གོ་ལ་ཁྱོན་ཡོངས་སུ་མི་རིགས་རིང་ལུགས་ཀྱི་འདུ་ཤེས་ཤུགས་ཆེ་རུ་འགྲོ་བཞིན་ཡོད་ཀྱང་བོད་པ་ཚོས་དབུ་མའི་ལམ་རྩོད་བཞིན་ཡོད་སྟབས་ཁེ་ན་ཌའི་གཞུང་གིས་བོད་པའི་འགྲོ་བ་མིའི་ཐོབ་ཐང་ཐོག་རྒྱབ་སྐྱོར་གནང་རོགས་ཟེར།
ཁེ་ན་ཌའི་གོ་ལའི་ཆ་འཕྲིན་(theglobeandmail) ཞེས་པའི་གསར་ཁང་གི་བཅར་འདྲིའི་ལན་དུ་ཁ་སང་སྲིད་སྐྱོང་བློ་བཟང་སེང་གེ་མཆོག་ནས་བརྗོད་དོན། ཕྱི་ལོ་དགུ་བཅུ་གོ་གྲངས་དང་བསྡུར་ན། དེང་སྐབས་གོ་ལ་ཁྱོན་ཡོངས་སུ་རྒྱལ་སྤྱི་རིང་ལུགས་དང་གུ་ཡངས་རིང་ལུགས་ཉམས་རྒུད་དུ་ཕྱིན་ཏེ་མི་རིགས་རིང་ལུགས་དང་མཐར་ལྷུང་རིང་ལུགས་ཤུགས་ཆེ་རུ་འཕེལ་བཞིན་པ་མཐོང་ཐུབ་སྟེ། དཔེར་ན། ཉེ་ཆར་དབྱིན་ཇི་ཡུ་རོབ་མཐུན་ཚོགས་ཀྱི་སྒྲིག་ཁོངས་ནས་ཕྱིར་བུད་པ་དང་སྐུ་ཞབས་ཊི་རུམ་ཕི་མཆོག་ལ་ཨ་རིའི་སྲིད་འཛིན་ལ་རྒྱལ་ཁ་ཐོབ་པ་གཅིག་པུ་ཙམ་མིན་པར། ཧྥེ་ལེ་ཕེན་གྱི་སྲིད་འཛིན་དང་ཉི་ཧོང་གི་སྲིད་བློན། དེ་བཞིན། ཨེ་སི་རིལ་བཅས་ནས་ཀྱང་གསལ་བོར་རྟོགས་ཐུབ་པ་དང་། དེ་ནི་གོ་ལ་ཁྱོན་ཡོངས་ཀྱི་འཕེལ་འགྱུར་ཞིག་ཡིན་ནའང་། འགྲོ་བ་མིའི་ཐོབ་ཐང་དང་གཞི་རྩའི་རང་དབང་གི་ཐད་ནས་བོད་མི་ཚོས་རྒྱལ་སྤྱི་རིང་ལུགས་དང་གུ་ཡངས་རིང་ལུགས་ཀྱི་ལངས་ཕྱོགས་བཟུང་ཡོད། ཨ་རིའི་གཞུང་ནས་དབུ་མའི་ལམ་གྱི་སྲིད་ཇུས་ལ་རྒྱབ་སྐྱོར་གནང་གི་ཡོད་པ་ལྟར། ཁེ་ན་ཌའི་གཞུང་ནས་ཀྱང་དབུ་མའི་ལམ་གྱི་སྲིད་ཇུས་ཐོག་རྒྱབ་སྐྱོར་གནང་བ་ཡིན་ན། དེ་ལ་རྗེས་སུ་ཡི་རངས་ཡོད། ཁེ་ན་ཌའི་གཞུང་ནས་ཁེ་ན་ཌ་ཤར་བརྒྱུད་ (Quebec) ཞིང་ཆེན་ནང་གི་གྲངས་ཉུང་མི་རིགས་ཀྱི་དཀའ་རྙོག་སེལ་བའི་ཉམས་མྱོང་གཞིར་བཟུང་ཐོག་རྒྱ་ནག་གཞུང་དང་མཉམ་དུ་བོད་དོན་གླེང་སློང་བྱ་ཐུབ་ངེས་རེད་བསམ་གྱི་འདུག ཕྱི་ལོ་ ༢༠༡༣ ལོ་ནས་ད་ལྟའི་བར་ཁེ་ན་ཌའི་གཞུང་གིས་བོད་མི་སྐྱབས་བཅོལ་བ་ ༩༠༠ ཁེ་ན་ཌར་གནས་སྤོར་དུ་བླངས་ཡོད་པ་དང་། ཁྱོན་འཆར་ལོའི་ཕྱི་ཟླ་དང་པོའི་ཟླ་མཇུག་ནང་བོད་མི་སྐྱབས་བཅོལ་བ་ ༡༠༠༠ ཁེ་ན་ཌར་གནས་སྤོར་དུ་ལེན་པའི་མཐུན་འགྱུར་གནང་བཞིན་ཡོད་པ་ལྟར། འབྱུར་འགྱུར་ཡང་དེ་ལྟའི་རོགས་སྐྱོར་མུ་མཐུད་ཡོང་བའི་ཐུགས་རེ་བཅང་ཡོད། ཅེས་སོགས་གསུངས་ཡོད་འདུག
