ཨ་རིའི་བུད་མེད་ཚོས་དམངས་གཙོ་ཚོགས་པའི་སྲིད་འོས་མི་ལྕམ་ཧེ་ལ་རེ་མཆོག་ལ་འོས་ཤོག་བླུག་ན། ད་ལྟའི་ཨ་རིའི་སྤྱི་ཚོགས་ལས་རིགས་ཁྲོད་ཕོ་མོ་འདྲ་མཉམ་མིན་པའི་དཀའ་རྙོག་སེལ་ཐུབ་པའི་བསམ་ཚུལ་བཏོན་འདུག
ཟླ་འདིའི་ཕྱི་ཚེས་ ༩ ནས་ ༡༣ བར་ནེའུ་ཡོག་དུས་བབ་གསར་ཁང་གིས་ཁ་པར་སྐུད་ལམ་ནས། ཨ་རིའི་བུད་མེད་ཀྱི་ཆབ་སྲིད་ལྟ་ཚུལ་དང་མི་ཚེ་སྐྱེལ་སྟངས། སྤྱི་ཚོགས་ནང་གི་བུད་མེད་ཀྱི་བྱེད་སྒོ་ཁག་གི་ཐོག་འཛིན་པའི་ལྟ་ཚུལ་སོགས་ཀྱི་ཐད་བསམ་ཚུལ་བསྡུ་ལེན་བྱས་སྐབས། ཨ་རིའི་བུད་མེད་མང་པོ་ཞིག་གིས་འདས་པའི་ལོ་ངོ་ ༢༠ རིང་ཨ་རིའི་སྤྱི་ཚོགས་ནང་ཕོ་མཆོག་མོ་དམན་གྱི་འདུ་ཤེས་ཆུང་དུ་ཕྱིན་ཡོད་ནའང་། མི་རིགས་དབྱེ་འབྱེད་ཀྱི་དཀའ་རྙོག་ད་དུང་སེལ་ཐུབ་མེད་པ་དང་། ཨ་རིའི་བུད་མེད་ཚོས་གཉེན་སྒྲིག་གི་ཐོབ་ཐང་ལས་ཨ་མའི་ཐོབ་ཐང་གཙིགས་སུ་འཛིན་ཞིང་། ཁོ་མོ་ཚོས་ཨ་རིའི་སྤྱི་ཚོགས་ཀྱི་ལས་སྒོ་ཁག་ཏུ་བུད་མེད་ཚོར་ཆགས་སྲེད་བརྙས་བཅོས་ཤུགས་ཆེ་བ་མ་ཟད། ད་དུང་བུད་མེད་ཚོ་སྤྱི་ཚོགས་ལས་སྒོར་ཞུགས་པའི་གོ་སྐབས་དང་གླ་འབབ་ཀྱི་ཁེ་ཐོབ་འདྲ་མཉམ་མིན་པའི་བསམ་ཚུལ་བཏོན་ཡོད་འདུག
ཨ་རིའི་སྤྱི་ཚོགས་ནང་ཕོ་མོ་འདྲ་མཉམ་མིན་པ་དང་མི་རིགས་འདྲ་མཉམ་མིན་པའི་གནད་དོན་དེའི་སྟེང་ནས་དམངས་གཙོ་ཚོགས་པའི་སྲིད་འཛིན་འོས་མི་ལྕམ་ཧེ་ལ་རེ་མཆོག་ལ་རྒྱབ་སྐྱོར་བྱེད་མཁན་མི་གྲངས་བརྒྱ་ཆ་ ༥༢ དང་སྤྱི་མཐུན་ཚོགས་པའི་སྲིད་འཛིན་འོས་མི་སྐུ་ཞབས་ཊི་རུམ་ཕི་མཆོག་ལ་རྒྱབ་སྐྱོར་བྱེད་མཁན་མི་གྲངས་བརྒྱ་ཆ་ ༣༩ ཟིན་གྱི་ཡོད་འདུག
