དེ་རིང་ཕྱི་དྲོའི་བོད་ནང་གི་ཆུ་ཚོད་ ༨།༣༠ ཙམ་ལ། དེ་སྔོན་རྒྱའི་བཙོན་འོག་ཏུ་ཡོད་པའི་བླ་བྲང་དགོན་པའི་གྲྭ་འཇིགས་མེད་རྒྱ་མཚོ་ལགས་བཙོན་གྲོལ་ཐོབ་སྟེ་ཕྱིར་ཡུལ་དུ་ལོག་ཡོད་འདུག
ཨ་ཁུ་འཇིགས་མེད་ཁོང་ ༢༠༡༡ ཟླ་ ༨ ཚེས་ ༢༠ ཉིན། རྒྱ་ནག་གཞུང་གིས་འཛིན་བཟུང་བྱས་པ་ནས་བཟུང་ལོ་གསུམ་རིང་ཁྲིམས་ཆད་མ་བཅད་པར་སྨན་ཁང་སོགས་སུ་གསང་བའི་བཀག་སྡོམ་བྱས་ཡོད་པ་དང་། ༢༠༡༤ ཟླ་ ༨ པའི་ནང་རྒྱལ་ཁབ་ཁ་བྲལ་གྱི་ལས་འགུལ་སྤེལ་བའི་ཉེས་མིང་འོག་ལོ་ ༥ ཁྲིམས་ཐག་བཅད་ཡོད་པ་རེད།
ད་ལོའི་ཕྱི་ཟླ་ ༣ པའི་ཟླ་མགོར་བློ་བུར་དུ་ཁོང་གི་ནང་མིར་ཁ་པར་འབྱོར་ཏེ། ཨ་ཁུ་འཇིགས་མེད་(兰州大厦平监狱医院) ཞེས་པའི་བཙོན་པའི་སྨན་ཁང་དུ་ཁྲིད་ཡོད་པའི་གནས་ཚུལ་ཞིག་འབྱོར་པ་དང་། སྐབས་དེར་ནང་མིས་ཁོང་ལ་ན་ཚ་ཅི་ཡོད་དྲིས་པའི་ལན་དུ་གནས་སྟངས་ཛ་དྲག་མིན་སྐོར་ཙམ་ལས་ན་ཚ་ཅི་ཡིན་གསལ་བཤད་བྱས་མེད།
དེ་རིང་ཕྱི་དྲོར་ཨ་ཁུ་འཇིགས་མེད་ལགས་ཀྱི་དགེ་ཕྲུག་དགེ་འདུན་ཕུན་ཚོགས་ལགས་ཀྱིས་གནས་ཚུལ་བཏང་འབྱོར་བྱུང་བའི་ནང་འདི་ལྟར་འཁོད་འདུག དེ་རིང་མཚན་མོ་བླ་བྲང་ཨ་ཁུ་འཇིགས་མེད་ཀན་སུའུ་ཞིང་ཆེན་ལན་ཀྲོའུ་གྲོང་ཁྱེར་གྱི་ཅན་ཡཱས་(兰州大厦平监狱) ཁྲིམས་ཁང་ནས་དམ་དྲགས་ཆེན་པོའི་འོག་བཙོན་གྲོལ་བྱས་འདུག
སྤྱིར་བཏང་ཁོང་ལ་བཅད་པའི་ལོ་ལྔའི་ཁྲིམས་ཆད་དེ་ནི་ ༢༠༡༦ ཕྱི་ཟླ་ ༨ ཚེས་ ༢༠ ཉིན་ཚང་ཡོད་ནའང་དུས་ལྟར་གློད་གྲོལ་བྱས་མེད་པ་མ་ཟད། ཁྲིམས་ཁང་གིས་བཤད་པ་ལྟར་ན་དེ་རིང་(༢༠༡༦/༡༠/༢༦)ཡང་སྔ་དྲོ་ཆུ་ཚོད་༨:༣༠ སྟེང་བཙོན་ནས་གློད་རྒྱུ་ཡིན་པས་ནང་མི་ཁྲིམས་ཁང་སྒོར་ལེན་དུ་ཡོང་དགོས་ཚུལ་བཤད་ཀྱང་། རྗེས་ནས་གནས་ཚུལ་ལ་འགྱུར་བ་བཏང་སྟེ་རྒྱ་གཞུང་གིས་ཁོང་གི་ནང་མི་སྤུན་མཆེད་སོགས་ལན་ཀྲོའུ་ལ་ཕེབས་བསུར་བཅར་བ་བཀག་སྡོམ་བྱས་པ་དང་། དེ་རིང་ས་རུབ་རྗེས་མིས་མི་མཐོང་ཁྱིས་མི་ཚོར་བའི་སྐབས་དང་བསྟུན་ནས་ཨ་ཁུ་འཇིགས་མེད་ཁོང་གི་ཕ་ཡུལ་ཕུག་སྡེར་བསྐྱལ་འདུག