ཁེ་ན་ཌའི་ཕྱི་སྲིད་ལྷན་ཁང་གི་མགྲིན་ཚབ་པ་ལྕམ་ཆན་ཊལ་གྷ་ནོན་ (Chantal Gagnon) ཟེར་བ་ཞིག་གིས། ང་ཚོའི་གཞུང་ངོས་ནས་ཁ་ཞེ་གཉིས་མེད་ཐོག་མུ་མཐུད་རྒྱ་ནག་གཞུང་དང་ལྷན་དུ་བོད་དོན་ཚུད་པའི་རྒྱ་ནག་ནང་གི་གྲངས་ཉུང་མི་རིགས་ཚོའི་འགྲོ་བ་མིའི་ཐོབ་ཐང་དང་ཁྲིམས་ཀྱི་དབང་སྒྱུར་སྐོར་གྲོས་མོལ་བྱ་རྒྱུན་ཡིན་ལ། དེ་སྔོན་ཡང་ང་ཚོས་རྒྱ་ནག་གཞུང་ལ་བོད་རྒྱ་གཉིས་ཐུན་མོང་གི་དཀའ་རྙོག་སེལ་ཐབས་གཞིར་བཟུང་ནས་རྒྱ་ནག་གཞུང་དང་༧གོང་ས་ཏཱ་ལའི་བླ་མའམ་ཁོང་གི་སྐུ་ཚབ་བར་མིང་དོན་མཚུངས་པའི་འབྲེལ་མོལ་ཡོང་དགོས་པའི་ཞུ་འབོད་ཞུས་ཡོད། ཅེས་བརྗོད་འདུག
གཞན། རོའུ་ཊར་གསར་ཁང་གིས་སྤེལ་བའི་གནས་ཚུལ་ཞིག་གི་ནང་། དེང་སྐབས་རྒྱ་ནག་དང་ཁེ་ན་ཌ་གཉིས་བར་དཔལ་འབྱོར་འབྲེལ་ལམ་ཡར་རྒྱས་གཏོང་ཐབས་སུ་འབད་བརྩོན་བྱེད་བཞིན་ཡོད་སྟབས། ད་ལན་སྲིད་སྐྱོང་བློ་བཟང་སེང་གེ་མཆོག་ཁེ་ན་ཌའི་ནང་ཕྱོགས་བསྐྱོད་བྱས་པ་དེས་རྒྱ་ནག་གི་དབང་འཛིན་དཔོན་རིགས་ཚོར་སེམས་འཁྲལ་བསླངས་ཡོད་པ་མ་ཟད། ད་དུང་ཁེ་ན་ཌའི་སྲིད་བློན་ཊ་རུ་ཌུ་མཆོག་ལའང་དེ་མཚུངས་ཀྱི་སེམས་འཁྲལ་བསླངས་ཡོད་སྐོར་བརྗོད་འདུག
ཁེ་ན་ཌར་ཡོད་པའི་རྒྱ་ནག་གཞུང་ཚབ་ཁང་གིས་གསལ་བསྒྲགས་ཤིག་སྤེལ་བའི་ནང་། བོད་ཀྱི་ལས་དོན་དེ་རྒྱ་ནག་ནང་ཁུལ་གྱི་ལས་དོན་ཞིག་ཡིན་སྟབས། རྒྱ་ནག་གཞུང་ཕྱོགས་ནས་ཕྱིའི་རྒྱལ་ཁབ་ཁག་གིས་དེ་ལ་བྱུས་གཏོགས་བྱེད་དུ་འཇུག་གི་མིན་ཞེས་འཁོད་ཡོད་འདུག
གསར་འགོད་པ། པདྨ་རྒྱལ།
༅༅། སྲིད་སྐྱོང་མཆོག་ལ་བཀྲིས་བདེ་ལེགས་ཞུ་བ་དང་སྦྲགས་ཀེ་ནཌའི་གཞུང་གི་གྲོས་ཚོགས་ནང་གསུང་བཤད་
དཔེ་མི་སྲིད་པའི་ཡག་པོ་གནང་སོང་། ཐུགས་རྗེ་ཆེ་ཞུ་གི་ཡོད།
ཁྱེད་བོད་ཀྱི་བུ། ཁྱོད་བོད་ཀྱི་ཆབ་སྲིད་དབུ་འཁྲིད། ཁྱེད་བོད་གངས་ཅན་ལྗོངས་ཀྱི་མགྲིན་ཚབ་པ།
ཁྱེད་ཀྱི་མཛད་འཕྲིན་རྒྱས་པའི་སྨོན་ལམ་འདེསབས།