འོས་བསྡུའི་ལས་འགུལ་འདི་ཨ་རིའི་ཕུགས་བསམ་དང་རེ་བ་གལ་ཆེན་ཡིན།

སྤྱི་ལོ་ 2016ལོའི་སྤྱི་ཟླ་ 11པའི་ཚེས 9 ཉིན་གྱི་ཆུ་ཚོད14:30སྟེང་། ས་ཡི་གོ་ལ་རིལ་མོ་འདིའི་སྒང་གི་མང་གཙོ་དང་རང་དབང་གི་རུ་འདྲེན་ལྟ་བུར་གྱུར་བའི་ཨ་མེ་རི་ཀས། འབངས་མི་རེ་རེའི་འདེམས་ཤོག་འཕངས་ཏེ། མ་འོངས་པའི་ལོ་བཞིའི་རིང་གི་དབུ་ཁྲིད་ལ་སྐུ་ཞབས་ཌ་ནོལ་ཐྲུམ་ཕིDanold J.Tump བདམས།
སྐུ་ཞབས་ཌ་ནོལ ཐྲུམ་ཕིDanold J.Tumpནི་ཨ་རིའི་སྤྱི་མཐུན་ཚོགས་པའི་ཚོགས་མི་ཡིན་ལ། 2016ལོའི་ཨ་རིའི་གཙོ་འཛིན་འོས་མིར་གྱུར་བས་ཨ་རིའི་ཕྱུག་པོའི་ནང་སྐད་གྲགས་ཆེ་ཤོས་ཆགས་ཡོད་པ་རེད།
ལོ་འཁོར་བཞི་རེར་རང་གི་དབུ་ཁྲིད་དེ་ཉིད་མི་བུ་སྒེར་བ་རེ་རེས་འདེམས་ཤོག་འཕངས་ཏེ་བདམས་ཆོག་པའི་ལམ་ལུགས་ཏེ། ཨ་རིའི་མང་གཙོའི་ལྟ་གྲུབ་དང་ལག་ལེན་གྱིས་འཛམ་གླིང་ཤར་ནུབ་ན་ཡོད་པའི་མི་མང་པོའི་ཡིད་ཀྱི་སྨོན་པ་འཆོར་གྱིན་ཡོད་ལ། དུས་རབས་ཉེར་གཅིག་པའི་ནང་ལ་ད་དུང་མངོན་ལྐོག་གཉིས་ཀའི་ལམ་ནས་གཉའ་གནོན་དང་བཤུ་བཞོག མཐོང་ཆུང་། ཟུར་བཀར་བྱེད་ཀྱིན་པའི་སྲིད་དབང་སྒེར་གཅོད་ཀྱི་རྒྱལ་ཁབ་དང་ས་ཁུལ་མང་པོ་ཁ་སྐྱེངས་སུ་འཇུག་གིན་ཡོད།
འདིར་ཨ་རིའི་འོས་བསྡུ་ཆེན་མོའི་སྐོར་གྱི་རྩོམ་ཞིག་བཀོད་ཡོད་དེ། རྩོམ་མཁན་ནི་སྤྱི་ཚོགས་འཕྲོད་བསྟེན་དྲ་བའི་གཙོ་སྒྲུབ་པ་ཡིན།
ཨ་རིའི་འོས་བསྡུ་ནི་རྒྱལ་ཁབ་གཞན་གྱི་འོས་བསྡུ་དང་བསྡུར་ན་མི་འདྲ་བ་ཞིག་རེད། རྒྱལ་ཁབ་གཞན་དུ་རྒྱལ་ཁབ་དེའི་ནང་གི་འོས་འཕེན་མཁན་མི་སྤྱིའི་གྲངས་འབོར་ལས་སུ་ལ་འོས་གྲངས་མང་ན་རྒྱལ་ཁ་དེ་ལ་ཐོབ་པ་རེད། ཡིན་ན་ཡང་། ཨ་རིའི་འོས་ཤོག་བརྩི་སྟངས་དེ་འདྲ་ཞིག་མིན།
ཨ་རིར་མངའ་སྡེ་ལྔ་བཅུ་ཐམ་པ་ཡོད། མངའ་སྡེ་ལྔ་བཅུ་ཐམ་པའི་སྤྱི་མཐུན་གྱི་རྩ་ཁྲིམས་དང་། སྲིད་གཞུང་། གྲོས་ཚོགས་ལམ་ལུགས་ཤིག་ཡོད་པ་མ་ཟད། མངའ་སྡེ་ལྔ་བཅུ་ཐམས་པར་རང་རང་གི་མངའ་སྡེའི་ཁྲིམས་ལུགས་གཏན་འབེབ་དང་ལག་བསྟར་བྱེད་དབང་ཡོད།
ཨ་རིའི་ནང་ཆབ་སྲིད་ཤོག་ཁག་ཆེ་ཤོས་གཉིས་ཡོད་པ་ནི་སྤྱི་མཐུན་ཚོགས་པ(Republican Party共和党)དང་། མང་གཙོ་ཚོགས་པ་(Democratic Party/民主党)གཉིས་ཡིན།

