པ་ཡིན་ན། ཁོང་གིས་ཨ་རིའི་མི་མང་གི་དཔྱ་ཁྲལ་ཉུང་དུ་གཏོང་བ་ནས་མེད་པ་བཟོ་རྒྱུ་དང་། ལོ་སྔོན་མའི་ཨ་རིའི་རྒྱལ་ཁབ་ཀྱི་བུ་ལོན་ཨ་སྒོར་ཐེར་འབུམ་ ༡༠ དང་། ད་ལོའི་བུན་དངུལ་ཨ་སྒོར་ཐེར་འབུམ་ ༡༩ ལྷག་ཡོད་པའི་དཀའ་ཁག་སེལ་རྒྱུ། ཨ་རིའི་མཐའ་མཚམས་ཁག་བརྟན་སྲུང་བྱས་ཏེ། ཨ་རིའི་མི་མང་ནང་ཐོངས་མཆན་མེད་པའི་འཇིགས་སྐུལ་དྲག་སྤྱོད་སྤེལ་མཁན་ཡུལ་གྱར་བ་ས་ཡ་ ༡༨༠༠༠༠ ཡོད་པ་ཚང་མ་ཕྱིར་འཕུད་བཏང་སྟེ། སྲིད་འཛིན་ཨོ་བྷ་མའི་སྐབས་འདིར་ད་ལོ་གཅིག་པུར་རྒྱལ་ནང་དུ་ཁྲིམས་འགལ་ནག་ཉེས་དང་འཇིགས་སྐུལ་དྲག་སྤྱོད་ཁྲོད་ཁྱོན་མི་མང་ ༣༤༨༠ ལྷག་གི་ཚེ་སྲོག་ཤོར་བ་ལྟ་བུའི་དཀའ་རྙོག་རིགས་སེལ་རྒྱུ་ཡིན་ལ། ཕྱིའི་ཚོང་ཟོག་ནང་འདྲེན་གྱི་ཁྲལ་ཇེ་མང་ལ་བཏང་སྟེ། ཨ་རིའི་རྒྱལ་ནང་གི་ཚོང་ཟོག་ཐོན་སྐྱེད་ཀྱི་ནུས་སྟོབས་གོང་སྤེལ་གཏོང་རྒྱུ་ཡིན་སྐོར་བརྗོད་འདུག

ཕྱི་ཟླ་ ༢ ཚེས་ ༢༥ ཉིན་ཁོང་གིས། ད་ལྟའི་ཨོ་བྷ་མའི་འཕྲོད་བསྟེན་ལྟ་སྐྱོང་སྲིད་ཇུས་ (ObamaCare) དེ་མི་མང་ལ་སྔར་ལས་ལྷག་པའི་མཐུན་འགྱུར་བསྐྲུན་ཐུབ་པའི་སྲིད་ཇུས་ཤིག་ཏུ་འཕོ་འགྱུར་གཏོང་དགོས། ཞེས་དང་། ཨ་རིའི་རྒྱལ་ནང་དུ་མེ་མདའ་ཉར་ཆོག་མིན་གྱི་རྩོད་གླེང་དེ་གཙོ་བོ་མིན་པར། མི་མང་གི་སེམས་ཁམས་འཕྲོད་བསྟེན་གཙོ་བོ་ཡིན་པ་དང་། ད་ལྟ་མི་མང་གི་སེམས་ཁམས་འཕྲོད་བསྟེན་ཞན་པའི་རྐྱེན་གྱིས། ཁོ་ཚོས་བློ་ཡུལ་ལས་འདས་པའི་དོན་རྐྱེན་བཟོ་སྲིད་སྟབས། གནད་དོན་དེ་སྔོན་འགོག་བྱ་ཆེད་མི་མང་གི་སེམས་ཁམས་འཕྲོད་བསྟེན་ཡར་རྒྱས་གཏོང་དགོས་པ་གཙོ་བོ་ཡིན་པ་དང་། ང་ཚོ་སྤྱི་མཐུན་ཚོགས་པའི་ངོས་ནས་ད་ལྟ་ཨོ་བྷ་མའི་འཕྲོད་བསྟེན་ལྟ་སྐྱོང་གི་སྲིད་ཇུས་འོག་ཉམ་ཐག་ནད་པ་མང་པོ་སྲིང་ལམ་ཁག་ཏུ་འཆི་རུ་འཇུག་འདོད་མེད། སྐོར་བརྗོད་འདུག

