བོད་མི་ཞིག་གིས་ཁོ་རང་གི་ཕྱི་སྐྱོད་ལག་འཁྱེར་ཐོག་ནས་བལ་ཡུལ་མི་སེར་ཡིན་པའི་གྷུ་རུན་ཟེར་བ་ཞིག་ཨ་རིར་གཏོང་རྩིས་བྱེད་སྐབས་ལྡི་ལི་རྒྱལ་སྤྱིའི་གནམ་ཐང་གི་འཛིན་བྱང་ཞིབ་བཤེར་བས་ཤེས་ཏེ་འཛིན་བཟུང་བྱས་ཡོད་འདུག
རྒྱ་གར་ཧིན་རྡུ་དུས་བབ་ཐོག་གནས་ཚུལ་ཐོན་པར། བལ་ཡུལ་གྱི་མི་སེར་ཡིན་པའི་ར་ཇིན་ཌི་ར་གྷུ་རུན་ (Rajendra Gurung)ཟེར་བ་ཞིག་གིས་བོད་མི་པད་མ་དབང་རྒྱལ་ (Wangyal Pema)ཟེར་བ་ཞིག་ལ་ཧིན་སྒོར་འབུམ་ ༤༠ སྤྲད་དེ། པད་མ་དབང་རྒྱལ་གྱི་ཕྱི་སྐྱོད་ལག་འཁྱེར་གྱི་ཐོག་ནས་ཨ་རིར་འགྲོ་རྩིས་བྱས་ཡོད་པ་དང་། ཁ་སང་ཕྱི་ཚེས་ ༡༨ ཉིན་བལ་ཡུལ་མི་ཟེར་ཡིན་པ་གྷུ་རུན་གྱིས་རྒྱ་གར་གྲོང་ཁྱེར་མུམ་བྷེ་ (Mumbai) ལ་འགྲོ་བའི་གནམ་གྲུའི་འཛིན་བྱང་ཉོས་པ་དང་། པདྨ་རྒྱལ་དབང་རྒྱལ་ཕྱིར་ཨ་རིར་འགྲོ་བའི་གནམ་གྲུའི་འཛིན་བྱང་ཉོས་ཏེ། ཁོང་གཉིས་གནམ་ཐང་གི་འཛིན་བྱང་ཞིབ་བཤེར་འགག་སྒོའི་ནང་ལོགས་སུ་བསླེབས་རྗེས། ཁོང་གཉིས་གནམ་ཐང་ནང་ལོགས་ཀྱི་གསང་སྤྱོད་ནང་སོང་སྟེ། ཕན་ཚུན་གྱི་གནམ་གྲུའི་འཛིན་བྱང་བརྗེས་བོ་བརྒྱབ་སྟེ་པད་མ་དབང་རྒྱལ་རྒྱ་གར་གྲོང་ཁྱེར་མུམ་བྷེར་འགྲོ་བའི་གནམ་གྲུར་བསྡད་པ་དང་། གྷུ་རུན་ཨ་རིར་འགྲོ་བའི་གནམ་གྲུར་སྡོད་སྐབས། གནམ་གྲུའི་ནང་གི་འཛིན་བྱང་ཞིབ་བཤེར་བས་གྷུ་རུན་གྱི་འཛིན་བྱང་ལ་ཞིབ་བཤེར་སྐབས་དོགས་གཞི་བྱུང་སྟེ་ཁོ་རྒྱ་གར་དབུས་ཉེན་རྟོག་ཁང་ལ་རྩིས་སྤྲོད་བྱས་ཡོད་འདུག
ཉེན་རྟོག་པའི་འདྲི་རྩད་སྐབས། གྷན་རུན་གྱིས་ཁོ་རང་བལ་ཡུལ་གྱི་མི་སེར་ཡིན་པ་དང་། ཁོའི་དངོས་མིང་ལ་ར་ཇིན་ཌི་ར་གྷུ་རུན་ (Rajendra Gurung) ཟེར་བ་དང་། པད་མ་དབང་རྒྱལ་དང་ཁོ་གཉིས་ཧ་ཅང་འདྲ་བོ་ཡོད་སྟབས། བདེ་འཇགས་ཞིབ་བཤེར་བས་ཤེས་རྒྱུ་མ་རེད་བསམ་ནས་ཕན་ཚུན་གྱི་གནམ་གྲུའི་འཛིན་བྱང་བརྗེས་ཏེ་ཁོ་རང་ཨ་རིར་འགྲོ་རྩིས་བྱས་པ་ཡིན་སྐོར་སོགས་བརྗོད་འདུག
