དེ་རིང་གྲོས་ཚོགས་ཚོགས་དུས་གཉིས་པ་མཇུག་བསྡོམས་ཐོག་སྲིད་སྐྱོང་མཆོག་གིས་བོད་མིའི་སྒྲིག་འཛུགས་ནས་རྒྱ་གར་གྱི་མི་སེར་ཐོབ་ཐང་ལེན་པར་དགག་བྱ་གནང་གི་མེད་ཀྱང་། རྒྱ་གར་གྱི་མི་སེར་ཐོབ་ཐང་ལེན་མཁན་མང་དུ་ཕྱིན་ན་བོད་མིའི་སྒྲིག་འཛུགས་ནས་སྲིད་བྱུས་གཏན་འབེབས་གནང་དགོས་པ་ཞིག་ཆགས་རྒྱུ་ཡིན་སྐོར་གསུངས་སོང་།
དེ་རིང་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་ ༢ པའི་ལས་ཉིན་མཐའ་མར། ཐེངས་འདིའི་ཚོགས་དུས་ཐོག་གླེང་སློང་བྱུང་བའི་གནད་དོན་གཙོ་བོ་ཁག་ཅིག་གི་ཐོག་སྲིད་སྐྱོང་བློ་བཟང་སེང་གེ་མཆོག་ནས་ལན་འདེབས་གསལ་བཤད་གནང་སོང་བ་དང་། སྐབས་དེར་སྲིད་སྐྱོང་མཆོག་ནས་ད་ལན་གྱི་གྲོས་ཚོགས་ནང་སྤྱི་འཐུས་རྣམ་པས་ཆ་ཤས་ལེན་སྟངས་སྐོར་ལ་དགོངས་ཚུལ་གསུངས་དོན། ཉིན་དགུའི་རིང་སྤྱི་འཐུས་རྣམ་པས་གྲོས་ཚོགས་ནང་ཆ་ཤས་ལེན་སྟངས་དང་། བོད་ནང་གི་གདུང་སེམས་མཉམ་སྐྱེད་ཀྱི་གཞུང་འབྲེལ་གྲོས་ཆོད་གྲོས་འཆར་གྱི་སྒང་ལ་ཆ་ཤས་ལེན་ཡོང་དུས་གཏིང་ཟབ་པོ་དང་དོན་དག་ཡོད་པ། དངོས་གནས་སློབ་གསོ་ལེན་ཆོག་པའི་དགོངས་པ་བྱུང་སོང་ཞེས་ཉིན་དང་པོ་རང་ནས་ཞུས་ཡོད་ལ། དེ་རིང་ཉིན་ ༩ པར་བསྐྱར་དུ་དོ་སྣང་དང་ཚོར་སྣང་ག་རེ་བྱུང་སོང་ཞུས་ན། ད་ལན་གྱི་གྲོས་ཚོགས་ནང་སྤྱི་འཐུས་གསར་པ་ ༢༣ དང་། རྙིང་པ་ ༢༢ ཡོད་ལ། ད་ལན་དངོས་གནས་ཆ་མཚུངས་བ་ཞིག་ཕེབས་འདུག་བསམ་པ་བྱུང་། གཞི་རྩའི་སྐྱབས་གནས་དགེ་འདུན་གྱི་སྡེ་ཞེས་ཆོས་བརྒྱུད་ཁག་གི་སྐུ་ཚབ་ཡོད་པའི་ཐོག བུད་མེད་ཀྱི་སྐུ་ཚབ་ཀྱང་བཅུ་གཅིག་བཅུ་གཉིས་ཤིག་ཕེབས་ཡོད་པ་ལྟར། བུད་མེད་ཀྱི་ནུས་སྟོབས་སྤེལ་བའི་སྐོར་ལ་ད་ལན་ཆ་ཤས་ལེན་མཁན་མང་ཙམ་བྱུང་བ་དེ་ཡར་རྒྱས་ཀྱི་རྣམ་པ་རེད་བསམ་གྱི་འདུག