ཕྱི་ལོ་ ༩ ཚེས་ ༦ ཉིན་ཨ་རིའི་མཁའ་མཚོ་གཉིས་ཀྱི་དམག་སྤྱི་ཆེན་མོ་ ༨༨ གྱིས་སྤྱི་མཐུན་ཚོགས་པའི་སྲིད་འཛིན་འོས་མི་སྐུ་ཞབས་ཊི་རུམ་ཕི་ལ་རྒྱབ་སྐྱོར་གྱི་ཞུ་ཡིག་ཅིག་ཕྱི་བསྒྲགས་བྱས་པའི་ནང་། “ད་ལོའི་སྲིད་འཛིན་འོས་བསྡུ་ལ་བརྟེན་ནས་ཨ་རིའི་མི་མང་ལ་དུས་ཡུན་རིང་བོའི་དམག་དོན་སྲིད་ཇུས་དང་། དེའི་གནས་སྟངས་ལ་འཕོ་འགྱུར་གཏོང་བའི་ཁ་ཚ་དགོས་གཏུགས་ཀྱི་གོ་སྐབས་ཤིག་སྤྲད་ཡོད། ང་ཚོ་ཨ་རིའི་དམག་སྤྱི་ཟུར་བ་ཡིན་པའི་ཆ་ནས། ང་ཚོས་ཨ་རིའི་དམག་དོན་སྲིད་ཇུས་ལ་འཕོ་འགྱུར་གཏོང་རྒྱུ་དེ་ནི་འཛམ་གླིང་ཡུལ་གྲུ་གང་ས་ནས་འབྱུང་བཞིན་པའི་འཇིགས་སྐུལ་དྲག་སྤྱོད་ཀྱི་གནད་དོན་དང་། ལྷག་པར་དུ་ཨ་རིའི་དམག་དོན་སྲིད་ཇུས་ཀྱི་དཀའ་རྙོག་བཅས་ཀྱི་ནང་མ་ཚུད་པའི་གང་ཟག་ཅིག་གིས་ད་གཟོད་ཨ་རིའི་དམག་དོན་སྲིད་ཇུས་ལ་འཕོ་འགྱུར་གཏོང་ཐུབ་པར་ཡིད་ཆེས་བྱེད་ཀྱིན་ཡོད། དེར་བརྟེན། ང་ཚོས་སྤྱི་མཐུན་ཚོགས་པའི་སྲིད་འཛིན་འོས་མི་སྐུ་ཞབས་ཊི་རུམ་ཕི་མཆོག་ལ་རྒྱབ་སྐྱོར་བྱེད་ཀྱིན་ཡོད།