བཙོན་གྲོལ་སྐབས་པར་དང་བརྙན་ལེན་པ། ཁ་བཏགས་འཐེན་པ་དང་ཁྱབ་བསྒྲགས་བྱེད་པ་སོགས་གཏན་ནས་མི་ཆོག་ཅེས་ཉེན་བརྡ་བཏང་འདུག དེའི་ཐད་ནང་མི་སྤུན་མཆེད་ཚོས་ལོ་མང་རིང་ངོ་ཐུག་མེད་པས་ངེད་བོད་པའི་ལུགས་སྲོལ་ལྟར་དགའ་བསུའི་རྣམ་པ་དང་རྟེན་འབྲེལ་མཚོན་སླད་ཁ་བཏགས་ཤིག་འཐེན་ཆོག་པ་ཞེས་སྙན་ཞུ་ཕུལ་ཡང་། དེའི་ལན་དུ་ཁོང་ཚོས་བཤད་པའི་དོན་ཚན་དེ་དག་ལ་ངོས་ལེན་མ་བྱས་ཚེ་བཙོན་གྲོལ་བྱེད་རྒྱུ་མིན་ཚུལ་གྱི་བཙན་གཏམ་བཤད་འདུག འོན་ཀྱང་། ཨ་ཁུ་འཇིགས་མེད་ཀྱི་ཨ་མ་གཙོས་ནང་མི་དག་གིས་བཙན་བཀའ་དེར་མ་ཉན་པར་ཁ་བཏགས་འཐེན་ཡོད་ནའང་། ཕྱི་མི་རྣམས་དེ་རིང་ཕེབས་བསུར་བཅར་བཅུག་མི་འདུག ཐ་ན་བཙོན་གྲོལ་སྐབས་ཨ་ཁུ་འཇིགས་མེད་ལ་གཟན་ཤམ་གྱོན་མི་ཆོག་པ་དང་། དགོན་པར་ཡང་འགྲོ་མི་ཆོག་པའི་བཙན་བཀའ་བཏང་ཡོད་འདུག
སྤྱིར་བཏང་ཁྲིམས་ཁང་ནང་ངལ་རྩོལ་བའི་ལས་ཀའི་སྐར་མ་བསགས་ནས་བཙོན་འཇུག་གི་དུས་ཡུན་ཉུང་འཕྲི་བྱེད་ལུགས་ཤིག་ཡོད་པ་ལྟར་ལག་ལེན་བྱས་ཚེ། ༢༠༡༥ ཟླ་གཉིས་པའི་ནང་ཙམ་ལ་ཁོང་བཙོན་གྲོལ་བྱེད་དགོས་ནའང་། རྒྱ་གཞུང་གིས་ནག་ཉེས་དོན་ཚན་དགུ་ཅན་ཞིག་བསྟན་ཏེ། འདི་ལ་མཛུབ་ཐེལ་བརྒྱབ་ན་ལག་ལེན་དེ་བྱེད་ཆོག་ཅེས་ཚུལ་མིན་གྱི་བྱ་སྤྱོད་བསྟན་པར། ཨ་ཁུ་འཇིགས་མེད་ཀྱིས་ངས་ནག་ཉེས་དེ་དག་གང་ཡང་བསགས་མེད་པས་དོན་ཚན་དེ་དག་ལ་ངོས་ལེན་གཏན་ནས་བྱེད་ཐབས་མེད་ཚུལ་དང་། ང་ལ་ལོ་ལྔའི་ཁྲིམས་ཆད་འདི་ཡང་དྲང་བདེན་གང་ཡང་མིན་ཞེས་བཤད་དེ་ངོས་ལེན་གནང་མི་འདུག
ཨ་ཁུ་འཇིགས་མེད་ཁོང་ ༢༠༡༡ ལོའི་ཟླ་ ༨ པའི་ཚེས་ ༢༠ ཉིན་འཛིན་བཟུང་བྱས་པ་ནས་བཟུང་ལོ་གསུམ་རིང་ཁྲིམས་ཆད་མ་བཅད་པར་སྨན་ཁང་སོགས་སུ་གསང་བའི་སྒོ་ནས་བཀག་སྡོམ་བྱས་པ་དང་། ༢༠༡༤ ཕྱི་ཟླ་བརྒྱད་པའི་ནང་དངོས་སུ་ལོ་ལྔའི་ཁྲིམས་ཐག་བཅད་ཡོད་པ་རེད། དེ་ནི་ཁོང་བཙོན་འཇུག་བྱེད་ཐེངས་བཞི་བ་དེ་ཡིན། ཞེས་འཁོད་འདུག
སྐུ་ཉིད་བཙོན་ཁང་ནང་ནས་བཙོན་གྲོལ་ཐོབ་པར་ངས་བཀྲ་ཤིས་བདེ་ལེགས་ཞུ། བསམ་དོན་འགྲུབ་པར་སྨོན།