སྤྱི་མཐུན་ཚོགས་པ་ནི་དཔལ་འབྱོར་ཐད་ནས་མ་རྩ་རིང་ལུགས་ཏེ། སྲིད་གཞུང་གི་ངོས་ནས་ཁྲལ་བསྡུ་བ་དང་། ཕྱུག་པོ་ཚོར་ཁྲལ་བསྡུ་བ་ཇེ་ཉུང་དུ་གཏོང་རྒྱུ་དང་། ལས་མིའི་ཟླ་ཕོག་སོགས་ལ་སྲིད་གཞུང་གིས་སྟངས་འཛིན་བྱེད་མི་འོས་པར་འདོད།

མང་གཙོ་ཚོགས་པས་སྲིད་གཞུང་གིས་ཁྲལ་བསྡུ་རྒྱུ་དང་། ཕྱུག་པོ་ཚོའི་ལག་ནས་ཁྲལ་མང་ཙམ་བསྡུ་རྒྱུ། ལས་མིའི་ཟླ་ཕོག་འཚོ་བའི་ཆུ་ཚད་དང་མཉམ་པ་ཞིག་ངེས་པར་སྤྲོད་དགོས་པ་དང་། ཚད་གཞི་དེ་སྲིད་གཞུང་གིས་གཏན་འབེབ་བྱེད་འོས་པར་འདོད།

ཀ༽ སྤྱི་ཚོགས་དང་མིའི་རིན་ཐང་ལྟ་ཚུལ།

སྤྱི་མཐུན་ཚོགས་པས་སྐྱེས་བུ་སྒེར་གྱི་ཐོབ་ཐང་དང་ཁྲིམས་ལུགས་ཀྱི་ཁེ་དབང་གཙོ་བོར་འཛིན།

མང་གཙོ་ཚོགས་པས་སྤྱི་ཚོགས་ཀྱི་ཁེ་ཕན་དང་ཀུན་ཁྱབ་སེམས་ཁུར་གཙོ་བོར་འཛིན།

ཁ ༽ སྤྱི་མང་འཕྲོད་བསྟེན་གྱི་ལྟ་ཚུལ།

སྤྱི་མཐུན་ཚོགས་པས་ཁེ་ལས་སྡེ་ཁག་གིས་འཕྲོད་བསྟེན་ཉེན་འགོག་གི་ལས་ཀ་སྒྲུབ་ཆོག་པ་དང་། མི་སྒེར་གྱི་འཕྲོད་བསྟེན་ཉེན་འགོག་སོགས་རང་ངོས་ནས་མཁོ་སྒྲུབ་བྱེད་དགོས་པར་འདོད།

མང་གཙོ་ཚོགས་པས་སྲིད་གཞུང་གིས་མི་མང་གི་འཕྲོད་བསྟེན་ཉེན་སྲུང་འགན་ལེན་དང་། འཕྲོད་བསྟེན་ཉེན་འགོག་འདི་སྤྱི་མང་གི་ཐོབ་ཐང་དུ་བརྩི་དགོས་པར་འདོད།

