རྒྱལ་ཡོངས་འཐུས་མི་ ༤༥ ཡི་གོ་གནས་རྩིས་མེད་ཀྱིས་ཞིབ་བཤེར་བྱེད་ཀྱི་འདུག

རྒྱ་ནག་ལའུ་ལིན་ཞིང་ཆེན་རྒྱལ་ཡོངས་འཐུས་མི་ ༤༥ ཡིས་ལྐོག་རྔན་སྤྲད་དེ་གོ་གནས་བླངས་བའི་ནག་ཉེས་འོག་འཐུས་མིའི་གོ་གནས་རྩིས་མེད་བཏང་བ་དང་ལའུ་ལིན་ཞིང་ཆེན་འཐུས་མི་ ༥༢༣ གྱིས་ལས་མཚམས་འཇོག་དགོས་པའི་ཐག་གཅོད་བྱས་འདུག

ཉེ་སྔོན་རྒྱ་ནག་གཞུང་གིས་དམིགས་བསལ་ལྟ་ཞིབ་ཚོགས་ཆུང་ཆེད་འཛུགས་བྱས་ཏེ། དམར་ཤོག་ཚོགས་པའི་མཐོ་རིམ་དཔོན་རིགས་ནང་ཁུལ་དུ་༼བརྡ་ཁྱབ༽ཟེར་བའི་ཡིག་ཆ་ཞིག་འགྲེམ་གྱིན་ཡོད་པ་དང་། ད་ལྟའི་བར་བོད་ཀྱི་ས་ཁུལ་མཚོ་སྔོན་སོགས་ཚུད་པའི་ཞིང་ཆེན་བཅུ་གྲངས་ཤིག་གི་ནང་བརྡ་ཁྱབ་དེ་བཀྲམ་ཚར་ཡོད་པ་དང་། དེ་རིང་ཞིན་ཐང་རིན་དྲ་བའི་ཐོག་གནས་ཚུལ་སྤེལ་བ་ལྟར་ན། ཟླ་འདིའི་ཕྱི་ཚེས་ ༡༣ ཉིན་རྒྱལ་ཡོངས་དམངས་འཐུས་རྒྱུན་ལས་ལྷན་ཚོགས་ནས་དམིགས་བསལ་ཚོགས་འདུ་བསྡུས་ཏེ། རྒྱ་ནག་ལའུ་ལིན་ཞིང་ཆེན་གྱི་རྒྱལ་ཡོངས་འཐུས་མི་ཁྱོན་ ༡༠༢ ཡོད་པའི་ནང་ནས་རྒྱུན་ལས་ ༣༨ ཚུད་པའི་འཐུས་མི་ ༤༥ ཡིས། ལྐོག་རྔན་སྤྲད་དེ་གོ་གནས་བླངས་བའི་ནག་ཉེས་འོག་འཐུས་མིའི་གོ་གནས་རྩིས་མེད་བཏང་ཡོད་པ་དང་། ལྐོག་རྔན་དང་འབྲེལ་བ་ཡོད་པའི་དོགས་གཞིའི་འོག་ཞིང་ཆེན་གྱི་འཐུས་མི་ ༥༢༣ གྱིས་ལས་མཚམས་འཇོག་དགོས་པའི་ཐག་གཅོད་བྱས་ཡོད་པ་མ་ཟད། གོ་གནས་རྩིས་མེད་བཏང་བའི་འཐུས་མི་ཚོར་ཞིབ་བཤེར་བྱེད་བཞིན་ཡོད་པ་དང་། ཁོ་ཚོ་མང་ཆེ་བ་ཞིག་དངུལ་རྩ་དང་བཟོ་ཚོང་ཁེ་ལས་ཆེ་ཁག་གཉེར་མཁན་ཡིན་པ་རེད།