དེ་བཞིན་བོད་ནས་གསར་དུ་འབྱོར་མཁན་ཚོ་ཡིན་ནའང་། གྲོས་ཚོགས་ནང་གསར་འབྱོར་ལ་ཐོབ་ཐང་ཡོད་མེད་སྐོར་ད་ལན་བགྲོ་གླེང་བྱུང་ཡོད་ལ་བྱུང་དགོས་པ་ཞིག་ཀྱང་རེད། གསར་དུ་འབྱོར་མཁན་ཡིན་ནའང་བརྒྱ་ཆ་མཐོན་པོ་ཡིན་པ་དང་། དེའི་ནང་ནས་ཀྱང་ད་ལན་སྐབས་ ༡༥ པའི་བཀའ་ཤག་ནང་ལོ་ ༢༠ ཡི་མཚམས་སུ་གསར་དུ་འབྱོར་མཁན་ཞིག་བཀའ་བློན་དུ་བསྐོ་བཞག་བྱས་ཡོད་པ་དང་། དེའང་བཀའ་ཤག་དང་སྲིད་སྐྱོང་ནས་ལོ་ ༢༠ མཚམས་སུ་བཀའ་ཤག་གི་འཛིན་སྐྱོང་རྩ་ཆེ་ཤོས་འདིའི་ནང་གསར་འབྱོར་གྱི་སྐུ་ཚབ་ཅིག་དགོས་ཀྱི་འདུག་ཅེས་བསམ་བློ་བཏང་སྟེ་བསྐོས་བཞག་པ་ཞིག་ཡིན། དམིགས་བསལ་གྱིས་ད་ལན་དོ་སྣང་ཡག་པོ་ཞིག་ག་རེ་བྱུང་སོང་ཞུས་ན། དེ་སྔོན་གཞིས་ཆགས་སྐོར་ནས་གསུང་ཡོང་དུས། གཞིས་ཆགས་ཁག་ནང་བཞུགས་མཁན་སྤྱི་འཐུས་རེ་གཉིས་ཤིག་ལས་མེད་ཀྱང་། ད་ལན་གཞིས་ཆགས་ཁག་ནང་བརྟན་འཇགས་ཀྱིས་བཞུགས་མཁན་རང་ནས་སྐུ་ཚབ་མི་ཉུང་བ་ཞིག་ཕེབས་ཡོད་སྟབས། གཞིས་ཆགས་སྐོར་གསུངས་སྐབས་ཚོར་བ་ལྡན་པ་གཅིག་པུ་མིན་པར་དངོས་གནས་དོན་དང་ལྡན་པ། ས་གནས་ཀྱི་གནས་སྟངས་མཁྱེན་པའི་ཐོག་ནས་དཔེར་མཚོན་བགྲངས་ཏེ་གསུངས་དུས། ཏན་ཏན་གཞིས་ཆགས་སྲ་བརྟན་གྱི་གཙོས་པའི་ན་གཞོན་དང་བཅས་གཞིས་ཆགས་ནང་བཞུགས་མཁན་ལ་ཕན་ཐོགས་པའི་དགོངས་ཚུལ་གནང་ཐུབ་ས་རེད་བསམ་པའི་ཚོར་བ་ཞིག་བྱུང་སོང་། དེ་བཞིན། ཕྱི་རྒྱལ་ཁག་ནས་སྐུ་ཚབ་ཡོད་པའི་ཐོག་སྤྱི་འཐུས་ནང་དུའང་ཤེས་འཇོན་ལྡན་པ། ཕྱི་རྒྱལ་ཁག་ལ་མང་པོ་ཕེབས་མྱོང་མཁན་མང་དག་ཅིག་ཕེབས་ཡོད་དུས། སྤྱི་ཡོངས་ནས་བོད་ནང་དང་ཕྱི་རྒྱལ། གཞིས་ཆགས། དེ་བཞིན་དྷ་རམ་ས་ལ་བཅས་ཀྱི་གནས་སྟངས་དང་། ཁྲིམས་དང་སྒྲིག་གཞི་གང་ཅིའི་ཐོག་གཏིང་ཟབ་པོ་ཞེ་དྲགས་བྱུང་སོང་། ཞེས་དང་། ཕྱག་རོགས་བཀའ་བློན་རྣམ་པས་ལས་བསྡོམས་སྙན་སྒྲོན་ཞུས་ཏེ་བཀའ་ལན་གསལ་བཤད་ཡག་པོ་གནང་སོང་ཞེས་ཐུགས་རྗེ་ཆེ་ཞུས་པ་དང་སྦྲགས། བཀའ་ཤག་གི་ལས་ཡུན་ལོ་ ༥ རིང་ནུས་པ་མཉམ་དུ་སྤུངས་ཏེ་མུ་མཐུད་ཧུར་ཐག་གནང་དགོས་སྐོར་གསུངས་སོང་།
ཡང་ད་ལན་གྱི་གྲོས་ཚོགས་ནང་རྒྱ་གར་ནང་ཡོད་པའི་བཙན་བྱོལ་བོད་མི་ཚོས་རྒྱ་གར་གྱི་མི་སེར་ཐོབ་ཐང་ལེན་པར་ཕན་གནོད་ཅི་ཡོད་དང་། བཀའ་ཤག་ནས་ཞིབ་འཇུག་བྱས་པའི་ཐོག་ནས་ལམ་སྟོན་གསལ་པོ་ཞིག་གནང་དགོས་སྐོར་སོགས་ཀྱི་དགོངས་ཚུལ་བྱུང་ཡོད་པ་དེའི་ཐད་ལ་སྲིད་སྐྱོང་མཆོག་ནས། དེར་ཞིབ་འཇུག་བྱེད་དགོས་བྱུང་ན་བྱ་རྒྱུ་རེད། ཡིན་ནའང་དེ་སྔོན་བཀའ་ཤག་གི་ངོས་ནས་ཞུས་ཡོད། རྒྱ་གར་གྱི་ཁྲིམས་ནང་ཕྱི་ལོ་ ༡༩༥༠ ནས་ ༡༩༨༧ བར་དུ་རྒྱ་གར་ནང་སྐྱེས་པ་དང་། ཕྱི་ལོ་ ༡༩༨༧ རྗེས་སུ་ཕ་མ་གང་རུང་ཞིག་རྒྱ་གར་གྱི་མི་སེར་ཡིན་ན་བུ་ཕྲུག་རྒྱ་གར་གྱི་མི་སེར་རེད་ཅེས་བཀོད་ཡོད་སྟབས། རྒྱ་གར་གྱི་མི་སེར་ལག་འཁྱེར་ལེན་ཆོག་གི་ཡོད་པ་རེད། བཙན་བྱོལ་དུ་ཡོད་པའི་བོད་པ་ཚོའི་ནང་དུ་ཕྱི་ལོ་ ༡༩༥༠ ནས་ ༡༩༨༧ བར་རྒྱ་གར་ནང་སྐྱེས་པ་མང་པོ་ཡོད་པ་རེད་ལ། ཕྱི་ལོ་ ༡༩༥༠ ནས་ ༡༩༨༧ བར་ཟེར་བ་དེ་བོད་པ་གཅིག་པུ་མ་རེད། དུས་ཡུན་དེའི་བར་དུ་རྒྱ་གར་ནང་སུ་སྐྱེས་པ་ཡིན་ནའང་རྒྱ་གར་གྱི་མི་སེར་རེད་ཅེས་གསུངས་ཡོད་དུས། རྒྱ་གར་གྱི་ཁྲིམས་ནང་མི་སེར་ཞུ་ཆོག་གི་རེད་ཅེས་ཐག་བཅད་ཚར་བ་དེར་བོད་མིའི་སྒྲིག་འཛུགས་གྱི་ངོས་ནས་མི་སེར་ཞུ་ཆོག་གི་མ་རེད་ཅེས་གསུང་ཆོག་གི་མེད་སྟབས། བདེ་སྲུང་ལས་ཁུངས་བརྒྱུད་དེ་རྒྱ་གར་གྱི་མི་སེར་ཞུ་ཡི་ཡིན་ལབ་ན། དགག་བྱ་མེད་པའི་ཡིག་ཆ་འབུལ་གྱི་ཡོད་པ་རེད། ཡིན་ནའང་རྒྱ་གར་གྱི་མི་སེར་ཞུས་ཞེས་ནམ་ཡང