ག ༽ དམག་དང་གོ་མཚོན་གྱི་ལྟ་ཚུལ།

སྤྱི་མཐུན་ཚོགས་པས་དམག་དཔུང་དང་གོ་མཚོན་གཞི་རྒྱ་ཇེ་ཆེར་གཏོང་དགོས་པར་འདོད།

མང་གཙོ་ཚོགས་པས་དམག་དཔུང་དང་གོ་ལག་ཉུང་འཕྲི་བྱེད་དགོས་པར་འདོད།

གཞི་རྩའི་ལྟ་ཚུལ་མི་མཐུན་པའི་ཆབ་སྲིད་ཤོག་ཁག་ཆེ་ཤོས་འདི་གཉིས་ཀྱིས་རང་རང་གི་ལྟ་བ་དང་། ལངས་ཕྱོགས། འཆར་འགོད་སོགས་བསྒྲགས་ནས་མི་མང་གི་འོས་ཤོག་ཐོབ་ཐབས་བྱེད་པ་དང་། མི་མང་གི་ངོས་ནས་ཀྱང་རང་རང་གི་ཁེ་ཕན་ལ་དཔག་པས་ཤོག་ཁག་སོ་སོའི་འོས་མིར་རྒྱབ་སྐྱོར་དང་ཡང་ན་དགག་པ་བྱེད་པ་རེད།
འོས་བསྡུའི་སྐབས་སུ། མངའ་སྡེ་རེ་རེར་གཙུག་ལག་འོས་གྲངས་（College Electoral Vote 学院选举人票）ཟེར་བའི་འོས་གྲངས་ཀྱི་ཐོབ་ཐང་ཞིག་ཡོད། གཙུག་ལག་འོས་གྲངས་ཁྱོན་སྡོམ་538 ཡོད་པ་དེ་མངའ་སྡེ་ལྔ་བཅུར་མངའ་སྡེ་སོ་སོའི་མིའི་གྲངས་འབོར་ལྟར་བགོ་འགྲེམ་བྱས་ཡོད།
ཨ་རིའི་མི་འབོར་ས་ཡ་སུམ་བརྒྱ་ལྷག་ཡོད་པ་རྣམས་དུས་ནམ་ཡིན་ཡང་མངའ་སྡེ་ལྔ་བཅུ་ནང་ནས་གང་དུའང་འགྲོ་སྐྱོད་དང་གནས་སྡོད་བྱེད་ཆོག་པས། མངའ་སྡེ་སོ་སོའི་མི་འབོར་ལ་འགྱུར་བ་ཐེབས་བཞིན་ཡོད། དེ་བས། ལོ་བཅུ་རེའི་མཚམས་སུ་མངའ་སྡེ་སོ་སོའི་མི་འབོར་རྩིས་ཞིབ་ཀྱིས་མངའ་སྡེའི་གཙུག་ལག་འོས་གྲངས་ཀྱི་ཐོབ་ཐང་ཐག་གཅོད་བྱེད། ཁེ་ལི་ཧྥོར་ནི་ཡཱ་མངའ་སྡེ་ལྟ་བུར་མཚོན་ན་གཙུག་ལག་འོས་གྲངས་50 ཡི་ཐོབ་ཐང་ཡོད་ལ། ཀྲེག་སེསི་མངའ་སྡེ་ལ་38. ནིའུ་ཡོག་མངའ་སྡེ་ལ་29. མངའ་སྡེ་རེ་ཟུང་ལ་གཙུག་ལག་འོས་གྲངས་3 ལས་མེད་པའང་ཡོད།
སྲིད་འཛིན་གྱི་འོས་ཐོབ་པ་ལ། འོས་མི་དེར་གཙུག་ལག་འོས་གྲངས538 ནས་ 270 ཐོབ་དགོས། ཁེ་ལི་ཧྥོར་ནི་ཡཱ་མངའ་སྡེ་ལྟ་བུ་དཔེ་རུ་བཀོད་ནས་བཤད་ན། མིག་སྔར་མངའ་སྡེ་དེར་མི་འབོར་ས་ཡ་སུམ་ཅུ་སོ་དགུ་ཙམ་ཡོད། མངའ་སྡེ་འདིའི་ནང་དུ་སྤྱི་མཐུན་ཚོགས་པ་དང་། མང་གཙོ་ཚོགས་པ་གཉིས་ཀྱི་ཁྱབ་ཁོངས་སུ་ཐོ་འགོད་བྱས་པའི་མི་ཡོད། འོས་བསྡུའི་ཉིན། དཔེར་ན། མངའ་སྡེ་འདི་ནས་མི་གྲངས་བརྒྱ་ཐམས་པ་འོས་ཤོག་འཕངས་ཡོད་པ་དང་། མི་བརྒྱ་ལས་49 ཡིས་སྤྱི་མཐུན་ཚོགས་པར་འོས་འཕེན་པ་དང་། 51 གིས་མང་གཙོ་ཚོགས་པར་འོས་འཕེན་ཡོད་ཚེ། མངའ་སྡེ་འདིའི་གཙུག་ལག་འོས་གྲངས་50 ཆ་ཚང་མང་གཙོ་ཚོགས་པར་ཐོབ་པ་རེད།