ཐེངས་འདིའི་ལའུ་ལིན་ཞིང་ཆེན་གྱི་ཆེད་དམིགས་ཞིབ་བཤེར་ཁྲོད་དོགས་ཡོད་མི་སྣ་ཧ་ཅང་མང་བ་དང་། དངུལ་དངོས་ཕོན་ཆེ་བ། གནད་དོན་རྙོག་ཟིང་ཆེ་བའི་རྐྱེན་གྱིས་ལའུ་ལིན་གྱི་ཞིང་ཆེན་རིམ་པ་དང་གྲོང་ཁྱེར་རིམ་པ། རྫོང་རིམ་པའི་འཐུས་མི་ཚང་མའི་ཕྱི་སྐྱོད་ལག་འཁྱེར་ཡར་བསྡུས་ཏེ་འགྲོ་འོང་ལ་སྟངས་འཛིན་བྱེད་བཞིན་ཡོད་པ་མ་ཟད། ཧྲིན་ཡང་གྲོང་ཁྱེར་གྱི་གཞུང་ཞབས་པ་ཚང་མའི་ཕྱི་སྐྱོད་ལག་འཁྱེར་ངེས་པར་དུ་ཡར་བསྡུས་ཏེ་འགྲོ་འོང་ལ་སྟངས་འཛིན་ནན་མོ་དགོས་པའི་བཀའ་རྒྱ་བསྒྲགས་ཡོད་འདུག་ལ། ད་ལན་གནས་དབྱུང་བཏང་བའི་འཐུས་མིའི་གྲངས་འབོར་ཧ་ཅང་མང་པོ་ཡིན་སྟབས། ལའུ་ལིན་ཞིང་ཆེན་དམངས་འཐུས་རྒྱུན་ལས་ལྷན་ཚོགས་ནས་ཚོགས་འདུ་བསྡུས་ཏེ་ལས་དོན་རྒྱུན་སྐྱོང་བྱེད་ཐབས་མེད་པ་ཆགས་ཡོད་འདུག

རྒྱ་ནག་གཞུང་འབྲེལ་ཚེ་ཞིན་དྲ་བའི་ཐོག ལའུ་ལིན་ཞིང་ཆེན་རྒྱལ་ཡོངས་དམངས་འཐུས་ནང་ལྐོག་རྔན་སྤྲོད་ལེན་བྱེད་མཁན་ཧ་ཅང་མང་བ་དང་། གོང་འོག་རིམ་པ་ཚང་མར་ལྐོག་རྔན་སྤྲོད་ལེན་གྱིས་ཕན་ཚུན་སྲུང་སྐྱོབ་བྱས་ཏེ། གཅིག་རྒྱས་ཀུན་རྒྱས་དང་གཅིག་ཉམས་ཀུན་ཉམས་ཀྱི་ཁེ་ཕན་ཚོགས་སྡེ་ཆེན་པོ་ཆགས་ཏེ་ཡུན་རིང་ཕྱིན་ཡོད་པ་དང་། ཐེངས་འདིར་དབུས་གཞུང་དང་ལའུ་ལིན་སྲིད་གཞུང་གཉིས་མཉམ་འབྲེལ་གྱི་ཐོག་ནས་ཆེད་འཛུགས་བྱས་པའི་ཚོགས་ཆུང་གི་ཞིབ་བཤེར་ལས་གཞི་དེ་འཆར་ལོའི་ཕྱི་ཟླ་ ༦ པའི་ནང་ཙམ་ལ་མཇུག་བསྡུ་ཐུབ་རྒྱུ་ཡིན་སྐོར་བརྗོད་ཡོད་པ་རེད།

