ངག་དབང་རབ་རྒྱལ་ལཊ་ཁྲིམས་ཞིབ་པ་གཞན་དུ་བདམས།

དེ་རིང་སྔ་དྲོར་གྲོས་ཚོགས་ནང་འོས་ཤོག་འཕངས་བ་བརྒྱུད་ཤེས་རིག་དྲུང་ཆེ་ངག་དབང་རབ་རྒྱལ་ལགས་བོད་མིའི་སྒྲིག་འཛུགས་ཀྱི་ཆེས་མཐོའི་ཁྲིམས་ཞིབ་ཁང་གི་ཁྲིམས་ཞིབ་པ་གཞན་དུ་བདམས་སོང་།

དེ་རིང་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་གཉིས་པའི་ལས་ཉིན་ ༦ པའི་སྔ་དྲོར། བཙན་བྱོལ་བོད་མིའི་བཅའ་ཁྲིམས་ལེའུ་༦ དོན་ཚན་ ༦༣ པའི་ནང་གསེས་ ༡ པོའི་དགོངས་དོན་གཞིར་བཟུང་། སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་ནས་བོད་མིའི་སྒྲིག་འཛུགས་ཆེས་མཐོའི་ཁྲིམས་ཞིབ་ཁང་གི་ཁྲིམས་ཞིབ་པ་གཞན་གཅིག་འོས་འདེམས་ཀྱི་འོས་མི་རུ་དྲིལ་བསྒྲགས་དྲུང་ཆེ་སྣང་ས་ཆོས་སྒྲོན་ལགས་དང་། ཤེས་རིག་དྲུང་ཆེ་ངག་དབང་རབ་རྒྱལ་ལགས་རྣམ་གཉིས་ཀྱི་མཚན་དང་ལོ་རྒྱུས་མདོར་བསྡུས་ཤིག་སྒྲོག་སྦྱངས་གནང་སྟེ་འོས་ཤོག་འཕངས་བ་བརྒྱུད། སྣང་ས་ཆོས་སྒྲོན་ལགས་ལ་འོས་གྲངས་ ༡༨ དང་། ངག་དབང་རབ་རྒྱལ་ལགས་ལ་འོས་གྲངས་ ༢༤ ཐོབ་སྟེ། ངག་དབང་རབ་རྒྱལ་ལགས་ཆེས་མཐོའི་ཁྲིམས་ཞིབ་ཁང་གི་ཁྲིམས་ཞིབ་པ་གཞན་དུ་འོས་འདེམས་གནང་སོང་།

བོད་མིའི་སྒྲིག་འཛུགས་ཀྱི་དྲ་བའི་ཐོག་ཁོང་གི་ལོ་རྒྱུས་བཀོད་པ་ལྟར་ན། ངག་དབང་རབ་རྒྱལ་ལགས་ནི་བོད་ཀྱི་དིང་རི་གླང་འཁོར་ཉེ་འགྲམ་ཞིང་རི་ཞེས་པའི་གྲོང་གསེབ་ཆུང་ཆུང་ཞིག་གི་ནང་འཁྲུངས།    དིང་རི་གླང་འཁོར་ཞེས་པ་དེའི་ནང་སྔོན་ཞི་བྱེད་ཆོས་ལུགས་ཀྱི་སྲོལ་གཏོད་པ་པོ་ ཕ་དམ་པ་སངས་རྒྱས་ཀྱི་བཞུགས་ཁྲི་གནས་ཡོད་པ་དང་།   བོད་ལ་རྒྱ་མིའི་བཙན་འཛུལ་སླེབས་རྗེས་ཁོང་གི་ཕ་མའི་ལྷན་ཕྱི་ལོ་  ༡༩༥༩  ལོར་བལ་ཡུལ་ཤར་ཁུམ་དུ་སྐྱབས་བཅོལ་ལ་འབྱོར།   དེ་རྗེས་ཕྱི་ལོ་  ༡༩༦༤ ལོར་རྒྱ་གར་དུ་གནས་སྤོ་བྱས་ཏེ། ཌལ་ཧོར་བོད་གཞུང་གཏན་སློབ་ཏུ་འཛུལ་ཞུགས་གནང་ནས་ཕྱི་ལོ་ ༡༩༧༤ ལོར་འཛིན་རིམ་བཅུ་གཅིག་སློབ་མཐར་ཕྱིན་པ་དང་། ཕྱི་ལོ་ ༡༩༧༤ ནས་ ༡༩༧༩ བར་ལྡི་ལི་མཐོ་སློབ་ཏུ་སྲིད་དོན་ཚན་རིག་ཐོག་སློབ་སྦྱོང་གནང་ནས་ཉེ་བའི་གཙུག་ལག་རབ་འབྱམས་པ་དང་། གཙུག་ལག་རབ་འབྱམས་པ་གཉིས་ཀྱི་ཕྱག་འཁྱེར་བཞེས།   དེ་རྗེས་ཇེ་ཨེམ་ཨཡེ་(JMI)མཐོ་སློབ་ནས་དགེ་རྒན་འོས་སྦྱོང་གི་ཕྱག་འཁྱེར་ཡང་ཐོབ། ཕྱི་ལོ་ ༡༩༧༩ ལོར་༸གོང་ས་མཆོག་གིས་བཙན་བྱོལ་བོད་མི་གཞོན་སྐྱེས་ཁག་ཅིག་བོད་དུ་དགེ་རྒན་གཏོང་གནང་མཛད་པའི་དགོངས་བཞེས་སྐབས། བོད་དུ་འགྲོ་བར་དང་བླང་དུ་ཐོན་མཁན་བོད་མི་དང་པོའི་གྲས་ཡིན་འདུག