འདས་པའི་ལོ་ངོ་བརྒྱད་རིང་ཨ་རིའི་དམག་དོན་རྟོགས་ཞིབ་ཀྱི་སྟོབས་ཤུགས་ཆུང་དུ་བཏང་བ་དང་། དམག་དཔུང་གི་འགྲོ་གྲོན་ཉུང་དུ་བཏང་བ་བཅས་ལ་བརྟེན་ཏེ། ཨ་རིའི་དམག་མི་ཚོས་སོ་སོའི་འཇོན་ནུས་ལ་དཔག་པའི་ལས་དོན་གང་ཡང་བསྒྲུབས་ཐུབ་མེད། དེ་དང་མཉམ་དུ་དགྲ་བོའི་སྟོབས་ཤུགས་ཇེ་ཆེར་ཕྱིན་ཏེ། ཁོ་ཚོར་ཨ་རིའི་རྒྱལ་ཁབ་གཅིག་པུ་ཙམ་མ་ཟད། ད་དུང་རང་དབང་ལུང་པ་གཞན་ལའང་འཇིགས་སྐུལ་བཙན་འཛུལ་བྱེད་པའི་གོ་སྐབས་མང་པོ་སྤྲད་ཡོད། ང་ཚོས་གནད་དོན་དེ་ནི་ཉེན་ཁ་ཆེན་པོ་ཞིག་ཏུ་མཐོང་གི་ཡོད་ལ། གལ་ཏེ་ཨ་རིའི་གཞུང་གིས་མུ་མཐུད་དེ་སྔའི་དམག་དོན་སྲིད་ཇུས་རྒྱུན་སྐྱོང་བྱས་ན། མ་འོངས་པར་གནད་དོན་དེ་ད་ལྟའི་གནས་སྟངས་ལས་སྡུག་ཏུ་འགྲོ་ངེས་རེད། རྒྱུ་མཚན་དེ་ལ་བརྟེན་ནས་ང་ཚོས་སྐུ་ཞབས་ཊི་རུམ་ཕི་ལ་རྒྱབ་སྐྱོར་བྱེད་ཀྱི་ཡོད་ལ། ཁོང་ལ་སྲིད་འཛིན་རྒྱལ་ཁ་ཐོབ་ན་ཁོས་ཨ་རིའི་དམག་དཔུང་གི་སྟོབས་ཤུགས་བསྐྱར་གསོ་དང་མཐའ་མཚམས་བརྟན་སྲུང་། ཁ་ཆེ་དྲག་སྤྱོད་པར་འགོག་རྒོལ། རྒྱལ་ནང་གི་སྒྲིག་ཁྲིམས་སླར་གསོ་གཏོང་ངེས་ཡིན་སྟབས། ཨ་རིའི་མི་མང་གིས་སྐུ་ཞབས་ཊི་རུམ་ཕི་མཆོག་ལ་རྒྱབ་སྐྱོར་ཡོང་བའི་འབོད་སྐུལ་ཞུ་བཞིན་ཡོད།” ཅེས་བརྗོད་འདུག

ཕྱི་ཟླ་ ༨ ཚེས་ ༦ ཉིན་ཨ་རིའི་འདྲ་དཔར་ཆེན་པོ་ཞེས་པའི་དྲ་ཚིགས་སྟེང་ཊི་རུམ་ཕི་མཆོག་གི་ས་ཁང་འཛུགས་སྐྲུན་སྐོར་ལ་སྐྱོན་གནས་དོན་ཚན་ ༡༢ བཀོད་ཡོད་པའི་ནང་། སྐུ་ཞབས་ཊི་རུམ་ཕུ་མཆོག་གིས་ཊི་རུམ་ཕུ་(Trump)ཞེས་པའི་སྡེ་ཚོགས་ཀྱི་མིང་ཐོག་ནས་ས་ཁང་ཉོ་སྡུད་དང་། ཁང་བརྩེགས་འཛུགས་སྐྲུན་བྱས་པའི་ལས་རིམ་ཁྲོད། ས་བདག་ལ་འབོག་མའི་དངུལ་བུན་ཕོན་ཆེན་པོ་ཆད་ཡོད་པ་དང་། ཁྲིམས་མཐུན་མིན་པའི་ས་ཁང་འཛུགས་སྐྲུན་བྱས་པ། དེ་བཞིན། མི་གཞན་དང་མ་རྐང་མཉམ་འཛུགས་བྱས་མཁན་དག་ལ་དངུལ་བུན་སྤྲད་མེད་པ། ཉལ་ཐའི་ནག་ཚོང་ལ་འབྲེལ་བ་ཡོད་པ་སོགས་ཀྱི་གནས་ཚུལ་འཁོད་འདུག