ཞི་ཅིན་ཕིན་དང་ཝང་ཅི་ཧྲན་གྱི་ལྐོག་ཟ་རུལ་སུངས་ལ་རྒོལ་རྡུང་གཏོང་བའི་སྲིད་བྱུས་འོག་ལའུ་ལིན་ཞིང་ཆེན་ནང་ཡུན་རིང་དབང་བསྒྱུར་བྱེད་མཁན་ལི་ཁྲང་ཁྲིན་དང་ཀྲུའུ་ཡོང་ཁང་། པའོ་ཞི་ལེ། ཞི་ཚེ་ཧུའུ། ཝང་མིན། ཁྲིན་ཀྲིན་གོ་སོགས་ཅང་ཙེ་མིན་ཚོགས་པའི་མཐོ་རིམ་དཔོན་རིགས་ཚོ་རིམ་པ་བྱས་ཏེ་ཕམ་པར་བརྒྱབ་ཡོད་པ་དང་། འདི་ལོ་གཅིག་པུར་ལའུ་ལིན་ཞིང་ཆེན་གྱི་དམར་ཤོག་དྲུང་ཆེ་ཟུར་པ་ཝང་མིན་ དང་ཞིང་ཆེན་དམངས་འཐུས་རྒྱུན་ལས་ལྷན་ཚོགས་ཀྱི་མགོ་འཁྲིད་གཞོན་པ་སོགས་ཞིང་ཆེན་རིམ་པའི་མཐོ་རིམ་དཔོན་རིགས་ ༤ ལྐོག་རྔན་དང་འབྲེལ་བ་ཡོད་པའི་ནག་ཉེས་འོག་འཛིན་བཟུང་བྱས་ཡོད་པ་དང་། ཐེངས་འདིར་བཀྲམ་པའི་བརྡ་ཁྱབ་ཟེར་བ་དེའི་ནང་དུའང་ལའུ་ལིན་གྱི་ས་གནས་གྲོང་ཁྱེར་རིམ་པ་དང་ཞིང་ཆེན་རིམ་པའི་དཔོན་རིགས་ ༡༠༠ ལྷག་གི་མིང་ཐོ་ཚུད་ཡོད་སྐོར་བརྗོད་འདུག

གནད་དོན་དེའི་ཐད་སྲིད་དོན་དབྱེ་ཞིབ་པ་ཚོས། ལའུ་ལིན་ཞིང་ཆེན་གྱི་ཐོན་སྐྱེད་སྤྱི་བསྡོམས་དུས་ཡུན་རིང་པོར་རྒྱལ་ཡོངས་ཀྱི་ཆེས་དམའ་ཤོས་ཆགས་ཡོད་ཀྱང་། འདི་ལོར་ལོ་རྒྱུས་ནང་བྱུང་མ་མྱོང་བའི་མྱུར་ཚད་མཐོན་པོས་འཕེལ་རྒྱས་ཕྱིན་ཡོད་སྟབས། པེ་ཅིན་གཞུང་གིས་ལའུ་ལིན་གྱི་ལྐོག་རྔན་དང་འབྲེལ་བའི་གནད་དོན་ཐད་འཐབ་འཛིང་བྱེད་པའི་འགུལ་སྐྱོད་ཆེན་པོ་ཞིག་མགོ་བརྩམས་ཡོད་པ་དང་། འགུལ་སྐྱོད་འདིའི་དམིགས་ཡུལ་ནི་རུལ་སུངས་ལ་རྒོལ་རྡུང་གཏོང་འདོད་པ་ཙམ་མིན་པར་གོ་སྐབས་བཟུང་སྟེ་ལའུ་ལིན་གྱི་དཔོན་གནས་ཆབ་སྲིད་ཁོར་ཡུག་བཅོས་བསྒྱུར་བྱས་ཏེ། འཆར་ལོའི་ཏང་གི་ཚོགས་ཆེན་ ༡༩ པའི་ཐོག་ལས་མི་བཀོད་འདོམས་ལ་ལམ་ག་བཟོ་བ་དང་། ཅང་ཙི་མེན་ལ་ལག་པ་འཆིང་ཐེངས་གཅིག་གིས་རྨེག་མེད་དུ་གཏོང་ཐབས་དང་། གཏིང་ཟབ་ཀྱི་ཆབ་སྲིད་བཅོས་བསྒྱུར་སོགས་ལས་དོན་ཆེན་པོ་རྣམས་ལེགས་འགྲུབ་ཡོང་ཐབས་བྱེད་བཞིན་ཡོད་སྐོར་རྗོད་ཀྱི་འདུག

གསར་འགོད་པ། པདྨ་མཚོ།