ཨ་རིའི་བུད་མེད་བརྒྱ་ཆ་ ༥༥ ཡིས་སྐུ་ཞབས་ཊི་རུམ་ཕི་ཡིས་བུད་མེད་ལ་བརྩི་བསྐུར་མི་བྱེད་པར་འདོད་པ་དང་། བུད་མེད་བརྒྱ་ཆ་ ༡༡ གྱིས་ཊི་རུམ་ཕི་མཆོག་ལ་འོས་ཤོག་བླུག་ན་བུད་མེད་ལ་ཁེ་ཕན་ཆེ་བར་བསམ་གྱི་ཡོད་ནའང་། བུད་མེད་བརྒྱ་ཆ་ ༤༥ ཡིས་ལྕམ་ཧེ་ལ་རེ་མཆོག་ལ་འོས་ཤོག་བླུག་ན་བུད་མེད་ཚོར་ཁེ་ཕན་ཆེ་བ་ཡོད་པའི་བསམ་ཚུལ་བཏོན་འདུག
གཞན། ཨ་རིའི་བུད་མེད་བརྒྱ་ཆ་ ༤༨ ཀྱིས་དེང་དུས་ཀྱི་ཨ་རིའི་སྤྱི་ཚོགས་ལས་རིགས་ཁྲོད་སྐྱེས་མ་ལས་སྐྱེས་པ་ཚོར་ཁེ་ཐོབ་མང་པོ་རག་གི་ཡོད་པར་འདོད་པ་དང་། མཐོ་སློབ་འགྲིམ་ཞིང་ད་ཆར་རང་ལོ་ ༣༠ སོན་པའི་ཨ་རིའི་བུད་མེད་མང་ཆེ་བའི་ཡོང་འབབ་ཨ་སྒོར་ཆིག་འབུམ་མ་ཟིན་ཙམ་ཡིན་པ་དང་། མི་ནག་གི་བུད་མེད་ཚོས་འཚོ་ཐབ་ཀྱི་ཁེ་ཐོབ་ཆེ་ཤོས་དེ་སྐྱེས་པ་ཚོས་བདག་འཛིན་བྱེད་ཀྱི་ཡོད་པའི་བསམ་ཚུལ་བཏོན་འདུག ཡང་བུད་མེད་བཞི་ཆ་གསུམ་གྱིས་དེང་གི་ཨ་རིའི་རྒྱལ་ནང་དུ། ཕོ་མོ་གཉིས་ཀྱི་ལས་ཀ་གཅིག་པ་ཡིན་ནའང་། ལས་ཀའི་ཡོང་འབབ་གཅིག་མཚུངས་མིན་པའི་ལྟ་ཚུལ་བཏོན་འདུག
ཐེངས་འདིའི་བསམ་ཚུལ་བསྡུ་ལེན་སྐབས། ཨ་རིའི་རུ་གྷར་སི་གཙུག་ལག་སློབ་ཆེན་ (Rutgers University) གྱི་བུད་མེད་ལས་དོན་ཚན་པའི་འགན་འཛིན་ལྕམ་ཊི་རི་ས་བྷོ་ཡིར་ (Teresa Boyer) ཟེར་བ་ཞིག་གིས། ཁོ་ཚོས་ཨ་རིའི་སྤྱི་ཚོགས་ལས་རིགས་ཁྲོད་ཕོ་མོ་འདྲ་མཉམ་མིན་པའི་དཀའ་རྙོག་སེལ་ཐབས་སུ་འབད་བརྩོན་བྱས་ཀྱང་། ལྡོག་ཕྱོགས་ཀྱི་དཀའ་རྙོག་དེ་ད་དུང་སེལ་ཐུབ་མེད་སྐོར་བརྗོད་འདུག