ཨ་རིའི་ནེའུ་ཡོག་དུས་བབ་ཀྱིས་ ༨ ཚེས་ ༡༢ ཉིན་སྤེལ་བའི་གནས་ཚུལ་ནང་། སྐུ་ཞབས་ཊི་རུམ་ཕི་ལ་རྒྱབ་སྐྱོར་བྱེད་མཁན་མི་མང་གིས་སྐུ་ཞབས་ཊི་རུམ་ཕི་ཡི་ཆབ་སྲིད་ལངས་ཕྱོགས་ཨ་རིའི་རྒྱལ་ནང་གི་ཁ་ཆེ་ཡུལ་གྱར་བ་ཕྱིར་འཕུད་བཏང་སྟེ། ཨ་རི་དང་མེག་སི་ཁོའི་མཐའ་མཚམས་བརྟན་སྲུང་བྱེད་རྒྱུའི་ཐད་རྒྱབ་སྐྱོར་བྱེད་ཀྱིན་ཡོད་ནའང་། ཁག་ཅིག་གིས་ཨ་རིའི་ནང་གི་དྲག་སྤྱོད་ཀྱི་དཀའ་རྙོག་དེ་ཁ་ཆེ་མི་རིགས་ཙམ་མིན་པར། མི་རིགས་དཀར་ནག་བར་གྱི་རྩོད་གླེང་ཁྲོད་དུའང་མི་གསོད་ཁྲག་སྦྱོར་མང་པོ་ཡོང་གི་ཡོད་སྟབས། སྐུ་ཞབས་ཊི་རུམ་ཕི་ཡིས་ཁ་ཆེ་ཡུལ་གྱར་བ་ཚང་མ་འཇིགས་སྐུལ་དྲག་སྤྱོད་པ་ཡིན་པའི་ལྟ་ཚུལ་དེར་མོས་མཐུན་བྱེད་ཀྱི་མེད། གཞན། སྤྱི་མཐུན་ཚོགས་པར་རྒྱབ་སྐྱོར་བྱེད་མཁན་མི་མང་བརྒྱ་ཆ་ ༤༣ གྱིས་སྐུ་ཞབས་ཊི་རུམ་ཕི་ཡི་ཆབ་སྲིད་ལངས་ཕྱོགས་ལ་རྒྱབ་སྐྱོར་དང་། མི་མང་བརྒྱ་ཆ་ ༣༩ ངོ་རྒོལ་བྱེད་ཀྱི་ཡོད་པ་དང་། དམངས་གཙོ་ཚོགས་པའི་ཁོངས་གཏོགས་ནས་སྐུ་ཞབས་ཊི་རུམ་ཕི་ལ་རྒྱབ་སྐྱོར་བྱེད་མཁན་མི་མང་བརྒྱ་ཆ་ ༧ དང་། ངོ་རྒོལ་དང་བརྒྱ་ཆ་ ༨༡ བཅས་བྱུང་ཡོད། དེ་བཞིན། རང་དབང་ཚོགས་སྡེ་ཁག་གི་མི་མང་བརྒྱ་ཆ་ ༡༧ གྱིས་ཊི་རུམ་ཕི་ཡི་ཆབ་སྲིད་ལངས་ཕྱོགས་ལ་རྒྱབ་སྐྱོར་དང་། བརྒྱ་ ༤༩ ཡིས་ངོ་རྒོལ་བྱེད་ཀྱི་ཡོད་འདུག

ཕྱི་ལོ་ ༢༠༡༦ ཟླ་ ༡༡ ཚེས་ ༨ ཉིན་ཨ་རིའི་སྐབས་ ༥༨ པའི་དངོས་གཞིའི་སྲིད་འཛིན་འོས་བསྡུ་ཆེན་མོ་ཚུགས་རྒྱུ་ཡིན་པ་ལྟར། སྐབས་དེར་དམངས་གཙོ་ཚོགས་པའི་སྲིད་འཛིན་འོས་མི་ལྕམ་ཧེ་ལ་རེ་དང་སྤྱི་མཐུན་ཚོགས་པའི་སྲིད་འཛིན་འོས་མི་སྐུ་ཞབས་ཊི་རུམ་ཕི་རྣམ་པ་གཉིས་བར་དངོས་གཞིའི་སྲིད་འཛིན་འོས་འགྲན་གནང་རྒྱུ་རེད།

གསར་འགོད་པ། པདྨ་རྒྱལ།