ཀིརྟི་དགོན་གྱི་གྲྭ་བློ་བཟང་བསོད་ནམས་ལགས་ལ་ལོ་ ༦ བཙོན་འཇུག་ཁྲིམས་ཐག་བཅད་དེ་མེན་ཡང་བཙོན་ཁང་དུ་བཅུག་ཡོད་འདུག
བཞུགས་སྒར་ཀིརྟིའི་བྱེས་པ་གྲྭ་ཚང་གི་བོད་གནས་འབྲེལ་མཐུད་པ་བློ་བཟང་ཡེ་ཤེས་ལགས་དང་ཀ་ཉག་ཚེ་རིང་ལགས་གཉིས་ཀྱིས་གནས་ཚུལ་མཁོ་གཏོང་གནང་བ་ལྟར་ན། ད་ལོའི་ཕྱི་ཟླ་༡༡ ཚེས་༩ ཉིན་རྔ་བ་ཀིརྟི་དགོན་པའི་རང་ལོ་ ༢༣ ཡིན་པའི་གྲྭ་བློ་བཟང་བསོད་ནམས་ལགས་ལ་ཁྲོ་ཆུ་རྫོང་ནས་ལོ་༦ གི་བཙོན་འཇུག་ཁྲིམས་ཐག་བཅད་དེ། དེང་སྐབས་མེན་ཡང་བཙོན་ཁང་དུ་ཡོད་ཀྱང་། རྗེས་སུ་བརྡ་ལན་བྱུང་བ་ཙམ་ལས་དུས་ཐོག་ལ་གནས་ཚུལ་གཅིག་ཀྱང་ཤེས་རྟོགས་ཐུབ་མེད་པ་དང་། ལོ་སྔོན་མའི་ཕྱི་ཟླ་༩ ཚེས་༡༡ ཉིན་རྔ་བ་རྫོང་ཉེན་རྟོག་པས་རྔ་བ་རྫོང་མཁར་ནས་འཛིན་བཟུང་བཀག་ཉར་བྱས་ཡོད་ཀྱང་། དེ་ནས་བཟུང་གར་ཡོད་ཅི་བྱུང་གི་གནས་ཚུལ་གཅིག་ཀྱང་གོ་ཐོས་བྱུང་མེད་པ་རེད།གནས་ཚུལ་ཡོང་ཁུངས་ནས་བརྗོད་ན་དྲ་ལམ་དུ་བོད་དོན་དང་འབྲེལ་བའི་ཡི་གེ་དང་པར་སོགས་སྐུར་བ་དང་། ཁྱབ་བསྒྲགས་བྱས་པའི་དོགས་གཞིའི་འོག་འཛིན་བཟུང་བྱས་པ་ཞིག་ཡིན་འདུག
ཁོང་ནི་རྔ་བ་རྫོང་རོང་མཁར་སར་ཡུལ་ཚོའི་རུ་ཆེན་གཉིས་པའི་ཕ་སྐལ་བཟང་དང་། མ་ཚེ་རིང་སྒྲོལ་མ་གཉིས་ཀྱི་བུ་ཡིན་ཞིང་། མིང་སྲིང་བཞིའི་ཆེ་ཤོས་ཡིན་པ་དང་། ཆུང་ཆུང་སྐབས་ནས་རྔ་བ་ཀིརྟི་དགོན་པར་གྲྭ་པ་བྱས་ཡོད་འདུག
གསར་འགོད་པ། པདྨ་མཚོ།