མིའི་རིགས་རིག་པའི་ཆེད་མཁས་པ་ལྕམ་རྗོ་སི་ཁོ་ལི་མན་ (Joyce Coleman) ཟེར་བ་ཞིག་གིས། ཁོ་མོ་ཨ་རིའི་ལྷོ་རྒྱུད་མངའ་སྡེ་མེ་སེ་སེ་ཕེ་ (Mississippi) ནས་འཚར་ལོང་བྱུང་བ་དང་ད་ལྟ་ལོ་ ༧༡ ཡིན་ཞིང་། ཁོང་མོས་ཚད་མི་འདྲ་བའི་མི་རིགས་དབྱེ་འབྱེད་ཀྱི་དཀའ་སྡུག་མང་པོ་མྱངས་པ་དང་། གནད་དོན་དེ་ད་དུང་སེལ་ཐུབ་མེད་སྟབས། ནམ་རྒྱུན་གཞན་གྱི་བརྙས་བཅོས་ལ་བཟོད་བསྲན་གྱིས་འཚོ་དགོས་བྱུང་ཡོད་སྐོར་བརྗོད་འདུག
གསར་འགོད་པ། པདྨ་རྒྱལ།
ལྕམ་ཧེད་ལ་རེ་ཡིས་མི་ལོ་སུམ་ཅུ་མ་ཟིན་ཙམ་ལ་ཨ་རིའི་སྲིད་གཞུང་གོ་གནས་མཐོ་ཤོས་ནང་ལས་ཀ་ཞབས་ཞུ་བསྒྲུབས་མྱོང་ཡོད་པ་དང་དེའི་རིང་མོས་བུད་མེད་ཀྱི་ཐོབ་ཐོང་འདི་གོང་འཕེལ་བཏང་ཟེར་བ་མིག་སྟོན་རྒྱུ་མེད་པ་རེད།
ཨ་རི་ནི་མ་རྩ་རིང་ལུགས་ཀྱི་དམངས་གཙོ་རྒྱལ་ཁབ་ཡིན་པས་ཕོ་མོ་འདྲ་མཉམ་ཟེར་བ་ཡོང་མི་ཐུབ་ལ།དེ་འདྲ་འདྲ་མཉམ་ཞིག་དགོས་ཚེ་ཨ་རིའི་གཞུང་གི་དམངས་གཙོ་རྩ་དོན་མ་རྩ་རིང་ལུགས་ཀྱི་དམངས་གཙོ་ནས་སྤྱི་ཚོགས་རིང་ལུགས་ཀྱི་དམངས་གཙོ་ལ་བསྒྱུར་བཅོས་གཏོང་གི་དགོས། དེ་ལྟར་བྱུང་ཚེ་དེང་སང་གི་ཨ་རི་ཟེར་བ་དེ་དམག་སྟོབས་དང་དཔལ་འབྱོར།སྲིད་དོན་གང་ཅི་ཕྱོགས་ནས་ཉམས་རྒུད་དུ་འགྲོ་ངེས་རེད།
དུས་བབ་གསར་ཁང་གིས་ངེས་པར་དུ་ཨ་རིའི་སྲིད་འཛིན་འོས་བསྡུ་གནས་ཚུལ་ཐོག་གསར་འགྱུར་རྒྱས་པ་འགོད་དགོས། དཔེར་ན།དེངསང་འགྲོ་བཞིན་པའི་སྲིད་འཛིན་འོས་མི་གཉིས་ཀྱི་ཨ་རིའི་དམག་དོན། ཕྱི་འབྲེལ་སྲིད་བྱུས། རྒྱལ་དོན་བདེ་འཇགས། རྒྱལ་དོན་དཔྱ་ཁྲལ།བདག་ཉར་མཚོན་ཆ། འཇིགས་སྐུལ་པ་འཛིན་བཟུང་འདྲི་ཞིབ།ཨ་རིའི་ནང་ཁྲིམས་འགལ་ཡིག་ཆ་མེད་པའི་སྐྱབས་བཅོལ་བ་ས་ཡ་༡༡། འཕྲོད་བསྟེན།ཤེས་ཡོན་བཅས་་ཀྱི་གནད་དོན་ཐོག་ལངས་ཕྱོགས་ཅི་ཞིག་ཡོད་མེད་སྐོར་འབྲི་ཐུབ་དགེ་ཕན་ཤིན་ཏུ་ཆེ།