ཉེན་རྟོག་ཕྱོགས་ནས། གྷུ་རུན་དང་པད་མ་དབང་རྒྱལ་གཉིས་གནམ་ཐང་གི་འཛིན་བྱང་ཞིབ་བཤེར་འགག་སྒོའི་ནང་དུ་བསླེབས་རྗེས། ཟུར་གྱི་གསང་སྤྱོད་ཁང་ནང་སོང་སྟེ་ཕན་ཚུན་གྱི་གནམ་གྲུའི་འཛིན་བྱང་བརྗེ་བཞིན་པ་གསང་སྤྱོད་ནང་གི་བརྙན་ལེན་འཕྲུལ་ཆས་ལས་ཤེས་རྟོགས་བྱུང་བ་དང་། གྷི་རིན་བཀག་སྐྱིལ་གྱིས་རྩད་ཞིབ་བྱས་པར་ཁོ་རང་སྔོན་མ་ནས་སྐྱབས་བཅོལ་བའི་མིང་ཐོག་ནས་ཨ་རིར་འགྲོ་འཆར་ཡོད་པ་ལྟར། ཁོས་པད་མ་དབང་རྒྱལ་ལ་ཧིན་སྒོར་འབུམ་ ༤༠ སྤྲད་དེ། དབང་རྒྱལ་གྱི་ཕྱི་སྤྱོད་ལག་འཁྱེར་ཐོག་ནས་ཨ་རིར་འགྲོ་རྩིས་བྱས་ཡོད་པ་དང་། ད་ཆར་ཁོང་གཉིས་ཀ་འཛིན་བཟུང་བྱས་ཏེ་རྩད་ཞིབ་བྱེད་བཞིན་ཡོད་ཀྱང་། དབང་རྒྱལ་གྱིས་རྒྱ་གར་སྐད་ཤེས་ཀྱི་མེད་སྟབས། ད་ཆར་སྐད་སྒྱུར་བ་ཞིག་འཚོལ་བཞིན་ཡོད་ལུགས་སོགས་བརྗོད་འདུག
ཞིབ་འཇུག་བྱས་པ་ལྟར་ན། པད་མ་དབང་རྒྱལ་དང་བལ་ཡུལ་མི་སེར་ཡིན་པའི་གྷུ་རུན་གཉིས་རྒྱལ་ས་ལྡི་ལིའི་རྒྱལ་སྤྱིའི་གནམ་ཐང་གི་ཉེ་འགྲམ་གྱི་མ་ཧེ་པལ་པུར་ (Mahipalpur) གྲོང་རྡལ་གྱི་གསོལ་མགྲོན་ཁང་ཞིག་ནས་འབྲེལ་བ་བྱས་ཡོད་པ་དང་། ཁོང་གཉིས་ཀྱི་གདོང་པ་ཧ་ཅང་འདྲ་བོ་ཡོད་པར་བརྟེན། གྷུ་རུན་གྱིས་པད་མ་དབང་རྒྱལ་ལ་ཧིན་སྒོར་འབུམ་ ༤༠ སྤྲད་དེ། ཁོ་པད་མ་དབང་རྒྱལ་གྱི་ཕྱི་སྐྱོད་ལག་འཁྱེར་གྱི་ཐོག་ནས་ཨ་རིར་འགྲོ་རྒྱུ་བྱས་ཡོད་འདུག
པད་མ་དབང་རྒྱལ་ནི་ཨ་རིར་སྡོད་པའི་བོད་མི་སྐྱབས་བཅོལ་ཞིག་ཡིན་པ་དང་། ཟླ་གཅིག་གི་སྔོན་ལ་ཁོ་ཨ་རི་ནས་རྒྱ་གར་ལ་ཡོང་ཡོད་འདུག
གསར་འགོད་པ། པདྨ་རྒྱལ།
ཨ་ཁ། ད་བོད་པའི་སྤུས་ཚད་སྟོན་གྱི་འདུག
བྱེད་རྒྱུ་འབེལ་ན་ཡོང་རྒྱུར་མང་ཞེས་པའི་དཔེ་ལྟར་རེད།དངུལ་ལ་དགའ་ཆེས་དྲག་ན་ཡོང་རྒྱུ་དེ་རེད།ཤེས་སོང་ངམ།