་ཞུ་ཡི་ཡོད་པ་མ་རེད་དཱ། མི་སེར་ཞུས་ཞེས་ཞུ་མི་དགོས་དོན་གང་ཡིན་ཟེར་ན། བོད་མིའི་སྒྲིག་འཛུགས་ལ་ལྔ་དང་ལྔ་བཅུའི་ནང་ཆབ་སྲིད་ཀྱི་འགན་ཞིག་ཡོད་པ་རེད། གཙོ་ཆེ་ཤོས་ཀྱི་འགན་དེ་བོད་ནང་གི་བོད་མིའི་བདེ་སྡུག་དང་ཁོང་ཚོའི་མངོན་འདོད་སྒྲུབ་རྒྱུ་དེ་རེད། དེ་དང་མཉམ་དུ་བཙན་བྱོལ་དུ་ཡོད་པའི་རྒྱ་བལ་འབྲུག་གསུམ་ནང་གི་བོད་མི་སྐྱབས་བཅོལ་བ་ཚོའི་བདེ་སྡུག་ལ་གཟིགས་རྒྱུ་དེ་རེད། ཕྱི་ནས་རོགས་དངུལ་གནང་ཡོང་སྐབས་བོད་པ་སྐྱབས་བཅོལ་བ་ཡོད། རོགས་དངུལ་གནང་རོགས་ཞེས་ཞུ་ཡི་ཡོད་པ་རེད། ང་ཚོ་སྐྱབས་བཅོལ་བ་ཡིན་ཞེས་རྒྱ་གར་གཞུང་དང་ཕྱི་རྒྱལ་ནས་རོགས་དངུལ་ཞུས་ཏེ། གཞིས་ཆགས་དང་སློབ་གྲྭ། སྨན་ཁང་སོགས་བཙུགས་པ་དེ་སྐྱབས་བཅོལ་བའི་ཆེད་དུ་ཡིན་ཟེར་གྱི་ཡོད་པ་རེད། ང་ཚོས་རྒྱ་གར་གྱི་མི་སེར་ཡིན་ལབ་ན་རྒྱ་གར་གཞུང་གིས་རོགས་སྐྱོར་གནང་གི་རེད། ཁྱེད་རང་ཚོས་རོགས་དངུལ་ཞུ་དགོས་པ་མི་འདུག་གཱ་ཟེར་གྱི་རེད། བོད་མིའི་སྒྲིག་འཛུགས་ཀྱི་ལྟ་རྟོག་བྱེད་ས་དེ་སྐྱབས་བཅོལ་བ་ཡིན་སྟབས། བོད་མིའི་སྒྲིག་འཛུགས་ནས་རྒྱ་གར་མི་སེར་ཞུས་ཞེས་ནམ་ཡང་ལམ་སྟོན་གནང་ཐུབ་ཀྱི་མེད་སྟབས། དོ་བདག་སོ་སོས་ཐག་གཅོད་དགོས་པ་རེད། གལ་སྲིད་རྒྱ་གར་གྱི་མི་སེར་ལག་འཁྱེར་ཞུས་པ་ཡིན་ན་ཁྲིམས་ཀྱི་ཐོག་ནས་ག་འདྲ་ཆགས་ཀྱི་ཡོད་པ་རེད་ཟེར་ན། འོས་བླུགས་པའི་ལག་འཁྱེར་དེ་བཟོས་པ་ཡིན་ན་རེད། ཕྱི་སྐྱོད་ལག་འཁྱེར་བཟོས་པ་ཡིན་ནའང་རེད། དེ་བཞིན་རྒྱ་གར་མི་སེར་ཞུས་ན་ཨ་རྐྱང་རྐྱང་སྐྱབས་བཅོལ་ལག་འཁྱེར་(R.C)ཡར་བསྡུ་དགོས་ཀྱི་ཡོད་པ་དང་། དེབ་སེར་པོའང་ཡར་བསྡུ་དགོས་ཀྱི་ཡོད་པ་རེད། གང་ཡིན་ཟེར་ན། ང་རྒྱ་གར་ཡིན་ཟེར་གྱི་ཡོད་དུས། རྒྱ་གར་ཡིན་ཚར་རྗེས་ཁྱེད་རང་