ཕྱི་ལོ་ ༡༩༨༢ ལོར་བོད་གཞུང་གི་ཨུ་རུ་སུའི་སྤྱི་མཐུན་རྒྱལ་ཁབ་(soviet union) ཏུ་བོད་མི་གཞོན་སྐྱེས་གསུམ་སློབ་སྦྱོང་བཏང་ཁོངས་ཀྱི་གཅིག་ཡིན།   ཡུ་ཀན་རན་གྱི་ཀེ་ཝེ་མཐོ་སློབ་ཏུ་(kiev university)ཨུ་རུ་སུའི་སྐད་ཡིག་སྦྱང་ནས་རྒྱལ་སྤྱིའི་འབྲེལ་ལམ་གྱི་ལོ་ རྒྱུས་(history of international relations)ཐོག་འབུམ་རམས་པ་ཡི་ཕྱག་ཁྱེར་བཞེས། ཕྱི་ལོ་ ༡༩༨༧ ནས་ ༡༩༩༢ བར་ལྡི་ལིའི་བོད་གཞུང་སྐུ་ཚབ་དོན་གཅོད་ཁང་དུ་དྲུང་གཞོན་དང་རྒྱལ་སྤྱི་འབྲེལ་ ལམ་གྱི་ལས་རོགས་ཐོག་ཕྱག་ལས་གནང་བ་དང་།  ཕྱི་ལོ་ ༡༩༩༣ ནས་ ༡༩༩༧ བར་ཨུ་རུ་སུ་དང་སོག་པོའི་སྐུ་ཚབ་དོན་གཅོད་ཀྱི་ཕྱག་ལས་གནང་མུས་ཐོག་ར་ཤི་ཡའི་ རྒྱལ་ས་མོ་སུ་ཁོ་(moscow)རུ་ཁོང་གིས་ཕྱི་ལོ་ ༡༩༩༣ ལོར་བཙུགས་པའི་བོད་ཀྱི་རིག་གཞུང་དང་ལོ་རྒྱུས་ལྟེ་གནས་ཁང་(Tibet culture and information centre)གི་འགན་འཛིན་ཡང་གནང་ཡོད།   ཁོང་ནི་ར་ཤི་ཡའི་ནོ་ཝ་སི་ཏི་ཊི་པེ་ཊི་(novasti tibeti) ཞེས་པའི་བོད་ཀྱི་གསར་འགྱུར་གྱི་རྩོམ་སྒྲིག་པ་ཡང་བྱས།  ཕྱི་ལོ་ ༡༩༩༧ ནས་ ༡༩༩༨ བར་དྲུང་འཕར་གྱི་གནས་རིམ་ཐོག་དྷ་རམ་ས་ལར་ཕྱི་དྲིལ་ལས་ཁུངས་སུ་འཛིན་སྐྱོང་འགན་འཛིན་གནང་།
ཕྱི་ལོ་ ༡༩༩༩ ནས་ ༢༠༠༥ བར་ནིའུ་ཡོག་ཏུ་རྟེན་གཞི་བྱས་པའི་བོད་གཞུང་སྐུ་ཚབ་དོན་གཅོད་ཀྱི་ལས་འགན་གནང་བ་དང་། སྐུ་ཚབ་དོན་གཅོད་ཀྱི་ཕྱག་ལས་གནང་མུས་ཐོག་ནིའུ་ཡོག་ཏུ་རྟེན་གཞི་བྱས་པའི་བོད་ཁང་དང་། བོད་ཀྱི་ཐེབས་རྩའི་འགན་འཛིན་ལྷན་ཚོགས་ཀྱི་ཚོགས་གཙོ་ཡིན་པ་མ་ཟད།     peace jam དང་temple of understanding དང་ཚོགས་པ་གཞན་ཁག་གི་ཚོགས་མི་རེད། ཕྱི་ལོ་ ༢༠༠༥  ལོར་ནིའུ་ཡོག་ནས་དྷ་རམ་ས་ལའི་ཕྱི་དྲིལ་ལས་ཁུངས་སུ་གནས་སྤོས་ཀྱི་འཛིན་སྐྱོང་ དྲུང་འཕར་གནང་བ་དང་། ཕྱི་ལོ་ ༢༠༠༨ ནས་ ༢༠༡༥ བར་ར་ཤི་ཡའི་བོད་གཞུང་སྐུ་ཚབ་དོན་གཅོད་ཀྱི་ཕྱག་ལས་གནང་། ཕྱི་ལོ་ ༢༠༡༥ ཟླ་ ༣ ཚེས་ ༡ ནས་བཟུང་ཤེས་རིག་ལས་ཁུངས་ཀྱི་ཤེས་ཡོན་དྲུང་ཆེ་གནང་མུས་ཡིན་འདུག

གསར་འགོད་པ། པདྨ་མཚོ།