མངའ་སྡེ་ཁ་ཤས་ལས་གཙུག་ལག་འོས་གྲངས་ཀྱི་ཐོབ་ཐང50 དང་། ཁ་ཤས་ལ་3 ལས་མེད་པའི་རྒྱུ་མཚན་གྱིས། རྒྱལ་ཡོངས་ཀྱི་མི་སྒེར་འོས་གྲངས་མཐོ་ཤོས་ཐོབ་མཁན་གྱི་འོས་མི་ལ། གཙུག་ལག་འོས་མ་ཚང་བར་སྲིད་འཛིན་གྱི་རྒྱལ་ཁ་མི་ཐོབ་པའང་ཡོད། དཔེར་ན། ཁེ་ལི་ཧྤོར་ནི་ཡཱ་མངའ་སྡེ་ལ་གཙུག་ལག་འོས་གྲངས་50 ཡོད། གལ་སྲིད་མངའ་སྡེ་ལ་སྤྱིའི་ཆ་ནས་མི་གྲངས་ས་ཡ་39 ཡོད་པ་ལས་དངོས་སུ་འོས་འཕེན་མཁན་ས་ཡ་གཅིག་གིས་མ་གཏོགས་མ་བྱུང་ནའང་། མངའ་སྡེ་འདིའི་འོས་འཕེན་ས་ཡ་གཅིག་ནས་མང་ཤོས་ཐོབ་མཁན་གྱི་འོས་མི་དེར་གཙུག་ལག་འོས་གྲངས་50 ཐོབ་པ་རེད། ཨེ་རིས་མཛོ་ནཱ་མངའ་སྡེ་ལྟ་བུར་མཚོན་ན་སྤྱིའི་ཆ་ནས་མི་གྲངས་ས་ཡ་7 མ་ཟིན་ཙམ་ཡོད། མངའ་སྡེ་འདིར་གཙུག་ལག་འོས་གྲངས་10 ཡི་ཐོབ་ཐང་ཡོད། སྤྱིའི་མི་གྲངས་ས་ཡ6.8 ཙམ་ནས་མི་གྲངས་ས་ཡ་ 5 ཙམ་ནས་འོས་འཕེན་ནའང་། འོས་གྲངས་མང་ཤོས་ཐོབ་མཁན་གྱི་འོས་མི་དེར་གཙུག་ལག་འོས་གྲངས་10 ལས་མི་ཐོབ། དེ་བས། སྐབས་རེར་སྤྱིའི་འོས་གྲངས་མང་ཤོས་ཐོབ་ཀྱང་གཙུག་ལག་འོས་གྲངས་ཀྱིས་མ་འདང་བར་འོས་ཤོར་བ་ཡོང་གི་ཡོད།
སྤྱི་ལོ་2016 ལོའི་སྔོན་འགྲོའི་འོས་བསྡུའི་སྐབས། ཨ་རིའི་མི་འབོར་སྤྱིའི་བརྒྱ་ཆ་18% ཙམ་གྱིས་མ་གཏོགས་འོས་འཕེན་མེད་པས། ཨ་རིའི་ལོ་རྒྱུས་ཁྲོད་ཀྱི་མི་མང་གིས་ཆེས་མི་དགའ་སའི་སྤྱི་མཐུན་ཚོགས་པའི་འོས་མི་ཌ་ནོལ ཐྲུམ་ཕི་དང་། མང་གཙོ་ཚོགས་པའི་འོས་མི་ཧིས་ལཱ་རིས་ཁིལེན་ཊོན་གཉིས་སྲིད་འཛིན་འོས་མིར་ཐོབ་པ་རེད།
ཆབ་སྲིད་དབྱེ་ཞིབ་པ་ཚོས་བཤད་པ་ལྟར་ན། འདས་པའི་སྲིད་འཛིན་འོས་མི་ཚོས་འོས་བསྡུའི་སྐབས་མི་མང་ལ་ཁས་ལེན་བྱས་པའི་བྱ་བཞག་ཁག་ལས། འོས་ཤོག་ཐོབ་མཁན་ཚོས་ཁས་ལེན་བརྒྱ་ཆ་བདུན་ཅུ་ནས་བརྒྱད་ཅུ་བར་ཇི་བཞིན་བསྒྲུབས་ཡོད་པར་བཤད་དོ།།