ལ་བོད་པའི་སྐྱབས་བཅོལ་ལག་འཁྱེར་དགོས་དོན་ཡོད་པ་མ་རེད། བོད་པའི་སྐྱབས་བཅོལ་ལག་འཁྱེར་དེ་ག་རེ་རེད་ཟེར་ན། ཁྱེད་རང་བོད་པ་ཡིན་ཟེར་དུས་རྒྱ་གར་ནང་བསྡད་ཆོག་པར་ཡིག་ཆ་གནང་བ་རེད། ཁྱེད་རང་རྒྱ་གར་ཡིན་ཟེར་དུས་ཡིག་ཆ་དེ་ནུས་མེད་ཕྱིན་ཚར་བ་རེད། དེ་ཐུགས་ལ་ཉར་རོགས་གནང་། ཞེས་དང་། རྒྱ་གར་གྱི་མི་སེར་ཐོབ་ཐང་ཞུས་ན་ཕན་གནོད་ཅི་ཡོད་དོ་བདག་སོ་སོས་གཟིགས་རྒྱུ་རེད་ལ། རྒྱ་གར་གྱི་མི་སེར་ཡིན་ན་ཚོང་ཆེན་པོ་རྒྱག་པ་དང་ཕྱི་རྒྱལ་དུ་འགྲོ་བ། རྒྱ་གར་གཞུང་གི་ནང་ལས་ཀ་རག་པ་བཅས་ལ་སྟབས་བདེ་རུ་འགྲོ་ཡི་ཡོད་ཀྱང་། རྒྱ་གར་གྱི་མི་སེར་ཞུས་པ་དེས་ང་ཚོ་སྐྱབས་བཅོལ་བའི་དཀའ་ངལ་རྣམས་སེལ་མི་ཐུབ་ལ། རྒྱ་གར་མི་སེར་ཆགས་པ་ཡིན་ནའང་རྒྱ་གར་མི་སེར་གྱི་གནས་སྟངས་སྤྱི་མཚུངས་ཀྱི་ཐོག་ནས་འགྲོ་དགོས་པ་རེད་མ་གཏོགས་དམིགས་བསལ་གྱི་ཐོབ་ཐང་ཞེ་དྲགས་ཤིག་རག་རྒྱུ་གང་ཡང་མེད་སྐོར་དང་། རྒྱ་གར་གྱི་མི་སེར་ཞུ་མཁན་མང་དུ་སོང་ན། རྒྱ་གར་མི་སེར་ཆགས་ན་སྐྱབས་བཅོལ་བའི་ཐོབ་ཐང་ལེན་ཆོག་གི་མ་རེད་ཟེར་བའི་སྐད་ཆ་དེ་ཤུགས་ཆེ་རུ་ཕྱིན་ཚེ། སྐབས་དེར་བོད་མིའི་སྒྲིག་འཛུགས་ཀྱི་ལངས་ཕྱོགས་གསལ་པོ་བཟོ་དགོས་པ་ཞིག་ཆགས་རྒྱུ་དང་། མ་འོངས་པར་གྲོས་ཚོགས་ནང་དེའི་སྐོར་སྐད་ཆ་ཡོང་དགོས་ངེས་རེད་ལ། སྲིད་བྱུས་ཀྱང་གཏན་འབེབས་བྱེད་དགོས་པ་ཞིག་དགོངས་ཀྱི་ཡོད་སྐོར་གསུངས་སོང་།
གསར་འགོད་པ། པདྨ་མཚོ།
![Ren Quanniu said the Henan Provincial Justice Department revoked his licence over comments he made in court in a 2018 case [File: Leo Ramirez/ AFP]](https://tibettimes.net/wp-content/uploads/2025/07/Untitled-2-360x180.jpg)
